Avāna Davidli raipamwui eina vāngasaka
Philistine-wui raanngalānghaina David-li athumwui thanglāi zanglai da mangshang, raan chāngli ana awui kathui ngaron-wui ningli saphāi khaungasa ungthui athumli ngarālāhaira da ningsha. Achish-na ava kachida ningshing sha, kaphāhai hangsha ava shimli nganashang zatzai. David-na hangthui, kala ithumwui Avāna ava Israel-li ngarālāhaikhavai-tanga ngarung lei.
29 1Chitharan Philistinenaobingna athumwui raimi saikora Apheili kazipkhui, kha Israelva Jezreelli khalei ura̱ok pheili rāmrah vasāpama. 2Philistinewui wungnaobingna shāshā kala thingthing eina ngasovai tharan, David kala awui mibingna Achishla ngasoda khanukshong ngasovai.
3Philistinewui raithānabingna ngahāna, "Hebrewnaobingna hili khi sākhala?" Achishna athumli hānga, "Hi David, Israelwui awunga Saulwui raona. Ana ili zimiksho hibing, chi maningmana, zingkum hibing ngasopamsai, kala ana ili rāyāmsang thang eina thuida aja eina tangda ali khayon khikha matheimana."
4Kha Philistinewui raithānabingna ali malungvāthaowa, kala hānga, "Mipā chi na ali kamiwui pamli chihounghaolu. Ana ithumla ngasoda raipamli masovaipaimana, maningakha raipanlungli ithumli thuingararpaishina. Awui akhavāwui ngahānkhangai latung khavai, ithumwui khalattawui mibingwui kui eina phāmei chi khikha leikhala? 5Hi David chi, athumna pheichak eina laa sālaga, 'Saulna thingkhali sāthata, kha Davidna thingtharāli sāthata,' da kaphok chi maningmala?"
6Chieina Achishna Davidli hokhuida hānga, "PROHO Varewui ming singda kahāngna, na ningkathara mina, kala na ili ngasoda rāmrahli ngasovai ngasora chi ina ringphāra. Na ili rākharā thang eina thuida aja eina tangda nali khayon khikha matheimana. Kha wungnaobingna nali mamayāmana. 7Philistinewui wungnaobingli malungvāt masā khavai, ara latungda chingri eina ungulu."
8Kha Davidna hānga, "Ina khi sākhala? Na ili rākharā thang eina thuida aja eina tangda nawui raoli khikha khayon theihaira, chieina iwui amei awungawui yangkashebingli ina rai ngararvai masārakhala?"
9Achishna Davidli hānga, "Ili na Varewui kazingrao akha thāda kaphā kaji ina thei. Kha Philistinewui raithānabingna, 'Ana ithumla ngasoda raipamli mangasopipaimana,' da hānga. 10Chiwui vang eina na kala na ngasoda kharā nawui akhavāwui raobing, ngathorthakva̱ ngakarthuilu; ngathorthak thuida kazing kathang tharan zathaolu."
11Chithāda David kala awui mibingna Philistine ngaleili latung khavai ngathorthak ngakarthuilaga zata, kha Philistinenaobingna Jezreelli ngasovai.
