UBawo Uphilisa Ngezandla zikaPetros
Indoda ecelacela esangweni letempile ibithwalwa apho imihla yonke yobomi bayo. UPetros akanasilivere nagolide, endaweni yoko uyibamba ngesandla, yaza indoda yangena ihamba, intinga. Kwisihlwele esikhwankqisiweyo uPetros ugxininisa ukuba la mandla asingawakhe kodwa ngakaBawo wethu.
3 1UPetros noYohane babesenyuka besiya etempileni malunga nentsimbi yesithathu emva kwemini, ilixa lokuthandaza. 2Kwaye kwakukho indoda eyayisisiqhwala kwasekuzalweni kwayo, ithwalwe ibekwe imihla ngemihla esangweni letempile elibizwa ngokuba liliHle, ukuze iceliceli kwabo bangenayo etempileni. 3Yathi yakubona uPetros noYohane seza kungena etempileni, yacela imali kubo. 4UPetros wayijonga nkqu enoYohane, wathi: “Sijonge.” 5Yathi ntsho amehlo, ilindele ukwamkela into kubo. 6Wathi uPetros: “Andinasilivere nagolide, kodwa endinako ndikunika kona: egameni likaYesu Krestu waseNazarete, vuka uhambe.” 7Wayibamba ngesandla sokunene, wayiphakamisa; kwathi kwaoko zomelela iinyawo zayo namaxhwele. 8Yantinga, yema, yaqala ukuhamba, yangena nabo etempileni, ihamba, intinga, idumisa uBawo wethu. 9Bayibona bonke abantu ihamba, idumisa uBawo wethu; 10bayiphawula ukuba yiyo laa ndoda ebihlala icelacela esangweni leliHle letempile, bazaliswa kukumangaliswa nakukuthi nqa kuko oko kwakwenzeke kuyo.
UPetros Uvakalisa UMkhonzi kaBawo wethu
11Yathi isabambelele kuPetros noYohane, bonke abantu bagidima kubo evarandeni ebizwa ngokuba yekaSolomon, bethe manga kunene. 12Wathi uPetros akukubona oku, wathi kubo abantu: “Madoda akwaSirayeli, kungani na ukuba nimangaliswe koku? Kungani na ukuba nisithi ntsho amehlo, ngokungathi ngawethu amandla okanye ngobuthixo bethu simenze wahamba lo mntu? 13UThixo ka-Abraham, noIsake, noYakobi, uThixo woobawo bethu, umzukisile uMkhonzi wakhe uYesu, lowo nina namnikela namkhanyela phambi koPilato, xa yena uPilato egqibe kwelokuba amkhulule. 14Kodwa nina nakhanyela oyiNgcwele noLilungisa, nacela ukuba kunikwa nina umbulali; 15nambulala uMenzi wobomi, lowo uBawo wethu wamvusayo kwabafileyo. Kuko oko singamangqina thina. 16Igama lakhe, ngokholo egameni lakhe, lenze yomelela le ndoda niyibonayo niyazi; kwaye ukholo olukuYesu lumnike le mpilo iphelele phambi kwenu nonke.
17“Ke kaloku, bazalwana, ndiyazi ukuba nenza ngokungazi, njengoko benjenjalo nabalawuli benu. 18Kodwa uBawo wethu ukuzalisekisile oko wakuxela ngenxa engaphambili ngabo bonke abaprofeti: ukuba uKrestu wakhe uya kuva ubunzima. 19Guqukani ngoko, nibuye, ukuze zicinywe izono zenu, 20ukuze kufike amaxesha okuhlaziyeka evela ebusweni bukaBawo wethu, aze athuma uKrestu enimiselweyo, uYesu, 21lowo amazulu afanele ukumamkela ade afike amaxesha okubuyiselwa kwezinto zonke, awathetha ngazo uBawo wethu ngomlomo wabaprofeti bakhe abangcwele kwasephakadeni. 22UMoses wathi: ‘UBawo wenu uya kunivelisela umprofeti onjengam, ephuma kubazalwana benu. Nize nimphulaphule kuko konke anixelela kona. 23Kothi wonke umntu ongaphulaphuliyo loo mprofeti, atshatyalaliswe kuphele phakathi kwabantu.’ 24Nabo bonke abaprofeti abathethayo, bethabathela kuSamuweli nabalandelayo, bazixela nabo ezi mihla. 25Nina ningoonyana babaprofeti nabomnqophiso awawenzayo uBawo wethu kooyihlo, ethi kuAbraham: ‘Ngembewu yakho zonke iintsapho zehlabathi ziya kusikelelwa.’ 26UBawo wethu, emvusile uMkhonzi wakhe, wamthuma kuni kuqala, ukuba anisikelele ngokumbuyisa elowo kuni ebubini bakhe.”
