Vakadzi Vaifamba naJesu
Vakadzi vanotsigira basa nemari vanodudzwa nemazita. Mufananidzo wevhu rakasiyana unotsanangura kuti sei shoko raBaba vedu risingasvike kwose mune vamwe. Anonyaradza dutu, anosunungura murume anonzi Regioni ane vavakidzani vanomukumbira kuti aende, ipapo anoporesa mukadzi aibuda ropa uye anomutsa mwanasikana waJairosi.
8 1Nokukurumidza shure kwaizvozvo, akafamba achipfuura namaguta nemisha, achiparidza nokuzivisa mashoko akanaka oumambo hwaBaba vedu. Vane gumi navaviri vaiva naye, 2uye vamwe vakadzi vakanga vaporeswa pamweya yakaipa nehosha: Maria, ainzi Magadharini, akanga abuda madhimoni manomwe maari, 3naJoana, mukadzi waChuza, mutariri waHerodhi, naSusana, navamwe vazhinji, vaivabatsira nezvinhu zvavo.
4Zvino vazhinji vakati vaungana, vanhu vachibva kuguta rimwe nerimwe vachiuya kwaari, akataura nomufananidzo, achiti:
5“Mukushi akabuda kundokusha mbeu yake. Paakanga achikusha, imwe mbeu yakawira panzira, ikatsikwa-tsikwa, uye shiri dzedenga dzikaidya. 6Imwe yakawira paruware; yakati yomera, ikasvava nokushayiwa unyoro. 7Imwe yakawira muminzwa, minzwa ikakura pamwe chete nayo, ikaivhunga. 8Imwe yakawira muvhu rakanaka, ikakura, ikabereka zvakapetwa kazana.” Achitaura izvi, akadanidzira, achiti, “Ane nzeve dzokunzwa, ngaanzwe.”
9Vadzidzi vake vakamubvunza kuti mufananidzo uyu wairevei.
10Akati, “Imi makapiwa kuti muzive zvakavanzika zvoumambo hwaBaba vedu; vamwe vose vanopiwa mifananidzo, kuitira kuti, ‘kunyange vachiona varege kuona, uye kunyange vachinzwa varege kunzwisisa.’”
11“Zvino mufananidzo ndiwoyu: Mbeu ishoko raBaba vedu. 12Vaya vari panzira ndivo vaya vanonzwa shoko; ipapo dhiabhorosi anouya achibvisa shoko mumwoyo yavo, kuti varege kutenda vagoponeswa. 13Vaya vari paruware vanonzwa shoko vagorigamuchira nomufaro, asi havana midzi; vanotenda kwechinguva, vozodzokera shure panguva yokuedzwa. 14Zvakawira muminzwa: ava ndivo vanonzwa, asi pavanoenderera mberi, kufunganya kwoupenyu, nepfuma, nomafaro zvinovavhunga, uye zvibereko zvavo hazvitongoibvi. 15Asi iyo iri muvhu rakanaka: ava vanonzwa shoko nomwoyo wakatendeseka, wakanaka, voribatisisa, vobereka zvibereko nokutsungirira.”
Chiedza Chisingagoni Kuvanzwa
16“Hapana munhu anotungidza mwenje, achiufukidza nechirongo, kana kuuisa pasi pomubhedha; asi anouisa pachigadziko, kuti vaya vanopinda vaone chiedza. 17Nokuti hapana chakavanzika chisingazoratidzwi pachena, hapana chakahwandiswa chisingazozivikanwi uye chikabudiswa pachena. 18Saka chenjererai kuti munonzwa sei, nokuti ani naani anacho achawedzerwa; asi uyo asina, kunyange icho chaanofunga kuti anacho achazvitorerwa.”
Mhuri yaBaba vedu
19Mai vake navanunʼuna vake vakauya kwaari asi vakatadza kusvika kwaari nokuda kwavazhinji. 20Zvino akaudzwa kuti, “Mai venyu navanunʼuna venyu vamire panze, vachida kukuonai.”
21Asi akavapindura akati, “Mai vangu navanunʼuna vangu ndivo vaya vanonzwa shoko raBaba vedu vachiriita.”
Jesu Anorayira Dutu
22Rimwe zuva iye navadzidzi vake vakapinda mugwa. Akati kwavari, “Ngatiyambukire mhiri kwegungwa.” Saka vakasimuka.
23Pavakanga vachifamba nomugwa, akabatwa nehope. Dutu remhepo rikaburukira pagungwa; igwa rikazara nemvura, vakava mungozi. 24Vakamumutsa, vachiti, “Tenzi, Tenzi, toparara!” Akamuka, akatsiura mhepo nemvura yaipengereka; zvikamira, kukadzikama. 25Akavabvunza, achiti, “Kutenda kwenyu kuripi?” Vachitya uye vachishamiswa, vakataurirana vachiti, “Ko uyu ndiani? Anorayira kunyange mhepo nemvura, zvichimuteerera.”
Murume Akasunungurwa kuRegioni
26Zvino vakayambuka vakasvika kudunhu ravaGerasa, rakatarisana neGarirea. 27Jesu paakangoburukira panyika, murume akanga akabatwa namadhimoni aibva muguta akasangana naye. Kwenguva refu akanga asingapfeki nguo, uye akanga asingagari mumba asi aigara pakati pamakuva. 28Akati achiona Jesu, akadanidzira, akawira pasi pamberi pake, akati nenzwi guru, “Munodei neni, Jesu, Mwanakomana waMwari Wokumusorosoro? Ndinokukumbirisai, musanditambudza!” 29Nokuti Jesu akanga arayira mweya wakaipa kuti ubude mumurume uyu, nokuti waigara uchimubata; kunyange akanga achichengetwa akasungwa namaketani nemagoko, aiadambura achingotinhwa nedhimoni kuenda kurenje.
30Jesu akamubvunza, achiti, “Zita rako ndiani?” Iye akati, “Regioni,” nokuti madhimoni mazhinji akanga apinda maari.
31Uye akamukumbirisa kuti arege kuarayira kuti aende mugomba rakadzikadzika.
32Zvino kwaiva neboka guru renguruve raifura pamawere ipapo. Madhimoni akamukumbirisa kuti aarege apinde munguruve, akaatendera. 33Saka madhimoni akabuda mumurume akapinda munguruve; boka rikamhanya richidzika nemawere richipinda mugungwa rikanyura.
34Vafudzi vakati vachizviona, vakatiza, vakandozivisa izvi muguta nomuruwa. 35Vanhu vazhinji vakabuda kundoona zvakanga zvaitika. Vakati vasvika kuna Jesu, vakawana murume akanga abudiswa madhimoni agere patsoka dzaJesu, akapfeka nguo uye ane pfungwa dzakakwana—kutya kukavabata. 36Uye vaya vakanga vazviona vakavaudza kuti murume akanga akabatwa namadhimoni akanga aporeswa sei. 37Vanhu vose vedunhu ravaGerasa vakamukumbira kuti abve kwavari, nokuti vakanga vabatwa nokutya kukuru. Saka akapinda mugwa akadzokera. 38Murume akanga abudiswa madhimoni akakumbirisa kuti aende naye, asi Jesu akamuendesa, achiti,
39“Dzokera kumba kwako; undoudza kukura kwezvawakaitirwa naBaba vedu.” Akaenda, achiparidza muguta rose kukura kwezvaakanga aitirwa naJesu.
Kuporeswa Nokumutswa Nokutenda
40Zvino Jesu paakadzoka, vazhinji vakamugamuchira, nokuti vose vakanga vakamumirira. 41Murume ainzi Jairosi, mutungamiriri wesinagoge, akauya akawira patsoka dzaJesu, achimukumbirisa kuti auye kumba kwake, 42nokuti akanga ane mwanasikana mumwe oga, aiva namakore anenge gumi namaviri, akanga ofa. Jesu paakanga achienda, vazhinji vakatenderera vachimumanikidza. 43Kwaiva nomukadzi akanga aine chirwere chokubuda ropa kwamakore gumi namaviri; akanga apedza upenyu hwake hwose achiripa vararapi, asi pakanga pasina aigona kumuporesa. 44Akaswedera shure kwake, akabata mupendero wenguo yake, pakarepo kubuda kweropa rake kukamira.
45Jesu akati, “Ndiani andibata?” Vose pavakaramba, Petro akati, “Tenzi, vazhinji vakakukomberedzai vachikumanikidzai.”
46Asi Jesu akati, “Pane munhu andibata, nokuti ndanzwa simba richibuda mandiri.”
47Mukadzi akati achiona kuti haagoni kuramba akavanda, akauya achidedera, akawira pasi pamberi pake, akazivisa pamberi pavanhu vose chikonzero chaakamubata nacho uye kuti akaporeswa sei pakarepo.
48Iye akati kwaari, “Mwanasikana, kutenda kwako kwakuporesa; enda norugare.”
49Achiri kutaura, mumwe munhu aibva kumba kwomutungamiriri wesinagoge akati, “Mwanasikana wenyu afa; musaramba muchinetsa Mudzidzisi.”
50Asi Jesu akazvinzwa akamupindura, achiti, “Usatya; tenda chete, uye achaporeswa.”
51Akati asvika pamba, haana kutendera munhu kupinda naye kunze kwaPetro, naJohani, naJakobho, nababa namai vomwana.
52Vose vakanga vachichema vachimurira, asi iye akati, “Regai kuchema, nokuti haana kufa, akangorara chete.”
53Vakamuseka, vachiziva kuti akanga afa.
54Asi iye akamubata ruoko, akadanidzira, achiti, “Mwana, muka.”
55Mweya wake ukadzoka, akamuka pakarepo. Akavaudza kuti vamupe chokudya. 56Vabereki vake vakashamiswa, asi iye akavarayira kuti varege kuudza munhu zvakanga zvaitika.