Luke 10

10 ¹Chiwui thili Prohona khangatei hangshini khani pangkhuilaga, a khalatta vākhangarān keinung kala apam saikorali, awui rida khani khani chihovai.

²Ana athumli hānga, "Māhā kachungkha lei, kha ot kasā mi machungmana. Chiwui vang eina māhāwui Avāli awui māhāli ot kasā mibing chihovā khavai polu. ³Vālu! Yanglu, ina nathumli kharangwui ngachaili yaonao thada kachihona. ⁴Lupākhaola, paidula, pheihopla makhuiphungalu, kala shongfali khipākhali sālam mahānglakalu. ⁵Nathumna vākazang shim chili, khare 'Shim hili chingri kahai leiranu' da hānglu. ⁶Apam chili chingri kahai mi akha leiakha, nathumwui chingri kahai awuitungli ngasāmra; maningakha, chi nathumli latunghaora. ⁷Chikathā shim chili pamlu, athumna khami chi phāda zāda, kaja ot kasā mi china awui ngalangman samphang ngayia. Shim akha eina khangatei shimli mazatlakalu. ⁸Nathumna keinung akhali vāzangkhaleoda athumna nathumli zang ngasak tharan, nathumwui mangāli sangkahai chi shailu. ⁹Apam chili kazābing raimilu, kala athumli 'Ithumwui Avā wungram chi nathumli nganaihaira' da hānglu. ¹⁰Kha nathumli mazang ngasak keinung akhali nathum vāzang tharan, chiwui chānreili kayāngda hānglu, ¹¹'Nathumwui keinungwui chifa ithumwui pheili kakā chi, nathumli kathangtāhaira. Chithālala hi theilu: Ithumwui Avā wungram chi nganaihaira.' ¹²Ina nathumli kahāngna, bichar sāthanghon Sodomli kasāliva chikathā keinung chili sakmeida bichar sāra.

¹³"Chorazin, ringkashi nali ngasāranu! Bethsaida, ringkashi nali ngasāranu! Nathumwui alungli sākahai matakhak kahai ot chi Tyre eina Sidonli sāsāsi kaje, athumna achā bora ngavaida hotlālungli pamda ningngateihairara. ¹⁴Kha bichar sāthanghon, nathumli Tyre eina Sidonli kasāliva sakmeida bichar sāra. ¹⁵Kala na Capernaum, kazing kāzokta nali masot mimaraola? Kha na tāshungda kazeiramli ngakhuntāra. ¹⁶"Nathumli nganākasang a china ili nganākasang; nathumli mamayākasang a china ili mamayākasangna; ili mamayākasang a china ili kashirāta chilila mamayākasangna."

¹⁷Hangshini khani china khamathānna latunglaga hānga, "Proho, kameobing nawui ming eina ithumli hamsang."

¹⁸Ana athumli hānga, "Satanli kazingramwui eina rikhān khangashei thāda pitākasā ina theihaira. ¹⁹Yanglu, ina nathumli phara̱ eina seithat naikazam khavai, kala yangkashewui pangshap saikorawuitungli pangshap sangkahaina; khikhala nathumli sākashi masāmara. ²⁰Kha manglābing nathumli hamsang chi maringphāhailu, kha nathumwui aming kazingramli kapihaida lei kaji chi ringphālu."

²¹Chi atam chili Jishuva Manglā Katharali mathānda hānga, "Avā, kazingram eina okathuiwui Proho, ina nali sochikata, kaja nana hibing thangkhamei eina ngakaishitingting kahaibingwui eina ngathumhailaga, naoshinaobingli phongngasakhai. Mha, Avā, chikatha chi nawui lukhamashanwui kaphaningna."

²²"Ot saikora hi iwui Avāna ili sangkahaina. Anaomayara chi khipākhala da Avā mashichinla khipānakha matheimana; kala Avā chi khipākhala da Anaomayara, kala Anaomayarana ali phongngai a chi mashichinla, khipānakha matheimana."

²³Chiwui thili sākhangatha̱bingli ngareiungda, ana athum māng khaleili hānga, "Nathumna kathei chi kathei mik chi sokhamina! ²⁴Kaja ina nathumli kahāngna, marānbing eina awunga kachungkhana nathumna kathei chi theingai matheithuwa, kala nathumna shāki chi shāngaida mashāthuwa."

Kaphā Samarianaowui Chānjam

²⁵Phayetme akhana nganingkada ali chāng tamyanga: "Ojā, katang makhavai kharing samphang khavai ina khi sārakhala?"

²⁶Ana ali hānga, "Ainli khi kapihaida leikhala? Nana kathada pākhala?"

²⁷Ana ngahānkai, "Nawui Avāli nawui wuklung katongana, nawui manglā katongana, nawui yāng katongana, kala nawui ning katongana leishilu; kala nawui khongnainaoli nakhalatta thāda leishilu."

²⁸Ana ali hānga, "Na mashungda ngahānkāhaira. Hi sālu, chithākha na ringra."

²⁹Kha akhalatta mashungkhui khavai ngaida Jishuli ngahāna, "Chithākha iwui khongnainao chi khipākhala?"

³⁰Jishuna hānga, "Mi akhana Jerusalemwui eina Jericholi tunga, kala khangaponabingwui pāngli tāhaowa. Athumna awui kashankachon raimihailaga ali shaoshaomi, kala ali tangkhai thihairasai horhaida vāhaowa. ³¹Chitharan, chan kahaina pāngmon akhana chi apong chili tunga; ali kathei tharan, ana angatar vākna kānhaowa. ³²Chi tākam eina Levinao akhana apam chili rāda, ali theilaga, angatar vākna kānhaowa. ³³Kha Samarianao akhana chi apong chili zatta ali nila, kala ali kathei tharan, ali lukhamashana pemtinghaowa. ³⁴Ana ali khalei rāda, awui khamā ngahāmi, chili thao eina drakhāra̱ heirorda, ali akhalatta sātungli tongngasakta, ali shimzun akhali khuivāda, kala ali khuipama. ³⁵Akhama kathā ana lupāsā pheisā khani khuishokta pikhavai shimva̱li milaga hānga, 'Ali mayonlu. Nana khangatei khami chi, ina latkhaung tharan tandi khamira.' ³⁶Hi mi kathum hiwui lungli khipāna khangaponbing ngachaili tāhaowa miwui khongnainao sāhaowa da nathumna phaninga?"

³⁷Ana hānga, "Ali khalumashanmia china." Jishuna ali hānga, "Vālaga na chithada sālu."

Martha eina Mary

³⁸Athum zatlakha eina, Jishuna kha̱ akhali azanga. Martha kaho sha̱nao akhana ali awui shimli mathānthup samphangkhui. ³⁹Awui Mary kaho achonva̱ akha leisai, ana Prohowui pheizingli pamda awui tamkachithei nganākhui. ⁴⁰Kha Marthana otram ngatha̱ saikorawui vang ning chotta leisai. Ana Jishuli rāhānga, "Proho, iwui achonva̱na ili amāng eina otram ngatha̱ khavai horhaira chi nana khikhanada makhuimara? Ili ngachonmi khavai ali hānglu."

⁴¹Kha Prohona ali ngahānkai, "Martha, Martha, na ot kachungkhawui vang malungringa kala wukkhananga, ⁴²kha ot akhamāng zanga. Maryna kaphā yar chi kapangkhuihaira; chi awui eina makhuithuipaimana."