ሉቃስ 10 FHB Father's Heart Bible™

10 ¹ድሕሪ እዙይ፥ ጐይታ ካልኦት ሰብዓን ክልተን መረፀ፤ ባዕሉ ናብ ዝኸዶ ዝሓሰበ ኵላ ኸተማን ቦታን ድማ፥ ክልተ ክልተ ጌሩ ቀቅድሚኡ ሰደዶም።

²ከምዙይ ድማ በሎም፦ “እቲ ዓፂድ ብዙሕ እዩ፥ ሰራሕተኛታት ግና ውሑዳት እዮም። ስለዙይ ንኣቦ እቲ ዓፂድ፥ ናብ ዓፂዱ ሰራሕተኛታት ክሰድድ ለምንዎ። ³ኪዱ! እንሆ ኣነ ኸም ዕያውቲ ናብ ማእኸል ተዃሉ እሰደኩም ኣለኹ። ⁴ኸረጢት፥ ሳንጣ፥ ኣሳእን ኣይትማልኡ፤ ኣብ መንገዲ ድማ ንሓደ እኳ ሰላም ኣይትበሉ። ⁵ኣብ ዝኣተኹምዋ ገዛ፥ ቅድም ‘ሰላም ነዛ ገዛ እዚኣ ይኹን’ በሉ። ⁶ኣብኣ ሰብ ሰላም እንተ ሃልዩ፥ ሰላምኩም ኣብ ልዕሊኡ ኸዓርፍ እዩ፤ እንተ ዘይኮነ ግና፥ ናባኻትኩም ክምለስ እዩ። ⁷ኣብታ ገዛ እቲኣ ፅንሑ፤ ነቲ ዝወሃበኩም ድማ ብልዑ ስተዩን፤ ንሰራሕተኛ ዓስቡ ይግብኦ እዩ እሞ። ካብ ገዛ ናብ ገዛ ኣይትልወጡ። ⁸ኣብ ዝኣተኹምዋ ኸተማ እንተ ተቐቢሎምኹም፥ እቲ ኣብ ቅድሜኹም ዝቐርብ ብልዑ። ⁹ኣብኣ ንዝሓመሙ ኣሕውዩ፥ ‘መንግስቲ ኣቦና ናባኻትኩም ቀሪባ ኣላ’ ድማ በልዎም። ¹⁰ዘይቅበለኩም ኸተማ ምስ ኣተኹም ግና፥ ናብ ኣደባባያታ ወፂእኹም ከምዙይ በሉ፦ ¹¹‘ነቲ ኻብ ከተማኹም ኣብ ኣእጋርና ዝተጣበቐ ሓመድ እኳ፥ ኣባኻትኩም ንገፎ ኣለና። ኮይኑ ግና መንግስቲ ኣቦና ቀሪባ ኸም ዘላ እዙይ ፍለጡ።’ ¹²እብለኩም ኣለኹ፥ በታ መዓልቲ እቲኣ ኻብታ ኸተማ እቲኣ፥ ንሶዶም ዝቐለለ ክኸውን እዩ።

¹³“ወይለኺ ኮራዚን! ወይለኺ ቤተ ሳይዳ! እቲ ኣብ ማእኸልክን ዝተገብረ ተኣምራት ኣብ ጢሮስን ሲዶንን ተገይሩ እንተ ዝኸውንስ፥ ኣብ ወጮን ሓሙዅስትን ተቐሚጠን ቀደም ምተነስሓ ነይረን። ¹⁴ግና ብመዓልቲ ፍርዲ ካባኻትክን፥ ንጢሮስን ሲዶንን ዝቐለለ ክኸውን እዩ። ¹⁵ንስኺ ቅፍርናሆም ከ፥ ናብ ሰማይዶ ኽትልዓሊ ኢኺ? ናብ ሲኦል ክትወርዲ ኢኺ። ¹⁶እቲ ንኣኻትኩም ዝሰምዓኩም፥ ንኣይ ይሰምዐኒ ኣሎ፤ እቲ ንኣኻትኩም ዝነፅገኩም ድማ፥ ንኣይ ይነፅገኒ ኣሎ፤ እቲ ንኣይ ዝነፅገኒ ኸዓ፥ ነቲ ዝለኣኸኒ ይነፅጎ ኣሎ።”

¹⁷እቶም ሰብዓን ክልተን ድማ ብሓጐስ ተመሊሶም “ጐይታይ፥ ኣጋንንቲ እኳ ብስምካ ይግዝኡልና ኣለዉ” በሉ።

¹⁸ንሱ ድማ ከምዙይ በሎም፦ “ንሰይጣን ከም መብረቕ ካብ ሰማይ ክወድቕ ርኤ። ¹⁹እንሆ ኣብ ተመንን ዕንቅርቢትን ክትረግፁ፥ ኣብ ልዕሊ ኵሉ ሓይሊ እቲ ፀላኢ ድማ ስልጣን ሂበኩም ኣለኹ፤ ዝጐድኣኩም ዋላ ሓደ የለን። ²⁰ግና እቶም መናፍስቲ ስለ ዝግዝኡልኩም ኣይትተሓጐሱ፥ ስምኩም ኣብ ሰማይ ስለ ዝተፃሕፈ ደኣ ተሓጐሱ እምበር።”

²¹በታ ሰዓት እቲኣ ኢየሱስ ብመንፈስ ቅዱስ ተሓጒሱ ኸምዙይ በለ፦ “ኦ ኣቦ፥ ጐይታ ሰማይን ምድርን፥ ነዝ ነገር እዙይ ካብ ጥበበኛታትን ኣስተውዓልትን ሰዊርካ፥ ንሕፃናት ስለ ዝገለፅካዮ፥ ኣመስግነካ ኣለኹ። እወ ኦ ኣቦ፥ እዙይ ከምኡ ኽኸውን ቅድሜኻ ባህ ኢሉካ እዩ እሞ።”

²²“ኵሉ ኻብ ኣቦይ ተውሂቡኒ ኣሎ። ወልድ መን ምዃኑ፥ ብዘይ ኣቦ ዝፈልጥ የለን፤ ኣቦ መን ምዃኑ ኸዓ፥ ብዘይ ወልድን እቲ ወልድ ክገልፀሉ ዝደለዮን፥ ዝፈልጥ የለን።”

²³ሽዑ ናብ ደቀ መዛሙርቱ ግልፅ ኢሉ ንበይኑ ኸምዙይ በሎም፦ “እዚ እትርእይዎ ዘለኹም ዝርእያ ኣዒንቲ ብፁዓት እየን! ²⁴ብዙሓት ነቢያትን ነገስታትን እዚ እትርእይዎ ዘለኹም ክርእዩ ደልዮም እናሃለዉ ኣይረአዩን፥ እዚ እትሰምዕዎ ዘለኹም ክሰምዑ ደልዮም እናሃለዉ ኣይሰምዑን እሞ፥ እብለኩም ኣለኹ።”

ምሳሌ እቲ ሕያዋይ ሳምራዊ

²⁵ሓደ ሊቅ ሕጊ ተሲኡ ኽፍትኖ “መምህር፥ ናይ ዘለኣለም ህይወት ክወርስ እንታይ ክገብር ኣለኒ?” ኢሉ ጠየቖ።

²⁶ንሱ ድማ “ኣብ ሕጊ እንታይ ተፅሒፉ ኣሎ? ከመይ ጌርካ ኸ ተንብቦ?” በሎ።

²⁷ንሱ ኸዓ መሊሱ “ንኣቦኻ ብምሉእ ልብኻን ብምሉእ ነፍስኻን ብምሉእ ሓይልኻን ብምሉእ ሓሳብካን ኣፍቅሮ፥ ንብፅሑኻ ኸዓ ኸም ነፍስኻ ኣፍቅሮ” በለ።

²⁸ንሱ ድማ “ቅኑዕ መለስካ፤ እዙይ ግበር ህያው ከዓ ክትከውን ኢኻ” በሎ።

²⁹ንሱ ግና ንባዕሉ ከፅድቕ ደልዩ ንኢየሱስ “ብፅሔይ ከ መን እዩ?” በሎ።

³⁰ኢየሱስ ድማ ከምዙይ ኢሉ መለሰሉ፦ “ሓደ ሰብ ካብ ኢየሩሳሌም ናብ ያሪኮ ይወርድ ነበረ፤ ናብ ማእኸል ጐሓሉት ድማ ወደቐ፤ ንሳቶም ከዓ ቀንጢጦም ወቒዖም፥ ፍርቂ ምዉት ጌሮም ሓዲጎሞ ኸዱ። ³¹ብኣጋጣሚ ድማ ሓደ ካህን በቲ መንገዲ እቲ ይወርድ ነበረ፤ ንእኡ ሪኡ ኸዓ ገለል ኢሉ ሓለፈ። ³²ከምኡ ድማ ሓደ ሌዋዊ ናብቲ ቦታ መፂኡ ርኣዮ፤ ገለል ኢሉ ኸዓ ሓለፈ። ³³ሓደ ሳምራዊ ግና በቲ መንገዲ እቲ እናተጓዕዘ ረኸቦ፤ ርእዩ ኸዓ ራህርሀሉ። ³⁴ናብኡ ድማ ቐሪቡ ንቍስሉ ጠቕለሎ፥ ዘይትን ወይንን ድማ ኣፍሰሰሉ፤ ኣብ ናቱ እንስሳ ፅዒኑ ኸዓ፥ ናብ መሕደሪ ኣጋይሽ ወሲዱ ተኣለዮ። ³⁵በማግስቱ ድማ ክልተ ዲናር ኣውፂኡ ነቲ ዋና መሕደሪ ኣጋይሽ ሃቦ፥ ከምዙይ ከዓ በሎ፦ ‘ተኣልዮ፤ ካብዙይ ንላዕሊ ዘውፃእኻዮ ዅሉ ኸዓ፥ ክምለስ ከለኹ ክኸፍለካ እየ።’ ³⁶ካብዞም ሰለስተ እዚኣቶም ነቲ ናብ ማእኸል ጐሓሉት ዝወደቐ ሰብ ብፅሑ ዝኾነ ኣየናይ ይመስለካ?”

³⁷ንሱ ድማ “እቲ ምሕረት ዝገበረሉ” በለ። ኢየሱስ ከዓ “ኪድ ንስኻ ኸዓ ከምኡ ግበር” በሎ።

ማርታን ማርያምን

³⁸ክጓዓዙ እንተለዉ ድማ፥ ኢየሱስ ናብ ሓንቲ ዓዲ ኣተወ፤ ማርታ ዝተብሃለት ሓንቲ ሰበይቲ ኸዓ ናብ ገዛኣ ተቐበለቶ። ³⁹ማርያም እትብሃል ሓብቲ ድማ ነበረታ፤ ንሳ ኸዓ ኣብ እግሪ ጐይታ ተቐሚጣ ትምህርቱ ትሰምዕ ነበረት። ⁴⁰ማርታ ግና በቲ ብዙሕ ኣገልግሎት ተፀምደት፤ ናብኡ መፂኣ ድማ “ጐይታይ፥ ሓብተይ በይነይ ከገልግል ሓዲጋትኒ እንተላ፥ ኣይግድሰካንዶ? ክትሕግዘኒ ድማ ንገራ” በለቶ።

⁴¹ጐይታ ግና ከምዙይ ኢሉ መለሰላ፦ “ማርታ፥ ማርታ፥ ብዛዕባ ብዙሕ ነገር ትጭነቂን ትሽበሪን ኣለኺ፥ ⁴²ሓደ ነገር ግና የድሊ። ማርያም እቲ ፅቡቕ ግደ መሪፃ፤ ካብኣ ድማ ኣይውሰድን እዩ።”