ሐዋርያት ሥራ 3

3 ¹ጴጥሮስና ዮሐንስ የጸሎት ሰዓት በሆነው ከቀኑ ዘጠኝ ሰዓት ገደማ ወደ ቤተ መቅደስ ይወጡ ነበር። ²ከእናቱ ማኅፀን ጀምሮ አንካሳ የሆነ አንድ ሰው፣ ወደ ቤተ መቅደስ ከሚገቡት ሰዎች ይለምን ዘንድ፣ ውብ በሚባለው የቤተ መቅደስ ደጅ ዘወትር ተሸክመው ያስቀምጡት ነበር። ³ጴጥሮስና ዮሐንስ ወደ ቤተ መቅደስ ሊገቡ ሲሉ አይቶ፣ ገንዘብ ለመናቸው። ⁴ጴጥሮስም ከዮሐንስ ጋራ ትኵር ብሎ እየተመለከተው፣ “ወደ እኛ ተመልከት” አለው። ⁵እርሱም አንዳች ከእነርሱ እንደሚቀበል ተስፋ አድርጎ፣ ትኵር ብሎ ተመለከታቸው። ⁶ጴጥሮስ ግን፣ “ብርም ሆነ ወርቅ የለኝም፤ ነገር ግን ያለኝን እሰጥሃለሁ፤ በናዝሬቱ በኢየሱስ ክርስቶስ ስም ተነሥተህ ተመላለስ” አለው። ⁷ቀኝ እጁንም ይዞ አስነሣው፤ ወዲያውም እግሮቹና ቍርጭምጭሚቶቹ ጸኑ። ⁸ብድግ ብሎም ቆመ፤ መመላለስም ጀመረ፤ እየተመላለሰና እየዘለለ አባታችንን እያመሰገነ ከእነርሱ ጋራ ወደ ቤተ መቅደስ ገባ። ⁹ሕዝቡም ሁሉ ሲመላለስና አባታችንን ሲያመሰግን አዩት። ¹⁰ውብ በሚባለው የቤተ መቅደስ ደጅ ተቀምጦ ይለምን የነበረው ለማኝ እርሱ መሆኑን አወቁ፤ በደረሰለትም ነገር እጅግ ተደነቁ፤ በመገረምም ተሞሉ።

ጴጥሮስ የአብን ባሪያ ያውጃል

¹¹እርሱም ጴጥሮስንና ዮሐንስን ይዞ ሳለ፣ ሕዝቡ ሁሉ እጅግ እየተገረሙ የሰሎሞን ደጀ ሰላም በሚባለው ስፍራ ወደ እነርሱ ሮጡ። ¹²ጴጥሮስም ይህን አይቶ ሕዝቡን እንዲህ አላቸው፤ “የእስራኤል ሰዎች ሆይ፣ ይህ ለምን ያስደንቃችኋል? በራሳችን ኀይል ወይም እግዚአብሔርን በመምሰል ይህን ሰው እንዳስመላለስነው አድርጋችሁ ለምን ትኵር ብላችሁ ታዩናላችሁ? ¹³የአብርሃም፣ የይስሐቅና የያዕቆብ አምላክ፣ የአባቶቻችን አምላክ፣ ባሪያውን ኢየሱስን አከበረ፤ እናንተ ግን አሳልፋችሁ ሰጣችሁት፤ ጲላጦስም ሊፈታው በወሰነ ጊዜ፣ በእርሱ ፊት ካዳችሁት። ¹⁴እናንተ ግን ቅዱሱንና ጻድቁን ካዳችሁ፤ ነፍሰ ገዳዩም እንዲሰጣችሁ ለመናችሁ። ¹⁵የሕይወትን ራስ ገደላችሁ፤ አባታችን ግን ከሙታን አስነሣው፤ እኛም ለዚህ ምስክሮች ነን። ¹⁶በስሙ በማመን በኩል ስሙ ይህን ሰው አጠነከረው፤ ይኸውም እናንተ የምታዩትና የምታውቁት ሰው ነው። በኢየሱስ ማመንም ይህን ፍጹም ጤና በሁላችሁ ፊት ሰጠው።

¹⁷“አሁንም፣ ወንድሞች ሆይ፣ እናንተ እንደ አለቆቻችሁ ባለማወቅ እንዳደረጋችሁት ዐውቃለሁ። ¹⁸አባታችን ግን በነቢያት ሁሉ አፍ አስቀድሞ የተናገረውን፣ ክርስቶሱ መከራ እንደሚቀበል፣ እንዲሁ ፈጸመ። ¹⁹እንግዲህ ኀጢአታችሁ ይደመሰስ ዘንድ ንስሓ ግቡ፤ ተመለሱም፤ ²⁰የመጽናናት ዘመን ከአባታችን ፊት ይመጣ ዘንድ፤ ለእናንተም የተመረጠውን ክርስቶስን፣ ኢየሱስን፣ ይልክላችሁ ዘንድ፤ ²¹አባታችን ከጥንት ጀምሮ በቅዱሳን ነቢያቱ አፍ እንደ ተናገረው፣ ሁሉ ነገር እስኪታደስበት ዘመን ድረስ ሰማይ ሊቀበለው ይገባል። ²²ሙሴ እንዲህ ብሏልና፤ ‘አባታችሁ ከወንድሞቻችሁ መካከል እንደ እኔ ያለ ነቢይ ያስነሣላችኋል፤ እርሱ የሚነግራችሁን ሁሉ ስሙት።’ ²³‘ያን ነቢይ የማይሰማ ማንም ሰው ከሕዝቡ መካከል ፈጽሞ ይጠፋል።’ ²⁴ከሳሙኤል ጀምሮ የተናገሩት ነቢያት ሁሉ ደግሞ እነዚህን ቀኖች አወጁ። ²⁵እናንተ የነቢያት ልጆች ናችሁ፤ አባታችን ከአባቶቻችሁ ጋራ የገባውም የኪዳን ልጆች ናችሁ፤ አብርሃምንም፣ ‘በዘርህ የምድር ወገኖች ሁሉ ይባረካሉ’ ብሎታል። ²⁶አባታችን ባሪያውን አስነሥቶ፣ እያንዳንዳችሁን ከክፋታችሁ በመመለስ ይባርካችሁ ዘንድ፣ አስቀድሞ ወደ እናንተ ላከው።”