1 ሳሙኤል 31

31 ¹ፍልስጥኤማውያን እስራኤልን ተዋጉ፤ የእስራኤልም ሰዎች ከፊታቸው ሸሹ፣ በጊልቦዓ ተራራም ላይ ተገድለው ወደቁ። ²ፍልስጥኤማውያን ሳኦልንና ልጆቹን ተከታትለው ደረሱባቸው፤ የሳኦልንም ልጆች ዮናታንን፣ አቢናዳብንና መልኪ ሱዓን ገደሉ። ³ጦርነቱም በሳኦል ላይ እጅግ ጸና፤ ቀስተኞችም አገኙት፣ በእነርሱም ክፉኛ ቈሰለ። ⁴ሳኦልም ጋሻ ጠባቂውን፣ “ሰይፍህን መዝዘህ ውጋኝ፤ ያለዚያ እነዚህ ያልተገረዙ ሰዎች መጥተው ወግተው ያሠቃዩኛል” አለው። ጋሻ ጠባቂው ግን እጅግ ስለ ፈራ እንቢ አለ። ስለዚህ ሳኦል ራሱ ሰይፉን ወስዶ በላዩ ወደቀ። ⁵ጋሻ ጠባቂውም ሳኦል እንደ ሞተ ባየ ጊዜ፣ እርሱ ደግሞ በሰይፉ ላይ ወድቆ ከእርሱ ጋር ሞተ። ⁶ስለዚህ ሳኦል በዚያ ቀን ከሦስቱ ልጆቹ፣ ከጋሻ ጠባቂውና ከሰዎቹ ሁሉ ጋር ሞተ።

⁷በሸለቆው ማዶና በዮርዳኖስ ማዶ የነበሩ የእስራኤል ሰዎች የእስራኤል ሰራዊት እንደ ሸሸ፣ ሳኦልና ልጆቹም እንደ ሞቱ ባዩ ጊዜ፣ ከተሞቻቸውን ትተው ሸሹ። ፍልስጥኤማውያንም መጥተው በእነርሱ ውስጥ ሰፈሩ። ⁸በማግስቱ ፍልስጥኤማውያን የሞቱትን ሊዘርፉ መጡ፤ ሳኦልንና ሦስቱን ልጆቹን በጊልቦዓ ተራራ ላይ ወድቀው አገኙአቸው። ⁹ራሱንም ቈረጡ፤ የጦር ዕቃውንም ገፈፉ፤ በጣዖቶቻቸው ቤተ መቅደስና በሕዝቡ መካከል ያወሩ ዘንድ በፍልስጥኤም አገር ሁሉ መልእክተኞችን ላኩ። ¹⁰የጦር ዕቃውንም በአስታሮት ቤተ መቅደስ አኖሩ፤ ሬሳውንም በቤትሳን ቅጥር ላይ ሰቀሉ። ^a a v10 አስታሮት የከነዓናውያን ሴት አምላክ ነበረች፤ የሳኦልን የጦር ዕቃ በቤተ መቅደሷ ማኖራቸው ፍልስጥኤማውያን ድሉን ለአማልክቶቻቸው የሰጡበት መንገድ ነበር።

¹¹የያቤስ ገለዓድ ነዋሪዎች ፍልስጥኤማውያን በሳኦል ላይ ያደረጉትን በሰሙ ጊዜ፣ ¹²ተዋጊዎቻቸው ሁሉ ሌሊቱን ሙሉ ተጓዙ፤ የሳኦልንና የልጆቹን ሬሳ ከቤትሳን ቅጥር አወረዱ፤ ወደ ያቤስ አምጥተውም በዚያ አቃጠሏቸው። ¹³ዐጥንታቸውንም ወስደው በያቤስ ባለው የኤስል ዛፍ ሥር ቀበሩ፤ ሰባት ቀንም ጾሙ።