Otsak 2

2 ¹Pentecost zimiksho kharā tharan, athum saikora apam akhali katongada leisai. ^a a v1 Pentecost hi Jihudibingwui Hapta Phanit chi, Makānkhami phanitwui thili zimiksho hangphangā kāhaiwui thili mayonna. ²Kashuirak eina kazingram eina masi zingrot neina̱ kakhanuk kathā akhon akha rāhaoda, athumna kapamda leikhai shim katonga chi pemtinghaowa. ³Meiwui male ngayarkhami kathā shokrāda, athum kachiva̱wuitungli pamda leihaowa. ⁴Athum saikora Manglā Kathara eina pemtinghaoda, Manglāna athumli matui khavai tui khami athishurda, tuiyur khangateibing eina matui haokaphoka.

⁵Chitharan kazingram zingli khalei yur kachiva̱wui eina rākasa shitkasanga Jihudibing Jerusalemli leisai. ⁶Hi akhon shai tharan, mi kachungkha rākazipda pa̱ngapā ngasaka, kaja mi kachiva̱na athumna kachichāwui tuiyur eina matui chi kashāhaowa. ⁷Athum saikora matakhak eina matakhaknahaida hānga, "Matuida khalei hibing saikora Galileenaobing maningsermala? ⁸Chithākha kathada ithum kachiva̱na athumna ithumwui luingana tuiyur eina matui chi kashāla? ⁹Parthianaobing, Medenaobing, kala Elamnaobing; Mesopotamia, Judea kala Cappadocia, Pontus kala Asiali leikasābing, ¹⁰Phrygia, Pamphylia, Egypt, Cyrenewui nganaili khalei Libyawui ngaleibing; Romewui eina rākasa mibing, Jihudibing kala Jihudi dharma khuisang kahaibing; ¹¹Cretenaobing kala Arabnaobing, athumna ithum kachichāwui tuiyur eina ithumwui Avāwui pangshap otsakbing chi hāngzat kaji ithumna kashāhaili!" ¹²Athum saikora matakhakda ningreikhasut ngasakda, akha eina akhali hānga, "Hiwui kakhalat khikhala?" ¹³Kha kaikhana mana̱shida hānga, "Athum zamshei eina pemtinghai."

Peterna Ringluihai Proho chi Hāngzat

¹⁴Kha Peterna tharāda akha eina ngasoda nganingda, awui akhon panglāk eina athumli hāngchithei: "Judeawui mibing, Jerusalemli leikasā saikora, hi theilaga iwui tui ningsanglak eina nganālu. ¹⁵Mibing hi nathumna phaningkha thāda makhamaripmana, kaja ara ngathorwui pung kakathumawui atam maningla chilina. ^b b v15 Zimikshowui pung kakathuma chiya ngathorwui pung kakathuma maikhalina—yaruina phaninghai khamarip chiwui vang chiya khare ngathorthakva̱ chilina. ¹⁶Maningmana, hi chiya Joel marānna hānghaikasā chilina:

¹⁷'Kala atam khanaobingli, da ithumwui Avāna hānga, ina iwui Manglā mi kachiva̱li heirormira; nanaomayara, nanao ngalāva̱ ngarāna marānra, nathumwui yaronnaobingna khamahā theira, kala nathumwui khararnaobingna mang machutra. ¹⁸Kala iwui rao mayarnaobing kala iwui rao sha̱naobinglila, chitharan ina iwui Manglā heirormira, kala athumna khamarān sāra. ¹⁹Ina kazingram atungshongli matakhak kahai ot, kala okathui azingshongli ashee, mei kala meikhut kachungkha machut chitheira. ²⁰Zimikna tangmangtinghaora, kala kachāngna ashee onhaora, khare kala tekhamatei Prohowui zimiksho marāranglakha. ²¹Kala Prohowui mingli khangakao saikora kahui samphangra.'"

²²"O Israelwui mibing, tui hi nganālu: Nazarethwui Jishu chi ithumwui Avāna nathumli shākhi mihai mipā akhana: ithumwui Avāna ali zangda nathumwui ngachaili matakhak kahai ot, masākharar ot kala machut sāmi; hi nathum khalattana theisera. ²³Mipā hi ithumwui Avāwui ngarān kahai khangarān kala kharin athishur eina horsangmihai, nathumna makaphā kasābingwui pāng eina krushli shaoshānda shaothata. ²⁴Kha ithumwui Avāna kathiwui kachot eina ali ningkhān ngasakta ringshok ngasaka; kaja kathina ali singkhui masamphangmana. ²⁵Kaja Davidna awui pongli hānga: 'Ina iwui mangāli ithumwui Avā atam kachida theihaira, kaja a iwui yāpangli lei, chieina I mangatha̱luimara.' ²⁶Chiwui vang eina iwui ning mathāna kala iwui male ringphai; chili lāngda, iwui phasāla kachihānli ngasāmkhuira. ²⁷Kaja nana imanglā chi Kazeiramli machihovamana, nawui katharapa chili kashui mathei ngasakmara. ²⁸Nana kharingwui shongfa ili theingasakhaira; nawui mangāli khamathānna ili chipemmira."

²⁹"Ivānaobing, ina nathumli meisā eina hāngshapli: ithumwui avāva̱ David thihaira, chifahaowa, kala awui chikhur chi thang hi eina tangda ithumla ngaso leichinga. ³⁰A marān ngasāhai chiwui vang, ithumwui Avāna awui atheibingwui ngachaili akhali awui wungpamkhongli pamngasakra da ngashit kahai chi ana theisai; ³¹Ana sāngngarānda theilaga Khristawui ringshok ngasakwui pongli hānga: a chi Kazeiramli machihovahaisai, kala awui phasāna kashui matheimana. ³²Jishu hi ithumwui Avāna ringshok ngasaka, kala ithum saikorana hiwui shākhina. ³³Chieina, ithumwui Avāwui yāpangli khāngkā ngasakhairada, Avāwui eina ngashit kahai Manglā Kathara chi samphanglaga, nathumna ara theida nganāki chi ana heirormihaira.

³⁴Kaja Davidna kazingramli khipākha makāhaolakmana, kha ana khalattana hānga: "Ithumwui Avāna iwui Proholi hānga, 'Iwui yāpangli pamlu, ³⁵Ina nawui yangkashebingli nawui pheinai masāngasakranglakha eina tangda.'"

³⁶"Chiwui vang eina Israelwui shimkhur saikorana reikhamatai theikhuiranu: nathumna krushli shaoshān kahai Jishu hi, ithumwui Avāna Prohola Khristala sāngasakhaira."

³⁷Hi shākahaiwui thili athumwui ning kharung thāda, Peter kala paokazat khangateibingli ngahāna, "Ivānaobing, ithumna khi sarakhala?"

³⁸Peterna athumli hānga, "Ningngateilu, kala nathumwui morei pheomi khavai nathum mi kachiva̱na Jishu Khristawui mingli ra̱hikkhuilu, kala nathumna Manglā Katharawui lemmet samphangra. ³⁹Kaja tuingashit chi nathumli, nathumwui naongarā, kala katāva̱li khalei saikorali, Proho ithumwui Avāna awui eina khokakhui mi saikorali khamina." ⁴⁰Kala tui khangatei kachungkha eina athumli kasoida poda hānga, "Khamakhao thot hiwui eina nathum khalatta huikhuilu." ⁴¹Chieina awui pao mathānda khuisang kahaibing ra̱hikmi, kala chithang mi thing kathum shakha ngarumsanghaowa.

Avāwui Shimkhur Thāda Pamkharing

⁴²Athumna paokazatbingwui tamkachithei, ngarumsak, khamui kachetphā kala seihā kasāli athum khalatta chigatchaowa. ⁴³Mi saikorali khangacheena pemtinghaowa, kala paokazatbingwui pāng eina machutkakhui kala matakhak kahai kachungkha sai. ⁴⁴Shitsang kahaibing saikora katonga ngasoda leisai, kala khalalei ot saikora sharuk khuia. ⁴⁵Athumna athumwui lam kala lan yorhailaga, samkaphang chi saikorali, mi kachiva̱wui khavāt khalei thāda ngayarmi. ⁴⁶Thangkachida, khorumshimli katonga chigatchaoda, shimli shimli khamui kachetda, mareojao kala tharzā kahai wuklung eina athumna kashakazā ngarumda zai, ⁴⁷ithumwui Avāli masot chikatda, mi saikorawui ngachaili ngahānkhangai samphanga. Kala Prohona thangkachida kahui samphang kahaibing athumwui mashingli ngarumsangmi.