Luku 10

10 ¹Lẹ́yìn èyí, Olúwa yan àádọ́rin-ó-lé-méjì mìíràn, ó sì rán wọn ṣáájú rẹ̀ ní méjì-méjì, sí gbogbo ìlú àti ibi tí òun fúnra rẹ̀ fẹ́ lọ.

²Ó sọ fún wọn pé, “Ìkórè pọ̀, ṣùgbọ́n àwọn òṣìṣẹ́ kéré. Nítorí náà ẹ bẹ Baba ìkórè náà kí ó rán àwọn òṣìṣẹ́ jáde sínú ìkórè rẹ̀. ³Ẹ máa lọ! Ẹ wò ó, èmi ń rán yín jáde bí àwọn ọ̀dọ́-àgùntàn láàrin àwọn ìkookò. ⁴Ẹ má ṣe gbé àpò owó, bẹ́ẹ̀ ni àpò, bẹ́ẹ̀ ni bàtà, ẹ má sì ṣe kí ẹnikẹ́ni ní ọ̀nà. ⁵Ilékílé tí ẹ bá wọ̀, ẹ kọ́kọ́ wí pé, ‘Àlàáfíà fún ilé yìí.’ ⁶Bí ẹni àlàáfíà bá wà níbẹ̀, àlàáfíà yín yóò bà lé e; bí kò bá sí bẹ́ẹ̀, yóò padà sọ́dọ̀ yín. ⁷Ẹ dúró ní ilé náà, ẹ máa jẹ ẹ máa mu ohun tí a bá fún yín, nítorí òṣìṣẹ́ yẹ sí owó-ọ̀yà rẹ̀. Ẹ má ṣe ṣí láti ilé dé ilé. ⁸Nígbàkigbà tí ẹ bá wọ ìlú kan tí wọ́n sì gbà yín, ẹ jẹ ohun tí a gbé kalẹ̀ níwájú yín. ⁹Ẹ mú àwọn aláìsàn láradá níbẹ̀, kí ẹ sì sọ fún wọn pé, ‘Ìjọba Baba wa ti súnmọ́ yín.’ ¹⁰Ṣùgbọ́n nígbà tí ẹ bá wọ ìlú kan tí kò gbà yín, ẹ jáde lọ sí àwọn ìgboro rẹ̀, kí ẹ sì wí pé, ¹¹‘Kódà eruku ìlú yín tí ó lẹ̀ mọ́ wa ní ẹsẹ̀, àwa nù ún nù sí yín. Síbẹ̀ ẹ mọ èyí: ìjọba Baba wa ti súnmọ́ tòsí.’ ¹²Mo wí fún yín, yóò rọrùn fún Sodomu ní ọjọ́ náà ju ti ìlú náà lọ.

¹³“Ègbé ni fún ọ, Korasini! Ègbé ni fún ọ, Bẹtisaida! Ìbá ṣe pé àwọn iṣẹ́ ìyanu tí a ṣe láàrin yín ni a bá ṣe ní Tire àti Sidoni, wọn ìbá ti ronúpìwàdà láti ìgbà pípẹ́, wọn ìbá sì jókòó nínú aṣọ ọ̀fọ̀ àti eérú. ¹⁴Ṣùgbọ́n yóò rọrùn fún Tire àti Sidoni ní ìdájọ́ ju tiyín lọ. ¹⁵Àti ìwọ, Kapernaumu, a ó ha gbé ọ ga sókè ọ̀run bí? A ó rẹ̀ ọ́ sílẹ̀ dé isà òkú. ¹⁶Ẹnikẹ́ni tí ó bá fetí sí yín, ó fetí sí mi; ẹnikẹ́ni tí ó bá kọ̀ yín sílẹ̀, ó kọ̀ mí sílẹ̀; ẹnikẹ́ni tí ó bá kọ̀ mí sílẹ̀, ó kọ̀ ẹni tí ó rán mi sílẹ̀.”

¹⁷Àwọn àádọ́rin-ó-lé-méjì náà padà pẹ̀lú ayọ̀, wọ́n sì wí pé, “Olúwa, kódà àwọn ẹ̀mí èṣù ń tẹríba fún wa ní orúkọ yín.”

¹⁸Ó wí fún wọn pé, “Mo rí Satani tí ó ṣubú bí mànàmáná láti ọ̀run wá. ¹⁹Ẹ wò ó, mo ti fún yín ní àṣẹ láti tẹ ejò àti àkekèé mọ́lẹ̀, àti lórí gbogbo agbára ọ̀tá—kò sí ohun tí yóò pa yín lára. ²⁰Ṣùgbọ́n ẹ má ṣe yọ̀ nítorí pé àwọn ẹ̀mí ń tẹríba fún yín—ẹ yọ̀ nítorí pé a ti kọ orúkọ yín sí ọ̀run.”

²¹Ní àsìkò náà gan-an Jesu yọ̀ nínú Ẹ̀mí Mímọ́, ó sì wí pé, “Baba, Olódùmarè ọ̀run àti ayé, mo yìn yín—ẹ fi nǹkan wọ̀nyí pamọ́ fún àwọn ọlọ́gbọ́n àti àwọn amòye, ẹ sì fihàn wọ́n fún àwọn ọmọ kékeré. Bẹ́ẹ̀ ni, Baba, nítorí èyí wù yín.”

²²“Gbogbo nǹkan ni Baba mi ti fi fún mi. Kò sí ẹni tí ó mọ ẹni tí Ọmọ náà jẹ́ bí kò ṣe Baba, tàbí ẹni tí Baba jẹ́ bí kò ṣe Ọmọ náà—àti ẹnikẹ́ni tí Ọmọ náà bá yàn láti fihàn fún.”

²³Nígbà náà ni ó yípadà sí àwọn ọmọ-ẹ̀yìn, ó sì wí fún wọn ní ìkọ̀kọ̀ pé, “Ìbùkún ni fún ojú tí ó rí ohun tí ẹ̀yin rí! ²⁴Nítorí mo wí fún yín, ọ̀pọ̀lọpọ̀ àwọn wòlíì àti àwọn ọba ni ó fẹ́ láti rí ohun tí ẹ̀yin rí, wọn kò sì rí i, àti láti gbọ́ ohun tí ẹ̀yin gbọ́, wọn kò sì gbọ́ ọ.”

Òwe Ará Samaria Rere Náà

²⁵Amòfin kan dìde, ó sì dán an wò pé, “Olùkọ́, kín ni mo gbọdọ̀ ṣe láti jogún ìyè àìnípẹ̀kun?”

²⁶Ó wí fún un pé, “Kín ni a kọ sínú Òfin? Báwo ni ìwọ ṣe ń kà á?”

²⁷Ó dáhùn pé, “Fẹ́ Baba rẹ pẹ̀lú gbogbo ọkàn rẹ, pẹ̀lú gbogbo ẹ̀mí rẹ, pẹ̀lú gbogbo agbára rẹ, pẹ̀lú gbogbo èrò-inú rẹ, àti aládùúgbò rẹ bí ara rẹ.”

²⁸Ó wí fún un pé, “Ìwọ dáhùn lọ́nà tí ó tọ́. Ṣe èyí, ìwọ yóò sì yè.”

²⁹Ṣùgbọ́n ní fífẹ́ dá ara rẹ̀ láre, ó béèrè lọ́wọ́ Jesu pé, “Ta sì ni aládùúgbò mi?”

³⁰Jesu dáhùn pé, “Ọkùnrin kan ń sọ̀kalẹ̀ láti Jerusalemu lọ sí Jeriko, ó sì bọ́ sí àárín àwọn ọlọ́ṣà, tí wọ́n bọ́ ọ ní aṣọ tí wọ́n sì lù ú, lẹ́yìn náà wọ́n fi í sílẹ̀ ní ààbọ̀ òkú. ³¹Ǹjẹ́, láìròtẹ́lẹ̀, àlùfáà kan ń sọ̀kalẹ̀ lọ ní ọ̀nà náà; nígbà tí ó rí i, ó kọjá lọ ní apá kejì. ³²Bẹ́ẹ̀ gẹ́gẹ́ ni ọmọ Lefi kan dé ibẹ̀, ó rí i, ó sì kọjá lọ ní apá kejì. ³³Ṣùgbọ́n ará Samaria kan tí ó ń rìn ní ọ̀nà náà rí i, nígbà tí ó sì rí i, àánú sì ṣe é. ³⁴Ó tọ̀ ọ́ lọ, ó di ọgbẹ́ rẹ̀, ó da òróró àti wáìnì sí i, ó gbé e ka ẹranko tirẹ̀, ó mú un lọ sí ilé èrò, ó sì tọ́jú rẹ̀. ³⁵Ní ọjọ́ kejì ó mú owó fàdákà méjì jáde, ó fi wọ́n fún olùtọ́jú ilé èrò náà, ó sì wí pé, ‘Tọ́jú rẹ̀. Ohunkóhun tí ìwọ bá ná sí i, èmi yóò san án padà fún ọ nígbà tí mo bá padà dé.’ ³⁶Èwo nínú àwọn mẹ́tẹ̀ẹ̀ta yìí ni ìwọ rò pé ó di aládùúgbò fún ọkùnrin tí ó bọ́ sí àárín àwọn ọlọ́ṣà náà?”

³⁷Ó dáhùn pé, “Ẹni tí ó ṣàánú fún un.” Jesu sì wí fún un pé, “Lọ, kí ìwọ sì ṣe bákan náà.”

Marta àti Maria

³⁸Bí wọ́n ti ń rìn, Jesu wọ abúlé kan. Obìnrin kan tí orúkọ rẹ̀ ń jẹ́ Marta gbà á sínú ilé rẹ̀. ³⁹Ó ní arábìnrin kan tí à ń pè ní Maria, tí ó jókòó lẹ́bàá ẹsẹ̀ Olúwa, tí ó sì ń tẹ́tí sí ẹ̀kọ́ rẹ̀. ⁴⁰Ṣùgbọ́n Marta pín ọkàn nítorí gbogbo iṣẹ́ ìsìn náà. Ó tọ̀ ọ́ wá, ó sì wí pé, “Olúwa, kò ha ṣe yín lọ́kàn pé arábìnrin mi fi mí sílẹ̀ láti dá ṣiṣẹ́ bí? Ẹ sọ fún un kí ó ràn mí lọ́wọ́.”

⁴¹Ṣùgbọ́n Olúwa dáhùn pé, “Marta, Marta, ìwọ ń ṣe àníyàn, ara rẹ kò sì balẹ̀ nítorí ọ̀pọ̀ nǹkan, ⁴²ṣùgbọ́n ohun kan ṣoṣo ni a nílò. Maria ti yàn ipín rere náà; a kì yóò gbà á kúrò lọ́wọ́ rẹ̀.”