Luka 10

10 ¹Baada ya haya, Bwana akawachagua wengine sabini na wawili, akawatuma wawili wawili mbele yake, kuingia katika kila mji na kila mahali alipokusudia yeye mwenyewe kwenda.

²Akawaambia, "Mavuno ni mengi, lakini watenda kazi ni wachache. Basi mwombeni Baba wa mavuno apeleke watenda kazi katika mavuno yake. ³Nendeni! Angalieni, ninawatuma kama wana-kondoo kati ya mbwa-mwitu. ⁴Msichukue mfuko wa fedha, wala mkoba, wala viatu, wala msimsalimie mtu yeyote njiani. ⁵Nyumba yoyote mtakayoingia, semeni kwanza, 'Amani iwe kwa nyumba hii.' ⁶Kama mtu wa amani yupo humo, amani yenu itakaa juu yake; kama sivyo, itawarudia ninyi. ⁷Kaeni katika nyumba hiyo, mkila na kunywa vile mnavyopewa, kwa maana mtenda kazi anastahili ujira wake. Msihame nyumba hii kwenda nyumba nyingine. ⁸Mji wowote mtakaoingia na wao wakawakaribisha, kuleni vile mtakavyoandaliwa. ⁹Waponyeni wagonjwa waliomo, na kuwaambia, 'Ufalme wa Baba yetu umewakaribia.' ¹⁰Lakini mtakapoingia mji usiowakaribisha, tokeni nje kwenye barabara zake mkaseme, ¹¹'Hata mavumbi ya mji wenu yaliyoshikamana na miguu yetu, tunayakung'uta juu yenu. Lakini fahamuni hili: Ufalme wa Baba yetu umekaribia.' ¹²Nawaambia, siku ile itakuwa nafuu zaidi kwa Sodoma kuliko kwa mji ule.

¹³"Ole wako, Korazini! Ole wako, Bethsaida! Kwa maana kama miujiza iliyofanyika kwenu ingefanyika Tiro na Sidoni, wangelitubu zamani, wakiketi katika nguo za magunia na majivu. ¹⁴Lakini itakuwa nafuu zaidi kwa Tiro na Sidoni wakati wa hukumu kuliko kwenu. ¹⁵Nawe, Kapernaumu, je, utainuliwa mpaka mbinguni? Utashushwa mpaka kuzimu. ¹⁶Awasikilizaye ninyi anisikiliza mimi; anayewakataa ninyi ananikataa mimi; anayenikataa mimi anamkataa yeye aliyenituma."

¹⁷Wale sabini na wawili wakarudi kwa furaha, wakasema, "Bwana, hata pepo wanatutii kwa jina lako."

¹⁸Akawaambia, "Nilimwona Shetani akianguka kutoka mbinguni kama umeme. ¹⁹Angalieni, nimewapa mamlaka ya kukanyaga nyoka na ng'e, na juu ya nguvu zote za yule adui—wala hakuna kitu chochote kitakachowadhuru. ²⁰Lakini msifurahi kwa sababu pepo wanawatii—bali furahini kwa sababu majina yenu yameandikwa mbinguni."

²¹Saa ile ile Yesu akafurahi katika Roho Mtakatifu, akasema, "Baba, Mwenye enzi wa mbingu na nchi, ninakuhimidi—kwa maana umeyaficha mambo haya kwa wenye hekima na werevu, nawe ukawafunulia watoto wadogo. Naam, Baba, kwa kuwa hivyo ndivyo ilivyokupendeza."

²²"Yote nimekabidhiwa na Baba yangu. Hakuna ajuaye Mwana ni nani ila Baba, wala ajuaye Baba ni nani ila Mwana—na yeye ambaye Mwana apenda kumfunulia."

²³Kisha akawageukia wanafunzi, akawaambia faraghani, "Heri macho yanayoyaona mnayoyaona ninyi! ²⁴Kwa maana nawaambia, manabii wengi na wafalme walitamani kuyaona mnayoyaona ninyi wala hawakuyaona, na kuyasikia mnayoyasikia wala hawakuyasikia."

Mfano wa Msamaria Mwema

²⁵Mwana-sheria mmoja akasimama akamjaribu, akisema, "Mwalimu, nifanye nini ili niurithi uzima wa milele?"

²⁶Akamwambia, "Imeandikwa nini katika Torati? Wewe unasomaje?"

²⁷Akajibu, "Mpende Baba yako kwa moyo wako wote, kwa roho yako yote, kwa nguvu zako zote, na kwa akili zako zote, na jirani yako kama nafsi yako."

²⁸Akamwambia, "Umejibu vema. Fanya hivyo nawe utaishi."

²⁹Lakini akitaka kujihesabia haki, akamwuliza Yesu, "Na jirani yangu ni nani?"

³⁰Yesu akajibu, "Mtu mmoja alikuwa akishuka kutoka Yerusalemu kwenda Yeriko, akaangukia kati ya wanyang'anyi, waliomvua nguo na kumpiga, kisha wakamwacha karibu kufa. ³¹Basi kwa bahati kuhani mmoja alikuwa akishuka njia ile; alipomwona, akapita kando. ³²Vivyo hivyo Mlawi naye akafika mahali pale, akamwona, akapita kando. ³³Lakini Msamaria mmoja aliyekuwa akisafiri njia ile akamfikia, na alipomwona, akasukumwa na huruma. ³⁴Akamwendea, akayafunga majeraha yake, akamimina mafuta na divai, akampandisha juu ya mnyama wake mwenyewe, akampeleka nyumba ya wageni, akamtunza. ³⁵Siku iliyofuata akatoa sarafu mbili za fedha, akampa mwenye nyumba ya wageni, akasema, 'Mtunze huyu. Chochote utakachotumia zaidi, nitakulipa nitakaporudi.' ³⁶Waonaje wewe, ni yupi kati ya hawa watatu aliyekuwa jirani wa yule mtu aliyeangukia kati ya wanyang'anyi?"

³⁷Akasema, "Ni yule aliyemwonea huruma." Yesu akamwambia, "Nenda nawe ukafanye vivyo hivyo."

Martha na Mariamu

³⁸Walipokuwa wakisafiri, Yesu akaingia katika kijiji kimoja. Mwanamke mmoja aitwaye Martha akamkaribisha nyumbani kwake. ³⁹Alikuwa na dada aitwaye Mariamu, ambaye aliketi miguuni pa Bwana, akisikiliza mafundisho yake. ⁴⁰Lakini Martha alikuwa na shughuli nyingi za kutumikia. Akamwendea, akasema, "Bwana, hujali kwamba dada yangu ameniacha nitumike peke yangu? Mwambie anisaidie."

⁴¹Lakini Bwana akamjibu, "Martha, Martha, unahangaika na kusumbuka kwa ajili ya mambo mengi, ⁴²lakini kinachohitajika ni kitu kimoja tu. Mariamu amechagua fungu jema; hataondolewa hilo."