Pitri Peter laga hath pora manuh ke bhal kori diye

Mondir laga duar te bhikh mangi thaka ekjon manuh ke tar jibon bhor protidin otu jaga te uthai anise. Peter logote poisa nai, kintu tar haath dhorise, aru manuh to jopi-jopi kene bhitor te jaise. Asurit hoi thaka manuh khan ke Peter pora joor di kene koise etu takot tai laga nohoi, amar Pitri laga ase.

Adhyay 3.

Peter aru John dinte tinta baje, prathana kora somoi te, mondir te jai thakise. Jonom pora lengra thaka ekjon manuh ke, mondir te gusa manuh khan pora bhik mangibole, hodai Sundor mata mondir laga duar te uthai anikene rakhidise. Peter aru John mondir te gusibole thaka dikhi kene, tai tarkhan pora poisa mangise. Aru Peter pora, John logote tar ke bhal kori sai kene, koise, “Amikhan ke sabi.” Aru tai tarkhan pora kiba pabo bhabikene, tarkhan ke bhal kori saise. Peter pora koise, “Moi logote chandi ba suna nai, kintu moi logote ki ase eitu moi tumi ke di ase: Nazareth laga Jisu Khrista laga nam te, uthibi aru berabi.” Tar laga dyna hath dhori kene, tai tar ke uthai dise; etiya-e tar laga theng aru theng laga gath khan takot hoise. Tai uthi kene khara hoise, berabole shuru korise, aru bera kene, uthi kene, aru amar Pitri ke stuti kori kene, tarkhan logote mondir te gusise. Aru sob manuh khan tai berai thaka aru amar Pitri ke stuti kori thaka dikhise. Tarkhan tai ke mondir laga Sundor Duar te bohi kene bhik manga manuh ase koi kene chinise, aru tar logote ki hoise eitu dikhi kene bisi asurit aru chukit hoise.

Peter pora Pitri laga noukar laga prachar kore

Tai Peter aru John ke dhori thaka homoi te, sob manuh khan bisi asurit hoi kene Solomon laga baranda koi mata jagate tarkhan logote polai ahise. Eitu dikhi kene, Peter pora manuh khan ke koise, “Israel laga manuh khan, kile eitu tumikhan ke asurit kori ase? Amikhan nijor takot ba bhokti pora tai ke berabole dise nisena, kile amikhan ke bhal kori sai ase? Abraham, Isaac, aru Jacob laga Isor, amar baba khan laga Isor pora, Tar laga noukar Jisu ke mohima dise; junke tumikhan hopi dise, aru jitia Pilate pora tai ke chari dibole bhabise, tumikhan Pilate laga age te tai ke asikar korise. Kintu tumikhan Pobitro aru Dhormik Jon ke asikar korise, aru ekjon manuh morai diya manuh ke tumikhan ke dibole mangise. Tumikhan jivon laga Malik ke morai dise; kintu amar Pitri pora tai ke mora pora jinda kori dise. Eitu laga amikhan sakhi ase. Tar laga nam, aru tar nam te biswas kora pora, etu manuh ke takot kori dise—juntu manuh ke tumikhan dikhi ase aru jane. Aru Jisu te biswas kora pora, tumikhan laga suku age te tai ke etu pura changai dise.

Aru etiya, bhai khan, moi jane tumikhan najani kene korise, tumikhan laga raja khan bhi eneka korise. Kintu Tar laga Khrista dukh pabo koikena, sob bhabobadi khan laga mukh pora age te koi diya kotha, amar Pitri pora pura kori dise. Etu nimite, mon ghurabi, aru wapas ahibi, titia tumikhan laga paap khan mitai dibo, titia amar Pitri laga usor pora aram kora somoi khan ahibo, aru Tai tumikhan nimite basi rakha Khrista, Jisu ke pathai dibo, junke, sob jinis thik kori nadia tak, sorgo pora grohon koribo lage; juntu laga kotha amar Pitri pora bahut age te Tar pobitro bhabobadi khan laga mukh pora koise. Moses pora koise, ‘Tumar Pitri pora tumikhan nimite, tumikhan laga bhai khan majot pora, moi nisena ekjon bhabobadi uthai dibo. Tai tumikhan ke ki kobo, sob te tai laga kotha huni bi.’ Jun manuh etu bhabobadi laga kotha nahuni bo, taike manuh khan majot pora pura khotom kori dibo.’ Samuel pora shuru kori kene kotha kowa sob bhabobadi khan bhi, etu din khan laga kotha koise. Tumikhan bhabobadi khan laga santan khan ase, aru amar Pitri pora tumikhan laga baba khan logote bonua vachan laga bhi, jitia Tai Abraham ke koise, ‘Tumar bongso pora prithibi laga sob poribar khan asirbad pabo.’ Amar Pitri pora Tar laga noukar ke uthai kene, tumikhan majot pora sob manuh ke tumikhan laga biya kaam pora ghurai kene asirbad dibole, poila tumikhan logote tai ke pathai dise.”