ሉቃስ 14 FHB Father's Heart Bible™

14 ¹ኣብ ሓንቲ ሰንበት መዓልቲ፥ ናብ ቤት ሓደ ኻብ ሓለቓ ፈሪሳውያን ክበልዕ ምስ ኣተወ፥ ኣፀቢቖም የማዕድዎ ነበሩ። ²እንሆ ኸዓ ኣብ ቅድሚኡ፥ ስጋኡ ብማይ ዝሓበጠ ሰብኣይ ነበረ።

³ኢየሱስ ድማ ነቶም ሊቃውንቲ ሕግን ፈሪሳውያንን “ብሰንበት ምሕዋይ ሕጋዊ ድዩ ወይ ኣይኮነን?” በሎም።

⁴ንሳቶም ግና ስቕ በሉ። ንሱ ኸዓ ነቲ ሰብኣይ ሒዙ ኣሕወዮ፤ ሰደዶውን።

⁵ሽዑ ኸዓ “ካባኻትኩም ሓደ፥ ወዱ ወይ ብዕራዩ ብመዓልቲ ሰንበት ናብ ዒላ እንተ ወደቖ፥ ሽዑ ንሽዑ ኣየውፅኦንዶ ኢኹም?” በሎም።

⁶ነዙይ ዝመልስሉ ኸዓ ሰኣኑ።

⁷እቶም ዕዱማት ነቲ ናይ ክብሪ ስፍራ ኸመይ ገይሮም ከም ዝሓርዩ ምስ ኣስተውዓለ፥ ከምዙይ ኢሉ መሰለሎም፦

⁸“ሓደ ሰብ ናብ መርዓ ምስ ዓደመካ፥ ካባኻ ዝኸብር ጋሻ ተዓዲሙ ኸይህሉ እሞ፥ ናይ ክብሪ ስፍራ ኣይትትሓዝ። ⁹ሽዑ እቲ ንኽልቴኹም ዝዓደመኩም መፂኡ ‘ስፍራ ነዝ ሰብ እዙይ ሃቦ’ ክብለካ እዩ፤ ንስኻ ኸዓ ብሕፍረት ነቲ ዝተሓተ ስፍራ ኽትሕዝ ኢኻ። ¹⁰ንስኻ ግና ምስ ተዓደምካ፥ ኪድ ነቲ ዝተሓተ ስፍራ ሓዝ፤ እቲ ዝዓደመካ ምስ መፀ ‘ኣታ ፈታዊ፥ ናብ ላዕሊ ደይብ’ ምእንቲ ኽብለካ። ሽዑ ኣብ ቅድሚ እቶም ምሳኻ ኣብ ማእዲ ዘለዉ ዅሎም ክብሪ ክትረክብ ኢኻ። ¹¹ርእሱ ልዕል ዘብል ዅሉ ኽዋረድ እዩ፤ ርእሱ ዘትሕት ከዓ ልዕል ክብል እዩ።”

¹²ነቲ ዝዓደሞ ሰብኣይ ድማ ከምዙይ በሎ፦ “ምሳሕ ወይ ድራር ክትገብር እንተለኻ፥ ዕርክኻ ወይ ኣሕዋትካ ወይ ኣዝማድካ ወይ ሃብታማት ጐረባብትኻ ኣይትዓድም። እንተ ዓደምካዮም፥ ንሳቶም ተመሊሶም ክዕድሙኻ እዮም፤ ዋጋ ድማ ክትቕበል ኢኻ። ¹³ድግስ ክትገብር እንተለኻ ግና፥ ንድኻታትን ንዝተጐድኡን ንሓንካሳትን ንዕዉራትን ዓድም፤ ¹⁴ቡሩኽ ድማ ክትከውን ኢኻ። ንሳቶም ዝፈድዩኻ ስለ ዘይብሎም፥ ብትንሳኤ ፃድቃን ክትፍደ ኢኻ።”

ድግስ ኣቦና

¹⁵ካብቶም ምስኡ ኣብ ማእዲ ዝነበሩ ሓደ ኸዓ እዙይ ምስ ሰምዐ፥ “ኣብ መንግስቲ ኣቦና ኣብቲ ድግስ ዝበልዕ ቡሩኽ እዩ!” በሎ።

¹⁶ኢየሱስ ድማ ከምዙይ ኢሉ መለሰሉ፦ “ሓደ ሰብ ዓብዪ ድግስ ገበረ፤ ብዙሓት ድማ ዓደመ።

¹⁷ጊዜ እቲ ድግስ ምስ በፅሐ ኸዓ፥ ነቶም ዕዱማት ‘ሕዚ ዅሉ ተዳልዩ እዩ እሞ ንዑ’ ኢሉ ኽነግሮም ኣገልጋሊኡ ለኣኸ። ¹⁸ኵሎም ግና ሓደ ብሓደ ክምኽንዩ ጀመሩ። እቲ ቐዳማይ ‘ግራት ዓዲገ ኣለኹ እሞ፥ ከይደ ኽርእያ ግዲ እዩ፤ በጃኻ ምኽንያተይ ተቐበለኒ’ በሎ።

¹⁹ካልእ ድማ ‘ሓሙሽተ ዕርዲ ኣብዑር ዓዲገ ኣለኹ እሞ፥ ክፍትኖም እኸይድ ኣለኹ፤ በጃኻ ምኽንያተይ ተቐበለኒ’ በለ።

²⁰ካልእ ከዓ ‘ሰበይቲ ተመርዒአ ኣለኹ፥ ስለዙይ ክመፅእ ኣይኽእልን እየ’ በለ።”

²¹እቲ ኣገልጋሊ ኸዓ ተመሊሱ እዙይ ንጐይታኡ ነገሮ። ሽዑ እቲ በዓል ቤት ተቘጢዑ፥ ነቲ ኣገልጋሊኡ ‘ቀልጢፍካ ናብ ኣደባባያትን ናብ ጐደናታት እታ ኸተማን ውፃእ፤ ንድኻታትን ንዝተጐድኡን ንዕዉራትን ንሓንካሳትን ከዓ ኣእቱ’ በሎ።

²²“እቲ ኣገልጋሊ ኸዓ ‘ጐይታይ፥ ከምቲ ዝኣዘዝካኒ ተገይሩ እዩ፤ ገና ድማ ቦታ ኣሎ’ በለ።

²³ሽዑ እቲ ጐይታ ነቲ ኣገልጋሊ ‘ቤተይ ምእንቲ ክትመልእ፥ ናብ መንገድታትን ናብ ሓጹርን ወፂእኻ ክኣትዉ ኣገድዶም። ²⁴ካብቶም ዝተዓደሙ ሓደ እኳ ድግሰይ ከም ዘይቀምስ እብለኩም ኣለኹ።’”

ዋጋ ንኢየሱስ ምስዓብ

²⁵ብዙሕ ህዝቢ ምስኡ ይጐዓዝ ነበረ፤ ናብኣቶም ግልፅ ኢሉ ድማ ከምዙይ በሎ፦

²⁶“ሓደ ሰብ ናባይ መፂኡ፥ ነቦኡን ነዲኡን ንሰበይቱን ንደቁን ነሕዋቱን ነሓትኑን፥ እወ ንህይወቱ ኸይተረፈ እንተ ዘይፀልአ፥ ደቀ መዝሙረይ ክኸውን ኣይኽእልን እዩ። ^a a v26 እዝ ኣብዙይ ዘሎ “ምፅላእ”፥ ብምውድዳር ኣዝዩ ብውሑድ ምፍቃር ዘመልክት፥ ናይ እብራውያን ኣዘራርባ እዩ፤ ኢየሱስ ኣንፃር ስድራ ቤት ፅልኢ ኣይእዝዝን ኣሎ፥ ካብ ኵሉ ኻልእ ተኣማንነት ዝዓቢ ፍቕሪ ንእኡ እምበር። ²⁷መስቀሉ ፆይሩ ዘይስዕበኒ ዅሉ፥ ደቀ መዝሙረይ ክኸውን ኣይኽእልን እዩ። ²⁸ካባኻትኩም ሓደ ግንቢ ክሰርሕ እንተ ደለየ፥ ዘፍፅሞ እኹል ገንዘብ ከም ዘለዎ ኽርኢ፥ ቅድም ተቐሚጡ ወፃኢኡዶ ኣይቈፅርን እዩ? ²⁹እንተ ዘይኮነ፥ መሰረት ኣንቢሩ ኽፍፅም እንተ ዘይከኣለ፥ ዝሪእዎ ዅሉ ኸባጭውሉ ኽጅምሩ እዮም፤ ³⁰‘እዝ ሰብ እዙይ ክሰርሕ ጀሚሩ ኽፍፅም ግና ኣይከኣለን’ ድማ ክብሉ እዮም። ³¹ወይ ሓደ ንጉስ ምስ ካልእ ንጉስ ክዋጋእ እንተ ኸደ፥ ነቲ ብዕስራ ሽሕ ዝመፅእ ዘሎ፥ ብዓሰርተ ሽሕ ክገጥሞ ይኽእል እንተ ኾይኑ፥ ቅድም ተቐሚጡ ኣይሓስብንዶ? ³²እንተ ዘይከኣለ ኸዓ፥ እቲ ኻልእ ገና ርሑቕ እንተሎ፥ ልኡኻት ልኢኹ ውዕሊ ሰላም ክልምን እዩ። ³³ከምኡ ድማ፥ ካባኻትኩም ነቲ ዘለዎ ዅሉ ዘይሓድግ ዝኾነ ሰብ፥ ደቀ መዝሙረይ ክኸውን ኣይኽእልን እዩ።

³⁴ጨው ፅቡቕ እዩ፤ ጨው መቐረቱ እንተ ጠፍአ ግና፥ ብምንታይ መሊሱ ይምቅር? ³⁵ንምድሪ ኾነ ንድዅዒ ኣይጠቅምን፥ ንደገ ይድርበ። ዝሰምዕ እዝኒ ዘለዎ ይስማዕ።”