ሉቃስ 14

14 ¹በአንድ ሰንበት ቀን ከፈሪሳውያን መሪዎች ወደ አንዱ ቤት ምግብ ሊበላ በገባ ጊዜ፣ አጥብቀው ይከታተሉት ነበር። ²በፊቱም ሰውነቱ በፈሳሽ ያበጠ አንድ ሰው ነበረ።

³ኢየሱስም ሕግ አዋቂዎችንና ፈሪሳውያንን፣ “በሰንበት መፈወስ ተፈቅዷል ወይስ አልተፈቀደም?” ሲል ጠየቃቸው።

⁴እነርሱ ግን ዝም አሉ። እርሱም ሰውዬውን ይዞ ፈወሰውና አሰናበተው።

⁵ከዚያም እንዲህ አላቸው፤ “ከእናንተ አንዱ ልጁ ወይም በሬው በሰንበት ቀን ጕድጓድ ውስጥ ቢወድቅ፣ ወዲያውኑ አያወጣውም?”

⁶ለዚህም የሚመልሱት መልስ አጡ።

⁷የተጋበዙትም የክብር ስፍራዎችን እንዴት እንደሚመርጡ ባስተዋለ ጊዜ፣ ይህን ምሳሌ ነገራቸው፤

⁸“አንድ ሰው ወደ ሰርግ ግብዣ በጠራህ ጊዜ፣ የክብር ስፍራ አትያዝ፤ ምናልባት ካንተ የተከበረ እንግዳ ተጠርቶ ይሆናልና። ⁹ያን ጊዜ ሁለታችሁንም የጠራው መጥቶ፣ ‘ስፍራህን ለዚህ ሰው ልቀቅ’ ይልሃል፤ አንተም በኀፍረት ዝቅተኛውን ስፍራ ትይዛለህ። ¹⁰አንተ ግን በተጠራህ ጊዜ፣ ሄደህ ዝቅተኛውን ስፍራ ያዝ፤ የጠራህ ሰው በመጣ ጊዜ፣ ‘ወዳጄ፣ ወደ ላይ ውጣ’ እንዲልህ። ከዚያም ከአንተ ጋራ በማዕድ ተቀምጠው ባሉት ሁሉ ፊት ክብርን ታገኛለህ። ¹¹ራሱን ከፍ የሚያደርግ ሁሉ ዝቅ ይደረጋልና፤ ራሱን ዝቅ የሚያደርግ ግን ከፍ ይደረጋል።”

¹²ከዚያም የጠራውን ሰው እንዲህ አለው፤ “ምሳ ወይም እራት ባዘጋጀህ ጊዜ፣ ወዳጆችህን ወይም ወንድሞችህን ወይም ዘመዶችህን ወይም ባለጠጎች ጎረቤቶችህን አትጥራ፤ ይህን ብታደርግ ምናልባት እነርሱ ደግመው ይጠሩሃል፤ ብድራትም ይመለስልሃል። ¹³አንተ ግን ግብዣ ባደረግህ ጊዜ፣ ድኾችን፣ አካለ ስንኩሎችን፣ አንካሶችን፣ ዕውሮችን ጥራ፤ ¹⁴ትባረካለህም። ብድራት የሚመልሱልህ ስለሌላቸው፣ በጻድቃን ትንሣኤ ብድራትህ ይከፈልሃል።”

የአብ ግብዣ

¹⁵ከእርሱ ጋራ በማዕድ ተቀምጠው ከነበሩት አንዱ ይህን በሰማ ጊዜ፣ “በአባታችን መንግሥት ግብዣ የሚበላ ብፁዕ ነው!” አለው።

¹⁶ኢየሱስም እንዲህ ሲል መለሰ፤ “አንድ ሰው ታላቅ ግብዣ አደረገ፤ ብዙ ሰዎችንም ጠራ።

¹⁷የግብዣውም ሰዓት በደረሰ ጊዜ፣ ‘ኑ፤ አሁን ሁሉ ተዘጋጅቷል’ ብሎ ለተጠሩት እንዲነግራቸው አገልጋዩን ላከ። ¹⁸ሁሉም ግን አንድ በአንድ ይሳበቡ ጀመር። የመጀመሪያው፣ ‘እርሻ ገዝቻለሁ፤ ሄጄ ማየት አለብኝ፤ እባክህ ይቅር በለኝ’ አለው።

¹⁹ሌላውም፣ ‘አምስት ጥምድ በሬዎች ገዝቻለሁ፤ ልፈትናቸውም እየሄድኩ ነው፤ እባክህ ይቅር በለኝ’ አለ።

²⁰ሌላውም፣ ‘አሁን ሚስት አግብቻለሁ፤ ስለዚህ ልመጣ አልችልም’ አለ።

²¹አገልጋዩም ተመልሶ ይህን ለጌታው ነገረው። የቤቱም ጌታ ተቈጥቶ አገልጋዩን፣ ‘ፈጥነህ ወደ ከተማዪቱ አደባባዮችና ጎዳናዎች ውጣ፤ ድኾችን፣ አካለ ስንኩሎችን፣ ዕውሮችንና አንካሶችን አግባ’ አለው።

²²አገልጋዩም፣ ‘ጌታዬ፣ ያዘዝከው ተፈጽሟል፤ ነገር ግን እስከ አሁን ስፍራ አለ’ አለ።

²³ጌታውም አገልጋዩን እንዲህ አለው፤ ‘ቤቴ እንዲሞላ፣ ወደ መንገዶችና ወደ አገር ዳር ጎዳናዎች ውጣ፤ እንዲገቡም አስገድዳቸው። ²⁴እላችኋለሁና፣ ከተጠሩት ሰዎች አንዱ እንኳ ከግብዣዬ አይቀምስም።’ ”

ኢየሱስን የመከተል ዋጋ

²⁵ብዙ ሕዝብም ከእርሱ ጋራ ይጓዝ ነበር፤ ወደ እነርሱም ዘወር ብሎ እንዲህ አለ፤

²⁶“ማንም ወደ እኔ የሚመጣ አባቱንና እናቱን፣ ሚስቱንና ልጆቹን፣ ወንድሞቹንና እኅቶቹን፣ አዎን፣ ሕይወቱን እንኳ ሳይቀር ካልጠላ፣ ደቀ መዝሙሬ ሊሆን አይችልም። ^a a v26 እዚህ ላይ “መጥላት” በንጽጽር እጅግ ያነሰ መውደድ ማለት የሆነ የዕብራይስጥ አነጋገር ነው፤ ኢየሱስ በቤተ ሰብ ላይ ጥላቻን እያዘዘ አይደለም፤ ነገር ግን ከሌላው ታማኝነት ሁሉ የሚልቅ ለእርሱ ያለ ፍቅርን ነው። ²⁷መስቀሉን ተሸክሞ የማይከተለኝ ሁሉ ደቀ መዝሙሬ ሊሆን አይችልም። ²⁸ከእናንተ አንዱ ግንብ ሊሠራ ቢፈልግ፣ ለመጨረስ የሚበቃ እንዳለው ለማየት አስቀድሞ ተቀምጦ ወጪውን አያሰላም? ²⁹አለበለዚያ መሠረቱን ጥሎ መጨረስ ባይችል፣ የሚያየው ሁሉ ሊዘባበትበት ይጀምራል፤ ³⁰‘ይህ ሰው መሥራት ጀመረ፤ መጨረስ ግን አልቻለም’ እያሉ። ³¹ወይም አንድ ንጉሥ ከሌላ ንጉሥ ጋራ ሊዋጋ ቢዘጋጅ፣ በሃያ ሺ ሰዎች የሚመጣበትን በዐሥር ሺ ሊገጥመው የሚችል እንደ ሆነ አስቀድሞ ተቀምጦ አያስብም? ³²ባይችልም፣ ሌላው ገና ሩቅ ሳለ መልእክተኞችን ልኮ የሰላም ውል ይለምናል። ³³እንዲሁም ከእናንተ ያለውን ሁሉ የማይተው ማንም ቢሆን ደቀ መዝሙሬ ሊሆን አይችልም።

³⁴“ጨው መልካም ነው፤ ነገር ግን ጨዋማነቱ ቢጠፋ፣ እንደ ገና በምን ይጣፍጣል? ³⁵ለዐፈርም ሆነ ለፋግ ክምር አይበጅም፤ ወደ ውጭም ይጣላል። የሚሰማ ጆሮ ያለው ይስማ።”