Hiak swak thang rwe
Chongdip

Kraanmi razapuba om balumsanuna Jisu ding loh lo thang rwe

Roma kraanmi razapuba khatna, bariak la chongkaang khatcha pile khopnuwe diga rinne, atiga Jisu na haba balumsa ga Israel bi hung mak aangnu diga rinne. Maanna inthi pui senu ding tang thangluga, tameinu khat khou basa ding pi han thang rwe. John ga qwan in bi ongnu kaan bi, Maan ga hung dingnu gaye kabo diga ka rwe. Rinswannu meng amnu kamaisa khatna Baom chung bi chap rwe.

Bung 7.

Maanna mi nun khou heiba chong bing pum brumza rin loi damnu nung, Maan Capernaum pi khut rwe. Kraanmi razapuba om swak pakhat, bating kriangnu, naaluga thi dingnu dan ngaak rwe. Jisu om lang bi ngaisunu kaan bi, kraanmi razapuba na Jihudi patso rwan ding Jisu khou lang thangluga, Maan hung ga baswak ding pi sa thang lang hweini ngaake. Bani Jisu kim bi hungnu kaan bi rakanga hweiniga rinne, “Maan lang Nangna heiba to pi thang dingnu bating khopnuwe, balangbe maanna ani chaat ding kriangnge, khatle ani lang synagogue in to pi thangnu maan ga gaye.” Jisu bani le diga se ngaake. Maan in nai hungnu kaan bi, kraanmi razapuba na baan rwan ding lang thangluga pi rin rwe, “Pukraangba, Nang nachang ding riangre to mako, balangbe ain in khou Nang hung khutnu lang ei khop make. Atibriakpina eina Nameithaan la hung lang ratnu diga baning mak ngaake. Atiyeda chongkaang khatcha Nangna rinbiyo, atiga aswak ka sa dam thanglune. Balangbe ei lega kangamnu om thwei bi ongnu mi gaye, khatle athwei bi le kraanmi rwan amme. Eina pakhat khou, ‘Seyo,’ diga rin dabe maan seye; pakhat katei khou ‘Hung ngo,’ diga rin dabe maan hung nge; aswak khou ‘Heiya towo,’ diga rin dabe maanna haga towe.”

Heiya ngaisunu kaan bi Jisu kraanmi razapuba ding loh lo rwe, khatle Maan tumut satluga Bating sunu mi khang khou rinne, “Eina nani khou rinnuwe, Israel bi lega hadanga balumsanu ei mu mak ngaake.”

Atiga lang thangnu mi nun in bi han hungnu kaan bi, baswak ka sa damnu ga mu rwe.

Jisu na tameinu khat om sa ding pi ring thou thang rwe

Haba nung bakha chanale, Maan Baom potroi rwan khatle mi khang pui takka diga Nain diga kounu namlian khat la se ngaake. Maan namlian keikhwak nai hungnu kaan bi, thinu mi pakhat kai thou ongnu ga mu rwe—maan banu om khatchanu sa, khatle banu ga tameinu gaye—atiga namlian bina mi khang pui takka mannu le diga ong ngaake.

Pukraangba na mannu ding munu kaan bi, maan ding kriangnuna sip rwe khatle rinne, “Chap mako.” Maan nai seluga ria ding sa lat rwe; kainu rwan han kadoi rwe, atiga Maanna rinne, “Katangpa, Eina nang khou rinnuwe, thou hung ngo.”

Atiga thinu mi ga thou hung ga dung ngaake khatle chong rin somme, khatle Jisu na maan ding banu khou pi thang rwe.

Bani khangsung kachi tak ngaak rwe; banina ani Pa ding swanga rinne, “Thiamting lian pakhat ani lak pi thou hung rwe!” “Ani Pa na Bami nun kim bi hung rwe!” Atiga Balang bi heiba thei chang nga Judea taram bing khatle amqwatnu taram bing bi thei chang thou dam ngaake.

Hungnu Maan ga Nangbo? diga John na hweini ngaake

John om potroi rwanna heiba chong bing pum brumza maan khou ndao thang rwe. Habei ga John na baom potroi rwan lak pina pat ni ding kou rwe, Pukraangba khou lang thangluga rin rwe, “Hungnu maan ga Nangbo, ati mak tabe ani kana pakhat ding khin langbo?” Haba mi nun Jisu kim bi hungnu kaan bi rinne, “Baptist John na ani Nakhou lang thangluga hweini ngaake, ‘Hungnu maan ga Nangbo, ati mak tabe ani kana pakhat ding khin langbo?’ ”

Ha chakrin bi Maanna mi tam takka naanu, riangre khaangnu khatle ri kasia nun ding pi sa thang rwe, khatle mik chonu tam takka ding mu pi thang rwe.

Maanna bani khou rinne, “Nanina seluga nanina munu khatle ngaisunu ga John khou bapuro: mik chonuna mu lat rwe, ket thoknuna se lat rwe; imphaannu rwan ga bathiang lat rwe, kana setnuna ngaisu lat rwe; thinuna ring thou lat rwe khatle lungsianu nun khou sacham kasam thang rwe. Khatle tudannu Ei ding ket basui maknu maan ga rithoi phangnuwe.”

John om chonglang rwan se thou damnu nung, Jisu na mi khang nun khou John om lang bi rin somme, “Nani ramphei la pa-aam ding phaang lang se swaknubo? Khwa na pok ngaaknu rei khatcha ding bo? Atiga nanina pa-aam munu ding se swaknubo? Banemnu pwan sin basoinu manpa khat ding gabo? Phaang ngo—lwat liannu pwan sin basoiluga karo rangaa bi ongnu mi nun ga krwang nun in bing la amme. Atiyeda nani pa-aam ding phaang lang se swaknubo—thiamting pakhat ding gabo? Owa, Eina nani khou rinnuwe, thiamting ma inkunu gaye. Balang bi hiak thang ngaaknu ga heiye, ‘Phaang ngo, Eina Nameithaan bi Nalampui bacha thang dingnu Achonglang ding lang thang nge.’

Eina nani khou rinnuwe, mannu bina ponnu nun lak pi John ma inkunu pakhatchanale am make—atiyeda ani Pa om krwang talei bi kasin bachanu maan ga John ma inkunu gaye.”

(Ramkhai khomnu nun le suiga mi khang brumza na heiya ngaisunu kaan bi, John om baptisma bina baptisma lousu damnu briakpina, banina ani Pa ga ririak senuwe diga takhwang to rwe, atiyeda Pharisee rwan khatle chongtan theinu rwanna, maan bina baptisma lousu makka, bani lang ding ani Pa om sa ningting ding thanghap sat rwe.).

“Atiga heiba mikin om mi nun ding Eina pa-aam le diga rin kaba dingbo, khatle bani ga pa-aam danbo? Bani ga keithian bi badungluga bani baan rwan ding kou ongnu naosen rwan ga dannuwe, ‘Anina nani lang tamrwang sem thang nge, atiyeda nanina laam make; anina lungchung thang nge, atiyeda nanina kakou make.’ Balangbe Baptist John ga uilu sa makka, zu le in makka hung ngaake, atiga nanina rinne, ‘Maan ri kasia khutnu gaye.’ Misa Sa Kapaisa ga sa in lu ga hung nge, atiga nanina rinne, ‘Phaang ngo, maan ga taraonu khatle zu kalonu gaye, ramkhai khomnu le noh mi nun om baanne!’ Atiyeda ningting ding nga basa rwan brumza na bataknuwe dinu indaowe.” a a v35 Ningting na bating ponnu pot bina bazan ding indaowe — Jisu om sa thangnu khatle sacham kasamna Maan ga tu batak takka gaye dinu sipnuwe.

Tam takka kok thang damnu briakpina, maanna tam takka kriang rwe

Pharisee pakhatna Maan ding baan le diga sa in lang kou ngaake; atiga Maan Pharisee in bi khutluga sa in lang ongta ngaake. Atiga haba namlian bi ongnu noh mannu pakhatna, Jisu Pharisee in bi sa in lang ongta ngaaknu ding theiluga, baman kungnu thao alabaster tong khat louluga hung ngaake. Mannu ga Maan taban bi, Baket pam bi han kadoiluga, chapga, bamikthwina Baket ding sip thang somme, khatle basamna Baket ka kanun sat thang rwe, atiga Baket ding kaputluga thao ga kanun thang rwe. Heiya munu kaan bi, Maan ding kounu Pharisee na basung bi baningnge, “Maan thiamting khat ga dabe, tudannu Bating sa latnu khatle hei mannu ga pa-aam dan mannu, noh mannu gaye dinu theinu zanuwe.”

Jisu na bakhou katake, “Simon, Eina nang khou rin lang chong kasem amme.” Maanna rinne, “Bachuthangnupa, rinno.”

Sian chaak pinu mi pakhat khou lei chaaknu mi pat ni am ngaake. Pakhatna denari raza nga chaak ngaake, khatle kana pakhatna somnga chaak ngaake. Bani pat ni na thun ngamlanruga, maanna bani om lei pat ni ga kok thang rwe. Atiga bani pat ni lak pi tudannu na bating ma kriang inkulunebo?

Simon na katake, “Eina baning nge, maanna lei tam takka kok thang damnu maan ye.” Jisu na bakhou rinne, “Nangna baze takka chong sian rwe.”

Mannu ding lang hanluga, maanna Simon khou rinne, “Heiba mannu ding nang mubo? Ei nang in la khut ngaake—nangna Aket lang tui pi make, atiyeda maanna bamik tui na Aket ding sip thangluga basamna kanun sat thang rwe. Nangna Akhou kaput mak ngaake, atiyeda maan gabe Ei insung la khut hung tangnu kaan bina Aket kaput ongnu bata mak ngaake. Nangna thao na Alu kanun mak ngaake, atiyeda maanna banamsanu thao na Aket kanun thang rwe. Atibriakpina Eina nang khou rinnuwe, baom noh tam takka kok thang rwe, balangbe maanna tam takka kriang rwe. Atiyeda tudannu kasin ga kok thangnu maan gana kasin ga kriang nge.” Habei ga maanna mannu khou rinne, “Naom noh bing ga kok thang rwe.”

Habei ga maan le diga sa in ongnu nunna khat le khat lak pi, “Noh bing ga le kok thangnu heiya tu gabo?” diga rin som rwe.

Atiga maanna mannu khou rinne, “Nang balumsana nang kanthang rwe, dai bazaangnu bi sero.”