Luka 7 FHB Father's Heart Bible™

7 ¹Rĩrĩa aarĩkirie kwĩra andũ maũndũ macio moothe, agĩtoonya Kaperinaumu. ²Nake ndungata ya mũnene wa thigari igana, ĩrĩa aendete mũno, nĩyarĩ ndwaru ĩkuhĩrĩirie gũkua. ³Rĩrĩa aiguire ũhoro wa Jesũ, mũnene ũcio wa thigari igana agĩtũma athuuri a Ayahudi kũrĩ we, makĩmũthaitha oke ahonie ndungata yake. ⁴Nao maakinya kũrĩ Jesũ, makĩmũthaitha mũno makĩmwĩra atĩrĩ, “Mũndũ ũyũ nĩagĩrĩire ũmwĩkĩre ũndũ ũyũ, ⁵amu nĩendete rũrĩrĩ rwitũ, na nĩ we watwaakĩire nyũmba iitũ ya thathaara.” ⁶Naake Jesũ agĩthiĩ nao. Na aakuhĩrĩria nyũmba-rĩ, mũnene ũcio wa thigari igana agĩtũma arata make kũmwĩra atĩrĩ, “Mwathani, ndũkenogie, amu ndiagĩrĩire wee ũtoonye rungu rwa nyũmba yakwa. ⁷Nĩ ũndũ ũcio o na niĩ mwene ndionire njagĩrĩire gũũka kũrĩ wee. No uga o kiugo, nayo ndungata yakwa nĩ ĩkũhona. ⁸Amu o na niĩ ndĩ mũndũ ũrĩ rungu rwa wathani, ndĩ na thigari rungu rwakwa. Njĩĩraga ũmwe atĩrĩ, ‘Thiĩ,’ naake agathiĩ; na ũngĩ, ‘Ũka,’ naake agooka; na ndungata yakwa, ‘Ĩka ũũ,’ nayo ĩgeeka.”

⁹Rĩrĩa Jesũ aiguire ũguo, akĩgega nĩ ũndũ wa mũndũ ũcio, akĩhũgũkĩra kĩrĩndĩ kĩrĩa kĩamuumĩte thuutha, akiuga atĩrĩ, “Ngũmwĩra atĩ, ndĩrĩ ndoona wĩtĩkio mũnene ũũ o na thĩinĩ wa Isiraeli.”

¹⁰Nao arĩa maatũmĩtwo maacooka nyũmba, magĩkora ndungata ĩrĩ honu.

Jesũ Ariũkia Mũrũ wa Mũtumia wa Ndigwa

¹¹Ihinda inini thuutha ũcio, agĩthiĩ itũũra rĩetagwo Naini, marĩ hamwe na arutwo ake na kĩrĩndĩ kĩnene. ¹²Na aakuhĩrĩria kĩhingo kĩa itũũra-rĩ, hakĩoneka mũndũ mũkuũ akuuĩtwo nja, we aarĩ mũrũ wa mũmwe wa nyina, na nyina aarĩ mũtumia wa ndigwa; na kĩrĩndĩ kĩnene kĩa itũũra kĩarĩ hamwe nake.

¹³Rĩrĩa Mwathani aamwoonire, akĩmũiguĩra tha, akĩmwĩra atĩrĩ, “Tiga kũrĩra.” ¹⁴Agĩkuhĩrĩria, akĩhutia ikebe rĩa ngaĩ; nao arĩa maakuuĩte makĩrũgama, nake akiuga atĩrĩ, “Mwanake, ngũkwĩra atĩ, ũkĩra.”

¹⁵Nake mũndũ ũcio mũkuũ agĩũkĩra agĩikara thĩ, akĩambĩrĩria kwaria, nake Jesũ akĩmũnengera nyina.

¹⁶Nao oothe makĩnyiitwo nĩ guoya; makĩgooca Ithe witũ, makiuga atĩrĩ, “Mũnabii mũnene nĩokĩrĩte gatagatĩ gaitũ!” O na makiuga atĩrĩ, “Ithe witũ nĩ aceerete andũ ake!” ¹⁷Naguo ũhoro ũyũ wake ũkĩhunja Judea guothe na bũrũri wothe ũrĩa warĩgiicĩirie.

Johana Akĩũria atĩrĩ: Wee nĩ wee Ũrĩa Ũgũũka?

¹⁸Nao arutwo a Johana makĩmwĩra maũndũ macio moothe. Naake Johana agĩĩta arutwo ake eerĩ, ¹⁹akĩmatũma kũrĩ Mwathani makamũũrie atĩrĩ, “Wee nĩ wee ũrĩa ũgũũka, kana twetanie ũngĩ?” ²⁰Nao andũ acio maakinya kũrĩ we, makĩmwĩra atĩrĩ, “Johana Mũbatithania nĩ we watũtũma kũrĩ wee, akĩũria atĩrĩ, ‘Wee nĩ wee ũrĩa ũgũũka, kana twetagĩrĩre mũndũ ũngĩ?’”

²¹Ithaa-inĩ rĩu akĩhonia andũ aingĩ ndwari, na mĩrimũ, na maroho mooru, na akĩhingũra maitho ma atumumu aingĩ.

²²Nake akĩmacookeria atĩrĩ, “Thiĩi mũkeere Johana maũndũ marĩa muonete na mũkaigua: atumumu nĩmonaga, ithua nĩithiĩĩaga, arĩa marĩ mangũ nĩmatheragio, aroia nĩmaiguaga, akuũ nĩmariũkagio, na athĩĩni nĩmahunjĩirio ũhoro mwega. ²³Na kũraathimwo mũndũ ũrĩa ũtahĩngagwo nĩ niĩ.”

²⁴Rĩrĩa andũ arĩa maatũmĩtwo nĩ Johana maathiĩ, Jesũ akĩambĩrĩria kwĩra kĩrĩndĩ ũhoro wa Johana, akĩũria atĩrĩ, “Nĩ kĩĩ mwathiĩte werũ-inĩ kuona? Ithanjĩ rĩkĩenjenjwo nĩ rũhuho? ²⁵No nĩ kĩĩ mwathiĩte kuona? Mũndũ wĩhumbĩte nguo njororo? Atĩrĩrĩ, arĩa mehumbaga nguo cia riiri, na matũũraga maikaraga wega, marĩ nyũmba cia athamaki. ²⁶No nĩ kĩĩ mwathiĩte kuona, mũnabii? Ĩĩ, ngũmwĩra atĩ, nĩ mũkĩru mũnabii. ²⁷Ũyũ nĩ we Maandĩko maaragia ũhoro wake atĩrĩ, ‘Atĩrĩrĩ, nĩngũtũma mũtũmwo wakwa akũtongorie, ũrĩa ũgaakũhaarĩria njĩra yaku mbere yaku.’

²⁸Ngũmwĩra atĩ, gatagatĩ ka arĩa maaciarirwo nĩ atumia gũtirĩ mũndũ mũnene kũrĩ Johana; no ũrĩa mũnini thĩinĩ wa ũthamaki wa Ithe witũ nĩ mũnene kũrĩ we.”

²⁹(Rĩrĩa andũ othe maiguire ũguo, o hamwe na etia mbeeca cia igooti, nĩmoigire atĩ Ithe witũ nĩ mũthingu, nĩgũkorwo nĩmabatithĩtio na ũbatithio wa Johana, ³⁰no Afarisai na arĩa oorutani a watho makĩrega muoroto wa Ithe witũ harĩ o ene, nĩgũkorwo matiabatithĩtio nĩ we.).

³¹“Andũ a rũciaro rũrũ-rĩ, ngaamagerekania na kĩĩ, na mahaana atĩa? ³²Mahaana ta ciana iikarĩte ndũnyũ-inĩ igĩĩtana, ikiuga atĩrĩ, ‘Nĩtwamũhuhĩire mũtũrirũ, na mũtiacina ngũrũ; nĩtwamũinĩire rwĩmbo rwa macakaya, na mũtiarĩra.’ ³³Amu Johana Mũbatithania ookire atekũrĩa mũgate kana akĩnyua ndibei, na inyuĩ mũkoiga atĩrĩ, ‘Arĩ na ndaimono.’ ³⁴Mũrũ wa Mũndũ ookire akĩrĩĩaga na akĩnyuuaga, na inyuĩ mũkoiga atĩrĩ, ‘Ta rorai, mũndũ mũkoroku na mũrĩĩu, mũrata wa etia mbeeca cia igooti na ehia!’ ³⁵No ũũgĩ nĩũtuĩkaga wa ma nĩ ciana ciaguo ciothe.” ^a a v35 Ũũgĩ nĩwĩonanagia na ũndũ wa kĩrĩa ũciaraga — kũhonia kwa Jesũ na ũhoro mwega iria eekaga nĩcionanagia ũrĩa arĩ we kũna.

Nĩ Tondũ Nĩarekeirwo Maũndũ Maingĩ, Nĩendire Mũno

³⁶Mũndũ ũmwe wa Afarisai akĩmwĩta oke marĩĩanĩre, nake agĩtoonya nyũmba ya Mũfarisai ũcio, agĩikara metha-inĩ. ³⁷Na mũtumia ũmwe wa itũũra rĩu, mwĩhia-rĩ, aamenya atĩ Jesũ nĩ aikarĩte metha-inĩ nyũmba ya Mũfarisai ũcio, akĩrehe cuba ya ngenyũ ĩiyũrĩte maguta manungi wega. ³⁸Akĩrũgama thuutha wake magũrũ-inĩ make akĩrĩraga, akĩambĩrĩria kũihũgia magũrũ make na maithori, akĩmagiria na njuĩrĩ yake, akĩmumunya magũrũ, na akĩmahaka maguta macio. ³⁹Rĩrĩa Mũfarisai ũrĩa wamwĩtĩte oonire ũguo, akĩĩciiria na ngoro yake atĩrĩ, “Mũndũ ũyũ angĩkorwo nĩ mũnabii, nĩangĩamenya mũndũ ũrĩa ũramũhutia na ũrĩa mũtumia ũyũ atariĩ — nĩ mwĩhia.”

⁴⁰Nake Jesũ akĩmũcookeria atĩrĩ, “Simoni, ndĩ na ũndũ wa gũkwĩra.” Nake akiuga atĩrĩ, “Uga, Mũrutani.”

⁴¹“Mũndũ ũmwe wakombithanagia mbeeca aarĩ na andũ eerĩ maarĩ na thiirĩ wake. Ũmwe aarĩ na thiirĩ wa dinari magana matano, na ũcio ũngĩ mĩrongo ĩtaano. ⁴²Na tondũ gũtirĩ warĩ na kĩa kũrĩha, akĩmarekera eerĩ. Nĩ ũndũ ũcio-rĩ, nũ wao ũkaamwenda makĩria?”

⁴³Simoni agĩcookia atĩrĩ, “Ndĩĩciiria nĩ ũrĩa aarekeirwo thiirĩ mũnene.” Nake Jesũ akĩmwĩra atĩrĩ, “Nĩwatua na kĩhooto.”

⁴⁴Agĩcooka akĩhũgũkĩra mũtumia ũcio, akĩĩra Simoni atĩrĩ, “Nĩ ũroona mũtumia ũyũ? Nĩndoonya nyũmba yaku, wee ndũraaheire maaĩ ma gwĩthamba magũrũ, no mũtumia ũyũ nĩ aihũgĩtie magũrũ makwa na maithori, akamagiria na njuĩrĩ yake. ⁴⁵Wee ndũramumunya, no mũtumia ũyũ, kuuma rĩrĩa ndoonyire, ndatigĩte kũmumunya magũrũ makwa. ⁴⁶Wee ndũrahaka mũtwe wakwa maguta, no mũtumia ũyũ nĩ ahakĩte magũrũ makwa maguta manungi wega. ⁴⁷Nĩ ũndũ ũcio ngũkwĩra atĩ, mehia make maingĩ nĩmarekanĩirwo, tondũ nĩ endire mũno. No ũrĩa ũrekagĩrwo mehia manini endaga manini.” ⁴⁸Nake akĩmwĩra atĩrĩ, “Mehia maku nĩmarekanĩirwo.”

⁴⁹Nao arĩa maarĩĩanagĩra nake makĩambĩrĩria kũũrania o ene atĩrĩ, “Nũ ũyũ ũrekanagĩra o na mehia?”

⁵⁰Nake akĩĩra mũtumia ũcio atĩrĩ, “Wĩtĩkio waku nĩ waakũhonokia; thiĩ na thaayũ.”