ሉቃስ 12

12 ¹በዚህ መካከል፣ እርስ በርሳቸው እስኪረጋገጡ ድረስ በሺዎች የሚቈጠር ሕዝብ በተሰበሰበ ጊዜ፣ ኢየሱስ በመጀመሪያ ለደቀ መዛሙርቱ እንዲህ ሊል ጀመረ፤ “ከፈሪሳውያን እርሾ፣ ማለትም ከግብዝነት ተጠበቁ። ²የማይገለጥ የተሰወረ ነገር የለም፤ የማይታወቅም የተደበቀ የለም። ³ስለዚህ በጨለማ የተናገራችሁት ሁሉ በብርሃን ይሰማል፤ በእልፍኝ ውስጥ በሹክሹክታ ያላችሁትም ከጣሪያ ላይ ይነገራል።

⁴“ወዳጆቼ ሆይ፣ እላችኋለሁ፤ ሰውነትን የሚገድሉትን፣ ከዚያ በኋላ ሌላ ምንም ሊያደርጉ የማይችሉትን አትፍሩ። ⁵ማንን መፍራት እንዳለባችሁ አሳያችኋለሁ፤ ከገደለ በኋላ ወደ ገሃነም ለመጣል ሥልጣን ያለውን ፍሩ። አዎን፣ እላችኋለሁ፣ እርሱን ፍሩ።

⁶አምስት ድንቢጦች በሁለት ሳንቲም አይሸጡምን? ሆኖም ከእነርሱ አንዱ እንኳ በአባታችን ፊት አይረሳም። ^a a v6 አሳርዮን ዋጋው አነስተኛ የሆነ ትንሽ የናስ ሳንቲም ነበር፤ ሁለቱ አምስት ድንቢጦችን ይገዙ ነበር። ⁷የራሳችሁ ጠጒር እንኳ ሁሉ ተቈጥሯል። አትፍሩ፤ ከብዙ ድንቢጦች ይልቅ እናንተ ትበልጣላችሁ።

⁸“እላችኋለሁም፤ በሰዎች ፊት የሚመሰክርልኝን ሁሉ፣ የሰው ልጅ ደግሞ በአባታችን መላእክት ፊት ይመሰክርለታል። ⁹በሰዎች ፊት የሚክደኝ ግን በአባታችን መላእክት ፊት ይካዳል። ¹⁰በሰው ልጅ ላይ ቃል የሚናገር ሁሉ ይቅር ይባልለታል፤ በመንፈስ ቅዱስ ላይ የሚሳደብ ግን ይቅር አይባልለትም። ¹¹ወደ ምኵራቦች፣ ወደ ገዦችና ወደ ባለሥልጣናት ፊት ባቀረቧችሁ ጊዜ፣ እንዴት መልስ እንደምትሰጡ ወይም ምን እንደምትናገሩ አትጨነቁ፤ ¹²መንፈስ ቅዱስ ምን ማለት እንዳለባችሁ በዚያ ሰዓት ያስተምራችኋልና።”

አባታችንን የረሳው ሰነፍ

¹³ከሕዝቡ መካከል አንድ ሰው፣ “መምህር ሆይ፣ ወንድሜ ርስቱን ከእኔ ጋር እንዲካፈል ንገረው” አለው።

¹⁴ኢየሱስ ግን፣ “አንተ ሰው፣ በእናንተ ላይ ዳኛ ወይም አካፋይ አድርጎ የሾመኝ ማን ነው?” አለው። ¹⁵እነርሱንም፣ “ተጠንቀቁ! ከመጐምጀት ሁሉ ተጠበቁ፤ ሕይወት ምን ያህል ብትበዛም በንብረት ላይ የተመሠረተ አይደለምና” አላቸው።

¹⁶ምሳሌንም እንዲህ ሲል ነገራቸው፤ “የአንድ ባለጸጋ ሰው መሬት መልካም ፍሬ አፈራ።

¹⁷እርሱም በልቡ፣ ‘ፍሬዬን የማስቀምጥበት ስፍራ የለኝምና ምን ላድርግ?’ ብሎ አሰበ። ¹⁸እንዲህም አለ፤ ‘የማደርገው ይህ ነው፤ ጎተራዎቼን አፍርሼ ከእነርሱ የሚበልጡ እሠራለሁ፤ እኽሌንና ንብረቴን ሁሉ በዚያ አከማቻለሁ። ¹⁹ነፍሴንም፣ “ነፍሴ ሆይ፣ ለብዙ ዓመታት የሚሆን ብዙ ተከማችቶልሻል፤ ዕረፊ፣ ብዪ፣ ጠጪ፣ ተደሰቺ” እላታለሁ።’

²⁰አባታችን ግን፣ ‘አንተ ሰነፍ! በዚህች ሌሊት ነፍስህ ከአንተ ትወሰዳለች። ያዘጋጀኸውስ ለማን ይሆናል?’ አለው። ²¹ለራሱ መዝገብ የሚያከማች ነገር ግን በአባታችን ዘንድ የማይበለጽግ ሰው ሁሉ እንዲህ ይሆናል።”

አባታችን የሚያስፈልጋችሁን ያውቃል

²²ከዚያም ኢየሱስ ደቀ መዛሙርቱን እንዲህ አላቸው፤ “ስለዚህ እላችኋለሁ፤ ስለ ሕይወታችሁ ምን እንደምትበሉ፣ ወይም ስለ ሰውነታችሁ ምን እንደምትለብሱ አትጨነቁ። ²³ሕይወት ከምግብ፣ ሰውነትም ከልብስ ይበልጣልና። ²⁴ቍራዎችን ተመልከቱ፤ አይዘሩም፣ አያጭዱም፣ ጎተራም ሆነ መጋዘን የላቸውም፤ ሆኖም አባታችን ይመግባቸዋል። እናንተማ ከወፎች እንዴት እጅግ ትበልጣላችሁ! ²⁵ከእናንተ መካከል በመጨነቅ በሕይወቱ ላይ አንዲት ሰዓት እንኳ ሊጨምር የሚችል ማን ነው? ²⁶እንዲህ ያለውን ትንሽ ነገር ማድረግ ካልቻላችሁ፣ ስለ ቀረው ስለ ምን ትጨነቃላችሁ? ²⁷አበቦች እንዴት እንደሚያድጉ ልብ በሉ፤ አይደክሙም፣ አይፈትሉም። ነገር ግን እላችኋለሁ፣ ሰሎሞን እንኳ በክብሩ ሁሉ ከእነዚህ እንደ አንዱ አልለበሰም ነበር። ²⁸እንግዲህ አባታችን ዛሬ በሜዳ ያለውን፣ ነገ ወደ እቶን የሚጣለውን ሣር እንዲህ የሚያለብስ ከሆነ፣ እናንተ እምነት የጐደላችሁ፣ እናንተንማ እንዴት አብልጦ አያለብሳችሁም?

²⁹ምን እንደምትበሉ ወይም ምን እንደምትጠጡ አትፈልጉ፤ አትጨነቁም። ³⁰የዓለም አሕዛብ ሁሉ እነዚህን ይፈልጋሉና፤ አባታችሁ እነዚህ እንደሚያስፈልጓችሁ ያውቃል። ³¹ከዚህ ይልቅ የአባታችንን መንግሥት ፈልጉ፤ እነዚህም ይጨመሩላችኋል።

³²“አንተ ታናሽ መንጋ፣ አትፍራ፤ አባታችሁ መንግሥቱን ሊሰጣችሁ ወዷልና። ³³ያላችሁን ሽጡ፣ ለድኾችም ስጡ፤ ሌባ በማይቀርብበት፣ ብልም በማያጠፋበት በሰማያት የማያልቅ መዝገብ የሚሆኑ የማያረጁ ኮረጆዎችን ለራሳችሁ አዘጋጁ። ³⁴መዝገባችሁ ባለበት፣ ልባችሁም በዚያ ይሆናልና።

ጌታ ሲመለስ ተዘጋጅታችሁ ጠብቁ

³⁵“ለአገልግሎት ተዘጋጅታችሁ ወገባችሁን ታጠቁ፤ መብራቶቻችሁም የበሩ ይሁኑ፤ ³⁶ጌታቸው ከሰርግ ግብዣ እስኪመለስ ድረስ እንደሚጠባበቁ አገልጋዮች ሁኑ፤ መጥቶ ሲያንኳኳ ወዲያውኑ በሩን ይከፍቱለታል። ³⁷ጌታቸው በመጣ ጊዜ ነቅተው የሚያገኛቸው አገልጋዮች ብፁዓን ናቸው። እውነት እላችኋለሁ፣ ለአገልግሎት ወገቡን ታጥቆ በማዕድ ያስቀምጣቸዋል፤ መጥቶም ያገለግላቸዋል። ³⁸በእኩለ ሌሊት ወይም ጎሕ ሳይቀድ ቢመጣም፣ እንዲሁ ተዘጋጅተው ቢያገኛቸው እነዚያ አገልጋዮች ብፁዓን ናቸው። ³⁹ይህን እወቁ፤ ባለቤቱ ሌባ በየትኛው ሰዓት እንደሚመጣ ቢያውቅ ኖሮ፣ ቤቱ እንዲደፈር ባልፈቀደ ነበር። ⁴⁰እናንተም ተዘጋጅታችሁ ጠብቁ፤ የሰው ልጅ በማታስቡት ሰዓት ይመጣልና።”

⁴¹ጴጥሮስም፣ “ጌታ ሆይ፣ ይህን ምሳሌ የምትነግረን ለእኛ ነው ወይስ ለሁሉ?” አለ።

⁴²ጌታም እንዲህ ሲል መለሰ፤ “ጌታው ለቤተሰቡ አገልጋዮች በተገቢው ጊዜ ድርሻቸውን እንዲሰጥ በእነርሱ ላይ የሚሾመው ታማኝና ጥበበኛ መጋቢ ማን ነው? ⁴³ጌታው በተመለሰ ጊዜ እንዲህ ሲያደርግ የሚያገኘው ያ አገልጋይ ብፁዕ ነው። ⁴⁴እውነት እላችኋለሁ፣ ባለው ሁሉ ላይ ይሾመዋል። ⁴⁵ያ አገልጋይ ግን በልቡ፣ ‘ጌታዬ ሳይመጣ ዘገየ’ ብሎ ወንዶቹንና ሴቶቹን አገልጋዮች መምታት ቢጀምር፣ ቢበላም ቢጠጣም ቢሰክርም፣ ⁴⁶የዚያ አገልጋይ ጌታ ባልጠበቀው ቀን በማያውቀውም ሰዓት ይመጣል፤ ለሁለትም ቈርጦ ከማይታመኑት ጋር ድርሻ ይሰጠዋል። ⁴⁷የጌታውን ፈቃድ አውቆ ሳለ ያልተዘጋጀ ወይም እንደ ፈቃዱ ያልሠራ አገልጋይ ብዙ ይገረፋል። ⁴⁸ያላወቀ ነገር ግን ቅጣት የሚያስገባ ነገር ያደረገ ጥቂት ይገረፋል። ብዙ ለተሰጠው ሁሉ ብዙ ይጠየቃል፤ ብዙ የተደራለትም ይበልጥ ይጠየቃል።

ወልድ ሰላምን ሳይሆን እሳትን ያመጣል

⁴⁹“እሳትን በምድር ላይ ልጥል መጣሁ፤ አሁኑኑ ቢቀጣጠል እንዴት በወደድሁ! ⁵⁰ነገር ግን የምጠመቀው ጥምቀት አለኝ፤ እስኪፈጸምም ድረስ እንዴት እጨነቃለሁ! ⁵¹በምድር ላይ ሰላምን ላመጣ የመጣሁ ይመስላችኋልን? አይደለም፣ እላችኋለሁ፤ መለያየትን እንጂ። ⁵²ከእንግዲህ በአንድ ቤት አምስት ሰዎች ተከፋፍለው ይኖራሉ፤ ሦስቱ በሁለቱ ላይ ሁለቱም በሦስቱ ላይ ይሆናሉ። ⁵³ይለያያሉም፤ አባት በልጁ ላይ ልጅም በአባቱ ላይ፣ እናት በልጇ ላይ ልጅም በእናቷ ላይ፣ አማት በምራቷ ላይ ምራትም በአማቷ ላይ ይሆናሉ።”

⁵⁴ሕዝቡንም እንዲህ አላቸው፤ “ደመና ከምዕራብ ሲወጣ ባያችሁ ጊዜ ወዲያውኑ ‘ዝናብ ይመጣል’ ትላላችሁ፤ እንዲሁም ይሆናል።

⁵⁵የደቡብ ነፋስ ሲነፍስም ‘ይሞቃል’ ትላላችሁ፤ እንዲሁም ይሆናል። ⁵⁶እናንተ ግብዞች! የምድርንና የሰማይን ገጽታ መለየት ታውቃላችሁ፤ ይህን ዘመን ግን መለየት እንዴት አታውቁም?

⁵⁷“ቅኑንስ ነገር ራሳችሁ ለምን አትፈርዱም? ⁵⁸ከከሳሽህ ጋር ወደ ሹም ስትሄድ፣ በመንገድ ላይ ሳላችሁ ከእርሱ ጋር ለመታረቅ ትጋ፤ አለዚያ ወደ ዳኛው ይጎትትሃል፣ ዳኛውም ለሹሙ ያስረክብሃል፣ ሹሙም ወደ እስር ቤት ይጥልሃል። ⁵⁹እልሃለሁ፣ የመጨረሻዋን ሳንቲም እስክትከፍል ድረስ ከዚያ አትወጣም።”