Luka 13

13 ¹Wakati huohuo watu fulani wakamwambia habari za Wagalilaya ambao Pilato alichanganya damu yao na dhabihu zao.

²Akawajibu, "Je, mnadhani Wagalilaya hawa walikuwa wenye dhambi kuliko Wagalilaya wote kwa sababu waliteswa hivyo? ³La, nawaambia; lakini msipotubu, ninyi nyote mtaangamia vivyo hivyo. ⁴Au wale kumi na wanane waliouawa mnara wa Siloamu ulipowaangukia—je, mnadhani walikuwa na hatia kuliko watu wote waishio Yerusalemu? ⁵La, nawaambia; lakini msipotubu, ninyi nyote mtaangamia namna iyo hiyo."

⁶Kisha akasema mfano huu: "Mtu mmoja alikuwa na mtini uliopandwa katika shamba lake la mizabibu. Akaenda kutafuta matunda juu yake, asipate. ⁷Akamwambia mtunza-bustani, 'Tazama, miaka mitatu nimekuwa nikija nikitafuta matunda juu ya mtini huu, nisipate. Ukate—kwa nini uendelee kuiharibu ardhi?' ⁸Lakini yeye akamjibu, 'Bwana, uache mwaka huu pia, hata nitakapouzunguka na kuchimba na kuweka samadi. ⁹Kisha ukizaa matunda mwaka ujao, vema; usipozaa, waweza kuukata.'"

Binti Aliyewekwa Huru Siku ya Sabato

¹⁰Basi alikuwa akifundisha katika mojawapo ya masinagogi siku ya Sabato. ¹¹Na tazama, palikuwa na mwanamke aliyekuwa na roho iliyomdhoofisha kwa miaka kumi na minane; alikuwa amepindika, hawezi kabisa kujinyoosha.

¹²Yesu alipomwona, akamwita akamwambia, "Mama, umewekwa huru kutoka udhaifu wako."

¹³Akaweka mikono yake juu yake, na mara akajinyoosha, akamtukuza Baba yetu.

¹⁴Lakini mkuu wa sinagogi, akiwa na hasira kwa sababu Yesu aliponya siku ya Sabato, akauambia umati, "Kuna siku sita za kufanya kazi. Njoni mponywe siku hizo, wala si siku ya Sabato."

¹⁵Bwana akamjibu, "Enyi wanafiki! Je, kila mmoja wenu hafungui ng'ombe wake au punda wake kutoka zizini siku ya Sabato na kumpeleka kunywa maji? ¹⁶Basi, huyu binti wa Ibrahimu, ambaye Shetani amemfunga miaka kumi na minane, hakustahili kufunguliwa kifungo hicho siku ya Sabato?"

¹⁷Aliposema mambo hayo, wapinzani wake wote wakaaibika, na umati wote ukafurahia mambo yote matukufu aliyokuwa akiyafanya.

Ufalme Hukua Kama Mbegu

¹⁸Basi akasema, "Ufalme wa Baba yetu unafanana na nini? Nifananishe na nini? ¹⁹Unafanana na punje ya haradali ambayo mtu aliitwaa akaipanda katika bustani yake, ikakua ikawa mti, hata ndege wa angani wakatengeneza viota katika matawi yake."

²⁰Na tena akasema, "Nifananishe ufalme wa Baba yetu na nini? ²¹Unafanana na chachu ambayo mwanamke aliitwaa akaificha katika pishi tatu za unga, hata wote ukachachuka."

Ingieni Kupitia Mlango Mwembamba

²²Akaenda zake katika miji na vijiji, akifundisha na kusafiri kuelekea Yerusalemu. ²³Mtu mmoja akamuuliza, "Bwana, je, wanaookolewa ni wachache?" Akawaambia,

²⁴"Jitahidini kuingia kupitia mlango mwembamba—kwa maana wengi, nawaambia, watataka kuingia wasiweze. ²⁵Mwenye nyumba akiisha kuinuka na kufunga mlango, nanyi mtasimama nje mkibisha, mkisema, 'Bwana, tufungulie.' Naye atawajibu, 'Siwajui mtokako.' ²⁶Ndipo mtakapoanza kusema, 'Tulikula na kunywa mbele yako; nawe ulifundisha katika njia zetu.' ²⁷Lakini atasema, 'Nawaambia, siwajui mtokako. Ondokeni kwangu, ninyi nyote mtendao maovu!' ²⁸Kutakuwa na kilio na kusaga meno, hapo mtakapowaona Ibrahimu na Isaka na Yakobo na manabii wote katika ufalme wa Baba yetu, nanyi wenyewe mkitupwa nje. ²⁹Nao watakuja watu kutoka mashariki na magharibi, kutoka kaskazini na kusini, nao wataketi kula katika ufalme wa Baba yetu. ³⁰Na tazama, wako wa mwisho watakaokuwa wa kwanza, na wako wa kwanza watakaokuwa wa mwisho."

Yesu Analilia Yerusalemu

³¹Saa iyo hiyo Mafarisayo fulani wakaja, wakamwambia, "Toka, uende zako mahali hapa—kwa maana Herode anataka kukuua."

³²Naye akawaambia, "Nendeni mkamwambie yule mbweha: Tazama, natoa pepo na kukamilisha uponyaji leo na kesho, na siku ya tatu nitakuwa nimemaliza. ³³Lakini yanipasa kusafiri leo, kesho, na kesho kutwa, kwa kuwa haiwezekani nabii kuangamia nje ya Yerusalemu.

³⁴Yerusalemu, Yerusalemu, uwauaye manabii na kuwapiga kwa mawe wale waliotumwa kwako! Mara ngapi nilitamani kuwakusanya watoto wako kama vile kuku akusanyavyo vifaranga vyake chini ya mabawa yake—lakini hukutaka! ³⁵Tazama, nyumba yenu mmeachiwa. Nawaambia: Hamtaniona hata mtakaposema, 'Amebarikiwa yeye ajaye kwa jina la Baba yetu!'"