An Warkar da Mutum a Teburin Bafarisiye

A teburin wani Bafarisiye ya warkar da wani mutum mai kumburi yayin da kowa ya yi shiru, sa'an nan ya gaya wa baƙi su zauna a wuri mafi ƙasƙanci, masu gayya kuma su gayyaci waɗanda ba za su iya rama musu ba. A liyafar Ubansa waɗanda aka gayyata suka ba da hujjoji, aka kuma kawo mutanen titi. Bin sa yana bukatar kome.

Babi na 14.

Wata ranar Asabar, sa'ad da ya shiga gidan wani daga cikin shugabannin Farisiyawa domin cin abinci, suna sa masa ido sosai. Ga kuma wani mutum a gabansa wanda jikinsa ya kumbura da ruwa.

Yesu ya ce wa masana shari'a da Farisiyawa, “Ya halatta a warkar da mara lafiya a ranar Asabar, ko a'a?”

Amma suka yi shiru. Sai ya kama mutumin, ya warkar da shi, ya kuma sallame shi.

Sa'an nan ya ce musu, “In ɗaya daga cikinku yana da ɗa ko saniya wanda ya fāɗa cikin rijiya a ranar Asabar, ba za ku fitar da shi nan da nan ba?”

Ba su kuwa da amsar da za su bayar game da haka.

Da ya lura yadda baƙi suke zaɓan wuraren zama masu daraja, sai ya ba su wannan misali,

“Sa'ad da wani ya gayyace ka zuwa bikin aure, kada ka zauna a wurin zama mai daraja, don kila an gayyaci wani baƙo wanda ya fi ka daraja. Sa'an nan wanda ya gayyace ku biyu zai zo yă ce maka, ‘Ka ba wannan mutum wurin zamanka,’ sai ka sha kunya ka tafi ka zauna a wuri mafi ƙasa. Amma sa'ad da aka gayyace ka, ka je ka zauna a wuri mafi ƙasa, domin sa'ad da mai gayyatarka ya zo, yă ce maka, ‘Aboki, ka matsa zuwa wuri mafi daraja.’ Sa'an nan za a girmama ka a gaban dukan waɗanda kuke zaune tare da kai a tebur. Gama duk mai ɗaukaka kansa, za a ƙasƙantar da shi, mai ƙasƙantar da kansa kuwa, za a ɗaukaka shi.”

Sa'an nan ya ce wa wanda ya gayyace shi, “Sa'ad da kake shirya cin abinci na rana ko na yamma, kada ka gayyaci abokanka ko 'yan'uwanka ko danginka ko maƙwabtanka masu arziki. In ka yi haka, su ma su gayyace ka, a kuwa sāka maka. Amma sa'ad da kake shirya biki, ka gayyaci matalauta, da nakasassu, da guragu, da makafi, za a kuwa albarkace ka. Tun da ba su da abin da za su sāka maka, za a sāka maka a tashin matattu na masu adalci.”

Bikin Uba

Da ɗaya daga cikin waɗanda suke zaune tare da shi a tebur ya ji haka, sai ya ce masa, “Mai albarka ne wanda zai ci abinci a bikin Mulkin Ubanmu!”

Yesu ya amsa masa ya ce, “Wani mutum ya shirya babban biki, ya gayyaci mutane da yawa.

“Da lokacin biki ya yi, sai ya aiki bawansa yă gaya wa waɗanda aka gayyata, ‘Ku zo, gama yanzu kome ya shirya.’ Amma dukansu suka fara neman uzuri, ɗaya bayan ɗaya. Na farko ya ce masa, ‘Na sayi gona, dole in je in gan ta. Ina roƙon ka yafe mini.’

Wani kuma ya ce, ‘Na sayi shanu nau'i-nau'i biyar, ina kuma kan hanya in gwada su. Ina roƙon ka yafe mini.’

Wani kuma ya ce, ‘Na yi aure ba da daɗewa ba, saboda haka ba zan iya zuwa ba.’”

Sai bawan ya dawo ya gaya wa maigidansa haka. Sai maigidan gida ya yi fushi, ya ce wa bawansa, ‘Ka fita da sauri zuwa tituna da layukan birni, ka kuma kawo matalauta, da nakasassu, da makafi, da guragu.’

“‘Maigida,’ bawan ya ce, ‘an aikata abin da ka umarta, amma har yanzu akwai saurun wuri.’

Sai maigidan ya ce wa bawan, ‘Ka fita zuwa kan hanyoyi da ƙananan hanyoyin ƙauye, ka tilasta musu su shigo, domin gidana yă cika. Gama ina gaya muku, ba ko ɗaya daga cikin waɗanda aka gayyata da zai ɗanɗani bikina ba.’”

Tsadar Bin Yesu

Taro mai yawa suna tafiya tare da shi, sai ya juya ya ce musu,

“Duk wanda ya zo wurina, bai kuwa ƙi mahaifinsa da mahaifiyarsa da matarsa da 'ya'yansa da 'yan'uwansa maza da mata ba—I, har da ransa—ba zai iya zama almajirina ba. ^a Duk wanda bai ɗauki gicciyensa ya bi ni ba, ba zai iya zama almajirina ba. Wane ne a cikinku, in yana so yă gina hasumiya, da ba zai fara zama yă ƙididdige tsadarsa ba, don yă ga ko yana da isashen kuɗin kammala ta? In ba haka ba, in ya kafa harsashi bai kuwa iya kammalawa ba, duk masu ganin haka za su fara yi masa ba'a, suna cewa, ‘Wannan mutum ya fara gini bai kuwa iya kammalawa ba.’ Ko kuwa wane sarki ne, in zai je yaƙi da wani sarki, da ba zai fara zama yă yi tunani ko zai iya fuskantar mai zuwa kansa da mutum dubu ashirin, shi da mutum dubu goma ba? In kuwa ba zai iya ba, zai aiki jakadu tun ɗayan yana da nisa, yă nemi sharuɗɗan sulhu. Haka ma, duk wani a cikinku wanda bai yi watsi da dukan abin da yake da shi ba, ba zai iya zama almajirina ba.

“Gishiri abu ne mai kyau, amma in gishiri ya rasa ɗanɗanonsa, yaya za a sāke mai da shi mai ɗanɗano? Ba shi da amfani ga ƙasa ko ga tarin taki, sai a zubar da shi. Duk mai kunnen ji, yă ji.”