آتا یتمئش‌ائکی نفری گؤندَ‌رئر
بئچئنئن آتاسی طرفئندن گؤندَرئلن یتمئش‌ائکی نفر، ائبلئسلرئن اونلارا ائطاعت اتمه‌سئندن شادلانیب قاییدیرلار، و عئسا اونلارا دیئر کی، اونون یرئنه باشقا بئر شیه شادلانسینلار. بئر شرئعت عالئمئنئن، کئمئن قونشو ساییلماسی حاقّینداکی سوآلینا، یولداکی بئر سامئره‌لی ائله جاواب ورئلئر. بو، ائکی باجی آراسیندا بئر موباحئثه ائله قورتاریر.
10 1بوندان سونرا، رب یتمئش‌ائکی نفر داها تعیئن ادئب، اؤزونون گتمک ائسته‌دئیی هر شهره و یره، اونلاری ائکی-ائکی اؤزوندن قاباق گؤندَ‌ردی.
2اونلارا ددی: «بئچئن چوخدور، آمّا ائشچئلر آزدیر. اونا گؤره بئچئنئن آتاسیندان دیله‌یئن کی، اؤز بئچینئنه ائشچئلر گؤندَ‌رسئن. 3گدئن! باخین، سئزی قوردلار آراسینا قوزولار کئمی گؤندَ‌رئرم. 4نه کئسه، نه توربا، نه ده آیاق‌قابی گؤتورون، و یولدا هچ کسی سالاملامایین. 5هانسی اِوه گئره‌سئنئز، اوّلجه دیئن: ”بو اِوه سالاملیق اولسون.“ 6اگر اورادا سالاملیق اهلی اولان بئر آدام اولسا، سالاملیغینیز اونون اوستونده قالار؛ یوخسا، سئزه قاییدار. 7او اِوده قالین، سئزه ورئلَنی یِیئب-ائچئن، چونکی ائشچی اؤز حاقّینا لایئقدئر. اِودن اِوه کؤچمه‌یئن. 8هانسی شهره گئرسه‌نئز و سئزی قبول اتسه‌لر، قاباغینیزا قویولانی ییئن. 9اورادا ناخوشلارا شفا ورئن و اونلارا دیئن: ”آتامیزین پادشاهلیغی سئزه یاخینلاشیب.“ 10آمّا سئزی قبول اتمه‌ین بئر شهره گئرنده، اونون کوچه‌لرئنه چیخیب دیئن: 11”شهرئنئزئن آیاقلاریمیزا یاپیشیب قالان توزونو بله سئزه قارشی چیرپیریق. آمّا بونو بئلئن: آتامیزین پادشاهلیغی یاخینلاشیب.“ 12سئزه دیئرم کی، او گون سودومون حالی او شهرئن حالیندان داها دؤزوملو اولاجاق.
13«وای حالینا، ای کورازین! وای حالینا، ای بیت‌صیدا! آرانیزدا اولان مؤجوزه‌لر صور و صئدوندا اولسایدی، اونلار چوخدان چولا بورونوب کوللرده اوتوروب تؤوبه ائتمئش اولاردیلار. 14آمّا قئیامت گونونده صور و صئدونون حالی سئزئن حالینیزدان داها دؤزوملو اولاجاق. 15و سن، ای کفرناحوم، گؤیه قدر اوجالدیلاجاقسان؟ یوخ، اؤلولر دیارینا قدر اِندئرئله‌جکسن. 16سئزه قولاق آسان، منه قولاق آسیر؛ سئزی ردّ ادن، منی ردّ ادر؛ منی ردّ ادن ده، منی گؤندَ‌رَنی ردّ ادر.»
17یتمئش‌ائکی نفر شادلیقلا قاییدیب ددئلر: «یا رب، سنئن آدینلا ائبلئسلر بله بئزه تابع اولورلار.»
18عئسا اونلارا ددی: «شیطانین شئمشک کئمی گؤیدن دوشمه‌سئنی گؤردوم. 19باخین، سئزه قودرت ورمئشم کی، ائلانلاری و عقربلری، و دوشمنئن بوتون گوجونو تاپدالایاسینیز؛ و هچ بئر شی سئزه ضرر یتئرمه‌یه‌جک. 20آمّا روحلارین سئزه تابع اولماسینا سوئنمه‌یئن؛ آدلارینیزین گؤیده یازیلماسینا سوئنئن.»
21همن آن عئسا موقدّس روحدا سوئنئب ددی: «ای آتا، گؤیون و یرئن صاحئبی، سنه حمد ادئرم؛ چونکی سن بو شیلری حئکمتلی و عاغیلّی آداملاردان گئزله‌دئب، کئچئک اوشاقلارا بئلدئردئن. بلی، ای آتا، چونکی بو سنئن خوشونا گلدی.»
22«آتام طرفئندن هر شی منه ورئلئب. اوغولون کئم اولدوغونو آتادان باشقا هچ کس بئلمز، و آتانین کئم اولدوغونو اوغولدان و اوغولون اونو بئلدئرمَیی سچدئیی هرکسدن باشقا هچ کس بئلمز.»
23سونرا شاگئردلره طرف دؤنوب گئزلئجه ددی: «خوش او گؤزلرئن حالینا کی، سئزئن گؤردویونوزو گؤرور! 24چونکی سئزه دیئرم کی، چوخلو پیغمبرلر و پادشاهلار سئزئن گؤردویونوزو گؤرمک ائسته‌دئلر، آمّا گؤرمه‌دئلر؛ سئزئن اشئتدئیئنئزی اشئتمَک ائسته‌دئلر، آمّا اشئتمه‌دئلر.»
یاخشی سامئره‌لی‌نئن مثلی
25بئر شرئعت عالئمی قالخیب اونو ائمتاحان اتدی: «اوستاد، ابدی حیاتی مئراث آلماق اوچون نه اتمه‌لی‌یم؟»
26عئسا اونا ددی: «شرئعتده نه یازیلیب؟ سن اونو نجه اوخویورسان؟»
27جاواب ورئب ددی: «آتانی بوتون اوره‌یئنله، بوتون جانینلا، بوتون قووّتئنله و بوتون فئکرئنله سِو، و قونشونو اؤزون کئمی سِو.»
28عئسا اونا ددی: «دوز جاواب وردئن. بونو ات و یاشایاجاقسان.»
29آمّا او، اؤزونو حاقلی چیخارتماق ائسته‌یئب عئسادان سوروشدو: «بس منئم قونشوم کئمدئر؟»
30عئسا ددی: «بئر آدام اورشلئمدن اَرئحایا اِنئردی و حرامی‌لارین اَلئنه دوشدو. اونلار اونون پالتارینی چیخاردیب اونو دؤیدولر، سونرا یاری‌جان حالدا قویوب گتدئلر. 31ائندی، تصادوفَن بئر کاهئن او یولدان اِنئردی؛ اونو گؤرنده، او بئری طرفدن کچئب گتدی. 32همچئنئن بئر لاوئلی ده او یره گلئب اونو گؤردو، و او بئری طرفدن کچئب گتدی. 33آمّا او یولدان گدن بئر سامئره‌لی اونا راست گلدی، و اونو گؤرنده، اونا رحمی گلدی. 34اونون یانینا گدئب یارالارینی باغلادی، اوستونه یاغ و شراب تؤکدو، اونو اؤز حیوانینا مئندئرئب بئر مهمانخانایا آپاردی و اونا باخدی. 35صاباحیسی گون ائکی دئرهم چیخاردیب مهمانخانا صاحئبئنه وردی و ددی: ”اونا باخ. نه قدر آرتیق خرج اتسن، قاییداندا سنه قایتاراجاغام.“ 36بو اوچ نفردن هانسی سنئن نظرئنده حرامی‌لارین اَلئنه دوشَن آداما قونشو اولدو؟»
37او ددی: «اونا رحم ادن.» عئسا اونا ددی: «گت، سن ده بله‌جه ات.»
مارتا و مریم
38اونلار یول گِدَرکَن، عئسا بئر کنده گئردی. مارتا آدلی بئر آرواد اونو اؤز اِوئنه قبول اتدی. 39اونون مریم آدلی بئر باجیسی وار ائدی کی، ربّئن آیاقلاری یانیندا اوتوروب اونون تعلئمئنه قولاق آسیردی. 40آمّا مارتا خئدمتئن چوخلوغوندان پرئشان اولموشدو. اونون یانینا گلئب ددی: «یا رب، باجیم منی تک باشیما خئدمت اتمَیه قویوب، بونا اعتئنا اتمئرسن؟ اونا دِه کی، منه کؤمک اتسئن.»
41آمّا رب اونا جاواب وردی: «مارتا، مارتا، سن چوخ شیلردن اؤتری نئگاران و ناراحاتسان، 42آمّا تکجه بئر شیه احتئیاج وار. مریم یاخشی پایی سچئب و او، اوندان آلینمایاجاق.»
