Kibutyo Saulo ak Weeriikyik eng' Lugeet
Ki ya pooryeet eng' tulweetap Gilboa. Ki par Jonathan ak tupchekyik, ak ki tyegaat mwoogik Saulo ak kiguoten miising', ak koeesyo chiito ne ipchin kariikyik kome ineendet, nooto ko ki nam rotwennyi ak kobutyo eng' ineendet. Ki riib Philistiik poortanyi eng' loondotap nganaseet; ak koip murenigap Jabes-gilead poortanyi.
31 1Kobaregei Philistiik ak Israel; ki mwei murenigap Israel ak kobutyo kobek eng' tulweetap Gilboa. 2Ki tyegaat Philistiik Saulo ak weeriikyik, ak ki par Philistiik Jonathan, Abinadab, ak Malkisua, weeriigap Saulo. 3Kinyigiisyi lugeet Saulo miising'. Ki konyoor mwoogik ineendet, ak ki kiguoten miising'. 4Ki leenji Saulo chiito ne ipchin kariikyik, “Itut rotweng'ung' ak ikityecha, amu matun kobwa murenichu che ma kimuratan, kokityecha, ak koausaus.” Ago ki eesyo chiito ne ipchin kariikyik, amu ki iywei. Nooto ko ki nam Saulo rotwennyi ak kobutyo eng' ineendet. 5Kingo ker chiito ne ipchin kariikyik kole kagome Saulo, ki butyo agine ineendet eng' rotwennyi ak kome kobooto ineendet. 6Eng' peetuunooto ko kome Saulo, kobooto weeriikyik somok, chiito ne ipchin kariikyik, ak piikyik tugul.
7Kingo ker murenigap Israel che mi komoswegap atebweet ak komoswegap Jordan kole ki mwei lugeetap Israel, ak ki kagobek Saulo ak weeriikyik, ki pagaakta nganasookwak ak komwei. Ki pwa Philistiik ak komeny eng' nganasochooto. 8Eng' peetuut ne ki isubu, ki pwa Philistiik si koreek piik che pek, ak ki konyoor Saulo ak weeriikyik somok ko kobutyo eng' tulweetap Gilboa. 9Ki til metinnyi, ak koreegune kariikyik, ak koyookto piik koba emetap Philistia si komwa ng'olyoondonooto eng' kootap kanamonikwak ak among piik. 10Ki inde kariikyik eng' hekaluutap Astarot, ak kiratyi muustonyi eng' irimeetap Beth-shean. a a v10 Astarot ko ki chepyosetap kamuktaik che po Kanaan; indoetap kariikgap Saulo eng' kootap ineendet ko ki ooreet ne kigoochinee Philistiik kamuktaikwak loiboeet.
11Kingo kas piik che menyei Jabes-gilead kiit ne ki yai Philistiik eng' Saulo, 12ki togosta murenik tugul che po lugeet kemout komugul, ak koip muustap Saulo ak muuswegap weeriikyik eng' irimeetap Beth-shean, ak koip koba Jabes, ak kobeel icheek olooto. 13Ki ip kawekyik, ak ketupchi icheek eng' keetit taman eng' Jabes, ak korugutkei peetuusyek tisap.