1 Samuẹli 29

29 ¹Àwọn Filistini sì kó gbogbo ọmọ ogun wọn jọ sí Afeki, nígbà tí àwọn ọmọ Israẹli pa àgọ́ wọn sí ẹ̀bá orísun omi ní Jesreeli. ²Bí àwọn alákòóso Filistini ti ń jáde lọ ní ọ̀rọ̀ọ̀rún àti ní ẹgbẹẹgbẹ̀rún, Dafidi àti àwọn ọmọkùnrin rẹ̀ ń bọ̀ lẹ́yìn pẹ̀lú Akiṣi.

³Àwọn balógun Filistini sì béèrè pé, “Kí ni àwọn Heberu wọ̀nyí ń ṣe níhìn-ín?” Akiṣi dá wọn lóhùn pé, “Èyí ni Dafidi, ìránṣẹ́ Saulu ọba Israẹli. Ó ti wà pẹ̀lú mi ní ọjọ́ wọ̀nyí—bẹ́ẹ̀ kọ́, ní ọdún wọ̀nyí—láti ọjọ́ tí ó ti sá tọ̀ mí wá títí di ìsinsìnyí, èmi kò sì rí àṣìṣe kankan lọ́dọ̀ rẹ̀.”

⁴Ṣùgbọ́n inú bí àwọn balógun Filistini sí i, wọ́n sì wí pé, “Rán ọkùnrin náà padà sí ibi tí o fi fún un. Kò gbọdọ̀ bá wa lọ sójú ogun, kí ó má baà yí padà sí wa nígbà ìjà. Pẹ̀lú kí ni ó ṣe lè fi tún rí ojúrere ọ̀gá rẹ̀ dáradára bí kì í ṣe pẹ̀lú orí àwọn ọkùnrin wa fúnra wa? ⁵Ṣé èyí kọ́ ni Dafidi tí wọ́n ń kọrin nípa rẹ̀ nínú ijó wọn pé: ‘Saulu pa ẹgbẹẹgbẹ̀rún rẹ̀, Dafidi sì pa ẹgbẹẹgbẹ̀rún mẹ́wàá rẹ̀’?”

⁶Nígbà náà ni Akiṣi pe Dafidi, ó sì wí pé, “Bí Olúwa ti wà láàyè, olóòtítọ́ ni ìwọ, inú mi yóò sì dùn láti jẹ́ kí o máa bá mi jáde, kí o sì máa bá mi wọlé nínú àgọ́. Èmi kò rí àṣìṣe kankan lọ́dọ̀ rẹ láti ọjọ́ tí o ti tọ̀ mí wá títí di ìsinsìnyí. Ṣùgbọ́n àwọn alákòóso kò fọwọ́ sí ọ. ⁷Nísinsìnyí, yí padà kí o sì máa lọ ní àlàáfíà, kí o má baà ṣe ohunkóhun tí yóò bí àwọn alákòóso Filistini nínú.”

⁸Dafidi sì tako rẹ̀ pé, “Ṣùgbọ́n kí ni mo ṣe? Kí ni ẹ rí lọ́dọ̀ ìránṣẹ́ yín láti ìgbà tí mo ti tọ̀ yín wá títí di ìsinsìnyí, tí èmi kò fi gbọdọ̀ lọ bá àwọn ọ̀tá olúwa mi ọba jà?”

⁹Akiṣi dá Dafidi lóhùn pé, “Mo mọ̀ pé lọ́dọ̀ mi, o dára bí angẹli Ọlọ́run. Síbẹ̀, àwọn balógun Filistini ti wí pé, ‘Kò gbọdọ̀ bá wa gòkè lọ sójú ogun.’ ¹⁰Nítorí náà, dìde kùtùkùtù òwúrọ̀, ìwọ àti àwọn ìránṣẹ́ ọ̀gá rẹ tí wọ́n bá ọ wá; dìde kùtùkùtù, kí o sì máa lọ nígbà tí ilẹ̀ bá mọ́.”

¹¹Nítorí náà, Dafidi àti àwọn ọmọkùnrin rẹ̀ dìde kùtùkùtù láti padà lọ sí ilẹ̀ Filistia ní àfẹ̀mọ́júmọ́, nígbà tí àwọn Filistini gòkè lọ sí Jesreeli.