ሉቃስ 11

ምዕራፍ 11።

11 ¹በአንድ ስፍራ ሲጸልይ ነበር፤ በጨረሰም ጊዜ፣ ከደቀ መዛሙርቱ አንዱ፣ “ጌታ ሆይ፣ ዮሐንስ ደቀ መዛሙርቱን እንዳስተማረ፣ እኛንም መጸለይ አስተምረን” አለው።

²እርሱም እንዲህ አላቸው፤ “ስትጸልዩ እንዲህ በሉ፦ አባት ሆይ፣ ስምህ ይቀደስ። መንግሥትህ ትምጣ። ³የዕለት እንጀራችንን በየዕለቱ ስጠን። ⁴ኀጢአታችንንም ይቅር በለን፤ እኛ ራሳችን ደግሞ የበደሉንን ሁሉ ይቅር እንደምንልና፤ ወደ ፈተናም አታግባን።”

⁵እንዲህም አላቸው፤ “ከእናንተ ማን ወዳጅ ኖሮት በእኩለ ሌሊት ወደ እርሱ ሄዶ፣ ‘ወዳጄ ሆይ፣ ሦስት እንጀራ አበድረኝ፣’

⁶“‘ወዳጄ ከመንገድ ስለ መጣብኝ፣ የማቀርብለትም ነገር ስለሌለኝ ነው፣’

⁷“እርሱም ከውስጥ ሆኖ፣ ‘አታስቸግረኝ፤ በሩ አሁን ተዘግቷል፤ ልጆቼም ከእኔ ጋር በአልጋ ላይ ናቸው፤ ተነሥቼ ምንም ልሰጥህ አልችልም’ ብሎ ይመልሳል?

⁸“እላችኋለሁ፤ ወዳጁ ስለ ሆነ ብቻ ተኝቶ የነበረው ተነሥቶ ባይሰጠውም እንኳ፣ ለማኙ ያለ ኀፍረት አጥብቆ ስለ ለመነ ብቻ፣ ተኝቶ የነበረው ተነሥቶ የሚያስፈልገውን ሁሉ ይሰጠዋል።”

⁹“እላችኋለሁ፤ ለምኑ፣ ይሰጣችኋል፤ ፈልጉ፣ ታገኛላችሁ፤ አንኳኩ፣ ይከፈትላችኋል።

¹⁰“የሚለምን ሁሉ ይቀበላል፤ የሚፈልግ ያገኛል፤ ለሚያንኳኳም ይከፈትለታል።

¹¹“ከእናንተ መካከል ልጁ ዓሣ ቢለምነው፣ በዓሣ ፈንታ እባብ የሚሰጠው የትኛው አባት ነው፤

¹²“ወይስ እንቍላል ቢለምነው ጊንጥ ይሰጠዋልን?

¹³“እናንተ ክፉዎች ሆናችሁ ለልጆቻችሁ መልካም ስጦታ መስጠት ካወቃችሁ፣ የሰማዩ አብ ለሚለምኑት መንፈስ ቅዱስን እንዴት አብልጦ አይሰጥም!”

የአባታችን መንግሥት መጥቷል

¹⁴ዲዳ የሆነን ጋኔን ያወጣ ነበር። በወጣም ጊዜ ዲዳው ተናገረ፤ ሕዝቡም ተደነቁ። ¹⁵ከእነርሱ አንዳንዶቹ ግን፣ “በአጋንንት አለቃ በብዔል ዜቡል አጋንንትን ያወጣል” አሉ፤ ¹⁶ሌሎች ደግሞ እየፈተኑት ከሰማይ ምልክት ከእርሱ ይሹ ነበር።

¹⁷እርሱ ግን ሐሳባቸውን አውቆ እንዲህ አላቸው፤ “እርስ በርሱ የተከፋፈለ መንግሥት ሁሉ ይፈርሳል፤ እርስ በርሱ የተከፋፈለ ቤትም ይወድቃል።

¹⁸“ሰይጣንም እርስ በርሱ ተከፋፍሎ ከሆነ፣ መንግሥቱ እንዴት ሊቆም ይችላል? አጋንንትን በብዔል ዜቡል አወጣለሁ ትላላችሁና።

¹⁹“እኔ አጋንንትን በብዔል ዜቡል የማወጣ ከሆነ፣ ልጆቻችሁስ በማን ያወጧቸዋል? ስለዚህ እነርሱ ይፈርዱባችኋል።

²⁰“እኔ ግን አጋንንትን በአባታችን ጣት የማወጣ ከሆነ፣ የአባታችን መንግሥት ወደ እናንተ ደርሷል።

²¹“ኀይለኛ ሰው ሙሉ በሙሉ ታጥቆ የራሱን ግቢ ሲጠብቅ፣ ንብረቱ ተጠብቆ ይኖራል።

²²“ነገር ግን ከእርሱ የሚበረታ መጥቶ ቢያጠቃውና ቢያሸንፈው፣ ያጠቃው ሰው ኀይለኛው ሰው ይታመንበት የነበረውን ጋሻ ጦር ይወስድበታል፤ ምርኮውንም ይከፋፍላል።

²³“ከእኔ ጋር ያልሆነ ሁሉ የሚቃወመኝ ነው፤ ከእኔ ጋር የማይሰበስብም ይበትናል።

²⁴“ርኩስ መንፈስ ከአንድ ሰው በወጣ ጊዜ፣ ዕረፍት እየፈለገ በደረቅ ስፍራዎች ያልፋል። ሳያገኝም ሲቀር፣ ‘ከወጣሁበት ወደ ቤቴ እመለሳለሁ። ²⁵በመጣም ጊዜ ቤቱን ተጠርጎና ተስተካክሎ ያገኘዋል።

²⁶“ከዚያም ሄዶ ከራሱ ይልቅ ክፉዎች የሆኑ ሌሎች ሰባት መናፍስት ያመጣል፤ ገብተውም በዚያ ይኖራሉ፤ የዚያም ሰው የኋለኛው ኑሮ ከፊተኛው የባሰ ይሆናል።”

²⁷ይህን ሲናገር፣ ከሕዝቡ መካከል አንዲት ሴት ድምፅዋን ከፍ አድርጋ፣ “አንተን የተሸከመ ማኅፀን፣ አንተንም ያጠባ ጡት ብፁዕ ነው!” አለች።

²⁸እርሱ ግን፣ “ከዚህ ይልቅ የአባታችንን ቃል ሰምተው የሚጠብቁት ብፁዓን ናቸው!” አለ።

ከዮናስ የሚበልጥ እዚህ አለ

²⁹ሕዝቡም እየተሰበሰቡ ሳሉ፣ እንዲህ ማለት ጀመረ፤ “ይህ ትውልድ ክፉ ትውልድ ነው። ምልክት ይሻል፤ ነገር ግን ከዮናስ ምልክት በስተቀር ሌላ ምልክት አይሰጠውም። ³⁰ዮናስ ለነነዌ ሰዎች ምልክት እንደ ሆነ፣ የሰው ልጅም ለዚህ ትውልድ እንዲሁ ይሆናልና። ³¹የደቡቧ ንግሥት በፍርድ ቀን ከዚህ ትውልድ ሰዎች ጋር ተነሥታ ትፈርድባቸዋለች፤ የሰሎሞንን ጥበብ ለመስማት ከምድር ዳርቻ መጥታለችና፤ እነሆም፣ ከሰሎሞን የሚበልጥ እዚህ አለ።

³²“የነነዌ ሰዎች በፍርድ ቀን ከዚህ ትውልድ ጋር ተነሥተው ይፈርዱበታል፤ ዮናስ በሰበከ ጊዜ ንስሓ ገብተዋልና፤ ከዮናስም የሚበልጥ እዚህ አለ።

የሰውነት መብራት

³³“ማንም መብራት አብርቶ በጓዳ ወይም ከዕቃ በታች አያስቀምጥም፤ ነገር ግን የሚገቡት ብርሃኑን እንዲያዩ በመቅረዝ ላይ ያስቀምጠዋል። ³⁴የሰውነትህ መብራት ዓይንህ ነው፤ ዓይንህ ጤናማ ሲሆን፣ ሰውነትህ ሁሉ በብርሃን ይሞላል፤ ክፉ ሲሆን ግን ሰውነትህ በጨለማ ይሞላል።

³⁵“ስለዚህ በአንተ ውስጥ ያለው ብርሃን ጨለማ እንዳይሆን ተጠንቀቅ።

³⁶“እንግዲህ ሰውነትህ ሁሉ ጨለማ ክፍል ሳይኖረው በብርሃን ከተሞላ፣ መብራት በጨረሩ እንደሚያበራልህ፣ ሙሉ በሙሉ ያበራል።”

ለከንቱ ሃይማኖት ወዮ

³⁷ሲናገርም፣ አንድ ፈሪሳዊ አብሮት ይበላ ዘንድ ጋበዘው፤ እርሱም ገብቶ በማዕድ ተቀመጠ። ³⁸ፈሪሳዊውም ከመብላቱ በፊት አስቀድሞ አለመታጠቡን አይቶ ተደነቀ።

³⁹ጌታም እንዲህ አለው፤ “እናንተ ፈሪሳውያን አሁን የጽዋውንና የወጭቱን ውጭ ታጸዳላችሁ፤ ውስጣችሁ ግን ስግብግብነትና ክፋት ሞልቶበታል። ⁴⁰እናንተ ሞኞች! ውጭውን የሠራ ውስጡንም ደግሞ አልሠራምን?

⁴¹“ነገር ግን በውስጥ ያለውን ለድኾች ስጡ፤ ሁሉም ይነጻላችኋል።

⁴²“ነገር ግን እናንተ ፈሪሳውያን፣ ወዮላችሁ! የአዝሙድን፣ የጤና አዳምንና የቅጠላ ቅጠል ሁሉን አሥራት ታወጣላችሁ፤ ፍትሕንና የአባታችንን ፍቅር ግን ትተዋላችሁ። ሌሎቹን ሳትተዉ እነዚህን ማድረግ ይገባችሁ ነበር።

⁴³“እናንተ ፈሪሳውያን፣ ወዮላችሁ! በምኵራብ የከበሬታ ወንበርን፣ በገበያም ሰላምታ መቀበልን ትወዳላችሁና።

⁴⁴“ወዮላችሁ! ምልክት እንደሌላቸው መቃብሮች ናችሁና፤ ሰዎችም ሳያውቁ በላያቸው ይሄዳሉ።”

⁴⁵ከሕግ ሊቃውንትም አንዱ መልሶ፣ “መምህር ሆይ፣ ይህን በመናገርህ እኛንም ታዋርደናለህ” አለው።

⁴⁶እርሱም እንዲህ አለ፤ “እናንተ የሕግ ሊቃውንትም፣ ወዮላችሁ! ሰዎችን ሊሸከሙት የሚከብድ ሸክም ታሸክማላችሁ፤ እናንተ ግን ሸክሙን በአንድ ጣታችሁ እንኳ አትነኩትም።

⁴⁷“ወዮላችሁ! የነቢያትን መቃብር ትሠራላችሁ፤ የገደሏቸው ግን አባቶቻችሁ ናቸው።

⁴⁸“እንግዲህ የአባቶቻችሁን ሥራ ትመሰክራላችሁ፤ ትስማሙበታላችሁም፤ እነርሱ ገድለዋቸዋልና፤ እናንተም መቃብራቸውን ትሠራላችሁ።’

⁴⁹“ስለዚህ የአባታችን ጥበብ ደግሞ እንዲህ አለች፤ ‘ነቢያትንና ሐዋርያትን እልክላቸዋለሁ፤ ከእነርሱም አንዳንዶቹን ይገድላሉ፤ ያሳድዳሉም።’

⁵⁰“ስለዚህ ዓለም ከተመሠረተ ጀምሮ የፈሰሰው የነቢያት ሁሉ ደም ከዚህ ትውልድ ይፈለግ ዘንድ፤

⁵¹“ከአቤል ደም ጀምሮ እስከ ዘካርያስ ደም ድረስ፤ እርሱም በመሠዊያውና በቤተ መቅደሱ መካከል ተገደለ። አዎን፣ እላችኋለሁ፤ ከዚህ ትውልድ ይፈለጋል።

⁵²“እናንተ የሕግ ሊቃውንት፣ ወዮላችሁ! የዕውቀትን ቍልፍ ወስዳችኋልና፤ እናንተ ራሳችሁ አልገባችሁም፤ የሚገቡትንም ከለከላችሁ።”

⁵³ከዚያም በወጣ ጊዜ፣ ጸሐፍትና ፈሪሳውያን አጥብቀው ይቃወሙት ጀመር፤ ስለ ብዙ ነገርም እንዲናገር ያስጨንቁት ነበር፤ ⁵⁴ከአፉ የሚወጣውን ነገር ሊይዙበት እያደቡለት ነበር።