Luke 9

Chapter 9.

9 ¹Jishuna tharāda khani chi hokhuilaga, athumli kameo saikorawui tungli kala kazāt raimi khavai pangshap kala sāshap mi. ²Kala ana ithumwui Avā wungram hāshok khavai kala kakazānao raimi khavai athumli chihovā.

³Chieina ana athumli hānga, "Shongfawui vang khikha makhuiphungalu: khāmshui, paidu, khamui, lupāla makhuiphungalu, kala phahon khani makhuiphungalu. ⁴Nathumna vākazang shim chili, chili pamlu, kala chiwui eina zatlu. ⁵Nathumli mazang ngasakngai keinung kachiva̱li, keinung chiwui eina shokthui tharan athumli shākhi sākhavai nathumwui pheili khalei chifa chi kathangtāhailu."

⁶Chieina athumna zatphoklaga, kha̱ kachiva̱li vāda, apam kachida paokaphā hāshokta kala kazāt raimida vaowa.

⁷Rammunga Herodna shokkahai saikora chi shālaga chukmaja̱haowa, kaja kaikhana "John chi kathiwui eina ringluihaira" da hāng, ⁸kha khangatei kaikhana "Elijah shokhaira" da hāng, kala khangatei kaikhana "kasāngkha marānbing akha ringluihaira" da hāng. ⁹Herodna hānga, "Ina John chi akui rangtāmi kahaina. Chithākha ina hithada tui shākahai a hi khipākhala?" Kala ana ali theingai khavai phāzatlakha.

Khamui Phangāna Mi Thing Phangā Mizā

¹⁰Paokazatbing latunga tharan, athumna sākahai saikora chi Jishuli unghāng. Chieina ana athumli khuilaga Bethsaida kaho keinung akhali ngathumsāda vāhaowa. ¹¹Kha mi kachungkhana theilaga ali shura. Ana athumli mathānthup samphangkhui, ithumwui Avā wungramwui pongli athumli hāng, kala raimi darkar kahaibing chi raimi. ¹²Thang peinanai tharan, tharāda khani china ali rāhāng, "Kuikhamareili khalei kha̱ kala keinungbingli vāda shimzun kala kashakazā samphang khavai yarui chi chihohaolu, kaja ithum hili ngachakyāng kahai apamli leiki."

¹³Ana hānga, "Nathumna athumli zākhavai khikha khamilu." Athumna ngahānkai, "Ithumna vāda yarui hi saikorawui vang kashakazā alokhui maningkha, ithumwuili khamui phangā kala khai khanimānga lei."

¹⁴Kaja mi thing phangā tākha leisai. Ana sākhangatha̱bingli hānga, "Athumli hangphangāngā eina ashang sālaga pamngasaklu."

¹⁵Athumna chithada sāda mi saikorali pamngasaka. ¹⁶Ana khamui phangā kala khai khani chi khuilaga, kazingram vāk yangkida, athum chi somilaga serkhaida, yarui chi mizā khavai sākhangatha̱bingli mihaida vaowa. ¹⁷Athum saikorana zāda ningyāng unglakhaowa; kala shaitai chi luk tharāda khani pemhaowa.

Nathumna I khipāna da hāngkhala?

¹⁸Thangkha, Jishuna kachiphun seihā sāda, awui sākhangatha̱bing ngalemli leilakha, ana athumli ngahāna, "Yaruina I khipāna da hāngkhala?"

¹⁹Athumna ngahānkai, "Kaikhana Ra̱hikme Johnna da hāng, kaikhana Elijahna da hāng. Khangatei kaikhana achālakhawui marān akha ringluihaira da hānga."

²⁰"Kha nathumna I khipāna da hāngkhala?" da ana ngahāna. Peterna ngahānkai, "Ithumwui Avāwui Khristana." ^a a v20 Peterna Jishuli "ithumwui Avāwui Khrista" da hoi tharan, ana Jishuli Avāna chihovā kahai Khrista china da shitsangda hānga—ali chihovā kahai Avā eina makhalatta Anaomayara chi.

Miwui Naomayarana Kachot Kachāng Phungphalungra

²¹Jishuna athumli saklak eina ningmi, hi khipālikha mahānglakalu da kasoi,

²²da hānga, "Miwui Naomayarana kachot kachāng kachungkha phungphalungra kala kathānabing, pāngmon akhokabing kala ain kathembingna ali makhuisangmara, kala shaothathaora, kha kakathuma thangli ringluira."

²³Chiwui thili ana athum saikorali hānga, "Kachikathā mina ithili shur khavai jiakha, awui khalatta chi malaihaida, thangkachida awui krush chi phungda ithili shurranu. ²⁴Kaja kachikathāna awui mirin kan khavai saakha shimānra, kha kachikathāna iwui vang eina awui mirin shimānra china chi kanra. ²⁵Mi akhana okathui katonga samphanglaga, khalattali shimānra lah khuishokhaora jiakha, chi khi kankhanā leikhala? ²⁶Kachikathāna ili kala iwui tuili kakhayak samphangakha, miwui Naomayarana awui khalattawui tekmatei kala Avāwui tekmatei kala kazingrao katharabingwui tekmatei eina kharā tharan, ali kakhayak samphangra. ²⁷Kha ina nathumli kachangkhat kahāngna, hili nganingda kaji mibingna, ithumwui Avā wungram matheiranglakha kathi chi mamazapki."

Avāna Awui Naomayarali Tekmatei Ngasak

²⁸Tui hi hāngkahaiwui thili thang chishat shakha khaleilaga, Jishuna Peter, John kala James athummāngli seihā sā khavai kaphungli thankai. ²⁹Ana seihā sāda leilakha, awui mai azak onhaowa, kala awui kachon hānshi kahai charshihai ngasāhaowa. ³⁰Kala mi khani ali chān tākhangazek leisai, ani Moses eina Elijahna. ³¹Anina tekmatei eina rāchitheida, ana Jerusalemli ungshung khavai nganaihaira awui thuikahaiwui pongli ngazeka.

³²Peter eina awui ngasotnaobing pikakhui na khalaphaowa; mathot peihaida, athumna awui tekmatei kala ali ngasoda khanganing mi khani chi thei. ³³Athum awui eina zatthui tharan, Peterna Jishuli hithada hānga, "Amei, ithum hili lei chi phālakhaira. Akha nawui vang, akha Moseswui vang, kala akha Elijahwui vang, ithumna rāmnao kathum sakhuisa." Ana khi hāngkhala kaji matheirarmana.

³⁴Ana ngazekta leilakha, muiyā akha rāda athumli khaya̱ eina khaluiphinhaowa; chi kazang tharan athum ngacheehaowa.

³⁵Muiyāwui eina akhon akhana hānga, "Hi iwui kapang kahai Anaomayarana; ali nganākhuilu!" ^b b v35 Jishuwui azak onphalung tharan, Avā khalattawui akhonna Jishuli "iwui Anaomayara, iwui kapang kahaia" da hoi—Avāna ningyāng ungngasakwui Anaomayara chiya, ara tekhamatei eina phongshokhaira.

³⁶Akhon chi pei tharan, Jishu maningla khipā leisā chi theihaowa. Athumna kasaikha pamda, chi atambingli athumna kathei chi khipālikha mahānghaimana.

Avā Akhawui Naomayara Tangkhamangwui Eina Ningkhān Ngasaka

³⁷Akhama kathā, athum kaphungwui eina katā tharan, mi kachungkhana ali samphanga. ³⁸Yaruiwui ngachaili mi akhana panglāk eina vaoda hānga, "Ojā, ina nali kapona, iwui naomayarali khayangrāmilu, kaja a iwui naomāngna. ³⁹Manglā akhana ali nganura, kala ngachālak eina vaoshoka; ali aporhop shokranglakha eina tangda nganurkazama, ali mana̱rimda chiholaga, ali sākazam ngasaka. ⁴⁰Nawui sākhangatha̱bingli chi kashamshok khavai ina poi, kha athum masāmirarthuwa."

⁴¹Jishuna ngahānkai, "Shitkasang makhaleia, thot ngakaikashe kaji, ina nathum ngalemli karankha ngasopamra kala nathumli karankha ja̱mira? Nawui naomayarali hili khuirālu."

⁴²Naoshinaopā chi rārā tharan, kameo china ali horkarsanga kala ali nganurkazama. Kha Jishuna makathar manglā chili kaharda, naoshinaopā chi raimihailaga, ali awui avāli mihaowa.

Miwui Naomayara Horsangmira

⁴³Saikorana ithumwui Avāwui khangamkharei chili matakhakhaowa. Jishuna kasā saikorali mi saikora matakhakhailakha, ana awui sākhangatha̱bingli hānga,

⁴⁴"Tui hibing nathumwui khanāli kaziphailu: Miwui Naomayarali kashap eina mibingwui pāngli horsangmira."

⁴⁵Kha athumna tui hiwui bhap matārarthuwa. Chi athumwui eina ngathumhaida athumna matheishingkhuipaithuwa, kala chiwui pongli ali ngahān khavai ngacheelakhaowa.

⁴⁶Ara athumwui ngachaili kachipā reimeikapkhala kajiwui pongli ngapai khangarok shokhaowa. ⁴⁷Kha Jishuna, athumwui ningwui kaphaning theihaoda, naoshinao akha khuida awui ngalemli nganing ngasakta,

⁴⁸kala athumli hānga, "Kachikathāna naoshinao hili iwui ming eina khuikasanga china ili khuikasanga, kala ili khuikasanga china ili kashirāta chilila khuikasanga. Kaja nathum saikorawui ngachaili teomeikap kaje a chi reimeikap kajena."

⁴⁹Johnna hānga, "Ojā, mi akhana nawui ming eina kameo kashamshok ithumna theila, chiwui vang ali masāluilu da ithumna khāmhaowa, kaja a ithumwui thi mashurmana."

⁵⁰"Ali masāluilu," Jishuna ali hānga, "kaja nathumli mangakaikashe a china nathumwui mina."

Jishuna Awui Mangā Jerusalemshong Chipama

⁵¹Ali kazingramshong khāngkai ngasak khavai atam nganai tharan, Jishuna Jerusalemli vākhavai awui mangā thaklāk eina chipama. ⁵²Ana ali rida paomebing chihovai. Athumna awui vang khangarān sākhavai Samarianaowui kha̱lung akhali vāzanga, ⁵³kha apam chiwui mibingna ali mazang ngasakmana, kaja ana Jerusalemli vākida zatta leisai. ⁵⁴Chi kathei eina, sākhangatha̱ James eina Johnna hānga, "Proho, kazingramwui eina mei kaho tāda athumli chuithatra ngasakmi kaji nana ningkachāngngaila?"

⁵⁵Kha ana kapeikhaung eina athumli kharara. ⁵⁶Chieina athum kha̱lung khangatei akhali vāhaowa.

Jishu Shurkahaiwui Aman

⁵⁷Athum shongfali zatta leilakha, kachikathā mi akhana ali hānga, "Nana vāpam kachida ina nathi shurra."

⁵⁸Jishuna hānga, "Ramfabing chi akhur lei, kazingram vānaobing chi athip lei, kha miwui Naomayara chi awui ngayaizang khavai apam akhala maleimana."

⁵⁹Mi khangatei akhali ana hānga, "Ithili shurhairalu." Kha ana ngahāng, "Proho, ina rida ishāvāli vāda ungchifahaifaga."

⁶⁰Kha Jishuna ali hānga, "Kathena athum khalattawui kathi chifaranu, kha na vāda ithumwui Avā wungram vaomalānmilu."

⁶¹Khangatei akhana hithādala hānga, "Proho, ina nathi shurra, kha rida iwui shimli khaleibingli kapāng shālam sākhuihaifaga."

⁶²Jishuna ngahānkai, "Lui vākhavai apāng sanglaga kapei yangtai mi khipālikha ithumwui Avā wungramwui vang maleishimana."