അപ്പോസ്തോലന്മാരുടെ പ്രവൃത്തികൾ 3 FHB Father's Heart Bible™

3 ¹പത്രോസും യോഹന്നാനും, ഉച്ചതിരിഞ്ഞ് ഏകദേശം മൂന്നുമണിക്ക്, പ്രാർഥനാസമയത്ത്, ദൈവാലയത്തിലേക്കു കയറിപ്പോകുകയായിരുന്നു. ²ജന്മനാ മുടന്തനായ ഒരു മനുഷ്യനെ, ദൈവാലയത്തിൽ പ്രവേശിക്കുന്നവരോടു ഭിക്ഷ യാചിക്കേണ്ടതിന്, സുന്ദരം എന്നു വിളിക്കപ്പെട്ട ദൈവാലയവാതിൽക്കൽ ദിവസവും ചുമന്നുകൊണ്ടുവന്നു വെച്ചിരുന്നു. ³ദൈവാലയത്തിലേക്കു കടക്കാൻ ഭാവിച്ച പത്രോസിനെയും യോഹന്നാനെയും കണ്ടിട്ട്, അവൻ അവരോടു പണം യാചിച്ചു. ⁴പത്രോസ് യോഹന്നാനോടൊപ്പം അവനെ ഉറ്റുനോക്കി, “ഞങ്ങളെ നോക്കുക” എന്നു പറഞ്ഞു. ⁵അവരിൽനിന്ന് എന്തെങ്കിലും ലഭിക്കുമെന്നു പ്രതീക്ഷിച്ച് അവൻ അവരെ ശ്രദ്ധയോടെ നോക്കി. ⁶പത്രോസ് പറഞ്ഞു: “വെള്ളിയും പൊന്നും എനിക്കില്ല; എന്നാൽ എനിക്കുള്ളതു ഞാൻ നിനക്കു തരുന്നു: നസറായനായ യേശുക്രിസ്തുവിന്റെ നാമത്തിൽ, എഴുന്നേറ്റു നടക്കുക.” ⁷അവന്റെ വലങ്കൈ പിടിച്ച് അവനെ എഴുന്നേല്പിച്ചു; ഉടനെ അവന്റെ പാദങ്ങളും നെരിയാണികളും ബലപ്പെട്ടു. ⁸അവൻ കുതിച്ചെഴുന്നേറ്റു നിന്നു, നടന്നുതുടങ്ങി, നടന്നും കുതിച്ചുചാടിയും നമ്മുടെ പിതാവിനെ സ്തുതിച്ചുംകൊണ്ട് അവരോടൊപ്പം ദൈവാലയത്തിൽ പ്രവേശിച്ചു. ⁹അവൻ നടക്കുന്നതും നമ്മുടെ പിതാവിനെ സ്തുതിക്കുന്നതും ജനമെല്ലാം കണ്ടു. ¹⁰ദൈവാലയത്തിന്റെ സുന്ദരവാതിൽക്കൽ ഭിക്ഷ യാചിച്ചുകൊണ്ടിരുന്നവൻ ഇവൻതന്നെ എന്ന് അവർ തിരിച്ചറിഞ്ഞു; അവനു സംഭവിച്ചതിൽ അവർ വിസ്മയവും അതിശയവും നിറഞ്ഞവരായി.

പിതാവിന്റെ ദാസനെ പത്രോസ് പ്രഘോഷിക്കുന്നു

¹¹അവൻ പത്രോസിനെയും യോഹന്നാനെയും മുറുകെപ്പിടിച്ചിരിക്കെ, ജനമെല്ലാം അത്യന്തം വിസ്മയിച്ച് ശലോമോന്റേത് എന്നു വിളിക്കപ്പെട്ട മണ്ഡപത്തിൽ അവരുടെ അടുക്കലേക്ക് ഓടിക്കൂടി. ¹²ഇതു കണ്ടിട്ട് പത്രോസ് ജനത്തോടു പറഞ്ഞു: “ഇസ്രായേല്യരേ, ഇതിൽ നിങ്ങൾ വിസ്മയിക്കുന്നതെന്ത്? ഞങ്ങളുടെ സ്വന്തശക്തിയാലോ ദൈവഭക്തിയാലോ ഇവനെ നടക്കുമാറാക്കിയെന്നപോലെ നിങ്ങൾ ഞങ്ങളെ തുറിച്ചുനോക്കുന്നതെന്ത്? ¹³അബ്രാഹാമിന്റെയും യിസ്ഹാക്കിന്റെയും യാക്കോബിന്റെയും ദൈവം, നമ്മുടെ പിതാക്കന്മാരുടെ ദൈവം, തന്റെ ദാസനായ യേശുവിനെ മഹത്ത്വപ്പെടുത്തി; അവനെ വിട്ടയയ്ക്കാൻ പീലാത്തോസ് തീരുമാനിച്ചിട്ടും, നിങ്ങൾ അവനെ ഏല്പിച്ചുകൊടുക്കുകയും പീലാത്തോസിന്റെ മുമ്പിൽ തള്ളിപ്പറയുകയും ചെയ്തു. ¹⁴എന്നാൽ നിങ്ങൾ പരിശുദ്ധനും നീതിമാനുമായവനെ തള്ളിപ്പറഞ്ഞ്, ഒരു കൊലപാതകിയെ നിങ്ങൾക്കു വിട്ടുതരണമെന്നു ചോദിച്ചു. ¹⁵ജീവന്റെ നാഥനെ നിങ്ങൾ കൊന്നു; എന്നാൽ നമ്മുടെ പിതാവ് അവിടുത്തെ മരിച്ചവരിൽനിന്ന് ഉയിർപ്പിച്ചു. ഇതിന് ഞങ്ങൾ സാക്ഷികളാകുന്നു. ¹⁶അവിടുത്തെ നാമത്തിലുള്ള വിശ്വാസത്താൽ, അവിടുത്തെ നാമം ഈ മനുഷ്യനെ ബലപ്പെടുത്തിയിരിക്കുന്നു—നിങ്ങൾ കാണുകയും അറിയുകയും ചെയ്യുന്ന ഈ മനുഷ്യനെത്തന്നെ. യേശുവിലുള്ള വിശ്വാസമത്രേ നിങ്ങളുടെ കൺമുമ്പിൽത്തന്നെ ഇവന് ഈ പൂർണസൗഖ്യം നല്കിയത്.

¹⁷“ഇപ്പോൾ, സഹോദരന്മാരേ, നിങ്ങളുടെ അധികാരികൾ ചെയ്തതുപോലെ നിങ്ങളും അറിവില്ലായ്മയാൽ പ്രവർത്തിച്ചു എന്നു ഞാൻ അറിയുന്നു. ¹⁸എന്നാൽ, തന്റെ ക്രിസ്തു കഷ്ടം അനുഭവിക്കുമെന്ന് സകല പ്രവാചകന്മാരിലൂടെയും മുൻകൂട്ടി അരുളിച്ചെയ്തത് നമ്മുടെ പിതാവ് ഇങ്ങനെ നിവർത്തിച്ചു. ¹⁹ആകയാൽ, നിങ്ങളുടെ പാപങ്ങൾ മായിച്ചുകളയപ്പെടേണ്ടതിന്, അനുതപിച്ച് മടങ്ങിവരുവിൻ, ²⁰നമ്മുടെ പിതാവിന്റെ സന്നിധിയിൽനിന്ന് ഉന്മേഷകാലങ്ങൾ വരേണ്ടതിനും, നിങ്ങൾക്കായി നിയമിക്കപ്പെട്ട ക്രിസ്തുവായ യേശുവിനെ അവിടുന്ന് അയയ്ക്കേണ്ടതിനുംതന്നെ. ²¹സകലവും യഥാസ്ഥാനപ്പെടുത്തപ്പെടുന്നതുവരെ അവിടുത്തെ സ്വർഗം സ്വീകരിക്കേണ്ടിയിരിക്കുന്നു; ഇതിനെക്കുറിച്ച് പുരാതനകാലംമുതൽ നമ്മുടെ പിതാവ് തന്റെ വിശുദ്ധപ്രവാചകന്മാരിലൂടെ അരുളിച്ചെയ്തിരിക്കുന്നു. ²²മോശ പറഞ്ഞു: ‘നിങ്ങളുടെ പിതാവ് നിങ്ങൾക്കായി നിങ്ങളുടെ സഹോദരന്മാരിൽനിന്ന് എന്നെപ്പോലെ ഒരു പ്രവാചകനെ എഴുന്നേല്പിക്കും. അവൻ നിങ്ങളോടു പറയുന്ന സകലകാര്യത്തിലും അവനെ ശ്രദ്ധിച്ചുകേൾക്കുവിൻ.’ ²³ആ പ്രവാചകനെ ശ്രദ്ധിച്ചുകേൾക്കാത്ത ഏതൊരുവനും ജനത്തിന്റെ ഇടയിൽനിന്ന് നിശ്ശേഷം ഛേദിച്ചുകളയപ്പെടും.’ ²⁴ശമുവേൽ മുതൽ സംസാരിച്ച പ്രവാചകന്മാരെല്ലാവരും ഈ നാളുകളെക്കുറിച്ചും മുൻകൂട്ടി അറിയിച്ചു. ²⁵നിങ്ങൾ പ്രവാചകന്മാരുടെയും, നമ്മുടെ പിതാവ് നിങ്ങളുടെ പിതാക്കന്മാരോടു ചെയ്ത ഉടമ്പടിയുടെയും മക്കളാകുന്നു; ‘നിന്റെ സന്തതിയിലൂടെ ഭൂമിയിലെ സകല കുടുംബങ്ങളും അനുഗ്രഹിക്കപ്പെടും’ എന്ന് അവിടുന്ന് അബ്രാഹാമിനോട് അരുളിച്ചെയ്തു. ²⁶നമ്മുടെ പിതാവ് തന്റെ ദാസനെ എഴുന്നേല്പിച്ച്, നിങ്ങളിൽ ഓരോരുത്തനെയും അവനവന്റെ ദുഷ്ടതയിൽനിന്നു തിരിക്കുന്നതിനാൽ നിങ്ങളെ അനുഗ്രഹിക്കേണ്ടതിന്, ആദ്യം നിങ്ങളുടെ അടുക്കലേക്ക് അവിടുത്തെ അയച്ചു.”