Jisu le Diga Senu Mei Rwan
Chwan lang lan potna paang thangnu mei rwan om nameng dou rwe. Tachi bwannu om chongchak khatna, ani Pa om chong ga katei bi pa-aam briakpina bakraa raza kraa maknubo dinu kabia nge. Maanna lipui kalingnu ding chamsan thangluga, Legion diga kounu manpa khat ding sut thang rwe, baom khua bing na maan ding se thang lang hweini thang nge; atiga thi se ongnu mannu khat ding pi sa thangluga, Jairus sa kamaisa ding thou thang rwe.
8 1Bakaan kasem ongluga, Maanna namlian le khul bing bi ani Pa om krwang talei om bathaang sacham ding kasamga chu thang ngaake. Atiga sangwan somga potroi rwan ga Maan le diga ong ngaake, 2khatle katha kasia le tanat bina pi sa thangnu mei rwan kasem le ong ngaake: maan bina ri kasia sanat swak damnu, Magdalene diga kounu Mary, 3khatle Herod om chwanlaang mi Chuza basan Joanna, Susanna, khatle katei mei taswang khak, bani om lan potna bani ding paang thang ngaaknu rwanne.
4Mi khang puina khutluga, namlian bing khatkhat bina mi nun Bakhou hung ongnu kaan bi, Maanna chongchak ka kabiaga rinne:
5“Tachi bwannu mi khatna tachi bwan lang se swak rwe. Maanna tachi bwannu kaan bi tachi kasemna lampui paan bi ta thangluga kadim kataanu to rwe, atiga tambaan la zwangnu basaa nunna kachung sa damme. 6Atiga tachi kasemna chen riak pi ta thang nge; mong thouluga tui maak briakpina kaak lan rwe. 7Atiga tachi kasemna kaling kung lak pi ta thang nge, kaling kung rwan ga thou kaluga ha ding namdan damme. 8Atiyeda tachi kasemna talei kasanu riak pi ta thangluga sing thouga bakraa raza kraa rwe.” Hei chong ding rinluga, Maanna rakanga rinne, “Tudannu ngai lang kana amnu maan gana ngaiyo.”
9Baom potroi rwanna hei chongchak om bakaan pa-aambo diga Bakhou ngai rwe.
10Maanna rinne, “Ani Pa om krwang talei om inthim chong bing ga theisu lang nani khou pi thangnuwe; atiyeda katei rwan khou, ‘bani munu kaan bi mu latla, ngainu kaan bi theisu latla’ dingna chongchak toga pi thangnuwe.”
11“Atun hei chongchak ga hei gaye: tachi maan ga ani Pa om chongkaang gaye. 12Lampui paan bi tanu tachi maan gabe chong ngaisunu nun gaye; habei ga Satan na hungluga, bani balumsaga kan thang mak lang, bani lamang bina chongkaang ding lou sat tam rwe. 13Chen riak pi tanu maan gabe chongkaang ngaisunu kaan bi rainuna lou rwe atiyeda baru maake; bani bakaan kasem balumsaluga, tamnu bakaan hung dabe pak lan rwe. 14Kaling lak pi ta thangnu maan gabe chong ngaisunu nun gaye, atiyeda bani senu kaan bi, kum langza sung riangrenu, lan khatle karo rangaana bani ding namdan damluga, bani bakraa ga chwan to latla. 15Atiyeda talei kasanu riak pi tanu maan gabe, inkamnu maaknu ririak senu sanu lamangna chongkaang ding ngaisuluga, haga tipka choiga, khaang theinu paan bina bakraa kraa rwe.”
Inthim Dam Ngam Maaknu Babaan
16“Minunna thaomei taanluga tong khatna lemsin thang make, mak tabe phaak thwei bi le thang make; atiyeda bathaang riak pi thangnuwe, haga insung bi khutnu nun gana babaan ding mulune. 17Balangbe indao thang laaknu makka inthim toga ongnu pot khatchale maake, khatle theinu toga babaan la lou hung laaknu makka inkamga ongnu pot khatchale maake. 18Atibriakpina nanina tatoga ngai dingbo diga sa inno; balangbe tudannu amnu maan khou le bakaan le pi thanglune, atiyeda tudannu maaknu maan gabe, maanna am amme diga baningnu ting hakna bakhouna lou sat thanglune.”
Ani Pa om Chikhung
19Banu le batang bau rwan ga Bakhou hung ngaake atiyeda mi khang briakpina Bakhou riak pi hung ngam mak ngaake. 20Atiga mi khatna Bakhou rinne, “Nanu le natang bau rwan ga Nang mu langna langkaang bi sui bwat ongme.”
21Atiyeda Maanna bani khou katake, “Ani Pa om chongkaang ding ngaisuluga tonu nun ga Anu le Atang bau rwanne.”
Jisu na Thiraang Ding Tweiye
22Kani khat Maan le Baom potroi rwan ga li bi khut rwe. Maanna bani khou rinne, “Tuipui raan khat la takan serizo.” Habei ga bani se swak rwe.
23Bani li hwannu kaan bi Maan inthi ong rwe. Tuipui bi thirwei kanatnu hung briakpina li bi tui hung bwei rwe, atiga bani riangre bi ta rwe. 24Banina Bating bathou thouluga rinne, “Bachuthangnupa, Bachuthangnupa, ani braan ding rwe!” Maanna thouluga thiraang le kanatnu tui ding twei rwe; habei ga lan drwe khatle rim rim ta drwe. 25Maanna bani khou ngai rwe, “Nani balumsat ga tabo?” Bani kachiga taswang khak namsu briakpina, khatna khat ting rinne, “Hei maan tubo? Maanna thiraang le tui ding hakna rin thang nge khatle hagana Bating chong ngaiye.”
Legion Bina Rang To Thangnu Manpa
26Habei ga bani Galilee maitwang la ongnu Gerasene taram la hung rwe. 27Jisu na talei la hung swaknu kaan bi, namlian rwan ri kasia khutnu manpa khatna Bating kadou rwe. Maan bakaan sei khak pwan pwan make khatle in bi makka thaanmwan lak pi ong ngaake. 28Jisu ding munu kaan bi maanna baraam natluga, Baket kim bi in balumtaluga, rakanga rinne, “Lusangnu Rikrwang Sa Kapaisa Jisu, Nangna ei le pa-aam to langbo? Eina Nang khou hweiye, ei ding tasiatnu to mako!” 29Balangbe Jisu na bathiang maknu katha ding manpa bina swak lang rin thang ngaak rwe; balangbe hagana maan ding bakaan taswang khak khut ngaake. Maan ding parei rui le thin ruina bangluga rangkaan thang peida, maanna rui ga kaichat satluga, ri kasiana maan ding ramanu la pi thou dam ngaake.
30Jisu na bakhou ngai rwe, “Nameng tatobo?” Maanna rinne, “Legion,” balangbe ri kasia taswang khak maan khou khut ngaak rwe.
31Atiga banina bani ding bakalan maaknu khun la se lang rin thang mak lang Bakhou hweiye.
32Haba kaan bi rammwan kim la bok nun tam taknu khatna basaak timsa ong ngaake. Ri kasia nun gana bani ding bok nun khou khut thang lang Bakhou hweiga, Maanna bani ding za thang rwe. 33Habei ga ri kasia nun gana manpa ding swak sialuga bok nun khou khut rwe; bok nun ga batok bariak thei makka rakanga rammwan la pak tasuk taluga tuipui bi ta imphum loi drwe.
34Bok nun ding siannu nun gana haba ga munu kaan bi pak khutluga, namlian le khul khat bing bi pu thang rwe. 35Mi nun ga pa-aam swak tamme diga mu langna swak rwe. Jisu kim la hungnu kaan bi, ri kasia bina rang to thangnu manpa ga pwan sinluga, sung bazaangga Jisu baket kim bi badung ongnu ga mu rwe; atiga bani kachinuna sip rwe. 36Atiga haba munu nun gana ri kasia khutnu manpa ding tatoga pi sa thang damme diga bani khou pu thang rwe. 37Gerasene taram om mi khangsung gana, kachinu kaliannu na bani ding namsu briakpina, Maan khou bani bina se thang lang hweiye. Habei ga Maanna li bi khutluga han hung rwe. 38Ri kasia nun ga swak sianu manpa gana Maan le diga se lang Bakhou hweiye, atiyeda Jisu na maan ding bathan thangluga rinne,
39“Nang in la han hungro; ani Pa na nang lang tatham to pi thang damme diga pu thang ngo.” Atiga maanna, Jisu na maan lang tatham to pi thang damme diga, namlian pum brumza bi chu thangga se rwe.
Balumsat na Pi Sa Thangnu khatle Thou Thangnu
40Atun Jisu na han hungnu kaan bi, mi khangna Bating loukhut thang rwe, balangbe bani khangsung gana Maan ding zong ong ngaake. 41Jairus tiga kounu synagogue om kai thangnupa manpa khat hungluga, Jisu Baket kim bi in balumtaluga, baom in bi hung lang bakhou hweiye, 42balangbe maan sangwan somga tangnu basa kamaisa khatcha am ngaake, haga thi ding rwe. Jisu na sega ongnu kaan bi, mi khangna Bating sui bwat ong ngaake. 43Mannu pakhat sangwan somga kani thi se ong ngaake; maanna baom sa ring dingnu bing ka kathiam nun khou phaang loi damme, atiyeda pakhatchanale maan ding pi sa thang ngam make. 44Banung la se hungluga, Bapwan hum ding banaan rwe, khatle thei mak daakka baom kani thi senu ga han basak rwe.
45Jisu na rinne, “Tuna Ating banaannubo?” Mi khangsungna za makka ongnu kaan bi, Peter na rinne, “Pukraangba, mi khangna Nang suisega bwat ongme.”
46Atiyeda Jisu na rinne, “Mi khatna Ating banaan rwe, balangbe Akhouna ngam ga swak drwe diga Eina theiye.”
47Mannu gana maan ding inkam dam ngam laye diga munu kaan bi, kathokka hungluga Bamai bi in balumtaluga, maanna Bating pa-aam to lang banaan khatle thei mak daakka pi sa thang damnu ga mi khangsung mai bi rin indao swak rwe.
48Atiga Maanna mannu khou rinne, “Kamaisa, nabalumsat ka nang ding pi sa thang rwe; dai bazaangga sero.”
49Jisu na chong kabia han ongnu kaan bi, synagogue kai thangnupa in lana mi khatna hungluga rinne, “Nasa kamaisa ga thi drwe; Bachuthangnupa ding to katop lat mako.”
50Atiyeda Jisu na ngailuga bakhou rinne, “Kachi mako; balumsa khak ongro, atiga maan ding kan thanglune.”
51Maan in bi hungnu kaan bi, Peter, John, James khatle naosen nu pa ga makka, pakhatchanale maan le diga khut lang za thang make.
52Mi khangsungna chap ongga maan chung bi nu hwei ong ngaake, atiyeda Maanna rinne, “Chap mako, balangbe maan thi make atiyeda in ongnu zung nge.”
53Atiga maan thi drwe diga theiga, banina Bating choi banui rwe.
54Atiyeda Maanna mannu kut ding namluga kou rwe, “Naosen, thouro.”
55Baom katha ga han hung rwe, khatle thei mak daakka mannu thou rwe. Atiga Maanna bani khou mannu ding za in lang pot pi thang ding ngo diga rin rwe. 56Mannu nu pa ga taswang khak namsu rwe, atiyeda Maanna bani khou swak tamnu ga pakhatchanale khou rin mako diga rakanga rin thang rwe.