1 Samuel 30

30 ¹Davidna kala awui mibing kakathumathang Ziklagli vāshunga; Amaleknaobingna Negebli kala Ziklagli ngaponzatlaga, ngararda mei eina riktāhaowa, ²kala apam chili khalei sha̱nao kala saikorali, kharei kateo tukvāhaowa; akhala mashaothatmana, kha athumli kashamhailaga awui aramshong tāmamāna. ³Davidna kala awui mibing keinung chili vāshunga, chi mei eina riktāhaowa, kala preiva̱ ngarā, naomayara, kala naongalāva̱ ngarā tukvāhaowa. ⁴Chapkhavai athumli yāng maleiranglakha eina tangda, Davidna kala awui mibingna akhon panglāk eina chapa. ⁵Davidwui preiva̱ khanila tukvāhaowa; ani Jezreelwui Ahino-am eina Carmelwui Nabalwui rameiva̱ Abigailna. ⁶Davidna chotchanglak kachiva̱ sāhaowa, kaja mibingna ali lunggui eina horthat khavai hānga; kachiva̱na awui naomayara kala naongalāva̱ ngarāwui vang ning khāngasakhaowa. Kha ana ithumwui Avāli akhalatta pang ngasaka.

⁷Davidna Ahimelechwui naomayara pāngmon Abiatharli hānga, "Ephod chi iwuili khuirālu." Chieina Abiatharna Davidli ephod khuirai.

⁸Davidna ithumwui Avāli ngahāna, "Hi ngaponkazābingli ina kharomra̱khala? Athumli ina ngaphankhuira̱khala?" "Kharomlu," da ana hānga. "Nana kachangkhata athumli ngaphankhuira kala saikorali kankhuira."

⁹Chieina Davidna kala awui mi shātharuk Besor tampākli vai, apam chili kaikhana pamsanga. ¹⁰Davidna mi shāmati ngasoda kharomvai; kha shākhanina, Besor tampāk kānkhavai chothaithukasā, apam chili pamsanga. ¹¹Athumna luili Egyptnao akha theida, Davidli khuirai, kala ali kashakazā kala tara̱ khuimi. ¹²Athumna ali khaorāthei khamui ahāng akha kala drakhātheikao mazān khani khuimi. Ana shai, kala awui yāng latunga, kaja a zimiksho kathum kala ngayā kathumthang kashakazā lah tara̱ mazāmana. ¹³Davidna ngahāna, "Na khipākhala? Na kali eina rākhala?" Ana hānga, "I Egyptnao yarona, Amaleknao akhawui raona. I kazā kahaiwui vang zimiksho kathum mangāli iwui akhavāna ili horhaira.

¹⁴Ithumna Cherethnaobingwui Negebli, Judahwui leiret, kala Calebwui Negebli ngaponzatlaga, Ziklagli mei eina riktāhaowa."

¹⁵Davidna ngahāna, "Hi ngaponkazā khumli nana ili thānvārakhala?" Ana hānga, "Varewui mingli mingzailaga, nana ili mashaothatmara lah iwui akhavāli mahanmira da shākhi sālu; chieina ina nali athumli thānvāra."

¹⁶Chieina Egyptnaopa Davidli thānvai; kala yanglu, athumna ngalei hupta phorda pamda, Philistine kala Judea ngaleiwui eina khuikhaung ngaponkakhui ot kachungkhawui vang phazāda, ra̱mangda, kala mathānthup eina ringkaphā sāda leisai. ¹⁷Davidna athumli ngazinshong eina akhama kathā ngazin eina tangda ngarara; uttungli tongda yāmvā yaronnao mi shāmati maningla yāmshokhaowa. ¹⁸Amaleknaobingna khuiunga saikora Davidna akhuiluishita, kala apreiva̱ khani chi kankhui. ¹⁹Kateo, kharei, naomayara, naongalāva̱, ngaponkakhui, lah khangatei khuiunga akhanidala mashimānmana; saikora Davidna akhuiluishita. ²⁰Davidna yao ashangva̱ kala sei saikora khuiya; awui mibingna chi sha̱kei khangateiwui mangāli thānzatta, "Hi Davidwui ngaponkakhuina" da hānga.

²¹Davidna Besor tampākli haimihai kahai, ali ashurung matheirar kaji vānlak kahai mi shākhani chili vāshunga. Athumna David kala awui mibingli samphang khavai shok ngararda vai; ana nganaimeida athumli shālam sai. ²²Kha Davidwui thi kashurabingwui alungli khalei makaphā makānkhanā mi saikorana hānga, "Athum ithumli ngasoda mavaimana kaji, ithumna akhuiluishita ngaponkakhui chi athumli mamimara; mi kachiva̱wui apreiva̱ kala anaongarā maningla thānda vāhaora."

²³Kha Davidna hānga, "Ichināngarā, ithumwui Avāna ithumli mihai chi eina hikathā masaalu. Ana ithumli phārihaida, ithumli rāngararbing chi ithumwui pāngli horsangmihaira. ²⁴Hi tuili khipāna nathumli nganākhala? Raili khavā a kala ot ngasoda kapama chi khayar akhathāda ngayarra." ²⁵Chithang eina thuida, Davidna chi Israelwui vang shiyan kala shiyan-chikan sāda haimihai, kala chi aja eina tangda lei.

²⁶Davidna Ziklagli vākashung eina, ngaponkakhui chi awui ngasotnaobing Judahwui khararnaobingli chihoda hānga, "Hi nathumwui vang, ithumwui Avāwui yangkashebingwui ngaponkakhui eina lemmet akhana." ²⁷Ana chi Bethelli khaleibingli, Negebwui Ramothli khaleibingli, kala Jattirli khaleibingli chihovā; ²⁸Aroerli khaleibingli, Siphmothli khaleibingli, kala Eshtemoali khaleibingli; ²⁹Rachalli khaleibingli, Jerahmeelnaobingwui keinungbingli khaleibingli, kala Kennaobingwui keinungbingli khaleibingli; ³⁰Hormahli khaleibingli, Bor-ashanli khaleibingli, kala Athachli khaleibingli; ³¹kala Hebronli khaleibingli, David kala awui mibingna zatlakha apam saikorali khaleibingli chihovā.