Ọdịda Sọl Erute Devid

Ọchịchị Devid—mmeri ya na ọdịda ya dị arọ. Nʼetiti ya ka ọgbụgba ndụ Nna anyị na Devid gbara guzo: nkwa nke Nna na nwa nwoke nke ruru ebe dị anya karịa otu ocheeze.

Isi 1.

Mgbe Sọl nwụchara, Devid si nʼimeri ndị Amalek lọta, nọrọ nʼZiklag ụbọchị abụọ. Nʼụbọchị nke atọ, otu nwoke si nʼebe ndị agha Sọl nọ bịa, uwe ya dọwara adọwa, aja dịkwa ya nʼisi. Mgbe o rutere ebe Devid nọ, o dara nʼala kpọọ isiala.

Devid jụrụ ya sị, “Ebee ka i si bịa?” Ọ zara sị, “Agbapụtara m site nʼebe ndị agha Izrel nọ.”

Devid jụrụ sị, “Gịnị mere? Gwa m.” Ọ sịrị, “Ndị mmadụ si nʼagha gbalaga. Ọtụtụ nʼime ha dara nwụọ. Sọl na Jonatan nwa ya nwụkwara anwụ.”

Devid jụrụ nwokorobịa ahụ wetara ozi ahụ sị, “Olee otú i si mara na Sọl na Jonatan nwa ya anwụọla?”

Nwokorobịa ahụ sịrị, “Adaba m nʼUgwu Gilboa, lee Sọl ka ọ dabeere na ùbe ya, ụgbọ agha na ndị na-agba ịnyịnya na-abịakwute ya nso. Ọ tụgharịrị, hụ m, kpọọ m òkù. Asịrị m, ‘Lee m nʼebe a.’ Ọ jụrụ m sị, ‘Ònye ka ị bụ?’ Agwara m ya sị, ‘Abụ m onye Amalek.’ Ọ sịrị m, ‘Guzoro nʼelu m gbuo m; oke ihe mgbu ejidela m, ma m ka dị ndụ.’ Ya mere, eguzoro m nʼelu ya gbuo ya, nʼihi na amaara m na ọ gaghị adị ndụ mgbe ọ daara. Mgbe ahụ, ewepụrụ m okpueze dị ya nʼisi na ọlaaka dị ya nʼaka, wetara ha ebe a nye onyenwe m.”

Mgbe ahụ, Devid jidere uwe nke ya dọwaa ha, ndị ikom niile so ya meekwara otú ahụ. Ha ruru ụjụ, bee ákwá, buokwa ọnụ ruo mgbede nʼihi Sọl, na Jonatan nwa ya, na ndị Nna anyị, na ụlọ Izrel, nʼihi na ha dara site na mma agha.

Devid jụrụ nwokorobịa ahụ wetara ozi ahụ sị, “Ebee ka i si?” Ọ sịrị, “Abụ m nwa onye ọbịa, onye Amalek.”

Devid sịrị, “Olee otú ị si ghara ịtụ egwu iweli aka gị igbu onye Nna anyị tere mmanụ?” Devid kpọrọ otu nʼime ụmụ okorobịa ya sị, “Gaa, tigbuo ya.” O tigburu ya, ọ nwụọ. Devid gwaworị ya sị, “Ọbara gị dị gị nʼisi nke gị, nʼihi na ọnụ gị gbara ama megide gị mgbe i kwuru sị, ‘Egburu m onye Nna anyị tere mmanụ.’”

Lee Ka Ndị Dike Si Daa

Mgbe ahụ, Devid bụrụ abụ ákwá a maka Sọl na Jonatan nwa ya, nye iwu ka a kụziere ndị Juda abụ ákwá a, nke a na-akpọ Ùbe; e dere ya nʼAkwụkwọ Jasha: ^a “Ebube gị, Izrel, togbọ egburu egbu nʼelu ugwu gị. Lee ka ndị dike si daa! Akọla ya na Gat, ekwusakwala ya nʼokporoụzọ Ashkelọn, ka ụmụ ndị inyom Filistia ghara ịṅụrị ọṅụ, ka ụmụ ndị inyom ndị a na-ebighị ugwu ghara iti mkpu ọṅụ. Ugwu ukwu Gilboa, ka igirigi maọbụ mmiri ozuzo ghara ịdakwasị gị, ka ubi ghara ịmị mkpụrụ maka àjà. Nʼihi na nʼebe ahụ ka e merụrụ ọta ndị dike, ọta Sọl, nke a na-eteghịzi mmanụ. ^b Site nʼọbara ndị e gburu egbu, site nʼanụ ahụ ndị dike, ùbe Jonatan alaghachighị azụ, mma agha Sọl alọtaghị nʼaka efu. Sọl na Jonatan, ndị a hụrụ nʼanya ma jaa mma nʼoge ndụ ha, nʼọnwụ ha ekewaghị ha. Ha dị ọsọ karịa ugo, sie ike karịa ọdụm. Ụmụ ndị inyom Izrel, kwaanụ ákwá maka Sọl, onye yikwasịrị unu uwe uhie uhie na uwe mara mma, onye jiri ihe ịchọ mma ọlaedo chọọ uwe unu mma. Lee ka ndị dike si daa nʼetiti ọgbọ agha! Jonatan togbọ egburu egbu nʼelu ugwu gị. Obi m jọrọ njọ nʼihi gị, nwanne m, Jonatan; ị dị m ezigbo oké ọnụahịa. Ịhụnanya gị nʼebe m nọ dị ebube, karịa ịhụnanya ndị inyom. Lee ka ndị dike si daa! Ngwa agha alaala nʼiyi.”