லூக்கா 10

10 ¹இதற்குப் பின்பு, கர்த்தர் வேறே எழுபத்திரண்டு பேரை நியமித்து, தாம் போகவிருந்த ஒவ்வொரு பட்டணத்திற்கும் இடத்திற்கும், அவர்களை இரண்டிரண்டு பேராகத் தமக்கு முன்னே அனுப்பினார்.

²அவர் அவர்களை நோக்கி: “அறுவடை மிகுதி, வேலையாட்களோ கொஞ்சம்; ஆகையால் அறுவடையின் பிதா தமது அறுவடைக்கு வேலையாட்களை அனுப்பும்படி அவரை வேண்டிக்கொள்ளுங்கள். ³போங்கள்! இதோ, ஓநாய்களுக்குள்ளே ஆட்டுக்குட்டிகளை அனுப்புவதுபோல நான் உங்களை அனுப்புகிறேன். ⁴பணப்பையையாவது சாமான் பையையாவது பாதரட்சைகளையாவது எடுத்துக்கொண்டு போகாதேயுங்கள்; வழியிலே ஒருவரையும் வாழ்த்தவும் வேண்டாம். ⁵நீங்கள் எந்த வீட்டில் பிரவேசித்தாலும், முதலாவது: ‘இந்த வீட்டிற்குச் சமாதானம் உண்டாவதாக’ என்று சொல்லுங்கள். ⁶சமாதானத்தின் மனிதர் அங்கே இருந்தால், உங்கள் சமாதானம் அவர்மேல் தங்கும்; இல்லாவிட்டால், அது உங்களிடமே திரும்பிவரும். ⁷அந்த வீட்டிலேயே தங்கி, அவர்கள் கொடுக்கிறதைப் புசித்துக் குடியுங்கள்; ஏனெனில் வேலையாள் தன் கூலிக்குப் பாத்திரனாயிருக்கிறான். வீட்டைவிட்டு வீடு மாறாதிருங்கள். ⁸நீங்கள் எந்தப் பட்டணத்தில் பிரவேசிக்கையில், அங்குள்ளவர்கள் உங்களை ஏற்றுக்கொண்டால், உங்கள்முன் வைக்கப்படுகிறதைப் புசியுங்கள். ⁹அங்குள்ள வியாதிக்காரரைச் சொஸ்தமாக்கி, ‘எங்கள் பிதாவின் ராஜ்யம் உங்களுக்குச் சமீபமாயிற்று’ என்று அவர்களுக்குச் சொல்லுங்கள். ¹⁰ஆனால் நீங்கள் எந்தப் பட்டணத்தில் பிரவேசிக்கையில், அங்குள்ளவர்கள் உங்களை ஏற்றுக்கொள்ளாவிட்டால், அதின் வீதிகளுக்குப் புறப்பட்டுப்போய்: ¹¹‘உங்கள் பட்டணத்தின் தூசி எங்கள் கால்களில் ஒட்டிக்கொண்டிருக்கிறதையும் உங்களுக்கு விரோதமாய் உதறிப்போடுகிறோம்; ஆயினும் எங்கள் பிதாவின் ராஜ்யம் சமீபமாயிற்று என்பதை அறிந்துகொள்ளுங்கள்’ என்று சொல்லுங்கள். ¹²அந்த நாளிலே அந்தப் பட்டணத்திற்குக் கிடைக்கும் தண்டனையைவிட, சோதோமுக்குக் கிடைக்கும் தண்டனை இலகுவாயிருக்கும் என்று உங்களுக்குச் சொல்லுகிறேன்.

¹³“ஐயோ, கோராசினே! ஐயோ, பெத்சாயிதாவே! உங்களில் செய்யப்பட்ட அற்புதங்கள் தீருவிலும் சீதோனிலும் செய்யப்பட்டிருந்தால், அவைகள் இரட்டுடுத்திச் சாம்பலில் உட்கார்ந்து அநேக நாட்களுக்குமுன்பே மனந்திரும்பியிருக்கும். ¹⁴ஆயினும் நியாயத்தீர்ப்பில் உங்களுக்குக் கிடைக்கும் தண்டனையைவிட, தீருவுக்கும் சீதோனுக்கும் கிடைக்கும் தண்டனை இலகுவாயிருக்கும். ¹⁵கப்பர்நகூமே, நீ வானபரியந்தம் உயர்த்தப்படுவாயோ? நீ பாதாளபரியந்தம் தாழ்த்தப்படுவாய். ¹⁶உங்களுக்குச் செவிகொடுக்கிறவன் எனக்குச் செவிகொடுக்கிறான்; உங்களைத் தள்ளுகிறவன் என்னைத் தள்ளுகிறான்; என்னைத் தள்ளுகிறவன் என்னை அனுப்பினவரைத் தள்ளுகிறான்” என்றார்.

¹⁷அந்த எழுபத்திரண்டு பேரும் சந்தோஷத்தோடே திரும்பிவந்து: “ஆண்டவரே, உம்முடைய நாமத்தினாலே பிசாசுகளும் எங்களுக்குக் கீழ்ப்படிகின்றன” என்றார்கள்.

¹⁸அவர் அவர்களை நோக்கி: “சாத்தான் மின்னலைப்போல வானத்திலிருந்து விழுகிறதைக் கண்டேன். ¹⁹இதோ, சர்ப்பங்களையும் தேள்களையும் மிதிக்கவும், சத்துருவினுடைய சகல வல்லமையின்மேலும் அதிகாரம் செலுத்தவும் நான் உங்களுக்கு அதிகாரம் கொடுக்கிறேன்; ஒன்றும் உங்களுக்குச் சேதம் செய்யாது. ²⁰ஆயினும், ஆவிகள் உங்களுக்குக் கீழ்ப்படிகிறதற்காக நீங்கள் சந்தோஷப்படாமல், உங்கள் நாமங்கள் வானத்தில் எழுதப்பட்டிருக்கிறதற்காகச் சந்தோஷப்படுங்கள்” என்றார்.

²¹அந்நேரத்திலே இயேசு பரிசுத்த ஆவியில் களிகூர்ந்து: “பிதாவே, வானத்திற்கும் பூமிக்கும் ஆண்டவரே, இவைகளை ஞானிகளுக்கும் கல்விமான்களுக்கும் மறைத்து, குழந்தைகளுக்கு வெளிப்படுத்தினபடியால் உம்மைத் துதிக்கிறேன். ஆம், பிதாவே, இப்படிச் செய்வது உமது சித்தமாயிருந்தது” என்றார்.

²²“என் பிதாவினால் எல்லாம் எனக்கு ஒப்புக்கொடுக்கப்பட்டிருக்கிறது. குமாரன் இன்னாரென்று பிதாவேயன்றி வேறொருவரும் அறியார்; பிதா இன்னாரென்று குமாரனும், குமாரன் யாருக்கு அவரை வெளிப்படுத்தச் சித்தமாயிருக்கிறாரோ அவனுமேயன்றி வேறொருவரும் அறியார்” என்றார்.

²³பின்பு அவர் சீஷர்களிடமாய்த் திரும்பி, தனித்து அவர்களை நோக்கி: “நீங்கள் காண்கிறவைகளைக் காண்கிற கண்கள் பாக்கியமுள்ளவைகள். ²⁴அநேக தீர்க்கதரிசிகளும் ராஜாக்களும் நீங்கள் காண்கிறவைகளைக் காணவும், கேட்கிறவைகளைக் கேட்கவும் விரும்பியும், காணாமலும் கேளாமலும் போனார்கள் என்று உங்களுக்குச் சொல்லுகிறேன்” என்றார்.

நல்ல சமாரியனைப் பற்றிய உவமை

²⁵அப்பொழுது நியாயசாஸ்திரி ஒருவன் எழுந்து, அவரைச் சோதிக்கும்படி: “போதகரே, நித்தியஜீவனைச் சுதந்தரித்துக்கொள்ள நான் என்ன செய்யவேண்டும்?” என்று கேட்டான்.

²⁶அதற்கு அவர்: “நியாயப்பிரமாணத்தில் என்ன எழுதியிருக்கிறது? நீ எப்படி வாசிக்கிறாய்?” என்றார்.

²⁷அவன் பிரதியுத்தரமாக: “உன் முழு இருதயத்தோடும், உன் முழு ஆத்துமாவோடும், உன் முழு பலத்தோடும், உன் முழு மனதோடும் உன் பிதாவை நேசிப்பாயாக; உன்னிடத்தில் நேசிக்கிறதுபோல உன் அயலகத்தானையும் நேசிப்பாயாக” என்றான்.

²⁸அவர் அவனை நோக்கி: “சரியாய்ப் பிரதியுத்தரம் சொன்னாய்; அப்படியே செய், அப்பொழுது பிழைப்பாய்” என்றார்.

²⁹அவனோ தன்னை நீதிமானாக்கிக்கொள்ள விரும்பி, இயேசுவை நோக்கி: “என் அயலகத்தான் யார்?” என்று கேட்டான்.

³⁰இயேசு பிரதியுத்தரமாக: “ஒரு மனிதன் எருசலேமிலிருந்து எரிகோவுக்கு இறங்கிப்போகையில் கள்ளர் கைகளில் அகப்பட்டான்; அவர்கள் அவனுடைய வஸ்திரங்களை உரிந்துகொண்டு, அவனை அடித்து, குற்றுயிராக விட்டுப்போனார்கள். ³¹அப்பொழுது தற்செயலாய் ஒரு ஆசாரியன் அந்த வழியே இறங்கிப்போனான்; அவனைக் கண்டு, பக்கமாய் விலகிப் போய்விட்டான். ³²அப்படியே ஒரு லேவியனும் அந்த இடத்திற்கு வந்து, அவனைக் கண்டு, பக்கமாய் விலகிப் போய்விட்டான். ³³ஆனால் அந்த வழியே பிரயாணம் பண்ணின ஒரு சமாரியன் அவனைக் கண்டு, அவன்மேல் மனதுருகி இரக்கங்கொண்டான். ³⁴அவனிடத்தில் வந்து, எண்ணெயையும் திராட்சரசத்தையும் வார்த்து, அவனுடைய காயங்களைக் கட்டி, தன் சொந்த மிருகத்தின்மேல் அவனை ஏற்றி, சத்திரத்திற்குக் கொண்டுபோய், அவனைப் பராமரித்தான். ³⁵மறுநாளில் அவன் புறப்படும்போது இரண்டு வெள்ளிக்காசுகளை எடுத்து, சத்திரத்தலைவனிடத்தில் கொடுத்து: ‘இவனைப் பராமரி; இதற்கு அதிகமாய் நீ ஏதாகிலும் செலவழித்தால், நான் திரும்பிவரும்போது அதை உனக்குச் செலுத்துவேன்’ என்றான். ³⁶கள்ளர் கைகளில் அகப்பட்டவனுக்கு இந்த மூவரில் எவன் அயலகத்தானாய் இருந்தான் என்று நினைக்கிறாய்?” என்றார்.

³⁷அதற்கு அவன்: “அவன்மேல் இரக்கஞ்செய்தவனே” என்றான். அப்பொழுது இயேசு அவனை நோக்கி: “நீயும் போய் அப்படியே செய்” என்றார்.

மார்த்தாளும் மரியாளும்

³⁸பின்பு அவர்கள் பிரயாணம் பண்ணுகையில், இயேசு ஒரு கிராமத்தில் பிரவேசித்தார்; அங்கே மார்த்தாள் என்னும் பேருள்ள ஒரு ஸ்திரீ அவரைத் தன் வீட்டிலே ஏற்றுக்கொண்டாள். ³⁹அவளுக்கு மரியாள் என்னும் ஒரு சகோதரி இருந்தாள்; அவள் கர்த்தருடைய பாதத்தண்டையிலே உட்கார்ந்து, அவருடைய போதனையைக் கேட்டுக்கொண்டிருந்தாள். ⁴⁰மார்த்தாளோ பற்பல பணிவிடைகளைக்குறித்து மிகவும் கவலைப்பட்டு, அவரிடத்தில் வந்து: “ஆண்டவரே, நான் தனியே பணிவிடை செய்யும்படி என் சகோதரி என்னை விட்டுவைத்தது உமக்குக் கவலையில்லையா? அவள் எனக்கு உதவிசெய்யும்படி அவளுக்குச் சொல்லும்” என்றாள்.

⁴¹கர்த்தர் அவளுக்குப் பிரதியுத்தரமாக: “மார்த்தாளே, மார்த்தாளே, நீ அநேக காரியங்களைக்குறித்துக் கவலைப்பட்டுக் கலங்குகிறாய். ⁴²ஆனால் தேவையானது ஒன்றே. மரியாள் அந்த நல்ல பங்கைத் தெரிந்துகொண்டாள்; அது அவளிடத்திலிருந்து எடுக்கப்படுவதில்லை” என்றார்.