Luke 8

8 ¹Chiwui thili, ana keinung eina kha̱bing saikorali zatvāmamānda, pao hāshokta kala ithumwui Avā wungramwui paokaphā hāngchithei. Sākhangatha̱ tharāda khani chi awuili ngasozanga, ²kala makaphā manglā eina kazābing eina kazāt raimi kahai sha̱nao kaikha: awui eina kameo shini thuihai kahai, Magdalene da kahokakhui Mary, ³kala Herodwui lan kasinga Chuzawui preiva̱ Joanna, kala Susanna, kala athumwui khalattawui lan eina athumli ngachona kahai khangatei kachungkhala ngasozanga.

⁴Mi kachungkha rākazipa kala keinung saikorawui eina mibing awuili rāda leilakha, ana chānjam akha hāngchithei:

⁵"Athā khayaoa mi akhana athā yaokhavai vai. Ana khayao tharan athā kaikha shongfali tātungda naikazamhaowa, kala khamasaiwui vānaobingna chi ngamuizāhaowa. ⁶Athā kaikha lungguitungli tātunga; chi shonshoklaga, nim mavātwui vang ngahuihaowa. ⁷Athā kaikha ka̱shātbingwui ngachaili tāzangda, ka̱shātrongbing hakkasang eina shangthathaowa. ⁸Athā kaikha ngalei katumli tāzanga, hakkasang eina athei shāshā matheiya." Hi hānghailaga, ana panglāk eina vaoda hānga, "Shākhavai khanā kakā a china nganākhuiranu."

⁹Awui sākhangatha̱bingna chānjam hi khi kahāngkhala da ali ngahāna.

¹⁰Ana hānga, "Nathumli ithumwui Avā wungramwui ngathumbing thei khavai chi mihaira; kha khangateibingli chānjam eina hāngchithei, chithākha 'athumna yangkila matheimara, kala shākila mabhap tāmara.'"

¹¹"Ara chānjam chiya hina: Athā chi ithumwui Avāwui tuina. ¹²Shongfapheili yaosang kahaibing chiya, tui kashā mibingna; chieina chipeena rāda athumwui wuklungli khalei tui chi khuishoka, chithākha athumna mashitsangmara, kala kahui masamphangmara. ¹³Lungguitungli tākazangbing chiya tui chi shālaga khamathān eina khuisang kahaibingna; kha angayung maleimana; athum atam kateo eina shitsangda, chāng khayang tharan kongluihaora. ¹⁴Ka̱shātlungli tākazangbing chiya tui kashābingna; kha athum zatvāmamānda, mirinwui malungkharing, kashāng, kala ringkaphāna athumli shangthathaowa, kala athumwui athei matuimana. ¹⁵Kha ngalei katumli tākazangbing chiya ningkathar kala khamathā wuklung eina tui chi shālaga, ngaziplak eina singtitta, khangatar eina athei matheiya."

Ngathum Masārpha Kahor

¹⁶"Mi akhala thaomei sharlaga, chi ham eina fakhammi lah petwui azingli mahaimana; kha thaomei rungkhavai apamli haimi, chithākha kazangbingna kahor chi theira. ¹⁷Kaja phongmi masārpha ngathum kahai khikha maleimana, kala theingasak kala kahorli khuiphong masārpha khangathum khikhala maleimana. ¹⁸Chieina, kathada nganā jikhala da ning ngasharlu; kaja leikahai a chili mataisang khamira, kha maleikasā a china a leimeia da aphaninga chi tangda khuithuihaora."

Ithumwui Avāwui Shimkhur

¹⁹Awui ava̱ kala achinā ngarā awuili rāhaowa, kha mi kachungkha sāhaoda awuili masamphangrarthuwa. ²⁰Chieina ali hānga, "Nawui ava̱ kala nawui achinā ngarā nali theikhavai ayarli nganinghaira."

²¹Kha ana athumli ngahānkai, "Ithumwui Avāwui tui nganāda chi kasābing chi ishava̱ kala igato ngarāna."

Jishuna Siphan Zingrotli Kasoi

²²Atam akha ana awui sākhangatha̱bingla marikhong akhali kātonga. Ana athumli hānga, "Ithum ngayi lākhavāk kānkalu." Chieina athum zatphoka.

²³Athum marikhong tongda vālaga, ana piphuphaowa. Siphan zingrot ngayitungli ngasha̱ungda marikhong chi tara̱na pemki jihaowa, kala athum kalāli leihaowa. ²⁴Athumna ali amathotkhuida hānga, "Amei, Amei, ithum shimānki jiura!" Ana ngakarthuida masi kala kaphanga tara̱li kahara; chi ngasāmda chingrihaowa. ²⁵Ana athumli ngahāna, "Nathumwui shitkasang kali leikhala?" Ngacheeda kala matakhakhaida athum akha eina akha hāngngaroka, "Chithākha hi khipākhala? Masi kala tara̱ eina tangda ana kasoi, kala athumna awui kahāng nganāli."

Legionwui Eina Ningkhān Kahai Mi Akha

²⁶Chieina athum Galileewui yangkhangasungchangli leikahai Gerasanaowui ngaleivāk vāshunga. ²⁷Jishuna ngaleili shokkhaleoda, keinungwui eina kameo kazanga mayarnao akha awuili rāngaroka. Ana atam kasāngkha kashankachon makhonla, shimli mapamla chikhurbing ngachaili pamhaowa. ²⁸Jishuli theilaga, ana vaoda awui mangāli khuktizanglaga panglāk eina hānga, "He Jishu, Juikhamatai Varewui Naomayara, ili nana khi sāki kajikhala? Ina nali kapona, ili marekharekmialu!" ²⁹Jishuna makathar mangla chili mipā chiwui eina shokhaolu da kasohairasai, kaja chi ra̱ra̱ ali tukkhui; ali marikhānghui kala zurthing eina khalapta rimpamlaga, ana chi sāshathaoda kameowui eina lamhāngli chihovāhaowa.

³⁰Jishuna ali ngahāna, "Nali khipa hokhala?" Ana hānga, "Legion," kaja kameo kachungkhana ali azanghaowa.

³¹Kala athumna ali makatang leizingkhurli khavāzang khavai makasomihai da poi.

³²Atam chitharan chiwui kaphungpheili hok ashangva̱ kaphunga akha phāzāzatta leisai. Kameobing china hokbing chili azang ngasak khavai ali poi, kala ana mayāmihaowa. ³³Chieina kameobing china mipā chiwui eina shoklaga hokbing chili azanga; hokshangva̱ chi kaphungton amaitarenli yongtāda ngayili tāzangda hikthatserhaowa.

³⁴Hok kahombing china chi theilaga yāma, kala keinungli kala kuikhamareili unghāngchithei. ³⁵Mi kachungkhana khi shokkahai kaji theikhavai shokrai. Athumna Jishuwuili vākashung tharan kameo shokkahai mipā chi kachon ngavaida kala ngarinda Jishuwui pheizingli pamda leikasā chi theihaowa, kala athum ngacheenāhaowa. ³⁶Kala chi kathei mibingna kameo kazanga mipā chi kathada raimi kahai kaji athumli hānga. ³⁷Gerasa ngaleiwui mibing saikorana athumwui eina zatthuimihai khavai Jishuli poi, kaja khangachee kachungkhana athumli pemhaira. Chieina ana marikhong akhali tongphungda latunghaowa. ³⁸Kameo shokkahai mipā china ali ngasovai khavai poi, kha Jishuna ali shiunda hānga,

³⁹"Nawui shimli ungulu; ithumwui Avāna nali kathada hakva sāmi kaji hānglu." Chieina ana vāda, Jishuna ali kathada hakva sāmi kaji keinung chi peichaoda hashokta phongchithei.

Shitkasang eina raimi kala ringshok ngasak

⁴⁰Chitharan Jishuna latung tharan, mi kachungkhana ali mathānthathup samphangkhui, kaja athum saikorana ali ngaraisai. ⁴¹Synagoguewui akhavā Jairus kaji aming mi akhana rāda Jishuwui pheizingli ngakhumzangda, awui shimli rākhavai ali poi, ⁴²kaja awui naongalāva̱ akha māng leisai, a zingkum tharāda khani sha̱kha, kathi thāda leisai. Jishuna zatmamānlakha mi kachungkhana ali puiruizata. ⁴³Sha̱nao akhana zingkum tharāda khani ashee ngaya̱da leisai; ana awui ringkhavai khalei saikora khanongbingli shimānmihai, kha khipānakha ali maraimirarthuwa. ⁴⁴Awui khanukshong rāda, ana awui kachonwui chontheira̱li sāza̱ya, kala awui ashee ngaya̱ chi ngalāngda phāhainaowa.

⁴⁵Jishuna hānga, "Khipāna ili sākaza̱khala?" Athum saikorana mamayā tharan, Peterna hānga, "Amei, mi kachungkhana nali puiruida kharomzata."

⁴⁶Kha Jishuna hānga, "Mi akhana ili sākaza̱haira, kaja iwui eina pangshap shokkahai kaji ina theihaira."

⁴⁷Ana ngathumda maleirarthu kaji theilaga, sha̱nao china kathirthirda rāda, awui mangāli ngakhumzangda, ali khisāda sākaza̱khala kala kathada ngalāngda raihaokhala kaji mi saikorawui mangāli hāngchithei.

⁴⁸Chieina ana ali hānga, "Naongalāva̱, nawui shitkasang eina nali raimihaira; chingri kahai eina ungulu."

⁴⁹Ana matuimahungda leilakha, synagoguewui akhavāwui shim eina kachikathā mi akhana rāhānga, "Nanao ngalāva̱ thihaira; Ojāli sheikhautluisamalu."

⁵⁰Kha Jishuna chi shālaga ali ngahānkai, "Mangacheealu; shitsanglu kasaikha, kala ana huikhuira."

⁵¹Shimli vākashung tharan, ana Peter, John, James, kala nao chiwui avā kala ava̱ maningla khipānakha ali ngasoda vāzang khavai mamayāthuwa.

⁵²Katonga awui vang chapngachāda leisai, kha ana hānga, "Machapalu, kaja ana thikahai maningmana, kha pida khaleina."

⁵³Chieina athumna ali mana̱shiya, kaja ana thihaira kaji athumna thei.

⁵⁴Kha ana apāng singkhuida vaoda hānga, "Nao, ngakarthuilu."

⁵⁵Awui manglā latunga, kala ana ngalāngda ngakarthuiya. Ana athumli ali shaikhavai khuimi khavai hānga. ⁵⁶Awui ava̱ avā matakhakhaowa, kha ana shokkahai chi mi khipālikha mahānglakalu da athumli kasoi.