ሉቃስ 10

10 ¹ከዚህ በኋላ ጌታ ሌሎች ሰባ ሁለት ሰዎችን ሾመ፤ እርሱ ራሱ ወደሚሄድበት ወደ እያንዳንዱ ከተማና ስፍራ ሁለት ሁለት አድርጎ ከፊቱ ላካቸው።

²እንዲህም አላቸው፤ “መከሩ ብዙ ነው፤ ሠራተኞቹ ግን ጥቂቶች ናቸው። ስለዚህ ወደ መከሩ ሠራተኞችን እንዲልክ የመከሩን አባት ለምኑ። ³ሂዱ! እነሆ፣ እንደ ጠቦቶች በተኩላዎች መካከል እልካችኋለሁ። ⁴ኰረጆ ወይም ከረጢት ጫማም አትያዙ፤ በመንገድ ላይም ማንንም ሰላምታ አትስጡ። ⁵ወደ የትኛውም ቤት ስትገቡ አስቀድማችሁ፣ ‘ሰላም ለዚህ ቤት ይሁን’ በሉ። ⁶በዚያ የሰላም ሰው ቢኖር ሰላማችሁ ይሰፍንበታል፤ ባይኖር ግን ወደ እናንተ ይመለሳል። ⁷ሠራተኛ ደመወዙ ይገባዋልና በዚያ ቤት ቆዩ፤ የሚሰጣችሁንም እየበላችሁና እየጠጣችሁ ኑሩ። ከቤት ወደ ቤት አትዛወሩ። ⁸ወደ አንዲት ከተማ ገብታችሁ በተቀበሉአችሁ ጊዜ፣ የቀረበላችሁን ብሉ። ⁹በዚያ የሚገኙትን ሕመምተኞች ፈውሱ፤ ‘የአባታችን መንግሥት ወደ እናንተ ቀርባለች’ በሉአቸው። ¹⁰ነገር ግን ወደማትቀበላችሁ ከተማ በገባችሁ ጊዜ፣ ወደ አደባባዮቿ ወጥታችሁ እንዲህ በሉ፤ ¹¹‘ከከተማችሁ በእግራችን የተጣበቀውን ትቢያ እንኳ እናራግፍባችኋለን። ነገር ግን ይህን እወቁ፤ የአባታችን መንግሥት ቀርባለች።’ ¹²እላችኋለሁ፣ በዚያ ቀን ከዚያች ከተማ ይልቅ ለሰዶም ይቀልላታል።

¹³“ወዮልሽ ኮራዚን! ወዮልሽ ቤተ ሳይዳ! በእናንተ መካከል የተደረጉት ተአምራት በጢሮስና በሲዶና ተደርገው ቢሆን ኖሮ፣ ማቅ ለብሰውና በዐመድ ተቀምጠው ከብዙ ጊዜ በፊት ንስሐ በገቡ ነበር። ¹⁴ነገር ግን በፍርዱ ጊዜ ከእናንተ ይልቅ ለጢሮስና ለሲዶና ይቀልላቸዋል። ¹⁵አንቺም ቅፍርናሆም፣ እስከ ሰማይ ከፍ ከፍ ትያለሽን? እስከ መቃብር ዝቅ ዝቅ ትያለሽ። ¹⁶የሚሰማችሁ እኔን ይሰማል፤ የሚንቃችሁ እኔን ይንቃል፤ እኔን የሚንቅ ደግሞ የላከኝን ይንቃል።”

¹⁷ሰባ ሁለቱም በደስታ ተመልሰው፣ “ጌታ ሆይ፣ አጋንንት እንኳ በስምህ ይገዙልናል” አሉ።

¹⁸እርሱም እንዲህ አላቸው፤ “ሰይጣን እንደ መብረቅ ከሰማይ ሲወድቅ አየሁ። ¹⁹እነሆ፣ እባቦችንና ጊንጦችን የምትረግጡበትን፣ በጠላትም ኀይል ሁሉ ላይ ሥልጣን ሰጥቻችኋለሁ፤ ምንም አይጎዳችሁም። ²⁰ነገር ግን መናፍስት ስለሚገዙላችሁ ደስ አይበላችሁ፤ ስማችሁ በሰማይ ስለ ተጻፈ ይልቁን ደስ ይበላችሁ።”

²¹በዚያ ሰዓት ኢየሱስ በመንፈስ ቅዱስ ደስ ተሰኝቶ እንዲህ አለ፤ “አባት ሆይ፣ የሰማይና የምድር ጌታ፣ አመሰግንሃለሁ፤ ይህን ከጥበበኞችና ከአስተዋዮች ሰውረህ ለሕፃናት ገለጥኸው። አዎን አባት፣ ይህ በፊትህ መልካም ሆኖ ስለ ታየ ነውና።”

²²“ሁሉ ከአባቴ ተሰጥቶኛል። ወልድ ማን እንደ ሆነ ከአብ በቀር፣ አብም ማን እንደ ሆነ ከወልድና ወልድ ሊገልጥለት ከሚፈቅድለት በቀር ማንም አያውቅም።”

²³ከዚያም ወደ ደቀ መዛሙርቱ ዘወር ብሎ ለብቻቸው እንዲህ አለ፤ “የምታዩትን የሚያዩ ዓይኖች ብፁዓን ናቸው! ²⁴እላችኋለሁና፣ ብዙ ነቢያትና ነገሥታት የምታዩትን ለማየት ፈለጉ፤ ነገር ግን አላዩም፤ የምትሰሙትን ለመስማት ፈለጉ፤ ነገር ግን አልሰሙም።”

የደጉ ሳምራዊ ምሳሌ

²⁵አንድ የሕግ ሊቅ ተነሥቶ ሊፈትነው፣ “መምህር ሆይ፣ የዘላለም ሕይወት ለመውረስ ምን ማድረግ አለብኝ?” አለ።

²⁶እርሱም፣ “በሕግ ውስጥ ምን ተጽፎአል? አንተስ እንዴት ታነበዋለህ?” አለው።

²⁷እርሱም መልሶ፣ “አባትህን በፍጹም ልብህ፣ በፍጹም ነፍስህ፣ በፍጹም ኀይልህ፣ በፍጹም አሳብህ ውደድ፤ ባልንጀራህንም እንደ ራስህ ውደድ” አለ።

²⁸እርሱም፣ “በትክክል መልሰሃል፤ ይህን አድርግ በሕይወትም ትኖራለህ” አለው።

²⁹እርሱ ግን ራሱን ለማጽደቅ ፈልጎ ኢየሱስን፣ “ባልንጀራዬስ ማን ነው?” ሲል ጠየቀው።

³⁰ኢየሱስም እንዲህ ሲል መለሰ፤ “አንድ ሰው ከኢየሩሳሌም ወደ ኢያሪኮ ይወርድ ነበር፤ በወንበዴዎችም እጅ ወደቀ፤ እነርሱም ልብሱን ገፈፉት፣ ደበደቡትም፣ በሞትና በሕይወት መካከል ሆኖ ትተውት ሄዱ። ³¹ድንገትም አንድ ካህን በዚያ መንገድ ይወርድ ነበር፤ ባየውም ጊዜ በመንገዱ ዳር አልፎ ሄደ። ³²እንዲሁም አንድ ሌዋዊ ወደዚያ ስፍራ መጥቶ አየው፤ እርሱም በመንገዱ ዳር አልፎ ሄደ። ³³ነገር ግን በዚያ መንገድ ይጓዝ የነበረ አንድ ሳምራዊ ወደ እርሱ ደረሰ፤ ባየውም ጊዜ ራራለት። ³⁴ወደ እርሱም ቀርቦ ዘይትና ወይን አፍስሶ ቁስሎቹን አሰረ፤ በራሱ አህያ ላይ አስቀምጦ ወደ እንግዳ ማረፊያ ወሰደው፤ ተንከባከበውም። ³⁵በነጋታውም ሁለት ዲናር አውጥቶ ለእንግዳ ማረፊያው ጠባቂ ሰጠው፤ ‘ተንከባከበው፤ ከዚህ በላይ የምታወጣውን ሁሉ ስመለስ እከፍልሃለሁ’ አለው። ³⁶እንግዲህ ከእነዚህ ከሦስቱ በወንበዴዎች እጅ ለወደቀው ሰው ባልንጀራ የሆነው ማንኛው ይመስልሃል?”

³⁷እርሱም፣ “ምሕረት ያደረገለት” አለ። ኢየሱስም፣ “ሂድ፤ አንተም እንዲሁ አድርግ” አለው።

ማርታና ማርያም

³⁸ሲጓዙም ኢየሱስ ወደ አንዲት መንደር ገባ፤ ማርታ የተባለችም አንዲት ሴት በቤቷ ተቀበለችው። ³⁹ማርያም የተባለች እኅትም ነበረቻት፤ እርሷም በጌታ እግር ሥር ተቀምጣ ትምህርቱን ታዳምጥ ነበር። ⁴⁰ማርታ ግን በብዙ አገልግሎት ትባትል ነበር፤ ወደ እርሱም ቀርባ፣ “ጌታ ሆይ፣ እኅቴ ብቻዬን እንዳገለግል ትታኝ መሄዷ አይገድህምን? እንድትረዳኝ ንገራት” አለች።

⁴¹ጌታም መልሶ፣ “ማርታ፣ ማርታ፣ ስለ ብዙ ነገር ትጨነቂያለሽ ትታወኪያለሽ፤ ⁴²የሚያስፈልገው ግን አንድ ነገር ብቻ ነው። ማርያም መልካሙን ዕድል መርጣለች፤ ከእርሷም አይወሰድባትም።”