Ìṣe àwọn Aposteli 3

3 ¹Peteru àti Johanu ń gòkè lọ sí tẹ́mpìlì ní nǹkan bí aago mẹ́ta ọ̀sán, wákàtí àdúrà. ²Wọ́n a máa gbé ọkùnrin kan tí ó yarọ láti ìgbà ìbí rẹ̀ wá, wọ́n a sì gbé e kalẹ̀ lójoojúmọ́ ní ẹnu-ọ̀nà tẹ́mpìlì tí à ń pè ní Dáradára, kí ó lè máa ṣagbe lọ́wọ́ àwọn tí ń wọ inú tẹ́mpìlì. ³Nígbà tí ó rí Peteru àti Johanu tí wọ́n fẹ́ wọ inú tẹ́mpìlì, ó béèrè owó lọ́wọ́ wọn. ⁴Peteru sì tẹjúmọ́ ọn pẹ̀lú Johanu, ó wí pé, “Wo wá.” ⁵Ó sì tẹjúmọ́ wọn, ní rírò pé òun yóò rí nǹkan gbà lọ́wọ́ wọn. ⁶Peteru wí pé, “Èmi kò ní fàdákà tàbí wúrà, ṣùgbọ́n ohun tí mo ní ni mo fi fún ọ: ní orúkọ Jesu Kristi ti Nasareti, dìde kí o sì máa rìn.” ⁷Ó sì mú un ní ọwọ́ ọ̀tún, ó gbé e dìde; lójijì ẹsẹ̀ rẹ̀ àti kókósẹ̀ rẹ̀ sì le koko. ⁸Ó fò sókè, ó dúró, ó bẹ̀rẹ̀ sí í rìn, ó sì bá wọn wọ inú tẹ́mpìlì, ó ń rìn, ó ń fò sókè, ó sì ń yin Baba wa. ⁹Gbogbo àwọn ènìyàn sì rí i tí ó ń rìn, tí ó sì ń yin Baba wa. ¹⁰Wọ́n sì dá a mọ̀ pé òun ni alágbe tí ó máa ń jókòó ní Ẹnu-ọ̀nà Dáradára ti tẹ́mpìlì, ẹnu sì yà wọ́n gidigidi, ìyàlẹ́nu sì kún wọn nítorí ohun tí ó ṣẹlẹ̀ sí i.

Peteru Kéde Ìránṣẹ́ Baba

¹¹Bí ó ti dìmú Peteru àti Johanu, gbogbo àwọn ènìyàn sáré tọ̀ wọ́n wá ní ìloro tí à ń pè ní ti Solomoni, ẹnu sì yà wọ́n gidigidi. ¹²Nígbà tí Peteru rí èyí, ó wí fún àwọn ènìyàn pé, “Ẹ̀yin ọmọ Israẹli, èéṣe tí ẹnu fi yà yín sí èyí? Èéṣe tí ẹ̀ fi tẹjúmọ́ wa, bí ẹni pé nípa agbára tiwa fúnra wa tàbí ìwà-bí-Ọlọ́run wa ni a ṣe mú kí ó máa rìn? ¹³Ọlọ́run Abrahamu, Isaaki, àti Jakọbu, Ọlọ́run àwọn baba wa, ti yin ìránṣẹ́ rẹ̀ Jesu lógo, ẹni tí ẹ̀yin fi lé àwọn ọ̀tá lọ́wọ́, tí ẹ sì kọ̀ níwájú Pilatu, nígbà tí Pilatu pinnu láti tú u sílẹ̀. ¹⁴Ṣùgbọ́n ẹ̀yin kọ̀ Ẹni Mímọ́ àti Olódodo náà, ẹ sì béèrè pé kí a fi apànìyàn kan fún yín. ¹⁵Ẹ pa Olùpilẹ̀ṣẹ̀ ìyè; Baba wa sì jí i dìde kúrò nínú òkú. Ẹlẹ́rìí ohun yìí ni àwa. ¹⁶Orúkọ rẹ̀, nípa ìgbàgbọ́ nínú orúkọ rẹ̀, ni ó ti mú ọkùnrin yìí lera—ọkùnrin náà gan-an tí ẹ̀ rí tí ẹ sì mọ̀. Ìgbàgbọ́ nínú Jesu sì ti fún un ní ìlera pípé yìí lójú gbogbo yín.

¹⁷“Ní báyìí, ẹ̀yin ará, mo mọ̀ pé àìmọ̀kan ni ẹ fi ṣe é, gẹ́gẹ́ bí àwọn aláṣẹ yín pẹ̀lú ti ṣe. ¹⁸Ṣùgbọ́n Baba wa ti mú ohun tí ó ti sọtẹ́lẹ̀ nípasẹ̀ gbogbo àwọn wòlíì ṣẹ: pé Kristi rẹ̀ yóò jìyà. ¹⁹Nítorí náà, ẹ ronú pìwàdà, kí ẹ sì yípadà, kí a lè pa ẹ̀ṣẹ̀ yín rẹ́, ²⁰kí àkókò ìtura lè wá láti ọ̀dọ̀ Baba wa, àti kí ó lè rán Kristi tí a yàn fún yín, Jesu, ²¹ẹni tí ọ̀run gbọ́dọ̀ gbà títí di ìgbà ìmúpadà ohun gbogbo sí ipò rẹ̀, èyí tí Baba wa ti sọ nípasẹ̀ àwọn wòlíì mímọ́ rẹ̀ láti ìgbà pípẹ́. ²²Mose wí pé, ‘Baba yín yóò gbé wòlíì kan bí èmi dìde fún yín, láti àárín àwọn arákùnrin yín. Ẹ gbọ́ tirẹ̀ nínú ohun gbogbo tí ó bá sọ fún yín.’ ²³Ẹnikẹ́ni tí kò bá fetí sí wòlíì náà ni a ó parẹ́ pátápátá kúrò láàrín àwọn ènìyàn.’ ²⁴Gbogbo àwọn wòlíì tí ó sọ̀rọ̀, láti Samueli wá, pẹ̀lú ti kéde àwọn ọjọ́ wọ̀nyí. ²⁵Ẹ̀yin ni ọmọ àwọn wòlíì àti ti májẹ̀mú tí Baba wa bá àwọn baba yín dá, ní sísọ fún Abrahamu pé, ‘Nípa irú-ọmọ rẹ ni a ó bùkún gbogbo ìdílé ayé.’ ²⁶Baba wa gbé ìránṣẹ́ rẹ̀ dìde, ó sì kọ́kọ́ rán an sí yín, láti bùkún fún yín nípa yíyí olúkúlùkù yín padà kúrò nínú ìwà búburú yín.”