Luke 11

Chapter 11.

11 ¹Ana apam akhali seihā sāda leisai. Ana seihā sā kuphailaga, awui sākhangatha̱bing akhana hānga, "Proho, Johnna awui sākhangatha̱bingli tamchithei kahai thada, ithumli seihā sā tamchitheimilu."

²Ana athumli hānga, "Nathumna seihā sā tharan, hithāda hānglu: Avā, Nawui ming kathara horanu. Nawui wungram rāshungmilu. ³Zimiksho kachida ithumli thangthangwui kashakazā chi khamilu. ⁴Kala ithumwui morei ithumli kapheomilu, kaja ithumnala ithumli khayonkhamāng kasā mi kachiva̱li pheomi. Kala ithumli kasuili mazang ngasakmialu."

⁵Ana athumli hānga, "Nathumwui ngachaili khipāna ngasotnao leida, ngayā sailung awuili vāda ali hāngra, 'Itao, ili khamui kathum chishutlu,'

⁶'kaja iwui ngasotnao akha shongzā eina rākahānga, kala ali khami khavai iwuili khikha maleila,'

⁷"kala ana alung eina ngahānkai, 'Ili zakkashi masāmialu; khāmong shunghairasai, kala iwui naongarā ila ngasopamda petli pihaira. Ina ngakarthuida nali khikha mamirarmara'?

⁸"Ina nathumli kahāngna: ani ngasotnao ngasāwui vang eina ana ngakarthuida ali khikha mamirarmara, a kapo ngasotnaona kakhayak makathei mapheihaila kapo kahaiwui vang eina, a kape china ngakarthuida ali sāvai khavai saikora chi mira."

⁹"Ina nathumli kahāngna: nathumna polu, chieina nathumli mira; nathumna phālu, chieina nathumna samphangra; nathumna shaolu, chieina nathumli shomira.

¹⁰"Kapo mi saikorana samphangra; kaphā mi china samphangra; kala kashao mili shomira.

¹¹"Nathumwui ngachaili avā akhana, awui naomayarana khai poakha, khaiwui mahutli ali phara̱ mira?

¹²"lah harra̱ poakha, ali seithat mira?

¹³"Maphāsālala nathumna, nathumwui naongarā chili khamathā ot mira mitheiakha, kazingramli khalei Avāna ali kapobingli Manglā Kathara chi kayākha mataimeida mirakhala!"

Ithumwui Avā Wungram Rāshunghaira

¹⁴Ana kameo khak khangasha̱ akha kashamshokmida leisai. Kameo chi shok tharan, khak khangasha̱pā chi matuipaihaowa, kala mi kachungkhana matakhakhaowa. ¹⁵Kha athum kaikhana hānga, "Kameobingwui akhavā Beelzebulwui pangshap eina ana kameobing kashamkashokna," ¹⁶kala kateibingna, ali chāng yangda, awuili kazingramwui machut chithei khavai phanganaowa.

¹⁷Kha athumwui kaphaning chi theihaoda ana athumli hānga, "Khalatta ngayarkazam kahai wungram kachiva̱ shimānhaora, kala shimkhur akha shimkhur akhali ngayarkazamhaiakha tāzangra.

¹⁸"Satanla khalatta ngakai ngarokta mijang leingarokhaiakha, awui wungram chi kathada nganingshapra? Kaja nathumna, ina Beelzebulwui pangshap eina kameobing kashamkashokna da hānga.

¹⁹"Ina kameobing chi Beelzebulwui mangā eina kashamshoka jiakha, nathumwui mibingna khipāwui mangā eina kashamshokra? Chithākha athumna nathumli bichar sāra.

²⁰"Kha ina ithumwui Avāwui pāngmareng eina kameobing kashamshokakha, ithumwui Avā wungram nathumwuitungli rāhaira.

²¹"Mi pangmei akhana raisari katonga shaksāda awui konung khalatta khamayona tharan, awui lan china tāphuphai.

²²"Kha ali pangmeira mi akhana nganang khangasaklaga ali khayuiana, kashaopa china pangmei mina shitsanga raisari chi khuithuilaga awui ngaponkakhui ngayara."

²³"Kachikathā ili ngasoda maleida chi ili ngakaikashe mina, kala ili ngasoda makakazipa mi china sākakathānana."

²⁴"Makathar manglāna mi akhawui eina shok tharan, tara̱ makhalei ngaleitungli ngasāmkakhui phāda zata; masamphangla, 'Ina shok kahai shimli I latungra' da hānga. ²⁵Kala chi rā tharan, shim chi kāt sākahai kala khare khanao sākahai theira.

²⁶"Chieina chi vālaga khalatta eina zakshimeikharda manglā khangatei shini khuirā; athum zangda chili leira, kala chikathā miwui anaolamshong mirin chi khare eina zakshimeikharhaora."

²⁷Ana chi hāng tharan, yaruiwui ngachaili khalei sha̱nao akhana panglāk eina vaoda hānga, "Nali khuikazang naopam, kala nali kashiman na̱ china sokhami ngasāranu!"

²⁸Kha ana hānga, "Chithālala, ithumwui Avāwui tui shālaga chi khamayonbing sokhami ngasāranu!"

Jonahli Reikhameia Kachikathā Hili Leili

²⁹Mi kachungkha rākazip tharan, ana hānga, "Thot hiya makaphā thotna. China machut phai, kha Jonahwui machut maningla chili khangatei machut mamira. ³⁰Kaja Jonahna Ninevehwui mibingli machut sākahai thada, chi tākam eina miwui Naomayarala thot hili machut sāra. ³¹Azingshong awungva̱na bichar sāthanghon thot hiwui mibing ngasoda ngakarthuira kala athumli khayon phenra; kaja ana Solomonwui thangkhamei shākhavai okathui hupta eina rāhānga, kala yanglu, Solomonli reikhameia kachikathā akha hili leili.

³²"Ninevehwui mibingna bichar sāthanghon thot hili ngasoda ngakarthuira kala chili khayon phenra; kaja Jonahna pao hāshokta rai eina athumna hengsāda ning ngateihaowa, kala Jonahli reikhameia kachikathā akha hili leili."

Phasāwui Thaomei

³³"Khipānakha thaomei shārda kathuk pamli lah māchumwui azingli mahaimana, kha thaomei apheilila haihai, chithākha ngazangabing china kahor theira. ³⁴Namikna naphasāwui thaomeina: chi mathingakha, naphasā katonga horchamrihaira; makaphāakha, naphasā katonga tangkhamangna pemtinghaira.

³⁵"Chiwui vang eina, nawuili khalei kahor chi tangkhamang maningmana kaji ningngasharlu.

³⁶"Chieina nawui phasā katonga kahorna pemtinghai, tangkhamang kazang akhanidala maleiakha, thaomeina awui kahor nawuitungli horvā thāda, chi katonga horra."

Arema Dharmali Kakhanang

³⁷Ana hānglakha Pharisee akhana phazāngarum khavai ali hoi; chieina ana shimli vāda phazā khavai pama. ³⁸Ana phazāt mangāli mapheorilui kaji theilaga Phariseena matakhakhaowa.

³⁹Chieina Prohona ali hānga, "Ara nathum Phariseebingna tengkot kala khongpheiwui ayar chi pheomathai, kha alungliya kākharām eina makhayā otna pemtinghai. ⁴⁰Nathum mangkhama̱bing! Ayar sākahai chi ana alunglila masāhaimana?

⁴¹"Kha alungli khalei otbing chi kachāmbingli khamilu, chithākha saikora nathumli tharpaira.

⁴²"Kha nathum Phariseebing, nathumli kakhanang ringkashi ngasāranu! Nathumna mintā, rue kala yangkharing saikorawui tithe mi, kha mashun kala ithumwui Avā leikashi hikathāthā mamayonmana. Hibing hi sahairarāna, kateibing chila masāmara majipaimana.

⁴³"Nathum Phariseebing, nathumli kakhanang ringkashi ngasāranu! Kaja nathumna synagogueli mathāmeikap pam kala leihngapha̱lungli shālam kasā ningchānga.

⁴⁴"Nathumli kakhanang ngasāranu! Kaja nathum hi matheikasa chikhur kathāna, kala mibingna matheila chiwui tungli zata."

⁴⁵Ain kathembingwui ngachaili akhana ali ngahānkai, "Ojā, hibing hāngda nana ithumlila chipatra."

⁴⁶Chieina ana hānga, "Nathum ain kathembinglila kakhanang ngasāranu! Nathumna mibingli phungki kharita otphun chiphuna, kha otphun chibing nathumna pāngmareng akha einala masingmana.

⁴⁷"Nathumli kakhanang ngasāranu! Nathumna marānbingwui chikhur sākā, kha athumli shaothatkahaibing chi navā ngarāna.

⁴⁸"Chieina nathum hi shākhi ngasāhaoda navā ngarāwui otsak chi khamayā thāhaowa, kaja athumna athumli shaothata kala nathumna athumwui chikhur sākā.

⁴⁹"Chieina ithumwui Avāwui thangkhameila hānga, 'Ina athumli marānbing kala paokazatbing chihovāra; athumwui ngachaili kaikhali athumna shaothatra kala rekharekra.'"

⁵⁰"Chithākha okathui masāranglakhawui eina marānbing saikorawui ashee tākahai chi thot hiwuitungli tāra,

⁵¹"Abelwui ashee eina thuilaga Zechariahwui ashee eina tangda, ana hanphut kala kathara khorumshimwui ngachaili thihaowa. Mha, ina nathumli kahāngna, chi thot hiwuitungli tāra.

⁵²"Ain kathembing, nathumli kakhanang ringkashi ngasāranu! Khikhalajila nathumna theikakhuiwui sho chi khuilaga horhaira; nathum khalattala mazangmana, kala zangki kajibingli khāmhaowa."

⁵³Ana apam chiwui eina shok tharan, ain kathembing eina Phariseebingna ali panglāk eina houngphoka, apong kachungkhawui maramli matui khavai ali ngaheida, ⁵⁴ana hāngki kaji tui kateokha akhali ali tukkhui khavai rimpama.