Luka 11 FHB Father's Heart Bible™

Babi na 11.

11 ¹Yana addu'a a wani wuri; da ya gama, sai ɗaya daga cikin almajiransa ya ce masa, “Ubangiji, ka koya mana addu'a, yadda Yohanna ma ya koya wa almajiransa.”

²Ya ce musu, “Sa'ad da kuke addu'a, ku ce, Ya Uba, a tsarkake sunanka. Mulkinka yă zo. ³Ka ba mu abincinmu na kullum kowace rana. ⁴Ka kuma gafarta mana zunubanmu, gama mu ma muna gafarta wa duk wanda muke binsa bashi. Kada kuma ka kai mu cikin jaraba.”

⁵Ya ce musu, “Wane ne a cikinku da yake da aboki, ya kuma je wurinsa da tsakar dare ya ce masa, ‘Aboki, ka ba ni aron gurasa uku,’

⁶“saboda wani abokina ya iso daga tafiya, ba ni kuma da abin da zan ba shi,’

⁷“sai ya amsa daga ciki, ‘Kada ka dame ni; an riga an kulle ƙofa, 'ya'yana kuma suna kwance tare da ni a gado. Ba zan iya tashi in ba ka kome ba’?

⁸“Ina gaya muku, ko da yake ba zai tashi ya ba shi kome ba saboda su abokai ne kawai, duk da haka saboda nacin da mai roƙon yake yi ba tare da kunya ba, zai tashi ya ba shi duk abin da yake bukata.”

⁹“Ina gaya muku, ku roƙa za a kuwa ba ku; ku nema za ku kuwa samu; ku ƙwanƙwasa za a kuwa buɗe muku.

¹⁰“Duk mai roƙo yakan samu; mai nema yakan samu; wanda yake ƙwanƙwasawa kuma za a buɗe masa.

¹¹“Wane uba ne a cikinku, in ɗansa ya roƙe shi kifi, zai ba shi maciji a maimakonsa;

¹²“ko kuma in ya roƙe shi ƙwai, zai ba shi kunama?

¹³“In ku da kuke mugaye kun san yadda za ku ba 'ya'yanku kyautai masu kyau, balle kuwa Uba na Sama, zai ba da Ruhu Mai Tsarki ga waɗanda suke roƙonsa!”

Mulkin Ubanmu Ya Zo

¹⁴Yana fitar da wani aljani da yake bebe. Da aljanin ya fita, sai mutumin da yake bebe ya yi magana, taron kuma suka yi mamaki. ¹⁵Amma waɗansunsu suka ce, “Da Ba'alzabub, sarkin aljannu, yake fitar da aljannu.” ¹⁶Waɗansu kuma, don su gwada shi, suka ci gaba da neman wata alama daga Sama a wurinsa.

¹⁷Amma da ya san tunaninsu, sai ya ce musu, “Duk mulkin da ya rabu gāba da kansa yakan lalace, gida kuwa da ya rabu gāba da gida yakan fāɗi.

¹⁸“In Shaiɗan ma ya rabu gāba da kansa, yaya mulkinsa zai tsaya? Gama kun ce da Ba'alzabub nake fitar da aljannu.

¹⁹“In da Ba'alzabub nake fitar da aljannu, to, da wane ne 'ya'yanku suke fitar da su? Saboda haka su za su shar'anta ku.

²⁰“Amma in da yatsan Ubanmu nake fitar da aljannu, to, Mulkin Ubanmu ya zo muku.

²¹“Sa'ad da mai ƙarfi, saye da makamai, yake tsaron fādarsa, dukiyarsa tana nan lafiya.

²²“Amma sa'ad da wani mafi ƙarfi ya auka masa ya kuma rinjaye shi, sai mai aukawar ya ƙwace makaman da mai ƙarfin ya dogara da su, ya kuma rarraba ganimarsa.

²³“Duk wanda ba ya tare da ni, yana gāba da ni ne, duk kuma wanda ba ya tarawa tare da ni, yana warwatsawa ne.

²⁴“Sa'ad da ƙazamin ruhu ya fita daga mutum, yakan ratsa busassun wurare yana neman hutu. Da bai samu ba, sai ya ce, ‘Zan koma gidana da na bari. ²⁵Sa'ad da kuma ya zo, yakan tarar da gidan an share shi an kuma tsara shi.

²⁶“Sa'an nan yakan tafi ya kawo waɗansu ruhohi guda bakwai mafiya muni fiye da kansa; su kuma shiga su zauna a wurin, halin ƙarshen mutumin kuwa ya fi na farko muni.’

²⁷Yayinda yake faɗin wannan, sai wata mace a cikin taron ta ɗaga murya ta ce, ‘Mai albarka ce cikin da ya ɗauke ka, da ƙirjin da ka sha!’

²⁸Amma ya ce, ‘Masu albarka ma su ne waɗanda suke jin maganar Ubanmu suke kuma kiyaye ta!’

Wani Mafi Girma da Yunusa Yana Nan

²⁹Yayinda taron suke taruwa, sai ya fara cewa, ‘Wannan zamani mugun zamani ne. Yana neman alama, amma ba za a ba shi wata alama ba sai dai alamar Yunusa. ³⁰Gama kamar yadda Yunusa ya zama alama ga mutanen Nineba, haka ma Ɗan Mutum zai zama ga wannan zamani. ³¹Sarauniyar Kudu za ta tashi a ranar shari'a tare da mutanen wannan zamani ta kuma hukunta su—ta zo daga iyakar duniya domin ta ji hikimar Sulemanu, ga shi kuwa, abin da ya fi Sulemanu girma yana nan.

³²“Mutanen Nineba za su tashi a ranar shari'a tare da wannan zamani su kuma hukunta shi, gama sun tuba sa'ad da Yunusa ya yi wa'azi, ga shi kuwa, wani mafi girma da Yunusa yana nan.

Fitilar Jiki

³³“Ba wanda yakan ƙuna fitila ya sa ta a ɓoye ko a ƙarƙashin kwando, sai dai a kan madaukin fitila, domin masu shiga su ga haske. ³⁴Idonka shi ne fitilar jikinka. Sa'ad da yake da kyau, dukan jikinka yana cike da haske; amma sa'ad da yake mummuna, jikinka yana cike da duhu.

³⁵“Saboda haka ka yi hankali kada hasken da yake cikinka yă zama duhu.

³⁶“To, in dukan jikinka yana cike da haske, babu wani sashe mai duhu, zai zama mai haske ƙwarai—kamar fitila mai haskaka ka da haskenta.’

Kaiton Addinin Banza

³⁷Yayinda yake magana, sai wani Bafarise ya gayyace shi cin abinci tare da shi; ya shiga ya kuma zauna a tebur. ³⁸Bafarisen ya yi mamaki da ya ga bai fara wanke hannu ba kafin cin abinci.

³⁹Sai Ubangiji ya ce masa, ‘To, ku Farisawa kuna tsabtace kof da kwano daga waje, amma a ciki kuna cike da kwaɗayi da mugunta. ⁴⁰Ku wawaye! Shin wanda ya yi wajen, ba shi ne ya yi cikin ma ba?

⁴¹“Amma ku ba da abubuwan da suke ciki ga matalauta, kome kuwa zai zama muku da tsabta.

⁴²“Amma kaitonku Farisawa! Kuna ba da zakkar na'ana'i, da tansay, da kowane irin ganye, amma kun ƙyale yin adalci da ƙaunar Ubanmu. Waɗannan ya kamata ku yi, ba tare da kun ƙyale sauran ba.

⁴³“Kaitonku Farisawa! Gama kuna son mafifitan wuraren zama a majami'u da kuma gaisuwa a wuraren kasuwa.

⁴⁴“Kaitonku! Gama kuna kama da kaburburan da ba a yi musu alama ba, mutane kuma suna takawa a kansu ba tare da sanin haka ba.’

⁴⁵Sai ɗaya daga cikin masana shari'a ya amsa masa ya ce, ‘Malam, da faɗin waɗannan abubuwa kana zagin mu mu ma.’

⁴⁶Sai ya ce, ‘Kaitonku ku ma masana shari'a! Kuna lodawa mutane kaya masu nauyi, amma ba kwa taɓa kayan ko da yatsa ɗaya.

⁴⁷“Kaitonku! Kuna gina kaburburan annabawa, amma ubanninku ne suka kashe su.

⁴⁸“Saboda haka ku shaidu ne, kuna kuma amincewa da ayyukan ubanninku, gama su suka kashe su ku kuma kuna gina kaburburansu.’

⁴⁹“Saboda haka hikimar Ubanmu ma ta ce, ‘Zan aiko musu annabawa da manzanni; waɗansunsu za su kashe su kuma tsananta musu.’

⁵⁰“domin a nemi alhakin jinin dukan annabawan da aka zubar tun kafuwar duniya a kan wannan zamani,

⁵¹“tun daga jinin Habila har zuwa jinin Zakariya, wanda aka kashe tsakanin bagade da wuri mai tsarki. Hakika, ina gaya muku, za a nemi alhakinsa a kan wannan zamani.

⁵²“Kaitonku masana shari'a! Gama kun ɗauke mabuɗin sani—ba ku shiga ba, kun kuma hana masu shiga.”

⁵³Sa'ad da ya bar wurin, sai malaman Attaura da Farisawa suka fara matsa masa ƙwarai, suna tsokanarsa yă yi magana a kan abubuwa masu yawa, ⁵⁴suna fakonsa, domin su kama shi cikin wani abu da zai faɗa.