1 ሳሙኤል 30

30 ¹ዳዊትና ሰዎቹ በሦስተኛው ቀን ጺቅላግ ደረሱ፤ አማሌቃውያን ኔጌብንና ጺቅላግን ወርረው ነበር፤ ጺቅላግንም አጥቅተው በእሳት አቃጠሉት፤ ²በዚያ የነበሩትን ሴቶችና ታናሽ ታላቁን ሁሉ ማረኩ፤ ማንንም አልገደሉም፤ ነገር ግን እያነዱ ወስደው በመንገዳቸው ሄዱ። ³ዳዊትና ሰዎቹ ወደ ከተማዪቱ ሲደርሱ በእሳት ተቃጥላ ነበር፤ ሚስቶቻቸውም ወንዶችና ሴቶች ልጆቻቸውም ተማርከው ነበር። ⁴ዳዊትና ከእርሱ ጋር የነበሩት ሕዝብ የሚያለቅሱበት ኀይል እስኪያጡ ድረስ ድምፃቸውን ከፍ አድርገው አለቀሱ። ⁵የዳዊት ሁለቱ ሚስቶች፣ የኢይዝራኤሏ አኪኖዓምና የቀርሜሎሱ የናባል መበለት አቢግያ ደግሞ ተማርከው ነበር። ⁶ሕዝቡ ሊወግሩት ይነጋገሩ ስለ ነበር ዳዊት እጅግ ተጨነቀ፤ እያንዳንዱ ስለ ወንዶችና ሴቶች ልጆቹ መራራ ኀዘን ነበረበትና። ዳዊት ግን በአባታችን ራሱን አበረታ።

⁷ዳዊትም የአኪሜሌክን ልጅ ካህኑን አብያታርን፣ “ኤፉዱን አምጣልኝ” አለው። አብያታርም ኤፉዱን ወደ ዳዊት አመጣ።

⁸ዳዊትም አባታችንን፣ “እነዚህን ወራሪዎች ላሳድዳቸውን? እደርስባቸዋለሁን?” ብሎ ጠየቀ። እርሱም፣ “አሳድዳቸው፤ በእርግጥ ትደርስባቸዋለህ፤ ሁሉንም ታድናለህ” አለው።

⁹ስለዚህ ዳዊትና ከእርሱ ጋር የነበሩት ስድስት መቶ ሰዎች ወደ ቤሶር ሸለቆ መጡ፤ አንዳንዶችም በዚያ ቀሩ። ¹⁰ዳዊት ከአራት መቶ ሰዎች ጋር አሳደደ፤ ሁለት መቶዎች ግን ቤሶርን ሸለቆ ለማቋረጥ ከመድከማቸው የተነሣ ወደ ኋላ ቀሩ። ¹¹በሜዳ ላይ አንድ ግብፃዊ አግኝተው ወደ ዳዊት አመጡት፤ እንጀራና ውሃ ሰጡት። ¹²ከበለስ ጥፍጥፍ አንድ ቍራጭ፣ ሁለት የዘቢብ ዘለላም ሰጡት። በልቶም ኀይሉ ተመለሰለት፤ ሦስት ቀንና ሦስት ሌሊት እንጀራ አልበላም፤ ውሃም አልጠጣም ነበርና። ¹³ዳዊትም፣ “አንተ የማን ነህ? ከወዴትስ ነህ?” ብሎ ጠየቀው። እርሱም እንዲህ አለ፤ “እኔ ግብፃዊ ጎበዝ ነኝ፤ የአንድ አማሌቃዊ ባሪያ ነኝ። ከሦስት ቀን በፊት በታመምሁ ጊዜ ጌታዬ ጥሎኝ ሄደ።

¹⁴የኪሬታውያንን ኔጌብ፣ የይሁዳን አገር፣ የካሌብንም ኔጌብ ወረርን፤ ጺቅላግንም በእሳት አቃጠልን።”

¹⁵ዳዊትም፣ “ወደዚህ ወራሪ ጭፍራ ታወርደኛለህን?” አለው። እርሱም፣ “እንዳትገድለኝ፣ በጌታዬም እጅ አሳልፈህ እንዳትሰጠኝ በእግዚአብሔር ማልልኝ፤ እኔም ወደ እነርሱ አወርድሃለሁ” አለ።

¹⁶ግብፃዊውም ዳዊትን አወረደው፤ እነሆም፣ ከፍልስጥኤምና ከይሁዳ አገር በወሰዱት እጅግ ብዙ ምርኮ እየተደሰቱ፣ እየበሉና እየጠጡ በምድሪቱ ሁሉ ተበትነው ነበር። ¹⁷ዳዊትም ከመሸ ጀምሮ እስከ ማግስቱ ምሽት ድረስ መታቸው፤ በግመሎች ተቀምጠው ካመለጡ አራት መቶ ጎበዛዝት በቀር ማንም አላመለጠም። ¹⁸ዳዊትም አማሌቃውያን የወሰዱትን ሁሉ መለሰ፤ ሁለቱንም ሚስቶቹን አዳነ። ¹⁹ታናሽም ታላቅም፣ ወንዶችም ሴቶችም ልጆች፣ ምርኮም፣ ከወሰዱትም ሌላ ማንኛውም ነገር ምንም አልጎደለም፤ ዳዊት ሁሉን መልሶ አመጣ። ²⁰ዳዊትም በጎቹንና ከብቶቹን ሁሉ ወሰደ፤ ሰዎቹም ከሌላው እንስሳ ፊት እያነዱ፣ “ይህ የዳዊት ምርኮ ነው” አሉ።

²¹ዳዊትም ሊከተሉት ደክሟቸው በቤሶር ሸለቆ ቀርተው ወደ ነበሩት ወደ ሁለት መቶ ሰዎች ደረሰ። እነርሱም ዳዊትንና ከእርሱ ጋር የነበሩትን ሕዝብ ሊቀበሉ ወጡ፤ እርሱም እየቀረበ ሰላምታ ሰጣቸው። ²²ነገር ግን ከዳዊት ተከታዮች መካከል ክፉዎችና ምናምንቴዎች የሆኑ ሁሉ፣ “ከእኛ ጋር ስላልሄዱ ከመለስነው ምርኮ ምንም አንሰጣቸውም፤ ለእያንዳንዱ ሚስቱንና ልጆቹን ብቻ ይዞ ይሂድ” አሉ።

²³ዳዊት ግን እንዲህ አለ፤ “ወንድሞቼ ሆይ፣ አባታችን በሰጠን ነገር እንዲህ አታድርጉ። እርሱ ጠብቆናል፤ የመጡብንንም ወራሪዎች በእጃችን አሳልፎ ሰጥቶናል። ²⁴በዚህ ነገር ማን ይሰማችኋል? ወደ ውጊያ የሚወርደውና ከዕቃው ዘንድ የሚቀረው እኩል ይካፈላሉ።” ²⁵ከዚያ ቀን ጀምሮ ዳዊት ይህን ለእስራኤል ሥርዐትና ፍርድ አድርጎ አጸና፤ እስከ ዛሬም ድረስ ጸንቶ ይኖራል።

²⁶ዳዊትም ወደ ጺቅላግ በደረሰ ጊዜ ለወዳጆቹ ለይሁዳ ሽማግሌዎች ከምርኮው ላከ፤ “እነሆ፣ ከአባታችን ጠላቶች ምርኮ ለእናንተ ስጦታ” አለ። ²⁷በቤቴል፣ በኔጌብ ራሞት፣ በኢያቲርም ላሉት ላከ፤ ²⁸በአሮዔር፣ በሲፍሞት፣ በኤሽታሞዕ ላሉት፤ ²⁹በራካል፣ በኢያራሕሜላውያን ከተሞችና በቄናውያን ከተሞች ላሉት፤ ³⁰በሖርማ፣ በቦር አሳን፣ በአታክ ላሉት፤ ³¹በኬብሮንና ዳዊትና ሰዎቹ ይዘዋወሩባቸው በነበሩት ስፍራዎች ሁሉ ላሉት ላከ።