Mabasa a Apoxtolo 2 FHB Father's Heart Bible™

2 ¹Pidakwana ntsiku ya Pentekoste, iwo onsene akhali pabodzi pa mbuto ibodzi. ^a a v1 Pentekoste ikhali Phwando ya Masumana ya Ayuda, ikhacitwa pakupita ntsiku makumaxanu pakumala Paskwa. ²Mwadzidzi, kubuluka kudzulu kwabwera kugaga ninga mphepo ikulu yakuthamanga mwakuwanga, mbakudzala nyumba yonsene mukhakhala iwo. ³Pyaonekera pinthu ninga malirimi a moto akugawanyika, mbapikhala pa m'bodzi na m'bodzi wa iwo. ⁴Onsene adzala na Nzimu Wakucena, mbatoma kulonga na pilongero pinango, ninga Nzimu mukhaapasa mafala akuti alonge.

⁵Pa ndzidzi unoyu, Ayuda akupembera adabuluka ku madziko onsene a pansi pa kudzulu akhakhala mu Yerusalemu. ⁶Pidabveka kugaga uku, mwinji wa anthu waungana, mbudzudzumika, thangwi m'bodzi na m'bodzi akhabva iwo mbalonga na cilongero cace cene. ⁷Iwo adzumatirwa na kudzumatirwa, mbalonga: “Kodi onsene awa analonga si Agalileya tayu? ⁸Mphapo tani, m'bodzi na m'bodzi wa ife asaabva mu cilongero cace cene cidabalwa iye naco? ⁹Aparthi, Amedhi, na Aelamita; ale anakhala mu Mesopotamiya, Yudeya na Kapadhokiya, Pontu na Aziya, ¹⁰Firigiya, Pamfiliya, Edjitu, na mbuto za Libiya zakufendedzera na Kirene; alendo akubuluka ku Roma, Ayuda na ale adalowa m'cipembedzo ca Ayuda; ¹¹Akireta na Aarabiya—tinaabva mbalonga na pilongero pyathu pyene mabasa makulu a Baba wathu!” ¹²Onsene adzumatirwa mbapenulana, mbabvundzana unango na ndzace: “Pyenepi pisabveka tani?” ¹³Mbwenye anango asaseka, mbalonga: “Iwo adzala na vinyu yakutsukwa.”

Pedhru Asamwaza Mbuya Adalamuka

¹⁴Mbwenye Pedhru alimira pabodzi na khumi na m'bodzi, mbakuza fala yace, mbaapanga: “Amuna a ku Yudeya, na imwe monsene munakhala mu Yerusalemu—dziwani pyenepi, mbabverani mwadidi mafala anga. ¹⁵Anthu awa nkhabe kuledzera ninga munanyerezera imwe, thangwi ndi ora yacipfemba basi namacibese. ^b b v15 Ora yacitatu ya ntsiku ikhali pafupi na ora yacipfemba namacibese—n'dzidzi wakutoma kakamwe toera kukhala na kuledzera kudanyerezera mwinji wa anthu. ¹⁶Nkhabe, pyenepi ndi pidalongwa kubulukira mwa mprofeta Yoele:

¹⁷‘Mu ntsiku zakumalisa, asalonga Baba wathu, Ine Ndinadzatsanulira Nzimu wanga pa anthu onsene; ana anu acimuna na ana anu acikazi anadzalonga uprofeta, aphale anu anadzaona masomphenya, na akalamba anu anadzalota maloto. ¹⁸Maseze pa atumiki anga acimuna na atumiki anga acikazi mu ntsiku zenezi Ndinadzatsanulira Nzimu wanga, mbadzalonga uprofeta. ¹⁹Ndinadzapangiza pinthu pyakudzumatirwa kudzulu, na pidzindikiro pantsi pa dziko—ciropa na moto na mpfunga za utsi. ²⁰Dzuwa rinadzasanduka cidima na mwezi unadzasanduka ciropa, mbudzati kufika ntsiku ikulu yaumbiri ya Mbuya. ²¹Na onsene ule anacemera dzina ya Mbuya anadzapulumuswa.’”

²²“Amuna a Izarayeli, bverani mafala awa: Yezu wa ku Nazareti—mamuna adampangizirwa kwa imwe na Baba wathu kubulukira mu pirengo, pyakudzumatirwa, na pidzindikiro pidacita Baba wathu kubulukira mwa iye pakati panu, ninga munadziwa imwe mwene. ²³Mamuna uyu, adaperekwa mwakubverana na cifuno cakukhazikika na cidziwiso cakutoma ca Baba wathu, imwe mwamkhomerera pa ntanda mbamupha na manja a anthu akusowa mwambo. ²⁴Mbwenye Baba wathu amlamusa, mbamsudzula ku nyatwa za kufa, thangwi kufa nee kukhakwanisa kunphata iye. ²⁵Thangwi Dhavidhi asalonga pya iye: ‘Ndaona Baba wathu patsogolo panga ndzidzi onsene, thangwi Iye ali ku nkono wanga wamadyo, toera ndikhonde kugwedezeka.’ ²⁶Na thangwi ineyi ntima wanga wakomerwa, na lirimi yanga yasekera; kusiyapo penepo, manungo anga anadzapuma mu cidikhiro. ²⁷Thangwi imwe nee munadzasiya moyo wanga ku manda, nee munadzatawirisa Wakucena wanu kuti aone kuvunda. ²⁸Imwe mwandipangiza njira za umaso; munadzandidzadzisa na kukomerwa patsogolo panu.”

²⁹“Abale, ndinakwanisa kukupangani mwakudzulira: ambuya wathu Dhavidhi afa, aikhwa m'manda, na nthumbi yace iciripo pakati pathu mpaka lero. ³⁰Thangwi iye akhali mprofeta, akhadziwa kuti Baba wathu akhadadumbira kuna iye toera kuikha m'bodzi wa dzinza yace pa mpando wace waumambo, ³¹iye aona kale mbalonga pya kulamuka kwa Kirixtu, kuti iye nee asiyiwa ku manda, nee manungo ace aona kuvunda. ³²Yezu uyu Baba wathu amlamusa, na ife tonsene ndife mboni za pyenepi. ³³Natenepa, pidakwezwa iye ku nkono wamadyo wa Baba wathu, mbatambira kuna Baba Nzimu Wakucena udapikirwa, iye atsanulira pinaona na pinabva imwe cincino.

³⁴Thangwi Dhavidhi nee akwira kudzulu, mbwenye iye ene asalonga: “Baba wathu apanga Mbuya wanga: ‘Khalani ku nkono wanga wamadyo, ³⁵mpaka ndikhazike anyamalwa anu kukhala cakupondera cya miyendo yanu.’”

³⁶“Natenepa, nyumba yonsene ya Izarayeli mbidziwe mwandimomwene: Baba wathu ancita Yezu uyu, adamkhomerera imwe pa ntanda, kukhala Mbuya na Kirixtu.”

³⁷Pidabva iwo pyenepi, mitima yawo yabayika, mbabvundza Pedhru na apostolo anango: “Abale, tinacitanji?”

³⁸Pedhru aatawira: “Tcunyukani, pontho m'bodzi na m'bodzi wa imwe abatizwe mu dzina ya Yezu Kirixtu toera kulekererwa machimo anu, penepo munadzatambira muoni wa Nzimu Wakucena. ³⁹Thangwi cipikirwa ndi ca imwe, na ana anu, na onsene ali kutali—onsene anadzacemerwa na Baba wathu, Nyakutonga wa pyonsene, kuti abwere kuna Iye.” ⁴⁰Na mafala manango mazinji acenjeza mbaawangisa, mbalonga: “Pulumukani ku m'badwo uwu wakuipa.” ⁴¹Natenepa, ale adatambira mafala ace abatizwa, mbathimizirwa anthu pafupi na 3.000 pa ntsiku ineyo.

Kukhala ninga Banja ya Baba

⁴²Iwo apereka manungo awo ku pfunziso za apostolo na ku kuphatana kukulu, ku kugwanda nkate na ku maphembero. ⁴³Kugopa kukulu kwafikira anthu onsene, na pyakudzumatirwa pizinji na pidzindikiro pyacitwa kubulukira mwa apostolo. ⁴⁴Onsene adakhulupira akhali pabodzi, mbagawana pinthu pyonsene pabodzi. ⁴⁵Agulisa minda yawo na pinthu pyawo, mbagawira onsene, mwakubverana na pikhasisira munthu m'bodzi na m'bodzi. ⁴⁶Ntsiku zonsene, pikhakhala iwo pabodzi n'Nyumba ya Mulungu, mbagwanda nkate nyumba na nyumba, akhagawana cakudya na mitima yakukomerwa na yakukhuluka, ⁴⁷mbasimba Baba wathu, mbafunwa na anthu onsene. Ntsiku zonsene Mbuya akhathimizira pa mwinji wawo ale akhapulumuswa.