2 Samyèl 1 FHB Father's Heart Bible™

1 ¹Apre Sòl mouri, David tounen soti nan batay kote li te kraze moun Amalèk yo, epi li rete de jou lavil Ziklag. ²Sou twazyèm jou a, yon nonm rive soti nan kan Sòl la, rad li chire, tèt li plen pousyè. Lè li rive bò kote David, li lage kò l atè, li bese tèt li jouk atè.

³David mande l: “Kote ou soti?” Li reponn: “Mwen chape kò m soti nan kan moun Izrayèl yo.”

⁴David mande: “Sa ki pase?” Li di: “Di m non.” Li reponn: “Moun yo kouri kite batay la. Anpil ladan yo tonbe, yo mouri. Sòl ak Jonatan, pitit gason l lan, mouri tou.”

⁵David mande jennonm ki te pote nouvèl la: “Ki jan ou fè konnen Sòl ak Jonatan, pitit gason l lan, mouri?”

⁶Jennonm lan reponn: “Mwen te rive konsa sou mòn Gilboa a, mwen wè Sòl apiye sou frenn li, cha lagè yo ak kavalye yo t'ap sere l deprè. ⁷Li vire tèt li, li wè m, li rele m. Mwen reponn: ‘Men mwen.’ ⁸Li mande m: ‘Ki moun ou ye?’ Mwen di l: ‘Mwen se yon moun Amalèk.’ ⁹Li di m: ‘Vin kanpe sou mwen, touye m; yon gwo doulè pran m, men mwen vivan toujou.’ ¹⁰Se konsa mwen kanpe sou li, mwen touye l, paske mwen te konnen li pa t'ap ka viv apre li fin tonbe a. Lèfini, mwen pran kouwòn ki te sou tèt li a ak braslè ki te nan bra l la, mwen pote yo isit la bay mèt mwen.”

¹¹Lè sa a, David kenbe rad ki te sou li, li chire yo. Tout moun ki te avè l yo fè menm bagay la tou. ¹²Yo pran lapenn, yo kriye, yo fè jèn jouk aswè pou Sòl, pou Jonatan, pitit gason l lan, pou pèp Papa nou an, ak pou tout fanmi Izrayèl la, paske yo te tonbe anba nepe.

¹³David mande jennonm ki te pote nouvèl la: “Kote ou soti?” Li reponn: “Mwen se pitit gason yon moun lòt nasyon, yon moun Amalèk.”

¹⁴David di l: “Ki jan ou fè pa t pè leve men ou pou touye moun Papa nou te chwazi a?” ¹⁵David rele yonn nan jenn gason l yo, li di l: “Ale, frape l touye l.” Nonm lan frape l, li mouri. ¹⁶David te di l: “San ou tonbe sou tèt pa ou, paske se bouch pa ou ki temwaye kont ou lè ou di: ‘Mwen touye moun Papa nou te chwazi a.’”

Ala Vanyan Gason yo Tonbe

¹⁷Lè sa a, David chante chante plenn sa a pou Sòl ak Jonatan, pitit gason l lan, ¹⁸epi li bay lòd pou yo moutre moun peyi Jida yo chante plenn sa a, yo rele Banza a; li ekri nan Liv Jachar la: ^a a v18 Liv Jachar la se te yon ansyen koleksyon powèm sou vanyan gason nan peyi Izrayèl ki pa rive jwenn jouk jounen jodi a. ¹⁹“Izrayèl, tout bèl pouvwa ou kouche mouri sou mòn ou yo. Ala vanyan gason yo tonbe! ²⁰Pa al rakonte sa lavil Gat, pa al gaye nouvèl la nan lari lavil Askalon, pou pitit fi moun Filisti yo pa fè fèt, pou pitit fi moun ki pa sikonsi yo pa leve men yo anlè ak kè kontan. ²¹Nou menm mòn Gilboa yo, se pou nou pa janm gen ni lawouze ni lapli, ni jaden ki bay rekòt pou ofrann. Paske se la yo te avili plak pwotèj vanyan gason yo, plak pwotèj Sòl la, ki p'ap janm pase luil ankò. ^b b v21 Sòlda yo te konn pase luil sou plak pwotèj an kui yo tout tan pou yo rete swa epi pare pou batay; yon plak pwotèj ki pa pase luil te gate, li pa t vo anyen. ²²Nan san moun yo te touye yo, nan chè vanyan gason yo, banza Jonatan an pa t janm fè bak, nepe Sòl la pa t janm tounen san l pa bwè san. ²³Sòl ak Jonatan, de moun yo te renmen anpil, de moun ki te gen anpil valè pandan yo t'ap viv, nan lanmò yo pa t separe. Yo te pi rapid pase malfini, yo te pi fò pase lyon. ²⁴Nou menm pitit fi Izrayèl yo, kriye pou Sòl, li menm ki te abiye nou ak bèl rad wouj swa, li menm ki te mete bèl bijou an lò sou rad nou. ²⁵Ala vanyan gason yo tonbe nan mitan batay la! Jonatan kouche mouri sou mòn ou yo. ²⁶Kè m ap fann pou ou, frè m, Jonatan; ou te gen anpil valè pou mwen. Renmen ou te gen pou mwen an te yon bèl bagay, li te pi fò pase renmen fanm. ²⁷Ala vanyan gason yo tonbe! Zam lagè yo fini nèt.”