Luke 12

12 ¹Chitharan, mi thing kachungkha kazipta akha eina akha naikazamda kuinam tharan, Jishuna awui sākhangatha̱bingli khare hāngchithei: "Phariseebingwui khawok, phakharek kaji chiwui eina nathum khalatta ning ngasharlu. ²Maphongshokmara da faror kahai khikha maleimana, kala matheiki kaji ngathum kahai khikha maleimana. ³Chiwui vang eina nathumna tangkhamangli kahāng chi kahorli shāra, kala nathumna kābing alungli shākhui eina kahāng chi shimtung eina vaomalāntāra.

⁴"Ina nathumli kahāngna, iwui ngasotnaobing: phasāli sāthatta, chiwui thili khikha lāngda masākharar athumli mangacheealu. ⁵Ina nathumli khipāli ngacheekhala kaji chitheira: shaothat kahaiwui thili nathumli kazeiramli horsang khavaiwui pangshap leikasā chili nathumna ngacheelu. Mha, ali ngacheelu da ina nathumli kahāngna.

⁶Konghi phangāli pheisā kasang khani eina mayormalā? Chithālala ithumwui Avāna konghi akhalila mamalaimana. ^a a v6 Assarion chi aman kateo pheisā kasang akhana sai—achi khanina konghi phangā alokhui. ⁷Kha nathumwui kuisambing saikora eina tangda shānhaida khaleina. Mangacheealu, kaja nathum aman konghi kachungkhali sakmeikhara.

⁸"Kala ina nathumli kahāngna, kachikathāna ili mibingwui mangāli mayaakha, miwui Naomayaranala ithumwui Avāwui kazingraobingwui mangāli ali mayāmira. ⁹Kha ili mibingwui mangāli kahata chili ithumwui Avāwui kazingraobingwui mangāli hatra. ¹⁰Miwui Naomayarali kachipat tui akha hāng mi chi pheomira, kha Manglā Katharali kachipat mi chi mapheomimara. ¹¹Nathumli synagoguebing, khamungabing kala akhavābingwui mangāli khuivā tharan, kathada nathum khalatta hāngphatra lah khi hāngra da malungmaringalu, ¹²khikhalajila chithang pung chili nathumna khi hāngphalungra kaji Manglā Katharana nathumli tamchitheira."

Ithumwui Avāli Malaihao Mangkhama̱

¹³Yaruiwui ngachaili kachikathā akhana ali hānga, "Ojā, iwui achināli shimlui chi ilila ngayarmi khavai hānglu."

¹⁴Kha Jishuna ali hānga, "Mi, khipāna ili nathumwuitungli bicharwo lah ngayarme kapangkhuikhala?" ¹⁵Ana athumli hānga, "Ning ngasharlu! Kākharām katonga chi chihochaohaolu, kaja mi akhawui mirin chi awui lan kachungkha eina masāmana."

¹⁶Kala ana athumli chānjam hi hāngchithei: "Kachikathā kashānga mi akhawui ngalei chili heiun kaphā sorngasaida unga.

¹⁷Ana awui wuklungli phaninga, 'Ina khi sārakhala? Iwui heiun kaziphai khavai apam maleimana.' ¹⁸Chieina ana hānga, 'Ina hithāda sāra: iwui chumbing sakhaihailaga, hakmei kachiva̱ sāra, kala iwui mā saikora eina iwui otbing chili kaziphaira.' ¹⁹Kala ina iwui manglāli hāngra, "Manglā, nana zingkum kachungkhawui vang kashap kaziphaida leiya; ngasāmkhuilu, zālu, manglu, mirin ringphākhuilu."

²⁰Kha ithumwui Avāna ali hānga, 'Mangkhama̱! Aja ngayā nawui manglā nawui eina ngatangkhuira. Chieina nana ngarān kahai chi khipākhawui ngasārakhala?' ²¹Kachikathā mina khalattawui vang lan khorhaida, kha ithumwui Avāli kashānga masā a chili chikathā shokra."

Ithumwui Avāna Nathumwui Kaphaning Thei

²²Chieina Jishuna awui sākhangatha̱bingli hānga, "Chiwui vang eina ina nathumli kahāngna: nathumwui mirinwui vang nathum khi zāra da, lah nathumwui phasāwui vang nathum khi ngavaira da malungmaringalu. ²³Kaja mirin hi kashakazāli phāmei, kala phasā hi kashankachonli phāmei. ²⁴Ngahong-hangkhābingli yanglu: athumna khayaola, kahātla maleimana, kazipshim lah chum maleimana, chithālala ithumwui Avāna athumli mizai. Nathumna vānaobingli kayākha aman sakmeikhala! ²⁵Nathumwui ngachaili khipāna malungringhaoda awui mirinli khuiningkha angarit mataisangshapkhala? ²⁶Nathumna chiyākha ot kateokha masārarmana jiakha, khisāda khangateibingwui vang malungringkhala? ²⁷Timrāwon khi eina phorkhala yanglu: ngalangkazār maleimana, tareng singa maleimana. Chithālala ina nathumli kahāngna, Solomon eina tangda awui tekhamatei saikora eina okthuisālala, hibingwui akhawui khamathā thada mangavairarmana. ²⁸Aja zimiksho hili lei, akhama meiphungli horsangkhami luiwui khawoli ithumwui Avāna chithāda ngavaimi jiakha, nathumli kayākha ngavaimeimira, shitkasang kateobing?

²⁹Nathum khi zāra lah khi mangra da maphaalu, kala malungmaringalu. ³⁰Kaja okathuiwui miyur saikorana hibing phā; nathumwui Avāna nathumna hibing darkar kaji thei. ³¹Chiwui mahutle, ithumwui Avā wungram phālu, chieina hibingla nathumli mira.

³²"Mangacheealu, yao ashangva̱ kateokha, kaja nathumwui Avāna nathumli wungram khami khavai kaphaninghaira. ³³Nathumwui lan yorlaga kachāmabingli milu. Nathum khalattawui vang machamserpaimana pāngkhao sālu. Khaleina manganaimana kala makungna mashaimana kazingramli mashimānmana lan kaziphailu. ³⁴Kaja nathumwui lan khaleipamli, nathumwui ningla leira.

Akhavā Latung Tharan Ngaranpinghaisālu

³⁵"Nathumwui kachon ngavaimida otram khavai ngaranpinghaisālu, kala nathumwui thaomei kāparhaida yangmilu, ³⁶athumwui akhavāna shakzāt zātkhān eina latunga da ngarai raobing thāda, chithākha ana rāda kashao tharan, athumna thākta khāmong shomira. ³⁷Akhavāna rā tharan rimpamda leikahai raobing chi soranu. Kachangkhat eina ina nathumli kahāngna, ana khalatta otram khavai kachon ngavaida, athumli tableli phazā khavai pamngasakra, kala rāda athumli otram ngatha̱ra. ³⁸Ana ngayā sailung latunglaga lah ngathor latunglaga, athumli ngaranpinghaisāda theiakha, chi raobing chi soranu. ³⁹Hi theilu, shimva̱ china katharan khale pungli rāra̱khala kaji theisāsi kaja, ana awui shimli mashaokhaizang ngasakmara. ⁴⁰Nathumla ngaranpinghaisāphalungra, khikhalajila miwui Naomayarana rāra kaji pung chili nathumna maphaningsālak."

⁴¹Peterna hānga, "Amei, na hi chānjam chi ithumwui vang hāngla, lah mi saikorawui vang khala?"

⁴²Prohona ngahānkai, "Akhavā china awui shimkhur raobingtungli yangmi khavai, atam chālak eina athumli kashakazā khuimi khavai chipamkhami rao, khanganā kala thangkhameiwui lanse chi khipakhala? ⁴³Akhavā latkhaung tharan chithāda sāda leida samphang rao chi soranu. ⁴⁴Kachangkhat eina ina nathumli kahāngna, akhavāna rao chili awui khalalei lan saikorawuitungli chipamra. ⁴⁵Kha kalikha rao chi china akhalatta, 'Iwui akhavā china rāda kasha̱haira' da hānglaga, raonao mayarnao kala sha̱naobingli shao khavai haophokta, phazāda khamanga mathothuwa jiakha, ⁴⁶Ana machihānkasa zimiksho, kala awui makathei pung chili, rao chiwui akhavāna hanungda, ali khani sāda katattāmilaga, shitkasang makhaleibingwui ngachaili apam mira. ⁴⁷Awui akhavāwui ningyāng theida, kha machukmaja̱la da awui ningyāng athishurda ot masākahai rao chi kashao kachungkha samphangra. ⁴⁸Kha matheila tandi khami mashun ot sākahai rao chi kashao kateokha samphangra. Kachungkha khami mi kachiva̱wui eina kachungkha pomira; kala kachungkha misangkahai chiwui eina mataisangda pomira.

Anaomayarana Mei Khuirā, Chingri Kahai Maningmana

⁴⁹"Ina okathuili mei horkhavai kharāna; chi arui sātrunghaira jisi kaja phārala! ⁵⁰Kha ili ra̱hikmi khavai akha lei, kala chi ungshung eina tangda I kathada kachotkachānghaokhala! ⁵¹Okathuili chingri kahai khuirā khavai ina kharāna da nathumna phaningla? Maningmana, ina nathumli kahāngna, kha mi ngayarkhai khavai kharāna. ⁵²Arui hiwui eina thuida shimkhur akhali mi phangā, kathum khanili kala khani kathumli, ngakai ngarokra. ⁵³Avāva̱na anaomayarali kala anaomayarana avāva̱li, ava̱va̱na anaongalāva̱li kala anaongalāva̱na ava̱va̱li, aniva̱na arihāva̱li kala arihāva̱na aniva̱li, athum ngakai ngarokra."

⁵⁴Kala ana yaruili hānga, "Zingtunshong eina muiyā akha kārārā nathumna theida, hengsāda 'Zingrot rāra' da nathumna hāngli, kala chithāpapama.

⁵⁵Kala azingshongwui masi phana tharan, 'Kasā ngasha̱ra' da nathumna hāngli, kala chithāpapama. ⁵⁶Phākakhaningbing! Okathui eina kazingwui maong nathumna yanglaga marānshapa. Chithākha khisāda aruiwui atam hi marānshapmana?

⁵⁷"Kala khisāda khi khangaronga kaji chi nathum khalatta bichar masāmana? ⁵⁸Nali kaphena mi chili ngasoda khamungali vāki tharan, shongfali ali mashitkhui khavai sālu; chi mathaakha ana nali bicharwoli khuithuihaora, kala bicharwona nali kashili mikāhaora, kala kashina nali phātopli sangra. ⁵⁹Ina nali kahāngna, nana naomeikapta pheisā akha marunkupranglakha eina tangda machishotlakmara."