ሉቃስ 13

13 ¹በዚያን ጊዜ አንዳንድ ሰዎች፣ ጲላጦስ ደማቸውን ከመሥዋዕታቸው ጋር ስለ ቀላቀለባቸው ገሊላውያን ነገሩት።

²እርሱም መልሶ እንዲህ አለ፤ “እነዚህ ገሊላውያን እንዲህ ስለ ደረሰባቸው ከሌሎቹ ገሊላውያን ሁሉ ይልቅ ይበልጥ ኀጢአተኞች የነበሩ ይመስላችኋልን? ³አይደለም እላችኋለሁ፤ ነገር ግን ንስሓ ባትገቡ፣ ሁላችሁ እንደዚሁ ትጠፋላችሁ። ⁴ወይስ በሰሊሆም የነበረው ግንብ ተደርምሶ የገደላቸው እነዚያ ዐሥራ ስምንት ሰዎች፣ በኢየሩሳሌም ከሚኖሩ ሰዎች ሁሉ ይልቅ ይበልጥ በደለኞች የነበሩ ይመስላችኋልን? ⁵አይደለም እላችኋለሁ፤ ነገር ግን ንስሓ ባትገቡ፣ ሁላችሁ እንደዚሁ ትጠፋላችሁ።”

⁶ከዚያም ይህን ምሳሌ ነገራቸው፤ “አንድ ሰው በወይኑ አትክልት ውስጥ የተተከለች በለስ ነበረችው። ፍሬ ፈልጎም ወደ እርስዋ መጣ፤ ነገር ግን ምንም አላገኘም። ⁷አትክልተኛውንም እንዲህ አለው፤ ‘እነሆ፣ በዚህች በለስ ፍሬ ስፈልግ ሦስት ዓመት መጣሁ፤ ምንም ግን አላገኘሁም። ቍረጣት፤ ለምንስ መሬቱን ታባክናለች?’ ⁸እርሱ ግን መልሶ፣ ‘ጌታ ሆይ፣ በዙሪያዋ ቈፍሬ ፍግ እስካደርግላት ድረስ፣ በዚህ ዓመትም ደግሞ ተዋት። ⁹ከዚያም በሚመጣው ዓመት ፍሬ ብታፈራ መልካም፤ ያለዚያ ግን ትቈርጣታለህ።’”

በሰንበት ነጻ የወጣች ልጅ

¹⁰በሰንበትም ቀን በአንዱ ምኵራብ ያስተምር ነበር። ¹¹በዚያን ጊዜም ዐሥራ ስምንት ዓመት በመንፈስ ድካም የያዛት አንዲት ሴት ነበረች፤ ጐባጣ ሆና ከቶ ቀጥ ብላ መቆም አትችልም ነበር።

¹²ኢየሱስም ባያት ጊዜ ጠርቶ፣ “አንቺ ሴት፣ ከደዌሽ ተፈትተሻል” አላት።

¹³እጁንም ጫነባት፤ ወዲያውም ቀጥ አለች፤ አባታችንንም አከበረች።

¹⁴የምኵራቡ አለቃ ግን ኢየሱስ በሰንበት ስለ ፈወሰ ተቈጥቶ ሕዝቡን፣ “ሰው የሚሠራባቸው ስድስት ቀኖች አሉ፤ ስለዚህ በእነዚያ ቀኖች መጥታችሁ ተፈወሱ እንጂ በሰንበት ቀን አይደለም” አለ።

¹⁵ጌታም መልሶ፣ “እናንት ግብዞች! እያንዳንዳችሁ በሰንበት ቀን በሬውን ወይም አህያውን ከግርግም ፈትቶ ውሃ ለማጠጣት አይመራውምን? ¹⁶ይህች የአብርሃም ልጅ የሆነች፣ ሰይጣን ዐሥራ ስምንት ዓመት አስሮ የኖራት ሴት፣ በሰንበት ቀን ከዚህ እስራት ብትፈታ አይገባምን?”

¹⁷ይህንም ሲናገር፣ የሚቃወሙት ሁሉ አፈሩ፤ ሕዝቡም ሁሉ እርሱ ስለሚያደርጋቸው ክቡር ሥራዎች ሁሉ ደስ አላቸው።

መንግሥቱ እንደ ዘር ያድጋል

¹⁸ስለዚህ እንዲህ አለ፤ “የአባታችን መንግሥት ምንን ትመስላለች? በምንስ አስመስላታለሁ? ¹⁹አንድ ሰው ወስዶ በአትክልቱ ውስጥ የዘራትን የሰናፍጭ ቅንጣት ትመስላለች፤ አደገችም፤ ዛፍም ሆነች፤ የሰማይም ወፎች በቅርንጫፎችዋ ሰፈሩ።”

²⁰ደግሞም እንዲህ አለ፤ “የአባታችንን መንግሥት በምን አስመስላታለሁ? ²¹አንዲት ሴት ወስዳ ሁሉ እስኪቦካ ድረስ በሦስት መስፈሪያ ዱቄት ውስጥ የሸሸገችውን እርሾ ትመስላለች።”

በጠበበው በር ግቡ

²²እያስተማረም በከተማዎችና በመንደሮች እያለፈ ወደ ኢየሩሳሌም ይጓዝ ነበር። ²³አንድ ሰውም፣ “ጌታ ሆይ፣ የሚድኑ ጥቂቶች ናቸውን?” ብሎ ጠየቀው። እርሱም እንዲህ አላቸው፤

²⁴“በጠበበው በር ለመግባት ተጋደሉ፤ እላችኋለሁና ብዙዎች ለመግባት ይፈልጋሉ፤ ነገር ግን አይችሉም። ²⁵የቤቱ ባለቤት ተነሥቶ በሩን ከዘጋ በኋላ፣ ውጭ ቆማችሁ፣ ‘ጌታ ሆይ፣ ክፈትልን’ እያላችሁ በሩን ታንኳኳላችሁ፤ እርሱ ግን መልሶ፣ ‘ከወዴት እንደ ሆናችሁ አላውቃችሁም’ ይላችኋል። ²⁶ከዚያም፣ ‘በፊትህ በልተናል፤ ጠጥተናል፤ አንተም በመንገዶቻችን አስተምረሃል’ ማለት ትጀምራላችሁ። ²⁷እርሱ ግን፣ ‘ከወዴት እንደ ሆናችሁ አላውቃችሁም እላችኋለሁ፤ እናንት ክፋት የምትሠሩ ሁሉ፣ ከእኔ ራቁ!’ ይላል። ²⁸አብርሃምንና ይስሐቅን፣ ያዕቆብንም ነቢያትንም ሁሉ በአባታችን መንግሥት ሳሉ ባያችሁ ጊዜ፣ እናንተ ራሳችሁ ግን ወደ ውጭ ተጥላችሁ ስትቀሩ፣ በዚያ ልቅሶና ጥርስ ማፋጨት ይሆናል። ²⁹ከምሥራቅና ከምዕራብ፣ ከሰሜንና ከደቡብም ሰዎች ይመጣሉ፤ በአባታችንም መንግሥት በማዕድ ይቀመጣሉ። ³⁰እነሆም፣ ኋለኞች የሆኑ አንዳንዶች ፊተኞች ይሆናሉ፤ ፊተኞች የሆኑ አንዳንዶችም ኋለኞች ይሆናሉ።”

ኢየሱስ ስለ ኢየሩሳሌም አለቀሰ

³¹በዚያኑ ሰዓት አንዳንድ ፈሪሳውያን ቀርበው፣ “ሄሮድስ ሊገድልህ ይፈልጋልና ተነሥተህ ከዚህ ውጣ” አሉት።

³²እርሱም እንዲህ አላቸው፤ “ሄዳችሁ ያን ቀበሮ እንዲህ በሉት፤ እነሆ፣ ዛሬና ነገ አጋንንትን አወጣለሁ፤ ድውዮችንም እፈውሳለሁ፤ በሦስተኛውም ቀን እፈጸማለሁ። ³³ነገር ግን ነቢይ ከኢየሩሳሌም ውጭ ሊጠፋ ስለማይገባ፣ ዛሬና ነገ፣ ከነገ ወዲያም መጓዝ ይኖርብኛል።

³⁴ኢየሩሳሌም ሆይ፣ ኢየሩሳሌም ሆይ፣ ነቢያትን የምትገድይ፣ ወደ አንቺ የተላኩትንም በድንጋይ የምትወግሪ! ዶሮ ጫጩቶቿን በክንፎቿ ሥር እንደምትሰበስብ፣ ልጆችሽን እሰበስብ ዘንድ ስንት ጊዜ ወደድሁ! እናንተ ግን እንቢ አላችሁ። ³⁵እነሆ፣ ቤታችሁ ባዶ ሆኖ ይቀርላችኋል። እላችኋለሁም፤ ‘በአባታችን ስም የሚመጣ ቡሩክ ነው!’ እስክትሉ ድረስ፣ አታዩኝም።”