Welauko Bou Jungto Louashi
Lanei welaula dogo phejinei, Jisuei ngüh kukei, Abou dogo hato sühko, kheijinei jihsiphai thodaka jen cheei koukap kaangbü ngühphatbü lenkei. Shabü sou Beelzebul danko satbü dogo attibüa, haoei jongaikei, kheijinei Farisibü hoba Ngühkhüm lenbou to chühngaian, haoeneibü tang jim shanga ügütü juongnyu laukei.
11 1Jisu kaothe ka welauko kikei; ladang hao welaubü khünkei, haoeibü eikshuong yo ka cheei hao to laukei, “Bunyubou, Johanei ong jembü eikshuong to lenbü tegü, sen welaula lenashi.”
2Jisuei haoen to laukei, “Kanei welaujinei, hai laushi: Abou, Ka nyen saopobü yingshi. Kaibü Sangle kaiya. 3Kün la chalou angbou seneibü shausiyung kushi. 4Hobaje seneibü shabü sen la apyoashi, aishanga künei ong sen la lepbü pendou to apyokaida. Hobaje kün takteibü to teleima.”
5Haoei haoen to laukei, “Kan yoa aoei jen che ki, hoba metuphanga hao jungto hauan hao to laulabü, ‘Jenabou, kü la wentek sem lotiashi,’
6“aishanga kü jen che lam ka louakei, hoba ngei hao la sholabü ai aying,’
7“hoba haoei shimung ka jongailabü, ‘Ngo tehuonti; koukap tekan aipkei, hoba kü chilang kü yoa yepan kikei. Ngo pian ka la ai kula athükda’?
8“Ngei kan to lenda, haosi jen kibü shanga ong yepan kibü jen cheei pian ka la ai akula yingasikei, hilabü jen cheei himou alouko athakko hileda; khoei yepan kibü kho piantiko hao khambü pendou hao la kulabü.”
9“Ngei kan to lenda, hiashi, hoba kan la kulabü; lamashi, hoba kanei haplabü; ngaitiashi, hoba kan la haiyetkulabü.
10“Hilabü pendouei haplabü; lamda haoei haplabü; ngaitibou la haiyetkulabü.
11“Kan yoa aoei bouei, jembü shouei ngao hilaje, ngao la liman pinyu hao la kulabü;
12“ayingsi hao wau hilaje, singnyak hao la kulabü si?
13“Kanei amaibü kiasikei, kaneibü chilang to maibü sung kula ngealonga, khuthükkabü Bouei hao hilabü shuong la Soushou Saopobü latetche anyikula kulabü!”
Seneibü Bou Sangle Louakei
14Haoei obangbü shabü sou che shian sattiko kikei. Ladang kho satkei, obangbü müt ngüh joyokei, hoba mütshang maangpangkei. 15Lausikei haoen yo ka atei laukei, “Shabü soushou shuong leiyeibou Belzebub danko haoei shabü sou shian sattida,” 16lubü shuongei hao takteiko khuthük ka amaaphelabü che hao la lambo kikei.
17Lausikei haoei haoeneibü dambü ngeko haoen to laukei, “Sangle pendou hao lolo to phegei kialonga leilulabü, hoba chem che chem to phegeilaje tuonglabü.
18“Satan ong hao lolo to phegei kialonga, haoeibü Sangle aei kümbo yinglabü? Aishanga ngo Belzebub danko shabü sou shian sattida dogo kanei lauda.
19“Ngei Belzebub danko shabü sou shian sattida longa, kaneibü shousi shuongei aoei danko shian sattida? Kheijinei haoenei kan matjemlabü.
20“Lausikei ngei seneibü Bou ikchü danko shabü sou shian sattida longa, seneibü Bou Sangle kan thüka louakei.
21“Hau yaangbü müt cheei kokbü pendou jungan jembü choba chem püetan kialonga, jembü peisilei hakso kilabü.
22“Lausikei hao thükkabou hau yaangbü cheei wapyoan hao thüklaje, hau yaangbü müt maanglembü kokbü shuong haoei sepeian louan jembü soletbü peisilei janyolabü.
23“Aoei ngo yoa akilonga ngo khulimbü ki, hoba aoei ngo yoa atakshatda haoei lintida.
24“Asaopobü soushou müt che ka satlaje, kaolina lam jembo haksoshang lamda. Ahapan haoei lauda, ‘Ngo satbü chem to ngailabü. 25Hoba kho louakei, chem saüenan hoba küpjeman kibü hapda.
26“Kheijinei kho hauan hao toje amaibü lubü soushou nyet leibalabü; haoen khüto atan khünei kilabü, hoba kho müteibü meten thu kho manga toje amaibou kilabü.”
27Haoei kho laujinei, mütshang juongnyu yaksa cheei kaangko laukei, “Ka künan kibü shisi hoba ka senyopbü senlang haübü!”
28Lausikei haoei laukei, “Laobou seneibü Bou ngüh ditan jungeibü shuong haübou!”
Jona Toje Thükkabou Hanei Ki
29Mütshang takshatjinei haoei laula khangkei, “Ho meten kho amaibü meten ki. Kho amaaphelabü lamda, lausikei kho la ai amaaphelabü akulabü, Jona amaaphelabü to liman. 30Aishanga Jona Ninevibü shuong la amaaphelabü yeibü tegü, Müteibü Shou ong ho meten la yeilabü. 31Jemang Chobasaoei matjem jiha ho meten mütshuong yoa pienan haoen yuktilabü—saoei Solomon songsihon ditla kaodak jithon ka louakei, hoba chühashi, Solomon toje thükkabou hanei kia.
32“Ninevibü shuongei matjem jiha ho meten yoa pienan kho yuktilabü, aishanga Jonaei songlenkei haoen maangpon sepeikei, hoba Jona toje thükkabou hanei kia.
Mangeibü Wanthung
33“Aoeikei wanthung sapan huphanga ayingsi kamei küplepan aphoda, lausikei denshanga phoda, khei lotbü shuongei ngesakbü haplabü. 34Ka nyek kho ka mangeibü wanthung ki: ka nyek maisho kialonga, ka mang khümbo ngesaklabü; amaibü kialonga, ka mang nakthühei nyakan kilabü.
35“Khoei ka ka kibü ngesakbü kho nakthüh akilabü lele maangsangashi.
36“Hibü ka mang khümbo ngesakbü kialonga, nakthühbü phet ai akilonga, kho khümbo ngesaklabü—wanthung cheei ka thüka ngesakbü shingbü tegü.”
Lema Lembü Shanga Ügütü
37Haoei laujinei, Farisi cheei hao yoa shaula hao ngakei; hao atan shaushang to setkei. 38Farisi cheei hao shaushang thedanga manga athe anyetbü hapan maangpangkei.
39Hobaje Bunyubouei hao to laukei, “Tou kan Farisi shuongei kap hoba dishon khonga saüenda, lausikei kaneibü shimung ka maangsha maangkok hoba amaibüei nyaka. 40Kan ngoubü shuong! Khonga kümbouei shimung ong akümbo lo?
41Lausikei maanga kibü shuong kho aeibou phaman kibü shuong la kuashi, hoba kan la pendou saopobü kilabü.
42Lausikei kan Farisibü shuong shangaje ügütü! Kanei mint, rue hoba lam shou phang pendoueibü anthükbü che sungbada, lausikei matjem hoba seneibü Bou sanou kho apyoda. Habü shuong kanei kümla kikei, lausikei lubü shuong kho teapyoma.
43Kan Farisibü shuong shangaje ügütü! Aishanga kanei sinagoga maanga setshang hoba pühlama salem kubü to sanouda.
44Kan shangaje ügütü! Aishanga kanei amaaphe akibü hee tegü ki, hoba mütshuongei kho maanga angeko paida.”
45Ngühkhüm songbüdobü che ei hao to jongaikei, “Lenbou, habü shuong laujinei nyi kün tokei nyikuda.”
46Haoei laukei, “Kan Ngühkhüm songbüdobü shuong tokei shangaje ügütü! Kanei mütshuong la amauti onat phoda, lausikei kanei kho on shuong to ikjishou cheei temeiti.
47Kan shangaje ügütü! Kanei thuseibü shuong tombü kümda, lausikei kaneibü pisibousi shuongei haoen haitikei.
48Kheijinei kanei aukabü ki, hoba kaneibü pisibousi shuong kümsilei to maanghaiko kida, aishanga haoenei haoen haitikei hoba kanei haoeneibü tombü kümda.’
49Kheijinei seneibü Bou songsido tokei laukei, ‘Ngei haoen jungto thuseibü shuong hoba youkoikjai shuong hautilabü; haoen yoa atei to haoenei haitilabü hoba shieikoelabü.’
50khei kaodak yaükei ka tatbü angtibü thuseibü shuong pendoueibü sii ho meten khua phantilabü lele,
51Abel sii ka tatbü, lemshang hoba sanchem kanglanga haibü Zekharia sii sühko. Haü, ngei kan to lenda, kho ho meten khua phantilabü.
52Kan Ngühkhüm songbüdobü shuong shangaje ügütü! Aishanga kanei ngelabü lipthetlabü lamjung lekei—kanei lolo alot, hoba lotla lambü shuong to kanei thaktikei.”
53Ladang haoei kaoen ka satkei, Ngühkhüm lenbou shuong hoba Farisibü shuongei hao to kaangko oyoko tatkei, hoba peisilei juong shanga haoei ngühangla shanga hao to athakko sudajakei, 54haoei ai lenlabü denche ka hao to lapla shanga, haoei shanga thoko kiteian kikei.
