லூக்கா 12

12 ¹அதற்குள் ஆயிரக்கணக்கானோர் ஒருவரையொருவர் மிதிக்கும்படி நெருக்கிக்கூடியிருக்கையில், இயேசு முதலில் தம்முடைய சீஷர்களை நோக்கி: “பரிசேயருடைய புளித்தமாவைக்குறித்து, அதாவது மாயத்தனத்தைக்குறித்து, எச்சரிக்கையாயிருங்கள். ²வெளிப்படுத்தப்படாத மறைவானது ஒன்றுமில்லை, அறியப்படாத மறைபொருளும் ஒன்றுமில்லை. ³ஆகையால் நீங்கள் இருளிலே சொன்னதெல்லாம் வெளிச்சத்திலே கேட்கப்படும், அறைகளுக்குள்ளே இரகசியமாய்ச் சொன்னது வீட்டின்மேல் நின்று அறிவிக்கப்படும்.

⁴“என் சிநேகிதரே, நான் உங்களுக்குச் சொல்லுகிறேன்: சரீரத்தைக் கொன்று, பின்பு அதற்கு அதிகமாய் ஒன்றும் செய்யக்கூடாதவர்களுக்குப் பயப்படாதிருங்கள். ⁵நீங்கள் யாருக்குப் பயப்படவேண்டுமென்று உங்களுக்குக் காண்பிக்கிறேன்: கொன்றபின்பு நரகத்திலே தள்ள அதிகாரமுள்ளவருக்குப் பயப்படுங்கள்; ஆம், அவருக்கே பயப்படுங்கள் என்று உங்களுக்குச் சொல்லுகிறேன்.

⁶ஐந்து அடைக்கலான் குருவிகள் இரண்டு சிறு காசுக்கு விற்கப்படுகிறதில்லையா? ஆயினும் அவைகளில் ஒன்றாகிலும் எங்கள் பிதாவுக்கு முன்பாக மறக்கப்படுவதில்லை. ^a a v6 அசாரியோன் என்பது சிறிதளவு மதிப்புள்ள ஒரு சிறு செப்புக்காசு—அவைகளில் இரண்டு ஐந்து குருவிகளை வாங்கின. ⁷உங்கள் தலையிலுள்ள மயிரெல்லாம் எண்ணப்பட்டிருக்கிறது; ஆகையால் பயப்படாதிருங்கள்; அநேகம் குருவிகளைப்பார்க்கிலும் நீங்கள் விசேஷித்தவர்களாயிருக்கிறீர்கள்.

⁸“அன்றியும், மனுஷர் முன்பாக என்னை அறிக்கைபண்ணுகிற எவனையும் மனுஷகுமாரனும் எங்கள் பிதாவின் தூதர்கள் முன்பாக அறிக்கைபண்ணுவார் என்று உங்களுக்குச் சொல்லுகிறேன். ⁹மனுஷர் முன்பாக என்னை மறுதலிக்கிறவனோ எங்கள் பிதாவின் தூதர்கள் முன்பாக மறுதலிக்கப்படுவான். ¹⁰மனுஷகுமாரனுக்கு விரோதமாக ஒரு வார்த்தை சொல்லுகிற எவனும் மன்னிக்கப்படுவான்; ஆனால் பரிசுத்த ஆவியானவருக்கு விரோதமாக தூஷணஞ்சொல்லுகிறவனோ மன்னிக்கப்படமாட்டான். ¹¹அவர்கள் உங்களை ஜெப ஆலயங்களுக்கும், அதிகாரிகளுக்கும், அதிகாரமுள்ளவர்களுக்கும் முன்பாகக் கொண்டுபோகும்போது, எப்படி, என்ன உத்தரவு சொல்லுவோம், என்ன பேசுவோம் என்று கவலைப்படாதிருங்கள்; ¹²ஏனெனில் நீங்கள் சொல்லவேண்டியதை பரிசுத்த ஆவியானவர் அந்நேரத்திலேயே உங்களுக்குப் போதிப்பார்” என்றார்.

எங்கள் பிதாவை மறந்த மதியீனன்

¹³அப்பொழுது ஜனக்கூட்டத்தில் ஒருவன் அவரை நோக்கி: “போதகரே, சுதந்தரத்தை என்னோடே பங்கிடும்படி என் சகோதரனுக்குச் சொல்லும்” என்றான்.

¹⁴அதற்கு இயேசு அவனை நோக்கி: “மனுஷனே, என்னை உங்கள்மேல் நியாயாதிபதியாகவும் பங்கிடுகிறவனாகவும் நியமித்தவன் யார்?” என்றார். ¹⁵பின்பு அவர் அவர்களை நோக்கி: “ஜாக்கிரதையாயிருங்கள்; சகலவித பொருளாசைக்கும் விலகியிருங்கள்; ஏனெனில் ஒருவனுடைய ஜீவனானது அவனுக்கு எவ்வளவு உடைமைகள் இருந்தாலும் அவைகளால் உண்டாகிறதல்ல” என்றார்.

¹⁶அன்றியும் அவர் அவர்களுக்கு ஒரு உவமையைச் சொன்னார்: “ஐசுவரியமுள்ள ஒருவனுடைய நிலம் நன்றாய் விளைந்தது.

¹⁷அவன் தனக்குள்ளே சிந்தித்து: ‘நான் என்ன செய்வேன்? என் தானியங்களைச் சேர்த்துவைக்க எனக்கு இடமில்லையே’ என்றான். ¹⁸பின்பு அவன்: ‘நான் இப்படிச் செய்வேன்: என் களஞ்சியங்களை இடித்து, பெரியவைகளைக் கட்டி, என் தானியத்தையும் என் பொருள்களையும் எல்லாம் அங்கே சேர்த்துவைப்பேன்; ¹⁹பின்பு என் ஆத்துமாவை நோக்கி: ஆத்துமாவே, அநேக வருஷங்களுக்கு உனக்குத் திரளான பொருள்கள் சேர்த்துவைக்கப்பட்டிருக்கிறது; இளைப்பாறு, புசி, குடி, சந்தோஷமாயிரு என்று சொல்லுவேன்’ என்றான்.

²⁰ஆனால் எங்கள் பிதா அவனை நோக்கி: ‘மதியீனனே, உன் ஆத்துமா இந்த இராத்திரியில் உன்னிடத்திலிருந்து எடுத்துக்கொள்ளப்படும்; அப்பொழுது நீ சேர்த்துவைத்தவைகள் யாருடையதாகும்?’ என்றார். ²¹தனக்காகவே பொக்கிஷங்களைச் சேர்த்துவைத்து, எங்கள் பிதாவினிடத்தில் ஐசுவரியவானாயிராதவன் யாவனுக்கும் இப்படியே சம்பவிக்கும்” என்றார்.

உங்களுக்கு என்ன தேவை என்பதை எங்கள் பிதா அறிவார்

²²பின்பு இயேசு தம்முடைய சீஷர்களை நோக்கி: “ஆகையால், நான் உங்களுக்குச் சொல்லுகிறேன்: என்னத்தை உண்போம் என்று உங்கள் ஜீவனுக்காகவும், என்னத்தை உடுத்துவோம் என்று உங்கள் சரீரத்துக்காகவும் கவலைப்படாதிருங்கள். ²³ஆகாரத்தைப்பார்க்கிலும் ஜீவனும், உடுப்பைப்பார்க்கிலும் சரீரமும் விசேஷித்தவைகளாயிருக்கிறது. ²⁴காக்கைகளைக் கவனித்துப்பாருங்கள்: அவைகள் விதைக்கிறதுமில்லை, அறுக்கிறதுமில்லை; அவைகளுக்குப் பண்டகசாலையுமில்லை, களஞ்சியமுமில்லை; ஆயினும் எங்கள் பிதா அவைகளைப் பிழைப்பூட்டுகிறார். பறவைகளைப்பார்க்கிலும் நீங்கள் எவ்வளவோ விசேஷித்தவர்கள்! ²⁵கவலைப்படுகிறதினாலே உங்களில் எவன் தன் ஆயுசுக்கு ஒரு மணிநேரத்தைக் கூட்டுவான்? ²⁶இப்படிப்பட்ட மிகச்சிறிய காரியத்தையும் செய்யக்கூடாதவர்களாயிருக்க, மற்றவைகளுக்காக ஏன் கவலைப்படுகிறீர்கள்? ²⁷லீலிபுஷ்பங்கள் எப்படி வளருகிறதென்று கவனித்துப்பாருங்கள்: அவைகள் உழைக்கிறதுமில்லை, நூற்கிறதுமில்லை; ஆயினும் சாலொமோன் தன்னுடைய எல்லா மகிமையிலும் அவைகளில் ஒன்றைப்போலாகிலும் உடுத்தியிருந்ததில்லை என்று உங்களுக்குச் சொல்லுகிறேன். ²⁸இன்று வயலிலிருந்து, நாளைக்கு அடுப்பிலே போடப்படுகிற புல்லை எங்கள் பிதா இவ்விதமாய் உடுத்துவித்தால், அற்பவிசுவாசிகளே, அவர் உங்களை எவ்வளவு அதிகமாய் உடுத்துவிப்பார்?

²⁹என்னத்தை உண்போம், என்னத்தைக் குடிப்போம் என்று தேடாதிருங்கள், கலங்காமலும் இருங்கள். ³⁰இவைகளையெல்லாம் உலகத்திலுள்ள ஜாதிகளெல்லாம் தேடுகிறார்கள்; இவைகள் உங்களுக்கு வேண்டியவைகளென்று உங்கள் பிதா அறிந்திருக்கிறார். ³¹இதற்குப் பதிலாக, எங்கள் பிதாவின் ராஜ்யத்தைத் தேடுங்கள்; அப்பொழுது இவைகளும் உங்களுக்குக் கூடக் கொடுக்கப்படும்.

³²“பயப்படாதே, சிறுமந்தையே; உங்களுக்கு ராஜ்யத்தைத் தந்தருள உங்கள் பிதா பிரியமாயிருக்கிறார். ³³உங்களுக்கு உண்டானவைகளை விற்று, தரித்திரருக்குக் கொடுங்கள். பழமையாய்ப் போகாத பணப்பைகளையும், குறையாத பொக்கிஷத்தையும் பரலோகத்திலே உங்களுக்கு உண்டாக்கிக்கொள்ளுங்கள்; அங்கே திருடன் அணுகுகிறதுமில்லை, பொட்டுப்பூச்சி கெடுக்கிறதுமில்லை. ³⁴உங்கள் பொக்கிஷம் எங்கே இருக்கிறதோ, அங்கே உங்கள் இருதயமும் இருக்கும்.

எஜமான் திரும்பிவரும்போது ஆயத்தமாயிருங்கள்

³⁵“உங்கள் அரைகள் கட்டப்பட்டதாகவும், உங்கள் விளக்குகள் எரிகிறதாகவும் ஆயத்தமாயிருங்கள்; ³⁶தங்கள் எஜமான் கலியாண விருந்திலிருந்து திரும்பிவருகையில், அவர் வந்து தட்டும்போது உடனே கதவைத் திறக்கும்படி காத்திருக்கிற ஊழியக்காரரைப்போல் இருங்கள். ³⁷எஜமான் வரும்போது எந்த ஊழியக்காரர் விழித்திருக்கக் காண்கிறாரோ அந்த ஊழியக்காரர் பாக்கியவான்கள்; அவர் தாமே அரைகட்டிக்கொண்டு, அவர்களைப் பந்தியிருக்கச்செய்து, அவர்களுக்குப் பணிவிடை செய்வார் என்று மெய்யாகவே உங்களுக்குச் சொல்லுகிறேன். ³⁸அவர் இரண்டாம் ஜாமத்திலாவது, மூன்றாம் ஜாமத்திலாவது வந்து, அவர்கள் அப்படி ஆயத்தமாயிருக்கக் காண்பாரானால், அந்த ஊழியக்காரர் பாக்கியவான்கள். ³⁹வீட்டெஜமான் திருடன் வருகிற வேளையை அறிந்திருந்தால், அவன் தன் வீட்டைக் கன்னமிடவொட்டானென்று அறிந்துகொள்ளுங்கள். ⁴⁰நீங்களும் ஆயத்தமாயிருங்கள்; நீங்கள் நினையாத வேளையில் மனுஷகுமாரன் வருவார்” என்றார்.

⁴¹அப்பொழுது பேதுரு அவரை நோக்கி: “ஆண்டவரே, இந்த உவமையை எங்களுக்குச் சொல்லுகிறீரோ, எல்லாருக்கும் சொல்லுகிறீரோ?” என்றான்.

⁴²அதற்குக் கர்த்தர்: “தன் வேலைக்காரருக்கு ஏற்றநேரத்தில் படிதானியம் கொடுக்கும்படி எஜமான் அவர்கள்மேல் விசாரணைக்காரனாக வைக்கிற உண்மையும் விவேகமுமுள்ள விசாரணைக்காரன் யார்? ⁴³எஜமான் வரும்போது எந்த ஊழியக்காரன் இப்படிச் செய்கிறவனாய்க் காணப்படுகிறானோ அந்த ஊழியக்காரன் பாக்கியவான். ⁴⁴அவன் தனக்கு உண்டான எல்லாவற்றின்மேலும் அவனை விசாரணைக்காரனாக வைப்பான் என்று மெய்யாகவே உங்களுக்குச் சொல்லுகிறேன். ⁴⁵ஆனால் அந்த ஊழியக்காரன்: ‘என் எஜமான் வர நாள்செல்லும்’ என்று தன் உள்ளத்தில் சொல்லிக்கொண்டு, வேலைக்காரரையும் வேலைக்காரிகளையும் அடிக்கவும், புசித்துக் குடித்து வெறிக்கவும் தொடங்கினால், ⁴⁶அந்த ஊழியக்காரன் நினையாத நாளிலும், அறியாத வேளையிலும் அவனுடைய எஜமான் வந்து, அவனை வெட்டி, உண்மையில்லாதவர்களோடே அவனுக்குப் பங்கை நியமிப்பான். ⁴⁷தன் எஜமானுடைய சித்தத்தை அறிந்திருந்தும் ஆயத்தமாகாமலும் அதன்படி செய்யாமலும் இருந்த ஊழியக்காரன் அநேக அடிகள் அடிக்கப்படுவான். ⁴⁸அறியாதவனாயிருந்து, தண்டனைக்கேற்றவைகளைச் செய்தவனோ, சில அடிகள் அடிக்கப்படுவான். எவனுக்கு அதிகம் கொடுக்கப்பட்டதோ அவனிடத்தில் அதிகமாய்க் கேட்கப்படும்; எவனிடத்தில் அதிகமாய் ஒப்புவிக்கப்பட்டதோ அவனிடத்தில் இன்னும் அதிகமாய்க் கேட்கப்படும்.

குமாரன் அமைதியையல்ல, அக்கினியைக் கொண்டுவருகிறார்

⁴⁹“நான் பூமியின்மேல் அக்கினியைப் போட வந்தேன்; அது இப்பொழுதே பற்றியெரிந்தால் என் விருப்பம் எவ்வளவு நிறைவேறும்! ⁵⁰ஆனால் நான் பெற்றுக்கொள்ளவேண்டிய ஒரு ஸ்நானம் உண்டு; அது நிறைவேறும்வரைக்கும் நான் எவ்வளவாய் நெருக்கப்படுகிறேன்! ⁵¹நான் பூமியிலே சமாதானத்தை உண்டாக்கவந்தேன் என்று நினைக்கிறீர்களா? இல்லை; பிரிவினையையே உண்டாக்கவந்தேன் என்று உங்களுக்குச் சொல்லுகிறேன். ⁵²இதுமுதல் ஒரே வீட்டிலே ஐந்துபேர் பிரிந்திருப்பார்கள்; மூன்றுபேர் இரண்டுபேருக்கு விரோதமாகவும், இரண்டுபேர் மூன்றுபேருக்கு விரோதமாகவும் இருப்பார்கள். ⁵³தகப்பன் மகனுக்கும் மகன் தகப்பனுக்கும் விரோதமாகவும், தாய் மகளுக்கும் மகள் தாய்க்கும் விரோதமாகவும், மாமி மருமகளுக்கும் மருமகள் மாமிக்கும் விரோதமாகவும் பிரிந்திருப்பார்கள்” என்றார்.

⁵⁴பின்பு அவர் ஜனக்கூட்டங்களை நோக்கி: “நீங்கள் மேற்கே ஒரு மேகம் எழும்புகிறதைக் காணும்போது, மழை வருகிறது என்று உடனே சொல்லுகிறீர்கள்; அப்படியே சம்பவிக்கிறது.

⁵⁵தென்றல் அடிக்கிறபோது, உஷ்ணம் உண்டாகும் என்று சொல்லுகிறீர்கள்; அப்படியே சம்பவிக்கிறது. ⁵⁶மாயக்காரரே! பூமியின் தோற்றத்தையும் வானத்தின் தோற்றத்தையும் நிதானிக்க உங்களுக்குத் தெரியுமே; இந்தக் காலத்தை நீங்கள் நிதானிக்காமலிருக்கிறது ஏன்?

⁵⁷“நீதியானதை நீங்களே ஏன் தீர்மானிக்கிறதில்லை? ⁵⁸உன்மேல் வழக்காடுகிறவனோடே நீ அதிகாரியினிடத்திற்குப் போகையில், வழியிலே அவனோடே சமாதானமாகும்படி பிரயத்தனம்பண்ணு; இல்லாவிட்டால் அவன் உன்னை நியாயாதிபதியினிடத்தில் இழுத்துக்கொண்டுபோவான், நியாயாதிபதி உன்னை உத்தியோகஸ்தனிடத்தில் ஒப்புவிப்பான், உத்தியோகஸ்தன் உன்னைச் சிறையிலே போடுவான். ⁵⁹நீ கடைசிக் காசைக்கூடச் செலுத்துமளவும் அவ்விடத்திலிருந்து புறப்படமாட்டாய் என்று உனக்குச் சொல்லுகிறேன்” என்றார்.