ሉቃስ 11 FHB Father's Heart Bible™

ምዕራፍ 11።

11 ¹ኣብ ሓደ ቦታ ኾይኑ ይፅሊ ነበረ፤ ምስ ወድአ ድማ፥ ካብ ደቀ መዛሙርቱ ሓደ “ኦ ጐይታ፥ ዮሃንስ ንደቀ መዛሙርቱ ከም ዝመሃሮም፥ ንስኻ ድማ ክንፅሊ ምሃረና” በሎ።

²ንሱ ኸዓ ከምዙይ በሎም፦ “ክትፅልዩ እንተለኹም እዙይ በሉ፦ ኦ ኣቦ፥ ስምካ ይቀደስ። መንግስትኻ ትምፃእ። ³ናይ ነፍሲ ወከፍ መዓልቲ ዕለታዊ እንጀራና ሃበና። ⁴ሓጢኣትና ድማ ሕደገልና፥ ንሕናውን ባዕልትና ንዝበደሉና ዅሎም ይቕረ ንብለሎም ኢና እሞ። ናብ ፈተናውን ኣይተእትወና።”

⁵ንሱ ኸዓ ከምዙይ በሎም፦ “መን ኻባኻትኩም እዩ ዓርኪ ዘለዎ፥ ፍርቂ ለይቲ ናብኡ ኸይዱ ድማ ‘ዓርከይ፥ ሰለስተ እንጀራ ኣለቅሓኒ፥

⁶ዓርከይ ካብ ጉዕዞ መፂኡኒ እዩ እሞ፥ ዘቕርበሉ ኸዓ ዘይብለይ ስለ ዝኾንኩ፥’

⁷ንሱ ኸዓ ኻብ ውሽጢ ‘ኣይተፅግመኒ፤ ማዕፆ ድሮ ተዓፅዩ እዩ፥ ደቀይ ድማ ምሳይ ኣብ ዓራት ደቂሶም ኣለዉ፤ ተሲአ ኽህበካ ኣይኽእልን እየ’ ኢሉ እንተ መለሰ?

⁸እብለኩም ኣለኹ፦ ዓርኩ ስለ ዝኾነ ጥራሕ እቲ ደቂሱ ዘሎ ዓርኪ ተሲኡ ገለ ክህቦ እንተ ኣበየ እኳ፥ እቲ ዝልምን ዓርኪ ብዘይሓፍር ፅንዓቱ ምኽንያት፥ እቲ ደቂሱ ዘሎ ተላዒሉ ዘድልዮ ዅሉ ኽህቦ እዩ።

⁹እብለኩም ኣለኹ፦ ለምኑ፥ ክወሃበኩም ኸዓ እዩ፤ ድለዩ፥ ክትረኽቡ ኢኹም፤ ኳሕኵሑ፥ ክኽፈተልኩምውን እዩ።

¹⁰ዝለምን ዅሉ ይቕበል፤ ዝደሊ ድማ ይረክብ፤ ነቲ ዝኳሕኵሕ ከዓ ክኽፈተሉ እዩ።

¹¹ካባኻትኩም ወዱ ዓሳ እንተ ለመኖ፥ ኣብ ክንዲ ዓሳ ተመን ዝህቦ ኣቦ መን እዩ፤

¹²ወይ እንቋቝሖ እንተ ለመኖ፥ ዕንቅርቢት ዝህቦ?

¹³እምበኣር ንስኻትኩም ክፉኣት ክነስኹም፥ ንደቅኹም ፅቡቕ ህያብ ምሃብ እንተ ፈሊጥኩም፥ ሰማያዊ ኣቦ ድኣ ኽንደይ ኣብሊፁ፥ ነቶም ዝልምንዎ ኻብ ሰማይ መንፈስ ቅዱስ ዘይህቦም!”

መንግስቲ ኣቦና መፂኣ እያ

¹⁴ሓደ በሃም ዝገበረ ጋኔን የውፅእ ነበረ። እቲ ጋኔን ምስ ወፀ ኸዓ፥ እቲ በሃም ሰብኣይ ተዛረበ፤ እቶም ህዝቢ ድማ ተገረሙ። ¹⁵ገሊኦም ግና “ብብኤል ዜቡል፥ በቲ ሓለቓ ኣጋንንቲ፥ ንኣጋንንቲ የውፅኦም ኣሎ” በሉ። ¹⁶ካልኦት ድማ ክፍትንዎ ኢሎም፥ ካብ ሰማይ ምልክት ካብኡ ይደልዩ ነበሩ።

¹⁷ንሱ ግና ሓሳቦም ፈሊጡ በሎም፦ “ኵሉ ኣብ ርእሱ ዝተፈላለየ መንግስቲ ይጠፍእ፥ ኣብ ርእሳ ዝተፈላለየት ቤት ድማ ትወድቕ።

¹⁸ሰይጣንውን ኣብ ርእሱ እንተ ተፈላለየ፥ መንግስቱ ኸመይ ኢላ ደው ክትብል እያ? ብብኤል ዜቡል ንኣጋንንቲ የውፅእ ኣሎ ትብሉ ኣለኹም እሞ።

¹⁹ኣነ ብብኤል ዜቡል ንኣጋንንቲ ዘውፅኦም እንተ ኾይነ፥ ደቅኹም ብመን እዮም ዘውፅእዎም? ስለዙይ ንሳቶም ክፈርዱኹም እዮም።

²⁰ኣነ ግና ንኣጋንንቲ ብኣፃብዕቲ ኣቦና ዘውፅኦም እንተ ኾይነ፥ መንግስቲ ኣቦና ናባኻትኩም መፂኣ እያ።

²¹ሓደ ሓያል ሰብ ብምሉእ ኣፅዋር ተዓጢቑ ናይ ባዕሉ ኣዳራሽ እንተ ሓለወ፥ ንብረቱ ብደሓን ይነብር።

²²ካብኡ ዝሕይል ግና መፂኡ ስዒሩ እንተ ወቕዖ፥ እቲ ዝወቕዖ ነቲ እቲ ሓያል ሰብ ዝተኣመኖ ኣፅዋር ይማልኦ፥ ነቲ ምርኮ ድማ ይማቐሎ።

²³እቲ ምሳይ ዘይኮነ ፀላእየይ እዩ፤ ምሳይ ዘይእክብ ድማ ይብትን።

²⁴ርኹስ መንፈስ ካብ ሰብ ምስ ወፀ፥ ዕረፍቲ እናደለየ ብደረቕ ቦታታት ይኸይድ። ምስ ሰኣነ ኸዓ ‘ናብታ ዝወፃእኩላ ቤተይ ክምለስ እየ’ ይብል። ²⁵ምስ መፀ ኸዓ፥ ነታ ቤት ተዂስቲራን ተሰሪዓን ይረኽባ።

²⁶ሽዑ ኸይዱ፥ ካብኡ ዝኸፍኡ ኻልኦት ሸውዓተ መናፍስቲ የምፅእ፤ ኣትዮም ድማ ኣብኡ ይነብሩ፤ መወዳእታ እቲ ሰብ እቱይ ከዓ ኻብ ቀዳማይ ይኸፍእ።”

²⁷እዙይ ክብል እንተሎ፥ ሓንቲ ሰበይቲ ኻብቲ ህዝቢ ዓው ኢላ “እቲ ዝፀወረካ ማህፀንን፥ እተን ዘጥበዋኻ ኣጥባትን ብፁኣት እዮም!” በለት።

²⁸ንሱ ግና “ብሕልፊ እቶም ቃል ኣቦና ሰሚዖም ዝሕልውዎ ብፁኣን እዮም!” በለ።

ካብ ዮናስ ዝዓቢ ኣብዙይ ኣሎ

²⁹እቶም ህዝቢ ኺተኣኻኸቡ እንተለዉ፥ ከምዙይ ክብል ጀመረ፦ “እዝ ትውልዲ እዙይ ክፉእ ትውልዲ እዩ። ምልክት ይደሊ ኣሎ፥ ብዘይ እቲ ምልክት ዮናስ ግና ካልእ ምልክት ኣይወሃቦን እዩ። ³⁰ዮናስ ንሰብ ነነዌ ምልክት ከም ዝኾኖም፥ ወዲ ሰብ ድማ ነዝ ትውልዲ እዙይ ከምኡ ምልክት ክኸውን እዩ። ³¹ንግስቲ ደቡብ ብመዓልቲ ፍርዲ ምስ ሰብ እዝ ትውልዲ እዙይ ተሲኣ ክትፈርዶም እያ፤ ንሳ ኻብ ወሰን ምድሪ ተላዒላ ንጥበብ ሰሎሞን ክትሰምዕ መፂኣ እያ እሞ፤ እንሆ ኸዓ፥ ካብ ሰሎሞን ዝዓቢ ኣብዙይ ኣሎ።

³²ሰብ ነነዌ ብመዓልቲ ፍርዲ ምስ እዝ ትውልዲ እዙይ ተሲኦም ክፈርድዎ እዮም፤ ዮናስ ምስ ሰበኸ ተነሲሖም እዮም እሞ፤ ካብ ዮናስ ዝዓቢ ኸዓ ኣብዙይ ኣሎ።

መብራህቲ ሰብነት

³³ሓደ እኳ መብራህቲ ኣብሪሁ ኣብ ጐዳጕዲ ወይ ኣብ ትሕቲ ዕቝ ኣየንብሮን እዩ፤ እቶም ዝኣትዉ ነቲ ብርሃን ምእንቲ ኽርእዩ ደኣ፥ ኣብ ቀዋሚ የንብሮ እምበር። ³⁴መብራህቲ ሰብነትካ ዓይንኻ እዩ፤ ዓይንኻ ጥዑይ እንተ ኾይኑ፥ ኵሉ ሰብነትካ ብሩህ ይኸውን፤ ክፉእ እንተ ኾይኑ ግና፥ ሰብነትካ ፅልመት ይመልኦ።

³⁵ስለዙይ እቲ ኣባኻ ዘሎ ብርሃን ፅልመት ከይኸውን ተጠንቀቕ።

³⁶እምበኣር ኵሉ ሰብነትካ ፅልመት ዘለዎ ኽፋል ዘይብሉ ብርሃን ዝመልኦ እንተ ኾይኑ፥ ከምቲ መብራህቲ ብጩራ ብርሃኑ ዘብርሃልካ፥ ኵሉ ብሩህ ክኸውን እዩ።”

ወይለኣ ንከንቱ ኣምልኾ

³⁷ክዛረብ እንተሎ፥ ሓደ ፈሪሳዊ ምስኡ ኽበልዕ ፀውዖ፤ ንሱ ኸዓ ኣትዩ ኣብ ማእዲ ተቐመጠ። ³⁸እቲ ፈሪሳዊ ኸዓ፥ ቅድሚ ምግቢ ኣቐዲሙ ኸም ዘይተሓፀበ ምስ ረአየ ተገረመ።

³⁹ጐይታ ድማ በሎ፦ “ሕዚ ንስኻትኩም ፈሪሳውያን፥ ንደገ ፅዋእን ሸሓንን ተንፅሑ፥ ውሽጥኹም ግና ስስዐን ክፍኣትን መሊኡ ኣሎ። ⁴⁰ኣቱም ዓያሹ! እቲ ንደገ ዝገበሮ፥ ንውሽጢውን ዝገበሮ ኣይኮነን ድዩ?

⁴¹ነቲ ኣብ ውሽጢ ዘሎ ግና ንድኻታት ሃብዎ፥ ኵሉ ድማ ንኣኻትኩም ንፁህ ክኸውን እዩ።

⁴²ኣቱም ፈሪሳውያን ግና ወይለኹም! ካብ ናዕናዕን ፂግናን ካብ ኵሉ ኣሕምልትን ዕሽር ትህቡ፥ ንፍትሒን ንፍቕሪ ኣቦናን ግና ትሓድግዎ። ነዙይ ኽትገብሩ፥ ነቲ ኻልእ ድማ ከይሓደግኩም ይግባእ ነይሩ።

⁴³ኣቱም ፈሪሳውያን ወይለኹም! ኣብ ኣብያተ ፀሎት ናይ ቅድሚት መንበር፥ ኣብ ኣደባባያት ድማ ሰላምታ ትፈትዉ ኢኹም እሞ።

⁴⁴ወይለኹም! ከምቲ ምልክት ዘይብሉ መቓብር ኢኹም እሞ፥ ሰባት ድማ እንተይፈለጡ ኣብ ልዕሊኡ ይኸዱ።”

⁴⁵ሓደ ኻብቶም ሊቃውንቲ ሕጊ ድማ “መምህር፥ እዙይ ብምባል ንኣናውን ትፅረፈና ኢኻ” ኢሉ መለሰሉ።

⁴⁶ንሱ ኸዓ ከምዙይ በለ፦ “ኣቱም ሊቃውንቲ ሕጊ፥ ንኣኻትኩምውን ወይለኹም! ንሰባት ከቢድ ፅዕነት ተሰክምዎም፥ ባዕላትኩም ግና ነቲ ፅዕነት ብሓንቲ ኣፃብዕትኹም ኣይትትንክፍዎን ኢኹም።

⁴⁷ወይለኹም! መቓብር ነቢያት ትሰርሑ፥ ዝቐተልዎም ግና ኣቦታትኩም እዮም።

⁴⁸ስለዙይ ንሳቶም ቀቲሎምዎም፥ ንስኻትኩም ድማ መቓብሮም ትሰርሑ ኢኹም እሞ፥ ንግብሪ ኣቦታትኩም ምስክር ኴንኩም ትሰማምዑሉ ኢኹም።

⁴⁹ስለዙይ ጥበብ ኣቦናውን ከምዙይ በለት፦ ‘ነቢያትን ሃዋርያትን ክሰደሎም እየ፥ ካብኣቶም ገሊኦም ድማ ክቐትልዎም፥ ከሳጕጕዎምውን እዮም።’

⁵⁰ካብ ምፍጣር ዓለም ኣትሒዙ ዝፈሰሰ ደም ኵሎም ነቢያት፥ ካብዝ ወለዶ እዙይ ምእንቲ ኽጥየቕ፥

⁵¹ካብ ደም ኣቤል ክሳዕ ደም ዘካርያስ፥ እቲ ኣብ መንጎ መሰውእን ቤተ መቕደስን ዝሞተ፤ እወ እብለኩም ኣለኹ፥ ካብዝ ወለዶ እዙይ ክሕተት እዩ።

⁵²ኣቱም ሊቃውንቲ ሕጊ ወይለኹም! መፍትሕ ፍልጠት ወሲድኩም ኢኹም እሞ፥ ባዕላትኩም ኣይኣተኹምን፥ ነቶም ዝኣትዉ ዘለዉ ድማ ከልኪልኩሞም።”

⁵³ካብኡ ምስ ወፀ ድማ፥ ፀሓፍትን ፈሪሳውያንን የመና ክፃረርዎ ጀመሩ፥ ብዛዕባ ብዙሕ ነገር ድማ ክዛረብ ኣዳፍእዎ፥ ⁵⁴ካብ ኣፉ ዝወፅእ ገለ ነገር ኽሕዝዎ፥ የድብይሉ ነበሩ።