Saul kala Anaomayarabing Raili Pitāhao
Gilboali rai khangarar chi makaphāna. Jonathan kala avāngarāli sāthathaowa, malā kakapbingna Saulli khamā za̱ngasaka, kala awui chāngvei phungkhamena ali mathatmana, chiwui vang ana akhalatta awui raighaili ngaronthathaowa. Philistinenaobingna awui phasā ngaveili hokthanghai; Jabesh-gileadwui mibingna chi akhuitā.
31 1Philistinenaobingna Israelli rai ngarara; Israelwui mibing athumwui eina yāmhailaga Gilboa Kaphungli thisanghaowa. 2Philistinenaobingna Saul eina anaomayarabingli ngaphankhuida, Philistinenaobingna Saulwui naomayara Jonathan, Abinadab, kala Malchishuali sāthatserhaowa. 3Rai chi Saulwuitungli ritlak eina shirena. Malā kasingabingna ali theihaida, athumna ali marlak eina khamā za̱ngasaka. 4Chieina Saulna awui raisāri phungme chili hānga, "Nawui raighai chi shokthokta, ili phai tothahaolu; mangahaida chi ahui marimkashokbing hina rāraga, ili tothatta, ili rekharekra." Kha awui raisāri phungmena ngacheenahaida mamayāthuwa. Chieina Saulna awui raighai khuilaga chili khalatta ngaronthathaowa. 5Awui raisāri phungmena Saul thikahai chi theihaida, ala akhalatta raighai eina ngaronthaida ali ngasoda thihaowa. 6Chithāda Saulla, anaomayara kathumla, awui raisāri phungmela, kala awui mibing saikorala chithang ngasoda thihaowa.
7Tampākwui lākhavāk kala Jordanwui lākhavāk khalei Israelwui mibingna, raimi yāmkahai kala Saulla anaomayarabingla thiser kahai chi theihaida, athumwui keinung chihohailaga yāmserhaowa. Kala Philistinenaobingna rālaga chili apamhaowa. 8Akhama kathā Philistinenaobingna kathibingwui ot akhangapon khavai rāda, Saulla anaomayara kathumla Gilboa Kaphungli thiserhaisai kaji theihaowa. 9Athumna akui rangkhui, awui raisāri raikhui, kala athumwui meoma̱bingwui shim kala mibingwui ngachaili chi shākhavai Philistia ngalei saikorali paome shivata. 10Athumna awui raisāri Ashtorethwui shimli leihairasai, kala awui angun Beth-shanwui raipanli hokthanghai. a a v10 Ashtoreth chi Canaanwui sha̱ varena; Saulwui raisāri ava̱wui shimli leihai chi, Philistinenaobingna rai yuikahaiwui masot athumwui varebingli mi khavaiwui shongfana.
11Jabesh-gileadli khaleibingna Philistinenaobingna Saulli sākahai chi kashā eina, 12athumwui rai khamarākabing saikorana ngayā pongda zatlaga, Beth-shanwui raipanwui eina Saulwui angun kala anaomayarabingwui angun akhuilaga, aram Jabeshli khuivai, kala chili mei eina riktāhaowa. 13Athumna athumwui ara̱kui khuilaga, Jabeshli khalei tamarisk chiwui azingli chifahaida, zimiksho shinithang kakhum eina pama.
