Luke 10 FHB Father's Heart Bible™

10 ¹Eitu pichete, Prabhu pora aru 72 jon ke basi loise, aru Tar nijor jabole thaka sob sheher aru jaga khan te duijon-duijon kori kene Tar age te pathai dise.

²Tar pora tarkhan ke koise, “Kati bole dhan bisi ase, kintu kaam kora manuh khan komti ase. Etu nimite, dhan kata laga Pitri ke Tar dhan kata te kaam kora manuh khan pathai dibole binti koribi.” ³“Jabi! Sabi, Moi tumikhan ke rong-kutta khan majote mer bacha khan nisena pathai ase.” ⁴“Poisa laga toli, jola, aru juta nalobi, aru rasta te kun ke bhi salam nakoribi.” ⁵“Tumikhan kuntu ghor te ghusibo, poila eneka kobi, ‘Eitu ghor te shanti hobo.’” ⁶“Jodi ta te shanti laga manuh ekjon thakise koile, tumikhan laga shanti tar uporte thakibo; jodi nai koile, eitu tumikhan logote wapas ahhi jabo.” ⁷“Hei ghor te thakibi, tarkhan pora ki dibo eitu khai aru pi kene, kilemane kaam kora manuh tar mojuri pabole lage. Ekta ghor pora dusra ghor te najabi.” ⁸“Tumikhan jun sheher te ghusibo aru tarkhan pora tumikhan ke grohon korile, tumikhan age te ki rakhi dibo eitu khabi.” ⁹“Ta te bemar manuh khan ke bhal kori dibi aru tarkhan ke kobi, ‘Amar Pitri laga rajyo tumikhan usorte ahhi jaise.’” ¹⁰“Kintu tumikhan jun sheher te ghusibo aru tarkhan pora tumikhan ke grohon nakorile, eitu laga rasta khan te ulai jai kene kobi,” ¹¹“‘Tumikhan laga sheher laga dhuli bhi amikhan laga theng te lagise, eitu amikhan tumikhan bhirud te jhari di ase. Kintu eitu jani lobi: amar Pitri laga rajyo usorte ahhi jaise.’” ¹²“Moi tumikhan ke koi ase, hei din te, hei sheher nimite pora bhi Sodom nimite aru soja hobo.”

¹³“Hai, tumi Khorajin! Hai, tumi Bethsaida! Jun asurit kaam khan tumikhan majote korise, eitu jodi Tyre aru Sidon te korise koile, tarkhan bisi din age te bosta-kapor pindhi aru chai te bohi kene mon ghurai loise hobo.” ¹⁴“Kintu bisar laga din te tumikhan nimite pora bhi Tyre aru Sidon nimite aru soja hobo.” ¹⁵“Aru tumi, Kaparnahum, tumi ke sorgo loi uthai lobo naki? Tumi ke pataal te girai dibo.” ¹⁶“Kun pora tumikhan laga kotha hune, tai Moi laga kotha hune; aru kun pora tumikhan ke namane, tai Moi ke namane; aru kun pora Moi ke namane, tai Moi ke pathai diya Jon ke namane.”

¹⁷Hei 72 jon khushi pora wapas ahhi kene koise, “Prabhu, Apuni laga nam te bhoot khan bhi amikhan laga kotha mane.”

¹⁸Tar pora tarkhan ke koise, “Moi Saitan ke sorgo pora bhijili nisena gira dikhise.” ¹⁹“Sabi, Moi tumikhan ke saph aru bisfula khan ke theng pora chepi dibole, aru dushman laga sob takot uporte adhikar dise—eku bhi tumikhan ke nuksan koribo naparibo.” ²⁰“Kintu atma khan tumikhan laga kotha mane koile eitu nimite khushi nohobi—kintu tumikhan laga nam sorgo te likhi kene ase koile eitu nimite khushi koribi.”

²¹Hei somoite Jisu Pobitro Atma te khushi hoi kene koise, “Pitri, sorgo aru prithibi laga Malik, Moi Apuni ke prosansa kori ase—Apuni gyaani aru buddhiman manuh khan pora eitu kotha khan lukai rakhise, aru chutu bacha khan ke dikhai dise. Hoi, Pitri, kilemane eneka kora Apuni ke bhal lagise.”

²²“Moi laga Pitri pora Moi ke sob jinis dise. Putro kun ase eitu Pitri nohoile kun bhi najane, aru Pitri kun ase eitu Putro nohoile kun bhi najane—aru kun ke Putro pora dikhai dibole itcha kore, tai he jane.”

²³Tetiya chella khan phale ghuri kene, alag te koise, “Tumikhan ki dikhe eitu dikha suku khan dhonyo ase!” ²⁴“Kilemane Moi tumikhan ke koi ase, bisi bhabobadi aru raja khan tumikhan ki dikhe eitu dikhibole mon korise kintu dikha nai, aru tumikhan ki hune eitu hunibole mon korise kintu huna nai.”

Bhal Samariya Manuh laga Drishtanto

²⁵Ekjon niyom jana manuh uthi kene Tar ke porikha korise, “Guruji, ananta jivon pabole moi ki koribo lage?”

²⁶Tar pora tar ke koise, “Niyom te ki likhise? Tumi eitu kineka pore?”

²⁷Tai jawab dise, “Tumi laga Pitri ke tumi laga pura mon pora, pura atma pora, pura takot pora, aru pura buddhi pora prem koribi, aru tumi laga ghor-usor manuh ke nijor nisena prem koribi.”

²⁸Tar pora tar ke koise, “Tumi thik jawab dise. Eitu koribi aru tumi jinda thakibo.”

²⁹Kintu tai nijor ke thik dikhabole mon kori kene, Jisu ke hudise, “Tenehoile moi laga ghor-usor manuh kun ase?”

³⁰Jisu pora koise, “Ekjon manuh Jerusalem pora Jeriko te namikene jai thakise aru dakait khan majote giri jaise, taikhan pora tar kapor khuli loise aru mari kene, tar ke adha-mora chari kene jai jaise.” ³¹“Etiya, ekjon purohit achanak hei rasta pora nami ahi thakise; tar ke dikhi kene, dusra phale pora paar hoi jaise.” ³²“Eneka hi, ekjon Levi manuh bhi hei jaga te ahhi kene, tar ke dikhise, aru dusra phale pora paar hoi jaise.” ³³“Kintu ekjon Samariya manuh hei rasta pora jai thaka homoite tar ke pai loise, aru tar ke dikhi kene, tar bhitorte morom ahise.” ³⁴“Tai tar usorte jai kene, tar jokhom khan bandi dise, tate tel aru angur-ros hali dise, aru tar ke nijor janwar uporte bohai kene, ekta musafir-ghor te loi jaise, aru tar sewa korise.” ³⁵“Dusra din te tai dui-ta chandi laga poisa ulai kene, musafir-ghor laga malik ke di dise, aru koise, ‘Tar bhal pora sewa koribi. Tumi eitu pora aru bisi kharcha koribo, moi wapas ahile sob wapas di dibo.’” ³⁶“Eitu tinjon majote, dakait khan majote giri juwa manuh laga ghor-usor manuh kun hoise, tumi ki bhabe?”

³⁷Tai koise, “Kun pora tar uporte doya dikhaise, tai he.” Jisu pora tar ke koise, “Jabi aru tumi bhi eneka koribi.”

Martha aru Mariam

³⁸Tarkhan jai thaka homoite, Jisu ekta gaon te ghusise. Martha koi kene ekjon maiki pora Tar ke tai laga ghor te grohon korise. ³⁹Tai laga Mariam koi kene ekjon bhoini thakise, kun Prabhu laga theng usorte bohi kene Tar sikhai diya kotha hunise. ⁴⁰Kintu Martha bisi sewa laga kaam loi kene chinta te byosto thakise. Tai Tar usorte ahhi kene koise, “Prabhu, moi laga bhoini pora moi ke ekla kaam koribole chari dise, eitu Apuni chinta nakore naki? Tai ke moi ke modot koribole kobi.”

⁴¹Kintu Prabhu pora tai ke jawab dise, “Martha, Martha, tumi bisi jinis loi kene chinta aru pareshan ase,” ⁴²“kintu ekta jinis he dorkar ase. Mariam pora bhal bhag basi loise; eitu tai pora loi lobo naparibo.”