Luke 13

13 ¹Atam chili mi kaikhana, Pilatena athumwui pha̱kaphayāli athumwui ashee manātkahai Galilee mibingwui maramli ali hānga.

²Ana ngahānkai, "Otshot hi samphang kahaiwui vang eina, Galilee mibing hina khangatei Galilee mi saikorali zakshimeikharda morei kaphungbing sāsai da nathumna phaningla? ³Chi maningmana, ina nathumli kahāngna; kha nathumna maningngateiakha, nathum saikorala tākam eina shimānra. ⁴Lah Siloamli khalei dolan china athumwuitungli pizangda thikahai mi tharāda chishat chiya, Jerusalemli khalei mikumo saikorali zakshimeikharda yonkahai sāsai da nathumna phaningla? ⁵Chi maningmana, ina nathumli kahāngna; kha nathumna maningngateiakha, nathum saikorala chithāda shimānra."

⁶Chieina ana chānjam hi hāngchithei: "Mi akhana awui drakhā yāmguili khaorārong akha vāsanga. Ana chiwuili athei phāda rā, kha khikha matheimana. ⁷Ana yāmgui khamayonali hānga, 'Yanglu, zingkum kathum ina khaorārong hili athei phāda rā, kha khikha matheimana. Chi shaotattāmilu—khisāda ngalei chi shimān ngasakhaokhala?' ⁸Kha ana ngahānkai, 'Amei, ajakumla chi hokhuilu, ina chiwui kuimareida chuikazanglaga paih mataisang kajina. ⁹Chieina zingkuma athei matheiakha, phālakhaira; matheiakha, nana chi shaotattāmi shaphaira.'"

Sabbaththangli Sha̱nao Akha Ningkhān Ngasakhai

¹⁰Ara Sabbaththang ana synagogue akhali tamchitheida leisai. ¹¹Atam chili, manglā akhana zingkum tharāda chishat ngazan ngasakhao sha̱nao akha kui mashunzangda leisai, kasākhala kui khāngkāda mashaipaimana.

¹²Jishuna chi kathei tharan chili hokhuilaga hānga, "Sha̱nao, na nawui kazā eina ningkhānhaira."

¹³Ana chiwuitungli pāng parlaga, ngalāngda ana kui khāngkāmida ithumwui Avāli soi.

¹⁴Kha synagoguewui kathāna Jishuna Sabbaththang kazāt raimikahaiwui vang malungvāthaida, yaruili hānga, "Ot sākhavai tharukthang lei. Chithang eina raikhui khavai rālu, kha Sabbaththang marālu."

¹⁵Prohona ali ngahānkai, "Phākakhaningbing! Sabbaththang nathum kachiva̱na nawui sei lah gadhāli seishimwui eina khalākhuilaga tara̱ mang ngasak khavai thānvā maningsermala? ¹⁶Abrahamwui sha̱nao hi Satanna zingkum tharāda chishat khalapkahai chi, Sabbaththang chi khara̱ eina ningkhān ngasak khavai mamashungmala?"

¹⁷Ana otshot hi kahāng tharan, awui yangkashe saikora maishihaora, kala yarui saikorana ana kasā tekhamatei ot saikorawui vang mathāna.

Wungram Chi Athā Kathāda Kharshoka

¹⁸Chieina ana hānga, "Ithumwui Avā wungram khi kathāna? Chili khi eina pāntampaira? ¹⁹Hiya mi akhana kayānghanthā khuilaga awui yāmguili yaosang kahai kathāna; chi kharshoklaga thing akha ngasāhaowa, kala kazingramwui vānaobingna aphāngli athip sai."

²⁰Kala ana latluida hānga, "Ithumwui Avā wungram khi eina pāntampaira? ²¹Hiya sha̱nao akhana khamui khuilaga, mathir chi katonga makapchungranglakha eina tangda lukyur kathumli ngathumhai kahai kathāna."

Khāmong Masha̱lak Chieina Kazanglu

²²Ana keinung kala kha̱bing kachiva̱li tamchithei kahaida, Jerusalemshong tāmamāna. ²³Khipā akhana ali ngahāna, "Proho, kahui samphang mibing kateokhamang leilā?" Ana athumli hānga,

²⁴"Khāmong masha̱lak chieina kazang khavai ngararlu; kaja ina nathumli kahāngna, mi kachungkhana kazang khavai hotnāra, kha mazangrarmara. ²⁵Shimva̱ china ngakarthuida khāmong shungnamhaiakha, nathum ayarli nganingda khāmong shaoda, 'Proho, ithumlila kashomilu' da hāngra; kala ana ngahānkāra, 'Nathum khalei eina rāki kaji ina matheimana.' ²⁶Chitharan nathumna hāngphokra, 'Ithumna nawui miktāli phāshak phāzai; nana ithumwui chānreili tamchithei.' ²⁷Kha ana hāngra, 'Ina nathumli kahāngna, nathum khalei eina rāki kaji ina matheimana. Iwui eina chihochaohaolu, nathum khalāng ot kasābing saikora!' ²⁸Nathumna Abraham, Isaac, Jacob kala marānbing saikora ithumwui Avā wungramli kathei tharan, kha nathum khalatta ayarli horshok kahai tharan, chili kachapla chapra kala ahā tarira. ²⁹Mibing zingsho kala zingtun, atungshong kala azingshongwui eina rāda, ithumwui Avā wungramli phazā khavai pamra. ³⁰Kala kachangkhat, khanaowabing kaikhana rira, kala kharebing kaikhana naora."

Jishuna Jerusalemwui Vang Chapa

³¹Chi angaritli Phariseebing kaikhana ali rāhānga, "Shokta hiwui eina zatthui, kaja Herodna nali shaothat khavai ngalanmi."

³²Kala ana athumli hānga, "Vaida chikathā ramfali hānglu: Yanglu, aja kala akhama ina kameo kashamshoklaga mibing raingasakra, kala kathum thangli ina kuphaira. ³³Chithālala, aja, akhama kala chiwui thangli ina zatphalungra; kaja marān akha Jerusalemwui ayarli thikhavai maphaimana.

³⁴O Jerusalem, Jerusalem, nawuili chihokharābingli lung eina horthata, kala marānbingli shaothata! Harva̱na anaoli angachangzingli pumkhami thada, ina nawui naongarāli kapum kayākha shirakhala; laga chi nathumna mamayāmana! ³⁵Yanglu, nawui shim nawui vang horhaira. Ina nathumli kahāngna: nathumna, "ithumwui Avāwui mingli kharā mi chi sokhamina!" da mahāngranglakha eina tangda ili matheiluimara."