Me basika na mukanda
Dibuku

Tata Ke Belusa na Maboko ya Pyele

Bakala mosi yina vwandaka lomba makabu na kyelo ya Yinzo ya Nzambi, ba vwandaka nata yandi kuna konso kilumbu ya luzingu ya yandi. Pyele vwandaka ve na mbongo, kasi yandi bakaka diboko ya yandi, mpe bakala yina kotaka na kutambula mpe na kudumuka. Na bantu yina yitukaka, Pyele tubaka ngolo ti ngolo yina kele ya yandi mosi ve kasi ya Tata ya beto.

Kapu 3.

Pyele na Yowane vwandaka kwenda na Yinzo ya Nzambi pene-pene na ngunga ya tatu ya nkokila, ngunga ya lusambulu. Bakala mosi ya vwandaka kikata kubanda na lubutuku ya yandi, ba vwandaka nata yandi mpe tula yandi konso kilumbu na kyelo ya Yinzo ya Nzambi, kyelo yina nkumbu na yawu «Kitoko», samu na kulomba makabu na bantu yina vwandaka kota na Yinzo ya Nzambi. Ntangu yandi talaka Pyele na Yowane yina vwandaka zola kota na Yinzo ya Nzambi, yandi lombaka bawu mbongo. Pyele, na kutala yandi ngolo kintwadi na Yowane, tubaka: «Tala beto.» Yandi tulaka dikebi ya yandi na bawu, na kuvingila na kuzwa kima mosi na maboko ya bawu. Pyele tubaka: «Mu kele ve na palata to wolo, kasi mu ke pesa nge kima yina mu kele na yawu: na Nkumbu ya Yesu-Klisto ya Nazaleti, telama mpe tambula.» Na kubaka diboko ya yandi ya lubakala, yandi telamisaka yandi na zulu; kaka na ntangu yina, makulu ya yandi na mabaku ya yandi kumaka ngolo. Na kudumuka, yandi telamaka, yandi bandaka na kutambula, mpe yandi kotaka na Yinzo ya Nzambi kintwadi na bawu, na kutambula, na kudumuka, mpe na kukembila Tata ya beto. Mpe bantu nyonso talaka yandi na kutambula mpe na kukembila Tata ya beto. Bawu zabaka yandi ti yandi vwandaka muntu yina vwandaka lomba makabu, yina vwandaka vwanda na Kyelo ya Kitoko ya Yinzo ya Nzambi, mpe bawu fulukaka na kuyituka mpe na kupamuka samu na mambu yina salamaka na yandi.

Pyele Ke Samuna Kisadi ya Tata

Ntangu yandi vwandaka simba Pyele na Yowane, bantu nyonso bakaka mbangu na kukwiza na bawu na Musampa yina nkumbu na yawu Salomoni, na kuyituka mingi. Ntangu Pyele talaka dyambu yina, yandi tubaka na bantu: «Beno bantu ya Isayeli, samu na yinki beno ke yituka na dyambu yayi? Samu na yinki beno ke tala beto ngolo, bonso nde na ngolo ya beto mosi to na mutindu beto ke zitisaka Nzambi, beto salaka ti yandi tambula? Nzambi ya Abalayami, ya Izaki, mpe ya Yakobi, Nzambi ya batata ya beto, kembisaka kisadi ya yandi Yesu, yina beno yekulaka mpe mangaka na ntwala ya Pilati, ntangu Pilati bakaka lukanu ya kubika yandi kwenda. Kasi beno mangaka Muntu ya Longo mpe ya Kudedama, mpe beno lombaka ti ba pesa beno muntu yina ke fwaka bantu. Beno fwaka Muntu yina ke pesaka luzingu; kasi Tata ya beto vumbulaka yandi na lufwa. Beto kele bambangi ya dyambu yayi. Nkumbu ya yandi, na nzila ya lukwikilu na Nkumbu ya yandi, me kumisa muntu yayi ngolo—muntu yina mpenza beno ke tala mpe ke zaba. Mpe lukwikilu na Yesu me pesa yandi mavimpi yayi ya mbote na meso ya beno nyonso.

«Mpe ntangu yayi, bampangi, mu zaba ti beno salaka yawu na kuzaba ve, mutindu mosi mpe bamfumu ya beno salaka. Kasi Tata ya beto lungisaka mambu yina yandi tubaka na ntwala na yinwa ya mimbikudi nyonso: ti Klisto ya yandi ke tala mpasi. Na yina, beno soba nkadulu ya beno, mpe beno vutuka, samu ti ba katula masumu ya beno, samu ti bantangu ya kupema kukwiza katuka na ntwala ya Tata ya beto, mpe samu ti yandi kufidisa Klisto yina ba soolaka samu na beno, Yesu, yina zulu fwana kuyamba tii ntangu bima nyonso ke vutuka na kisika ya yawu, mambu yina Tata ya beto zonzaka na yinwa ya mimbikudi ya longo ya yandi kukatuka ntama. Moyize tubaka: “Tata ya beno ke telemisa samu na beno mumbikudi mutindu munu, na kati ya bampangi ya beno. Beno wila yandi na mambu nyonso yina yandi ke zabisa beno. Konso muntu yina ke wila mumbikudi yina ve, ba ke manisa yandi na kufwa, mpe ba ke katula yandi na kati ya bantu.” Mimbikudi nyonso yina zonzaka, kubanda na Samwele mpe na manima, bawu mpe samunaka bilumbu yayi. Beno kele bana ya mimbikudi mpe ya ngwisani yina Tata ya beto salaka na batata ya beno, na kuzabisa Abalayami: “Makanda nyonso ya ntoto ke baka lusakumunu na nzila ya bana ya nge.” Tata ya beto telamisaka kisadi ya yandi mpe fidisaka yandi na beno ntete, samu na kusakumuna beno na kubalula konso muntu na kati ya beno na mambu ya yimbi ya yandi.»