2 Samuel 1

1 ¹Saul thikahaiwui thili, Davidna Amaleknaobingli yuihaida latunglaga Ziklagli zimiksho khani apamsanga. ²Kakathumathang, mi akha awui kachon serkhāka kala kuili ngaleila neoda Saulwui rāmrahwui eina rāhaowa. Davidli rāshunglaga ngaleili kui mashunzangda khoruma.

³Davidna ali hānga, "Na kachiwui eina rākhala?" "Ina Israelwui rāmrahwui eina yāmshoka," da ana ngahānkai.

⁴"Khi shokkahaikhala?" da Davidna hānga. "Ili hānglu." Ana hānga, "Mibing raiwui eina yāmhaowa. Kachungkha pitāda thihaowa. Saul eina anaomayara Jonathanla thihaira."

⁵Davidna pao hāngmi yaronnao chili hānga, "Saul eina anaomayara Jonathan thihaira kaji kathada nana theikhala?"

⁶Yaronnao china hānga, "Ina Gilboa Kaphungli latrāda leilakha, Saul awui kazeili ngazunglaga pamsai, kala siguigari eina sigui raimibingna ali kuinampama. ⁷Ana ngareiungda ili theilaga ili hoi. Ina, 'I hili leili' da ngahānkai. ⁸Ana ili, 'Na khipākhala?' da ngahāna. Ina ali, 'I Amaleknao akhana' da hānga. ⁹Ana ili hānga, 'Iwuitungli nganingda ili shaothatlu; angunna ili tukkhuihaira, kha I aruila kharinga leili.' ¹⁰A pitāhaowa manganingshapmara kaji ina theikahaiwui vang, chieina ina awuitungli nganingda ali shaothata. Chieina akuiwui kuihon eina apāngli sangkahai chāng chi khuilaga, hili ishameili khuirāna."

¹¹Chieina Davidna awui kachon yonkhuilaga serkhāka, kala ali ngasoda leikahai mi saikoranala chithāda sāhaowa. ¹²Athumna Saul, anaomayara Jonathan, ithumwui Avāwui mibing, kala Israelwui shimkhurwui vang chapngachāda chapa, kala ngazin eina tangda khuma; kaja athum raighai eina thihaira.

¹³Davidna pao hāngmi yaronnao chili hānga, "Na kachiwui eina rākhala?" Ana hānga, "I ramkazat Amaleknao akhawui naomayarana."

¹⁴Davidna hānga, "Ithumwui Avāwui thao neomi kahaili shaothat khavai napāng parkhavai kathada na mangacheethuwa?" ¹⁵Davidna awui yaronnaobingwui ngachaili akhali hokhuida hānga, "Vālaga ali shaothatlu." Chieina ana ali shaothatlaga a thihaowa. ¹⁶Davidna ali hānghaisai, "Nawui ashee nawui kuiwuitungli lei; kaja 'Ina ithumwui Avāwui thao neomi kahaili shaothata' da na hāngkahaiwui vang nakhalattawui khamorna nawuitungli shākhi mihaira."

Kapangabing Kathada Pitāhaokhala

¹⁷Chieina Davidna Saul eina anaomayara Jonathanwui vang chapchāt laa hi sai, ¹⁸kala Judahwui mibingli chapngachā laa hi tamchithei khavai kaso mi, chi Malā da hoi; chi Jasharwui Lairikli kapihaida lei: ^a a v18 Jasharwui Lairik chi kharethangwui Israelnaobingwui raikapinga khangatha̱bingwui laa kazipkhui akhana sai, chi hikhali mataisāda shimānhaira. ¹⁹"O Israel, nawui tekhamatei nawui kajujuili sathatta pitāhaira. Kapingabing kayākha pitāhaokhala! ²⁰Gathli chi mahānglakalu, Ashkelonwui chānreili chi mavaosanglakalu, maningakha Philistinewui naongalāva̱bingna ringphāra, ahui marimkashokbingwui naongalāva̱bingna sochikatra. ²¹O Gilboa Kaphungbing, nawuitungli ikra̱la kazingla matāranu, chigat mathei luibing maleiranu. Kaja chili kapingabingwui chāngvei sākhamānghaira, Saulwui chāngvei, thao eina mareoluithuwa. ^b b v21 Raikapingabingna athumwui sāhui chāngveibing matheng ngasaklak eina, rai khavai ranpingda leichingkhavai, atam kachida thao neomi; thao maneo chāngvei chi sāshimānhaoda khikhawui vangla mathāmana. ²²Sāthat kahaibingwui ashee eina, kapingabingwui asā eina, Jonathanwui malā mangalanhaomana, Saulwui raighai katho mavaida mahanungmana. ²³Saul eina Jonathan, mirinli leikashe kala yangkhangai, kathili anina makhalākmana. Anina khalāngli thākmei, kazingkha̱li pangmei. ²⁴Israelwui naongalāva̱bing, Saulwui vang chaplu, hungshi kahai kala khamathā sāri eina nathumli ngavaimi kahaia, nathumwui kachonli sināwui ngachān sāri sāsangmi kahaia. ²⁵Kapingabing raipamli kayākha pitāhaokhala! Jonathan nawui kajujuili sathatta pitāhaira. ²⁶Ina nawui vang wukkhananghaira, ichinā Jonathan; na iwui vang mathālak eina lumlak kahaina. Nawui ili leikashi chi sha̱naobingwui leikashili mataimeikhārda matakhakhaira. ²⁷Kapingabing kayākha pitāhaokhala! Raiwui khutlaibing shimānhaira."