ጊዜ ከይሓለፈ ተመለሱ

ብዛዕባ እቲ ጲላጦስ ዝገበሮ ህልቂት ምስ ተነግሮ፥ ኢየሱስ እቶም ዝሞቱ ዝገደዱ ሓጥኣን ዝነበሩ ዝብል ግምት ነፀገ፥ ‘ንስሃ እተዉ’ ድማ በለ። ፍረ ዘይብላ በለስ ሓንቲ ዓመት ተወሰኸላ። ብሰንበት ንዝተጐብጠት ሰበይቲ ኣርሓዋ፥ ንሳ ኸዓ ንኣቦና ኣኽበረቶ፤ እቲ ማዕፆ ፀቢቡ ምዃኑ ኣጠንቀቐ፥ በኸየ ድማ።

ምዕራፍ 13።

በታ ጊዜ እቲኣ ድማ ገሊኦም ሰባት፥ ብዛዕባ እቶም ጲላጦስ ደሞም ምስ መስዋእቶም ዝሓወሶ ገሊላውያን ነገርዎ።

ንሱ ኸዓ ከምዙይ ኢሉ መለሰሎም፦ “እዞም ገሊላውያን እዚኣቶም እዙይ ስለ ዝተሳቐዩ፥ ካብ ኵሎም ካልኦት ገሊላውያን ዝገደዱ ሓጥኣን ዝነበሩ ይመስለኩምዶ? ኣይፋልኩምን፥ እብለኩም ኣለኹ፤ ንስሃ እንተ ዘይ ኣቴኹም ግና፥ ኵላትኩም ከምኡ ኽትጠፍኡ ኢኹም። ወይ እቶም እቲ ኣብ ሰሊሆም ዝነበረ ግንቢ ወዲቕዎም ዝሞቱ ዓሰርተ ሸሞንተ ሰባት፥ ካብ ኵሎም ኣብ ኢየሩሳሌም ዝነብሩ ሰባት ዝበለፀ በደለኛታት ዝነበሩ ይመስለኩምዶ? ኣይፋልኩምን፥ እብለኩም ኣለኹ፤ ንስሃ እንተ ዘይ ኣቴኹም ግና፥ ኵላትኩም ብተመሳሳሊ ኽትጠፍኡ ኢኹም።”

ሽዑ ኸምዙይ ኢሉ መሰለሎም፦ “ሓደ ሰብኣይ ኣብ ኣታኽልቲ ወይኑ ዝተኸለ በለስ ነበሮ። ፍረ ኽደሊ መፂኡ ድማ ሓንቲ እኳ ኣይረኸበን። ነቲ ኣላዪ ኣታኽልቲ ድማ ከምዙይ በሎ፦ ‘እንሆ፥ ኣብዝ በለስ እዙይ ፍረ እናደለኹ ሰለስተ ዓመት መፂአ፥ ሓንቲ እኳ ኣይረኸብኩን። ንምንታይ ንምድሪ የድክሞ? ቍረፆ።’ ንሱ ግና ከምዙይ ኢሉ መለሰሉ፦ ‘ኦ ጐይታ፥ ኣብ ዙርያኡ ኵዒተ ድዂዒ ክሳዕ ዝገብረሉ፥ ነዛ ዓመት እዚኣውን ሕደጎ። ድሕሪኡ ኣብ ዝመፅእ ዓመት እንተ ፈረየ ፅቡቕ፤ እንተ ዘይኮነ ግና ክትቍርፆ ትኽእል ኢኻ።’”

ጓል ብሰንበት ሓራ ወፀአት

ብሰንበት ድማ ኣብ ሓደ ቤተ ፀሎት ኣይሁድ ይምህር ነበረ። እንሆ ኸዓ ዓሰርተ ሸሞንተ ዓመት መንፈስ ዘድከማ ሓንቲ ሰበይቲ ነበረት፤ ተጐቢጣ፥ ፈፂማ ቅንዕ ክትብል ዘይትኽእል ነበረት።

ኢየሱስ ድማ ምስ ረአያ ፀዊዑ “ኣቲ ሰበይቲ፥ ካብ ሕማምኪ ሓራ ወፂእኪ ኣለኺ” በላ።

ኣእዳው ድማ ኣብ ልዕሊኣ ኣንበረ፤ ሽዑ ንሽዑ ኸዓ ቀንዕ ኢላ ንኣቦና ኣኽበረቶ።

እቲ ሓለቓ ቤተ ፀሎት ግና፥ ኢየሱስ ብሰንበት ስለ ዘሕወያ ተቘጢዑ፥ ነቲ ህዝቢ “ዝስራሕ ሽዱሽተ መዓልቲ ኣለዋ፤ በተን መዓልቲታት እቲኣተን መፂእኹም ተሓወዩ እምበር፥ ብሰንበት ኣይኹን” በሎም።

ጐይታ ድማ ከምዙይ ኢሉ መለሰሉ፦ “ኣቱም ግብዛት! ነፍሲ ወከፍኩም ብሰንበት ብዕራዩ ወይ ኣድጉ ካብ ደንበኡ ፈቲሑ፥ ኣውፂኡ ኣየስትዮንዶ እዩ? እዛ ዓሰርተ ሸሞንተ ዓመት ሰይጣን ዝኣሰራ ጓል ኣብርሃም፥ ብሰንበት ካብዝ ማእሰርቲ እዙይ ክትፍታሕዶ ኣይግብኣን እዩ?”

እዙይ ምስ በለ፥ ኵሎም እቶም ተቓወምቱ ሓፈሩ፤ ኵሉ እቲ ህዝቢ ኸዓ በቲ ዝገብሮ ዝነበረ ኵሉ ግሩም ተግባራት ተሓጐሰ።

መንግስቲ ኣቦና ከም ዘርኢ ይዓቢ

ስለዙይ ከምዙይ በለ፦ “መንግስቲ ኣቦና ምስ ምንታይ ትመሳሰል? ምስ ምንታይከ ክመስላ? ሓደ ሰብኣይ ወሲዱ ኣብ ገነቱ ዝዘርኣ ፍረ ኣድሪ ትመስል፤ ዓብያ ድማ ኦም ኮነት፤ ኣዕዋፍ ሰማይ ከዓ ኣብ ጨናፍራ ሰፈሩ።”

መሊሱ ድማ “መንግስቲ ኣቦና ምስ ምንታይ ክመስላ? ሓንቲ ሰበይቲ ወሲዳ ኣብ ሰለስተ መስፈሪ ሓርጭ፥ ኵሉ ክሳዕ ዝበኵዕ ዝሓብኣቶ ማይ ብሑቕ ትመስል” በለ።

ብፀቢብ ደገ እተዉ

እናመሃረ ናብ ኢየሩሳሌም እናተጓዕዘ ድማ፥ ብኸተማታትን ዓድታትን ይሓልፍ ነበረ። ሓደ ሰብ ድማ “ኦ ጐይታ፥ እቶም ዝድሕኑ ውሑዳት ድዮም?” ኢሉ ሓተቶ። ንሱ ኸዓ ከምዙይ በሎም፦

“ብፀቢብ ደገ ኽትኣትዉ ተጋደሉ፤ ብዙሓት ክኣትዉ ክደልዩ እዮም እሞ ኣይኽእሉን እዮም፥ እብለኩም ኣለኹ። ብዓል ገዛ ተሲኡ ነቲ ደገ ምስ ዓፀዎ፥ ኣብ ወፃኢ ደው ኢልኩም ማዕፆ እናኳሕኳሕኩም ‘ኦ ጐይታ፥ ክፈተልና’ ክትብሉ ኢኹም። ንሱ ኸዓ ‘ካበይ ምዃንኩም ኣይፈልጥን’ ኢሉ ክመልሰልኩም እዩ። ሽዑ ‘ኣብ ቅድሜኻ በሊዕና ሰቲና ኢና፤ ንስኻ ኸዓ ኣብ ኣደባባያት ዓድና መሂርካ’ ክትብሉ ኽትጅምሩ ኢኹም። ንሱ ግና ‘ካበይ ምዃንኩም ኣይፈልጥን እብለኩም ኣለኹ፤ ኣቱም ኵሉኹም ገበርቲ እከይ፥ ካባይ ርሓቑ!’ ክብል እዩ። ንኣብርሃምን ይስሓቅን ያእቆብን ኵሎም ነብያትን ኣብ መንግስቲ ኣቦና ምስ ረኣኹም፥ ንስኻትኩም ግና ናብ ወፃኢ ምስ ተደርበኹም፥ ብኽያትን ምሕርቃም ኣስናንን ክኸውን እዩ። ካብ ምብራቕ፥ ካብ ምዕራብ፥ ካብ ሰሜን፥ ካብ ደቡብ ድማ ሰባት ክመፁ፥ ኣብ መንግስቲ ኣቦና ኸዓ ኣብ መኣዲ ክቕመጡ እዮም። እንሆ ኸዓ፥ ዳሕረዎት ኮይኖም ቀዳሞት ዝኾኑ ኣለዉ፤ ቀዳሞት ኮይኖም ዳሕረዎት ዝኾኑ ኸዓ ኣለዉ።”

ኢየሱስ ንኢየሩሳሌም በኸየላ

በታ ጊዜ እቲኣ ድማ ገሊኦም ፈሪሳውያን መፂኦም “ሄሮድስ ክቐትለካ ይደሊ ኣሎ እሞ፥ ካብዙይ ውፃእ ኪድ” ኢሎም በልዎ።

ንሱ ኸዓ ከምዙይ በሎም፦ “ኬድኩም ነቲ ወኻርያ ‘እንሆ፥ ሎምን ፅባሕን ኣጋንንቲ አውፅእ፥ ንሰባት ከዓ ኣሕዊ፤ ብሳልሳይ መዓልቲ ድማ ክፍፀም እየ’ በልዎ። ይኹን እምበር፥ ነብዪ ኻብ ኢየሩሳሌም ወፃኢ ክመውት ስለ ዘይኽእል፥ ሎምን ፅባሕን ድሕሪ ፅባሕን ክጓዓዝ ይግብአኒ እዩ።

ኦ ኢየሩሳሌም! ኢየሩሳሌም! ንነቢያት እትቐትሊ፥ ነቶም ናባኺ ዝተልኣኹ ድማ ብእምኒ እትቕጥቅጢ! ከምቲ ደርሆ ንጨቓዊታ ኣብ ትሕቲ ኣኽናፋ እትእክብ፥ ንደቅኺ ኽእክብ ክንደይ ጊዜ ናፈቕኩ! ንስኺ ግና ኣይፈተኽን! እንሆ፥ ቤትኪ ተሪፋትልኪ ኣላ። ‘ብስም ኣቦና ዝመፅእ ብሩኽ እዩ!’ ክሳዕ እትብሊ፥ ኣይክትርእይንን ኢኺ እብለኪ ኣለኹ።”