Me basika na mukanda
Dibuku

Yesu Ke Fidisa Kumi na Zole

Yesu fidisaka kumi na zole, mampa tanu dyisaka bantu mafunda, mpe Pyele tubaka ti yandi kele Klisto, mpe kaka na ntangu yina Yesu tubaka ti bawu fwana kufwa yandi. Na mongo, Tata ya beto tubaka ti yandi kele Yina Yandi Soolaka. Ntangu yandi kulumukaka, yandi belusaka mwana ya bakala yina bilandi lendaka kubelusa ve. Na manima, yandi balukaka na nzila ya Yelusalemi.

Tata ya beto ke zonza na vese 35

Kapu 9.

Yesu bokilaka kumi na zole kintwadi, yandi pesaka bawu lulendo mpe lutumu na zulu ya bampeve ya yimbi nyonso mpe na kubelusa bimbevo. Mpe yandi fidisaka bawu samu na kulongisa Kimfumu ya Tata ya beto mpe na kubelusa bambevo.

Yandi tubaka na bawu: «Beno baka ata kima ve samu na nzila: yinti ve, nkutu ve, mampa ve, to mbongo ve, mpe beno baka ve binkuti zole konso muntu. Yinzo yina beno ke kota, beno vwanda kuna, mpe beno katuka kuna. Kisika yina ba ke yamba beno ve, ntangu beno ke katuka na mbanza yina, beno ningisa fundu-fundu yina kele na makulu ya beno, mutindu kimbangi na kutelama na bawu.»

Na yina, bawu katukaka mpe kwendaka na bwala na bwala, na kulongisa Nsangu ya Mbote mpe na kubelusa na bisika nyonso.

Elode mfumu ya yiya kuwaka mambu nyonso yina vwandaka salama, mpe yandi vwandaka kuyituka, samu ti bantu ya nkaka vwandaka tuba ti Yowane me vumbuka na bawu ya kufwa, ba ya nkaka ti Eli me monikina, mpe ba ya nkaka dyaka ti mosi na kati ya mimbikudi ya ntangu ya ntama me vumbuka. Elode tubaka: «Mu zengaka Yowane ntu, kasi nani yayi yina mu ke na kuwa mambu ya mutindu yayi samu na yandi?» Yandi vwandaka sosa kutala yandi.

Mampa Tanu Ke Dyisa Bantu Mafunda Tanu

Ntangu bantumwa vutukaka, bawu zabisaka Yesu mambu nyonso yina bawu salaka. Yandi bakaka bawu mpe katukaka na mansweki na mbanza mosi ya ba ke bokilaka Besayida. Kasi bantu zabaka yawu mpe landaka yandi. Yandi yambaka bawu, zonzaka na bawu mambu ya Kimfumu ya Tata ya beto, mpe belusaka bayina vwandaka na mfunu ya kubeluka. Ntangu kilumbu vwandaka kumanisa, kumi na zole kwizaka mpe tubaka na yandi: «Fidisa nkonga ya bantu samu ti bawu kwenda sosa kisika ya kulala mpe madya na babwala mpe na bizunga ya bisika yina beto kele, samu ti beto kele na kisika ya ngaanda awa.»

Yandi tubaka: «Beno pesa bawu kima ya kudya.» Bawu tubaka: «Beto kele kaka na mampa tanu mpe mbisi zole, kana beto kwenda ve sumba madya samu na nkonga yayi nyonso ya bantu.»

Samu ti bantu vwandaka kiteso ya mafunda tanu (5 000) ya babakala. Yandi zabisaka bilandi ya yandi: «Beno vandisa bawu na mimvuka ya kiteso ya makumi tanu konso mumvuka.»

Bawu salaka mutindu yina, mpe bawu vandisaka bantu nyonso. Yandi bakaka mampa tanu mpe mbisi zole, vumbulaka meso na zulu, sakumunaka mpe bukaka yawu, mpe tatamanaka kupesa yawu na bilandi samu na kukabula na nkonga ya bantu. Bantu nyonso dyaka mpe yukutaka; bitini yina bikanaka fulusaka bitunga kumi na zole.

Nani Beno Ke Tuba Ti Mu Kele?

Kilumbu mosi, ntangu Yesu vwandaka sambila yandi mosi mpe bilandi ya yandi vwandaka pene-pene, yandi yufulaka bawu: «Bantu ke tuba ti mu kele nani?»

Bawu vutulaka: «Yowane Mubotiki. Bantu ya nkaka ke tuba ti Eli. Ba ya nkaka dyaka ti mumbikudi mosi ya ntangu ya ntama me vumbuka.»

Yandi yufulaka: «Kasi beno, beno ke tuba ti mu kele nani?» Pyele vutulaka: «Klisto ya Tata ya beto.» a a v20 Ntangu Pyele ke bokila Yesu «Klisto ya Tata ya beto», yandi ke tuba ti Yesu kele Muntu ya Kubyekama yina Tata fidisaka, Mwana yina ke swaswana na Tata yina fidisaka yandi.

Mwana ya Muntu Fwana Kutala Mpasi

Yesu kebisaka bawu ngolo, yiminaka bawu na kutuba na muntu ata mosi mambu yayi,

yandi tubaka: «Mwana ya Muntu fwana kutala mpasi mingi mpe bambuta, bamfumu ya banganga-Nzambi, mpe bantwadisi ya Musiku ke manga yandi, mpe ke fwa, mpe na kilumbu ya tatu ke vumbuka.»

Na yina, yandi zabisaka bawu nyonso: «Muntu yina ke zola kulanda munu fwana kukibika yandi mosi mpe kubaka kulunsi ya yandi konso kilumbu mpe kulanda munu. Samu ti konso muntu yina ke zola kugulusa luzingu ya yandi, yandi ke vidisa yawu; kasi konso muntu yina ke vidisa luzingu ya yandi samu na munu, yandi ke gulusa yawu. Samu ti wapi mfunu kele kana muntu me zwa bimvwama nyonso ya yinza, kasi yandi ke bebisa to ke vidisa yandi mosi? Muntu yina ke wa nsoni samu na munu mpe samu na mambu ya munu, Mwana ya Muntu mpe ke wa nsoni samu na yandi ntangu yandi ke kwiza na nkembo ya yandi mosi mpe na nkembo ya Tata mpe ya bambazi ya longo. Kasi mu ke zabisa beno ya tsyelika: bantu ya nkaka yina me telama awa ke tala lufwa ve tii bawu ke tala Kimfumu ya Tata ya beto.»

Tata Ke Kembisa Mwana ya Yandi

Kiteso ya bilumbu nana na manima ya mambu yayi, Yesu bakaka Pyele, Yowane, mpe Zaki, mpe yulukaka na mongo samu na kusambila. Ntangu yandi vwandaka sambila, kizizi ya luse ya yandi sobaka, mpe binkuti ya yandi kumaka mpembe ya kulutila ya kulezima. Mpe babakala zole vwandaka zonza na yandi, Moyize mpe Eli, yina monikinaka na nkembo, na kuzonza mambu ya kukatuka ya yandi, yina yandi vwandaka pene-pene na kulungisa na Yelusalemi.

Pyele mpe bantu ya yandi vwandaka ya kulala mpongi mingi; ntangu bawu vumbukaka mbote, bawu talaka nkembo ya yandi mpe babakala zole yina vwandaka telama na yandi. Ntangu bawu vwandaka katuka na yandi, Pyele tubaka na Yesu: «Mfumu, yawu kele mbote ti beto kele awa. Bika beto sala bayinzo tatu ya mileba, mosi samu na nge, mosi samu na Moyize, mosi samu na Eli.» Yandi zabaka ve yinki yandi vwandaka tuba.

Ntangu yandi vwandaka zonza, dituti kwizaka mpe fukaka bawu na kitombe; ntangu bawu kotaka na yawu, bawu waka boma.

Ndinga mosi katukaka na dituti, yandi tubaka: «Yayi kele Mwana ya munu, Muntu ya munu ya Kusoola, beno wila yandi!» b b v35 Na kusobuka ya kizizi, ndinga mosi ya Tata ke bokila Yesu «Mwana ya munu, Muntu ya munu ya Kusoola», Mwana mosi yina Tata ke sepelaka na yandi, yina ntangu yayi me monikina na nkembo.

Ntangu ndinga manaka, Yesu monikinaka yandi mosi. Bawu vwandaka pi, bawu zabisaka muntu ata mosi ve na bilumbu yina mambu yina bawu talaka.

Mwana ya Tata Mosi Me Katuka na Kitombe

Na kilumbu yina landaka, ntangu bawu kulumukaka na mongo, nkonga ya nene ya bantu kutanaka na yandi. Bakala mosi na kati ya nkonga ya bantu lookaka: «Mulongi, mu ke lomba nge, tala mwana ya munu ya bakala, samu ti yandi kele mwana ya munu kaka mosi. Mpeve mosi ke kangaka yandi, mpe na mbala mosi yandi ke boka; yawu ke ningisaka yandi tii yandi ke basisa mafulu-fulu na munoko, yawu ke bikaka yandi fyoti ve, na kunyokola yandi. Mu lombaka bilandi ya nge na kubingisa yawu, kasi bawu lendaka ve.»

Yesu vutulaka: «Beno bantu ya kukonda kiminu mpe ya yimbi, tii ntangu nki mu fwana kuvwanda kintwadi na beno mpe kukanga ntima na beno? Nata mwana ya nge ya bakala awa.»

Ntangu mwana vwandaka kwiza, mpeve ya yimbi bwisaka yandi na ntoto mpe ningisaka yandi. Kasi Yesu ngalaka mpeve ya yimbi, belusaka mwana, mpe vutulaka yandi na tata ya yandi.

Ba Ke Yekula Mwana ya Muntu

Bawu nyonso yitukaka mingi samu na nene ya Tata ya beto. Ntangu bantu nyonso vwandaka yituka na mambu nyonso yina Yesu salaka, yandi tubaka na bilandi ya yandi:

«Beno tula mambu yayi na makutu ya beno: Ntama mingi ve, ba ke yekula Mwana ya Muntu na maboko ya bantu.»

Kasi bawu bakulaka mambu yayi ve. Ya vwandaka ya kubumbama na bawu samu ti bawu lenda kubakula yawu ve, mpe bawu waka boma ya kuyufula yandi samu na yawu.

Ntwananu kwizaka na kati ya bilandi samu na kuzaba nani kele muntu ya nene na kati ya bawu. Kasi Yesu zabaka mabanza ya bantima ya bawu. Yandi bakaka mwana ya fyoti mpe telemisaka yandi pene-pene ya yandi,

mpe zabisaka bawu: «Muntu yina ke yamba mwana yayi na nkumbu ya munu, yandi ke yamba munu; mpe konso muntu yina ke yamba munu, yandi ke yamba mpe yina fidisaka munu. Ya tsyelika, muntu yina kele ya nsuka na kati ya beno nyonso, ni yandi kele muntu ya nene.»

Yowane tubaka: «Mfumu, beto talaka muntu mosi vwandaka bingisa bampeve ya yimbi na nkumbu ya nge, mpe beto mekaka na kukanga yandi, samu ti yandi ke landa ve kintwadi na beto.»

Yesu tubaka na yandi: «Beno kanga yandi ve, samu ti muntu yina kele ve mbeni ya beno, yandi kele ya beno.»

Yesu Balula Kizizi ya Yandi na Yelusalemi

Ntangu bilumbu kumaka pene-pene samu na kunanguna yandi na zulu, Yesu balulaka kizizi ya yandi na ngolo nyonso samu na kukwenda na Yelusalemi. Yandi fidisaka bantwadisi na mantwala ya yandi. Bawu kwendaka mpe kotaka na bwala mosi ya kizunga ya Samaliya samu na kukubika yandi, kasi bantu ya kuna yambaka yandi ve, samu ti yandi vwandaka kwenda na Yelusalemi. Ntangu bilandi Zaki mpe Yowane talaka yawu, bawu tubaka: «Mfumu, nge zola ti beto bokila tiya kukulumuka na zulu samu na kuyoka bawu?»

Kasi yandi balukaka mpe ngalaka bawu. Mpe bawu kwendaka na bwala ya nkaka.

Ntalu ya Kulanda Yesu

Ntangu bawu vwandaka tambula na nzila, muntu mosi tubaka na yandi: «Mu ke landa nge konso kisika nge ke kwenda.»

Yesu tubaka: «Mibaku kele na mabulu, bandeke ya zulu kele na bazala, kasi Mwana ya Muntu kele na kisika ya kutula ntu ya yandi ve.»

Yandi tubaka na muntu ya nkaka: «Landa munu.» Kasi yandi vutulaka: «Mfumu, bika ntete ti mu kwenda kuzika tata ya munu.»

Kasi Yesu zabisaka yandi: «Bika ti bafwa kuzika bafwa ya bawu, kasi nge, kwenda zabisa Kimfumu ya Tata ya beto.»

Muntu ya nkaka mpe tubaka: «Mfumu, mu ke landa nge, kasi bika ntete ti mu kwenda kanina bantu yina kele na yinzo ya munu.»

Yesu vutulaka: «Muntu yina me simba kisalulu ya kusadilaka bilanga mpe ke tala na manima, yandi fwana ve na Kimfumu ya Tata ya beto.»