Luka 8 FHB Father's Heart Bible™

8 ¹Kunima dya mambu mana, Yesu wákatuka, wádiata mu mbanza yi mu bikata, mu kulonga yi mu kumenika Musamu wa Bukheti wa Kipfumu kya Tata wetu. Kumi yi bodi bákala yi yandi, ²amana bakhetu bahika bana bábeluka mu bitembu bya mbi yi mu makhasi: Madiya, wuna bisi tela Makatala, mwena yandi bitembu bya mbi tsambwadi byálubuka, ³yi Zyani, mukhetu wa Kuza, kalema wa Helode, yi Suzana, yi bakhetu bahika balawu, bana bakala basadisa bawu mu kuvwa kwa bawu.

⁴Bwosu mulumba-lumba wumosi wambuta wulundakana, amana batu bátuka mu mbanza yosu bisa kwena yandi, Yesu wázimbula kingana:

⁵«Mukuni mosi wálubuka mu kukwenda kuna. Buna kakala mwanga kheni, ndambu yahika yábwila mu nzila, yadyatadyawa, amana banuni ba zulu bisiya dya. ⁶Yahika yábwila hana tadi; buna yámena, yáyumuka kikuma kyakonda mamba. ⁷Yahika yábwila mu kati dya tsaku, amana tsaku záleya hakimosi yi yawu amana zákakidisaya. ⁸Kaasi kheni yikwawu yábwila mu mafu ma bukheti, yákola, amana yálubula mbala khama.» Buna kazimbula mambu mana, wákalunga: «Wosu wuna kenina yi matu ma kuwongama, kawongama.»

⁹Balonguki bandi bámuyufula biki kingana kyokyo kisongidila.

¹⁰Yandi wávutula: «Benu, lwátambula mu kuzaya mazaya ma bitsweki bya Kipfumu kya Tata wetu; kaasi bana basala, bawu batambula bingana, ndangu “mu kutala batala kaasi kámonaku, amana mu kuwongama bawongama kaasi kababakisaku.”»

¹¹«Kingana kyokyo, yi kyaki: Kheni, yi Ndinga ya Tata wetu. ¹²Bana benina mu kati dya nzila, yi bana bawongama; amana mbeni wisi, wubwotula Ndinga mu mbundu za bawu, ndangu bakwikilaku amana bahulukaku. ¹³Bana benina hana tadi, bawongama Ndinga amana batambula yawu mu kyesi, kaasi bakonda musodi; bakwikila mu ndambu ya tangwa, amana babwa mu tangwa dya phasi. ¹⁴Yina yábwila mu kati dya tsaku: yi bana bawongama, kaasi buna bakwenda, phasi za luzingu yi kimvwama yi tsambu bisi babafitikisa, amana kabayibutaku mbutu yafwana. ¹⁵Kaasi yina yenina mu mafu ma bukheti: yi bana bawongama Ndinga mu mbundu yasungama yi yambote, basimbidila yawu ngolu, amana babuta mbutu mu kikwamina.»

Kyesesi Kina Kakondaku Swekama

¹⁶«Ka mutu ku walemisa mwinda amana kawusweka ni kalondu, holo kasya ku tsi ya mbuka; kaasi wásya hana muzanga, ndangu bana bakóta bamona kyesesi. ¹⁷Mukuma, kwena kima kyasweka kina kakonda lubuka, keti kima kyatsweki kina kakonda zayakana amana kakwísa ku kyesesi. ¹⁸Buna, dikebisenu mutindu lubati wongama, mukuma wosu wuna kenina yi kima, bamuheka hika; amana wosu wuna kenina ni kima ku, ata kina kabanza ni kenina kyawu, bamubwotula kyawu.»

Dikanda dya Tata wetu

¹⁹Ngudi wandi yi baphangi bandi bisa kwena yandi, kaasi bálendaku tula kwena yandi ku kikuma kya mulumba-lumba wa batu. ²⁰Amana bámuzimbwala: «Ngudi waku yi baphangi baku, batelama ku mbazi, bazodi kumona ngeyi.»

²¹Kaasi yandi wubavutwadi: «Ngudi wama yi baphangi bama, yi bana bawongama Ndinga ya Tata wetu amana basadila yawu.»

Yesu Wakaya Kimbongila

²²Kilumbu kimosi, Yesu yi balonguki bandi bákota muna mudimba. Yandi wubazimbwadi: «Tusabuka ku sambwa dikwawu dya yanga.» Amana bákatuka.

²³Buna bakala kangala, Yesu wánimba. Kimbongila kimosi kya ngolu kyátukula hana yanga; mudimba wáyandika kubasa mamba, amana bákala mu phasi. ²⁴Bámutokamisa, mu kuzimbula: «Pfumu, Pfumu, tukuluki!» Yandi wátokama, wákaya pfunzi yi mamba ma ngolu; byádibata, amana talala dyávutuka. ²⁵Yandi wubayufula: «Kweti lukwikilu lwenu?» Mu bweya yi kitswi, bawu bazonzasana bawu yi bawu: «Nani buna wuna wawu? Kabati kaya ata pfunzi yi mamba, amana byawu bisi kumuwongamina.»

Mutu Walubulwa mu Khwingi

²⁶Amana benda kangala ku kinzunga kya bisi Ngelasoni, kina kenina kuna thwala ya Ngadidi. ²⁷Buna Yesu wásumuka ku tsi, mutu mosi wa mbanza wuna wákala yi bitembu bya mbi wámutundakana. Tuka ntama kavwataku miledi amana kakalaku mu nzu, kaasi hana kati dya mazyamu. ²⁸Buna kámona Yesu, wákalunga, wábwa kuna thwala yandi, amana wázonza mu ndinga ya ngolu: «Khi dyambu, yi meni yi ngeyi, Yesu, Mwana wa Nzambi Kahungu? Yikulombidi, wungyangisaku!» ²⁹Mukuma Yesu kákala muheka muswa kwena kitembu kya mbi ni kalubuka mwena mutu, kikuma mbala za lawu kyakala mukwata; ata bakala mulunda amana bamuzitikila ni miyololu yi mitaku, kákalamya tabula myawu amana kitembu kya mbi kyakala munata ku makanga.

³⁰Yesu wákala muyufula: «Biki khumbu yaku?» Yandi wávutula: «Khwingi», mukuma bitembu bya mbi byalawu byákota mwena yandi.

³¹Amana byámubokila ni kabatumaku bakwenda mu kalunga.

³²Kinga kwákala kwakuna kibuka kimosi kya mbuta kya bangulu kyakala dya hana mongu. Bitembu bya mbi byámulomba ni kabitambwasa bakota mwena bangulu, amana yandi wátambwasa. ³³Buna bitembu bya mbi byálubuka kwena mutu, byákota muna bangulu; amana kibuka kyosu kya bangulu kyádidindumuna kuna beti dya bitadi, kibwidi kuna yanga amana bázyonda muna mamba.

³⁴Bana bakala bahungula bangulu, buna bámona, bátina; benda menika dyambu dina mu mbanza yi mu bikata. ³⁵Mulumba-lumba wa batu wálubuka mu kukwenda tala mana máhita. Buna bátula kwena Yesu, bámona mutu wuna bitembu bya mbi byálubuka mwena yandi, wazakala muna malu ma Yesu, wavwatikini miledi yi mabanza ma kimutu — amana bweya bwábakwata. ³⁶Amana bana bámona dyambu dina, bazimbudi kwena bawu mutindu mutu wuna wákala yi bitembu bya mbi kábeluka. ³⁷Batu boosu ba kinzunga kya bisi Ngelasoni bámulomba ni kabasisa, mukuma bweya bwa lawu bwábakwata. Buna wákota muna mudimba amana wávutuka. ³⁸Mutu wuna bitembu bya mbi byálubuka mwena yandi wámulomba ni kenda hakimosi yi yandi, kaasi Yesu wámusula, mu kuzimbula:

³⁹«Vutuka ku nzu yaku; menika mambu moosu Tata wetu káhangila kwena ngeyi.» Yandi wénda, mu kumenika mu mbanza yosu mambu moosu Yesu káhangila kwena yandi.

Kubeluswa yi Kufutumuswa mu Lukwikilu

⁴⁰Buna Yesu wávutuka, mulumba-lumba wa batu wámuyamba, mukuma boosu bakala muhingila yandi. ⁴¹Yakala mosi, khumbu yandi Zayilusi, pfumu wa nzu ya kimvuka ya Bayuta, wátula amana wábwa muna malu ma Yesu, mu kumulomba ni kakwisa kuna nzu yandi, ⁴²mukuma kakala yi mwana wa mukhetu mosi hahika, wa mvula kumi yi zodi, wakala kufwa. Buna Yesu kakala kwenda, mulumba-lumba wa batu bakala mufitikisaka tselu yi tselu. ⁴³Mukhetu mosi kákala noka menga mu mvula kumi yi zodi; kuvwa kwandi kwosu wámanisa mu kufuta bandomvi, kaasi keti mutu kálendaku kumubelula. ⁴⁴Wisa bwesuka kuna manima amana wásimba nzenzi ya muledi wandi, amana muna kithulumukina menga mandi mádibata.

⁴⁵Yesu wuzimbudi: «Nani wutsimbi?» Buna boosu bátunu, Phetelu wuzimbudi: «Pfumu, mulumba-lumba wa batu bakala kulanda ngeyi yi kukufitikisa tselu yi tselu.»

⁴⁶Kaasi Yesu wuzimbudi: «Mutu mosi wutsimbi, mukuma yimweni ni ngolu zálubuka mwena meni.»

⁴⁷Buna mukhetu kámona ni kafwaniku kusweka, wisa, kuna yi kutekitaka, wábwa kuna thwala yandi, amana wázimbula kuna thwala ya batu boosu kikuma kya biki kánsimbina yi buna kabeluka muna kithulumukina.

⁴⁸Amana wunzimbwadi: «Mwana, lukwikilu lwaku lukubeludi; ndawenda mu ngemba.»

⁴⁹Muna tangwa dina kakala zonza bwabuna, mutu mosi wátuka ku nzu ya pfumu wa nzu ya kimvuka wuzimbudi: «Mwana waku wa mukhetu wufini; wuyangisilaku hika Mulongi.»

⁵⁰Kaasi Yesu buna káyuka, wuvutudi: «Wukalaku yi bweya; kwikila kwaku, amana kakáhuluka.»

⁵¹Buna kátula ku nzu, kayambulaku keti mutu kakóta hakimosi yi yandi, katula lwesi Phetelu yi Yowani yi Zyaki yi tata wa mwana yi ngudi wandi.

⁵²Boosu bakala dila yi kusya khondu kikuma kyandi, kaasi yandi wuzimbudi: «Ludilaku, mukuma kafiku, wanimba kenina.»

⁵³Amana bámuseya, mukuma bázaya ni wufini.

⁵⁴Kaasi yandi wásimba koku dyandi amana wákalunga: «Mwana, tokama!»

⁵⁵Kitembu kyandi kyávutuka, amana wátokama muna kithulumukina. Yandi wábazimbwala ni bamuheka ndambu ya madya. ⁵⁶Biwutu byandi, kitswi kibakwati, kaasi yandi wábakandisa ni bamenikaku kwena mutu mana máhita.