1 ሳሙኤል 29

29 ¹ፍልስጥኤማውያን ሰራዊታቸውን ሁሉ በአፌቅ ሰበሰቡ፤ እስራኤላውያን ግን በኢይዝራኤል ባለው ምንጭ አጠገብ ሰፈሩ። ²የፍልስጥኤም ገዢዎች በመቶና በሺ እየተሰለፉ ሲወጡ፣ ዳዊትና ሰዎቹ ከአኪስ ጋራ በኋለኛው ተሰለፉ።

³የፍልስጥኤም አዛዦችም፣ “እነዚህ ዕብራውያን እዚህ ምን ያደርጋሉ?” ብለው ጠየቁ። አኪስም፣ “ይህ የእስራኤል ንጉሥ የሳኦል አገልጋይ ዳዊት ነው። እነዚህን ቀናት — አይደለም፣ እነዚህን ዓመታት — ከእኔ ጋራ ኖሯል፤ ወደ እኔ ከኰበለለበት ቀን ጀምሮ እስከ ዛሬ ድረስ ምንም ነውር አላገኘሁበትም” አላቸው።

⁴የፍልስጥኤም አዛዦች ግን ተቈጡበት፤ እንዲህም አሉት፦ “ይህን ሰው ወደ ሰጠኸው ስፍራ መልሰው። ከእኛ ጋራ ወደ ጦርነት አይውረድ፤ አለዚያ በውጊያ ጊዜ በእኛ ላይ ሊዞር ይችላል። የጌታውን ሞገስ ለመመለስ ከገዛ ሰዎቻችን ራሶች የሚበልጥ ምን ያገኛል? ⁵በጭፈራቸው፣ ‘ሳኦል ሺዎቹን፣ ዳዊት ግን እልፍ አእላፋቱን መታ’ ብለው የዘመሩለት ይህ ዳዊት አይደለምን?”

⁶ስለዚህ አኪስ ዳዊትን ጠርቶ እንዲህ አለው፦ “እግዚአብሔር ሕያው እንደ ሆነ፣ አንተ ታማኝ ነህ፤ በሰፈሩ ውስጥ ከእኔ ጋራ ስትወጣና ስትገባ ማየት ደስ ይለኛል። ወደ እኔ ከመጣህበት ቀን ጀምሮ እስከ ዛሬ ድረስ ምንም ነውር አላገኘሁብህም። ገዢዎቹ ግን አይወዱህም። ⁷አሁን ተመለስ፤ የፍልስጥኤምንም ገዢዎች የሚያስከፋ ነገር እንዳታደርግ በሰላም ሂድ።”

⁸ዳዊትም፣ “ታዲያ ምን አደረግሁ?” ብሎ ተከራከረ፤ “ከጌታዬ ከንጉሡ ጠላቶች ጋራ ለመዋጋት እንዳልሄድ፣ ወደ አንተ ከመጣሁበት ቀን ጀምሮ እስከ ዛሬ ድረስ በአገልጋይህ ላይ ያገኘኸው ምንድን ነው?” አለ።

⁹አኪስም ዳዊትን እንዲህ አለው፦ “በእኔ ዘንድ እንደ እግዚአብሔር መልአክ መልካም እንደ ሆንህ ዐውቃለሁ። ይሁን እንጂ የፍልስጥኤም አዛዦች፣ ‘ከእኛ ጋራ ወደ ጦርነት አይውጣ’ ብለዋል። ¹⁰ስለዚህ አንተና ከአንተ ጋራ የመጡት የጌታህ አገልጋዮች ማልዳችሁ ተነሡ፤ ማልዳችሁ ተነሥታችሁ በነጋ ጊዜ ሂዱ።”

¹¹ስለዚህ ዳዊትና ሰዎቹ ማልደው ተነሥተው በማለዳ ወደ ፍልስጥኤም ምድር ተመለሱ፤ ፍልስጥኤማውያን ግን ወደ ኢይዝራኤል ወጡ።